《哈佛台語筆記》

 | | | 轉寄

查某囝請大學

作者 李勤岸 2007.06.24

阮查某囝嘉宜自細漢就真好liú-lia̍h ，免傷操心。印象上深ê ，是tshuā 伊去se̍h 百貨公司，門口有排電動馬仔siâⁿ 囡仔，lok 銀甲仔伊就會上上下下搖來搖去，通常囡仔抵當sîn爽，電就停去，愛koh lok 錢，你無lok ，馬仔bē koh tín 動，囡仔會開始mà-mà 哭。嘉宜若beh 坐，我先參伊phín 好，坐一遍niâ ，伊m̄ 捌吵beh koh 加坐一遍。印象中，伊m̄ 捌mà-mà 哭kā 阮亂過。。人攏講囡仔若到十幾歲，會變kah 真káu-kuài ，m̄-koh ，伊那像嘛m̄ 捌發過脾氣。 阮查某囝伊修養tsiah 好，我攏感覺彼是伊出世tsah 來ê 。

最近，伊開始有脾氣，會參阮大細聲。今年伊高中上尾冬，開始請大學。伊讀冊讀kah 無暝無日，暝--時不時愛去ko͘-tsiâⁿ 伊加減睏一下。伊去睏，鬧鐘仔tsah leh ，tsuān 二點鐘後giang ，隨koh peh 起來讀。後來，阮偷偷仔kā 鬧鐘仔tsuān khah 晏二點鐘，伊醒起來，發現時間m̄ 著，就足受氣。以後tio̍h kā 鬧鐘藏入去被空內底，hō͘ 阮tshuē 無。伊食飯嘛teh 讀冊，坐車嘛teh 讀冊。逐時teh 抱怨時間是按怎beh 過去，汰無愛恬恬mài 振動。

為著beh 請大學，伊自高中就逐禮拜二工去病院抑是圖書館做義工四點鐘，beh 累積社區服務ê 積分；koh 參加網球隊，因為參加球隊khah 有可能會當請著獎學金。 伊ê 成績嘛 bē-bái 。In 學校頂個月有辦一個晚會，講愛beh 穿khah 正式ê 衫仔褲去參加，搜無半su khah 會看得ê ，只好借媽媽ê 衫穿。問伊是甚物晚會hiah 正式，伊講這間學校傷過hàm ，應該無hiah 『嚴重』，伊tī Hawaii 就領過啊，是『國家榮譽獎』，頒hō͘ 成績全班第一名ê 學生，tī 遐阮kan-na 學校請大家做夥去食一頓飯，來遮，愛koh 辦晚會頒獎。我講阮家長敢會使去參加，伊講伊無beh 起去領，因為伊已經有領過啊，我免去。

陪伊去參加幾間名校來波士頓辦ê 說明會。伊攏足認真聽，koh 問真濟問題。去參加tī in 學校辦ê 『大學展 （college fair)』，嘛是tī 遐ê 名校擔仔位頭前問東問西，我攏恬恬khiā tī 伊邊仔。我講你若無愛去哈佛ê 擔仔位遐問看覓，我看哈佛彼格足冷清，無人踏腳到，就按呢kā 伊鼓勵。伊講免lah 。到底是因為傷近，近廟欺神？抑是明知一定請bē 著，免了時間？聽講MIT 教授ê 囡仔若是請入去，攏免學費，哈佛m̄ 知有這號優待無？不過上少教授子弟申請可能嘛是會khah 容易錄取，khah 容易請著獎學金才著。Koh se̍h 第二liàn ，koh se̍h 到哈佛遐，我koh kā 伊鼓舞。伊頭斡leh ，去隔壁南加州大學。伊講對加州ê 大學khah 有興趣，所以有beh 請幾若間加州ê 大學。伊講南加大是伊ê 第一志願。

最近伊有去MIT修課，去hō͘ 彼個教課ê 大學生迷去ê 款，轉來講伊發現足愛MIT，足愛科學，beh 請MIT，beh 做科學家。

伊本底對文學真有興趣，初中就看過大部份大學英文系tsiah讀ê 文學作品，the̍h 著全校閱讀第一名。In 學校鼓勵學生看課外冊，有列推薦冊單hō͘ in 家己去圖書館借來看，看了，就去考試，通過就會當加分，甚至會當補別科ê 分數。伊看冊看tiâu leh ，逐時攏愛載伊去圖書館借冊，一借就是一tha̍h 。我掠準伊會beh 讀文學，無張持講beh 讀科學，講對數學、生物、物理、化學攏真有興趣。Kā 探聽詳細，講無beh koh 像我按呢，規世人散kah 鬼beh 掠去，這款日子伊過kah 真艱苦。

好，beh 請MIT 嘛好，上無嘛khah近，坐電車過三站tio̍h到，會當省寡宿舍錢。MIT 安排人kā 伊口試 (interviw)，彼個人是MIT校友，tuà tī 阮對面街。我陪伊去，叫伊考煞才家己行轉來。因為這款口試攏會真久，in 一暗kan-na 安排一個學生niā-niā 。頂回in 媽媽陪伊去市中心 hō͘ Cornell （康乃爾）ê 代表口試，tī 門口khiā beh 二點鐘。真濟名校攏是按呢，每個申請ê 學生攏愛 koh 口試。伊講 Cornell 伊 beh 請『早決（early decision)』。申請大學有三種方式，上早ê 就是『早決』，tī 十月就愛提出申請，kan-na 會使請一間，若是錄取，一定愛去，bē 使koh 請別間。Koh 來是『早行動（early action)』，十一月愛提出，會使請一間以上，若有二間以上錄取，就會使選擇，不過bē 使攏m̄ 去。Koh 來就是最後一批申請，無限制你申請幾間，嘛無限制你beh 去m̄ 去。嘉宜講Cornell 伊一定請bē 入去，只是伊真愛這間學校，是伊ê 『夢中校』，罔請，當做練習申請，koh suà 落去伊就khah 會曉申請。我講你m̄ 是khah 愛tī 市內ê 學校? Cornell tī 郊區ê 大學城，是按怎你會hiah 愛這間學校？是m̄ 是彼是台灣總統李登輝ê 母校？抑是聽我講過Cornell校園上蓋suí ？十冬前我去遐演講轉來，hip 足濟幻燈片，自然景觀及人文景觀攏足幽雅 ，有山有水，有橋有瀑布，建築物嘛攏真有個性。

我講你請ê 學校學費hiah 貴，beh 那讀會起？按呢申請，無實際。伊講，你攏m̄ 請綠卡，m̄ 請美國公民，咱準請公立ê 嘛是貴，何況m̄ 是公民會當請ê 獎學金、學校攏變kah 真有限，變做外國學生，我beh 請大學，加真困難，甚至koh 愛考TOEFL。我講TOEFL你ê 情形應該會當免除，你會使kā in 按呢要求。若是請無，轉來台灣讀。逐kài 若是看著遐ê 學校hiah 貴，若真正去讀，阮m̄ tō 腹肚hâ hō͘ ân ，三頓kiáu 鹽花仔。想beh 說服伊轉來台灣讀，伊m̄ ，叫伊請德州大學Austin分校，俗koh 好，伊嫌熱。叫伊盡量請波士頓附近ê 學校，伊講無愛hō͘ 地理位置縛腳縛手。伊講會請十幾間leh ，免煩惱，嘛會請幾間仔公立學校，到時才來考慮。

彼工下課轉來，入門就嚷講：『恁慘啊lah ！』in 媽媽想講害啊，一定是頂幾工開車搶紅燈去hō͘ 警察hip 著，罰單寄來啊。

『是發生甚物代誌m̄ 著緊講！』媽媽 ê 面色已經青lìng-lìng。

『反正恁穩死ê tō 著lah ！』

In 媽媽hiông-hiông-kông-kông 緊uì 便所tsông 出來。

『Cornell 講beh kā 我錄取啊！』

2001/12/17

（Tsit篇本底是《哈佛台語筆記》輯一 Joornal•筆記－哈佛校園聽著台語 ê 鐘聲 第 12 篇）