《哈佛台語筆記》

 | | | 轉寄

聖誕節ê 哈佛校園

作者 李勤岸 2007.07.01

東亞語文系ê行政助理Frankie送一張電子批hō͘ 系裡所有ê 同仁，感謝哈佛大恩大德，tī 聖誕節前一工到新年初一beh kā 學校關起來。伊講若會當加關一、二工仔m̄知偌好。

聽講哈佛規年透冬是無teh 關ê ，這是哈佛ê 傳統。 胡老師講有一冬，雪落足大，公車、地下鐵攏總停駛啊，政府機關kap 公立學校攏歇睏，伊駛車拚來上課，路裡無人無車，雪積kah 真厚，害伊駛kah tshū kah 東倒西歪，趕到教室，學生已經齊到，teh 等老師上課。

教師手冊有真清楚交代：無管天氣按怎，學校是bē 關ê ，老師愛家己發落上課ê 代誌。我想講若是天氣真正bái kah 彼號款，我一定無beh hō͘ 學生拚命冒險來上課，家己嘛無愛來上課，beh kā 學生講萬一天氣bái kah 公車無駛，咱一定停課，以後才tshuē 時間來補。不過，我一直攏bē 記得kā in 交待。佳哉今年天氣特別好，聖誕節到啊，攏無大雪。

聖誕節無落雪，敢有sîng 聖誕節？我 m̄ 捌tī 寒帶過聖誕節，m̄ 知影。Tī Tsicago 搬去舊金山ê 阿肅姊講伊頭一年ê 聖誕節，無雪，氣氛規個走精去，害伊傷心流目屎。

我刁工tī 聖誕節彼工，開車來學校，看關起來ê 哈佛是生做按怎？ 路裡無甚物車，阿靈鎮到劍橋鎮，假那空城 。公車久久啊才有一班，攏是làu 空tsuā 。本底上下班時間塞車塞kah tsat-thóng-thóng ê 這條Massatsusetts 大道，今仔日一條大腸直liù-liù，駛無十分鐘tio̍h 到。大sù-ki車就kā 停tiàm 辦公室邊仔。Kā 停tiàm 『無停車証，拖走』ê 牌仔頭前。今仔日學校歇睏，當然無校警會來拖車。我平時坐公車，無買停車証。準beh買，嘛是真oh ，因為學校停車位真缺，愛等規冬才買會著。資深教授學校會kā 保留一格停車位，寫伊ê 名，過身了後koh保留落來紀念伊，台灣ê考古學開基祖張光直教授舊年過身，學校猶有伊ê 停車位。

我想講所謂學校『shut down』一定是校門關ân-ân，辦公室鎖leh ，燒氣禁掉，網路bē 通。結果kan-na 象徵性kā Johnson Gate 這個大門關起來，其他十八ê 大、小門攏開。平時，校中心ê 哈佛園 (Harvard Yard) 天暗了後會kā 邊仔 門關起來，tshun Johnson Gate 這個大門。聽講這是早期貴族學校ê 傳統。哈佛園 tsia-ê 門，無管大小，攏是烏色ê鐵欄杆門，一扇約有tsiâⁿ 十枝鋼枝，頂高是劍尖，二扇對稱，藝術雕花ê 拱形設計，中央是尖起來ê 王冠形狀，有一個裝飾ê 古典煤油燈。逐個門，攏有名，人名，有伊ê 紀念意義。聖誕節，學校關起來，kan-na 關一個大門，意思意思。行入去，大樓、宿舍、圖書館、博物館攏關leh ，平時除了老師、學生，猶有真濟遊客，有ê 觀光團koh 有工讀生tshuā 隊導遊。今仔日，靜tauh-tauh 。所有tshāi tī 校園內 ê 雕刻作品攏用烏色帆布包leh ，hō͘ 人欣賞規冬，應當歇睏一下。 Tshun 創辦人John Harvard ê 銅像無蓋leh ，不過本底頭殼頂hō͘ 伊遮日彼支大幅國旗嘛收起來啊。911 以前，hō͘ 伊遮日ê 是大大幅、紅紅紅ê 校旗，校訓『真理』 ê 拉丁字VERITAS拆開寫tī 三本掀開ê 冊。旅客對這個銅像特別有趣味，銅像ê 倒腳鞋尖 hō͘ 旅客摸kah 金滑金滑，講 lù 伊ê 腳指頭仔會有好運。導遊抑是學校印ê 紹介手冊攏叫這個銅像是『三個白賊』ê 銅像。銅像基座刻講：『JOHN HARVARD FOUNDER 1638』，其實這個銅像m̄ 是Harvard 本人，是雕刻家用伊ê 學生做Model，因為根本無人知影當初kā 伊ê 藏書及一半土地捐出來起學校ê Harvard 生做啥款。1638 是伊過身、捐獻財產ê 年koh，學校二冬前，1636， tio̍h 有啊。講Harvard 是創辦人嘛 m̄ 著，事實是Massatsusetts 灣區殖民地大總法院投票通過創辦ê 。所以一開始是公立學校，後來才變做私立ê 。 不過，tī 『真理』校旗下腳，三個白賊，會當公開當做心適ê 傳說講hō͘ 遊客聽，這間美國上老ê 大學有伊面對真理ê 勇氣。用鎖匙拍開辦公室樓腳ê 門，內底猶原真燒烙，燒氣猶原開tī 七十度。以前tī 台灣東部教冊，逐遍假日去辦公室，冷氣ê 中央系統攏禁掉，若是暗時，校園內底暗bong-bong，節約是真節約，m̄-koh蓋sîng無真鼓勵老師運用研究室。哈佛一定真鼓勵老師做研究，準講學校shut down ê日子 ，你猶會當轉來研究室，tī kap 平時完全仝款ê 溫度內底工作。

拍開電腦，網路猶原暢通無阻，我隨時kap 台灣連線，透過網路kā 我想厝ê 心情用寬頻ê 高速度傳轉去故鄉，tī 無雪ê 聖誕節，tī 冷清清ê 哈佛校園。


2001/12/25

（Tsit篇本底是《哈佛台語筆記》輯一 Joornal•筆記－哈佛校園聽著台語 ê 鐘聲 第 13 篇）