《哈佛台語筆記》

 | | | 轉寄

建構台灣人ê集體記憶

作者 李勤岸 2007.12.23

建構台灣人ê集體記憶 －228 五十五週年紀念 tī波士頓228和平日紀念會講

各位敬疼ê台灣同鄉，各位兄弟姊妹：大家午安，大家好！

今仔日咱聚集tī tsia，抱著沈重ê心情beh來紀念228五十五週年。我beh 用『建構台灣人ê集體記憶』來參大家做夥三思228 ê本質kap意義，向望透過對228進一步ê認bat，ē-tàng深化咱台灣人ê族群意識kap國家意識。

首先，我beh來宣讀一份七人ê名單：

陳 炘 日本慶應大學理財科畢業；美國哥倫比亞大學經濟系畢業 施江南 日本京都大學醫學博士 李瑞漢 日本中央大學法科畢業 郭章桓 日本慶應大學醫學院外科畢業 王育霖 日本東京帝國大學法科畢業 陳澄波 日本東京美術學校畢業 林茂生 日本東京帝國大學畢業；美國哥倫比亞大學教育哲學博士

以上所列，真sîng是teh發布台灣政府內閣主要部會首長ê名單。以in ê資歷，in ê才華，in ê名望，ē-tàng組成一個世界一流ê新內閣。可惜，歷史不但無hō͘ in去發揮in ē-tàng貢獻hō͘國家ê專長，顛倒轉，in去hō͘一個世界無水準ê政府無緣無故屠殺掉。尤其諷刺ê是，當時in攏真熱誠認同彼個所謂『祖國』 政府，幻想beh 回歸『祖國』ê懷抱。in無想到脫離日本殖民，m̄是『光復』，卻是再度淪陷入去另外一個帝國ê再殖民。短短一冬四個月，228大屠殺就來發生。短短10外工時間，被屠殺死亡ê人數，確實偌濟，到taⁿ無人清楚。保守估計，有數萬人左右。若是根據93年11月份美國國家地理雜誌(National Geographic) 所講，根據台灣官方估計，大約有二萬八千人。

228 ê經過：

1945年8月15日日本戰敗投降，中國tī 10月17日 派兵五千佔領台灣。47年2月27日，中國軍事政府專賣局查緝私煙，tī台北太平町附近取締賣薰ê寡婦林江邁，沒收所有ê薰，koh kā伊身軀所有ê錢攏提去，這個生活困苦ê婦人人苦苦哀求，煞hō͘人用銃頭mai kah 頭殼流血昏倒在地，旁觀ê人看無做得，大聲喝拍，專賣局ê人一面走一面開銃，tuāⁿ死路人陳文溪。群眾愈來愈憤怒，包圍警察局憲兵隊，要求交出兇手。隔工，2月28日，人民開始罷工罷課遊行示威，中國政府開機關銃掃射。事件開始擴大。後來台灣社會精英及民間領袖組成228處理委員會，一方面an-tah群眾，一方面向中國陳儀政府交涉，要求政治改革。陳儀一方面應付『處委會』，騙講bē uì中國調兵來，一方面已經向蔣介石請求軍隊。3月初9，中國軍隊21師登陸基隆。開始大屠殺。

228 ê本質是啥物？

228 m̄是一個事件，228是大屠殺。228 m̄是incident，m̄是一個事件，koh khah m̄是accident，m̄是意外事件。伊是歷史ê必然，無發生tī二月底，嘛會發生tī三月底，無發生tī彼工，嘛會發生tī別工，緊tsua̍h慢，伊總是會發生。228 bē 使講是事件，bē使講是incident，伊是參人類tī世界其他所在發生ê massacre， genicide， holocaust 仝款，是massacre，是屠殺，是genicide，是種族屠殺，是holocaust，是集體屠殺。228 本質上是一個族群去侵略另外一個族群ê大屠殺。

本質上，對中國人來講，彼是一場戰爭。是對日抗戰ê延續。中國人tī中國hō͘日本人欺負、佔領、屠殺，in來台灣是來『接收』，台灣當時是日本ê領土，台灣人是日本人，in是軍事佔領台灣，in tī十外工屠殺數萬人，基本上in是當做戰爭ê延續，是對日本人報仇。Tī這場戰爭中，可惜，台灣人並無正規軍，台灣人有ê不過是正義感、不過是不滿、不過是憤怒。台灣人誤以為家己是中國人，誠心誠意teh歡迎家己ê同胞，結果m̄知影家己無hō͘人當做中國人，無hō͘人當做同胞，卻hō͘人當做日本人，hō͘人當做戰爭報仇ê代罪羊羔、成做犧牲品。

Tī這場莫名奇妙ê戰爭中，台灣人犧牲性命ê數萬人內底，有三款人。第一款是台灣人ê菁英分子，有ê是議員，有ê是智識分子，有ê是醫生、律師，是作家、畫家，in攏tī屠殺ê名單內底。中國軍事政府是根據名單去掠人銃殺ê。第二款是有真正抗戰ê，有參戰ê。Tī中部埔里ê二七部隊，其實是台中商專，台中師專ê學生kap維持治安ê民間自衛隊所組成，真正參中國軍正面戰爭ê時間干單四工，就無法度抵擋，宣佈解散（3/12~16）。Tī高雄，高雄一中ê學生、高雄女中ê學生嘛是抗暴四工 (3/3-6) 就全部hō͘人消滅。第三款人上濟，攏是無辜ê百姓，tī中國軍隊登陸四界屠殺中白白喪生。

228 ê意義？

咱攏是228受難者

嚴格講起來，全体台灣人攏是228受難者。228以後，續落來開始『清鄉』、白色恐怖，台灣人自按呢tī完全無人權、無自由ê特務統治之下過五十幾冬，雖然性命無喪失，不過除了性命以外，喪失去ê物件實在太濟太濟，講起來，除了悽慘ê 228遺族以外，所有ê台灣人攏嘛會使講是228 ê受難者。

Koh進一步講，除了有形ê軍事228以外，中國政權tī台灣所實施ê語言政策，是屠殺台灣人所有母語ê另外一個228大屠殺。用屠殺語言文化來達成伊軍事228無完成ê部分，也就是滅種。kā你ê族群母語消滅掉，就ē-tàng達到消滅整個族群，達到滅種ê目的。台灣一向實施ê，到taⁿ mā猶未廢除ê，就是中國語為國語ê語言政策。這個政策最後就是beh 消滅母語。前三工，2 月21日，是世界母語日。聯合國教科文組織（UNESCO)公布一份報告，講現tsú時世界上現存ê 6000 ê語言，有一半瀕臨滅種。其中特別提著台灣，講台灣原本所有ê 23種本土語言，收著華語ê威脅，無久ê將來就會消失，tī地球消失。按呢講，咱其實攏是228 ê受難者，準講m̄是軍事228 ê受難者，嘛是語言228 ê受難者。

集體創傷需要集體治療

一個人若有創傷就需要治療，心理ê創傷需要心理治療。228 ê創傷，是台灣人集體ê心理創傷，bē 當干單向前看，m̄ 轉去看彼個傷口，bē 當一直kā伊deny，親像早前中國政府ê做法按呢，kā伊否認，不準你知影伊ê存在，知影就犯罪，就有危險。deny是人類對付心理創傷真容易採取ê方法，不過，這款方法bē 當治療彼ê創傷。另外一個態度就是ignore，雖然無去kā伊否認掉，不過是kā伊忽略，有當做無，這就是咱tshiâⁿ-tshiâⁿ 用來安慰家己ê， 講號做『向前看』。講『向前看』是khah 好聽，其實這就是ignore ê態度。Ignore bē 當治療，bē 當解決問題。

今仔日咱講起228大屠殺發生ê代誌，m̄是beh來怨恨甚麼人，m̄是無beh 原諒，是beh 得著治療。台灣人ê集體創傷需要集體做夥勇敢去面對，去瞭解，然後得著治療。

228是咱共同 ê集體記憶，需要咱做夥建構

咱今仔日聚集tī tsia，m̄-tiāⁿ beh集體治療咱228 ê創傷，咱猶beh koh khah 積極建構咱台灣人ê集體記憶。228大屠殺了後，hō͘人thâi無了ê台灣人，一方面大著驚，另外一方面煞清楚家己是台灣人，m̄是中國人，煞產生無beh 永遠hō͘人殖民，產生beh 家己當家做主，beh 家己有家己ê國家ê信念。這個信念是犧牲數萬人ê性命才換來ê。這個信念建立tī 228 大屠殺頂高。做一個台灣人，無管你tī世界 ê叨一角落，只要你是台灣人，當頭照面，免講話，腦內底咱這個共同ê集體記憶就會互相對話，就會真親，真疼惜對方，因為你有228 ê創傷，我有228 ê創傷，咱有共同ê一個集體記憶。親像猶太人，見面就有in ê舊約故事ê共同記憶，koh有in被德國人集體屠殺ê holocaust ê共同記憶。這款ê共同記憶需要不斷去強調，用儀式，用藝術，用詩歌，用小說、用電影不斷去講起，不斷去紀念。m̄是beh 怨恨，m̄是無beh 原諒，是beh進一步hō͘咱台灣人有共同ê記憶，ē-tàng形成咱台灣人共同一致ê性命意識 kap國家意識。勇敢做夥防止任何形式ê 228 tī台灣koh 再發生。記憶是一個族群通向救贖ê不二法門；若是放hō͘ bē 記得，最後ê結果就是是自我放逐，就是自暴自棄ê絕望。今仔日咱tī tsia 紀念228，我用「建構台灣人ê集體記憶」來參大家做夥勉勵。多謝各位。