《哈佛台語筆記》

 | | | 轉寄

籲請成立「Holo語文事務委員會」

作者 李勤岸 2008.05.18

自從成立「客家事務委員會」、「原住民事務委員會」以後，客語及原住民語攏因為有專責機構，有專職人員，有專款專用，hō͘ 連本強 beh 滅絕 ê 語言文化會得 thang 開始恢復生機。

Holo 語族雖然講是多數語族，不過 tī 長期國語獨尊 ê 語言政策之下，Holo 話及客語、原住民語命運仝款，攏瀕臨滅亡。2001 年 2 月 21 日聯合國教科文組織（UNESCO)ê 世界語言報告內面就明列台灣 ê Holo 話、原住民話及客語攏是死亡中 ê 語言。

Holo 話到 taⁿ 並無一個專職機構來從事語言復振 ê 工作。教育部屬下 ê「國語推行委員會」，雖罔加減會 tàng 做寡相關 ê khang-khuè，可惜層級siuⁿ低，經費siuⁿ少，koh beh 以「國語」為主，分散資源。何況委員會工作人員，包括主任委員，攏是兼職 niā-tiāⁿ。請問，一個無半個專職工作人員 ê 單位，怎樣會 tàng thang 擔當起救護台灣語言文化 ê 重擔？

Holo 語族因為是大語族，往往為著避免 hō͘ 人扣上「福佬沙文主義」ê 大頂帽仔，處處刻意去迴避權利 ê 爭取，致使 Holo 語實際上已經是弱勢語言 ê 事實全然 hō͘ 一般大眾忽視。長久落去，無定著，所謂多數語族 ê 弱勢語言 Holo 話，會成做台灣上早消失 ê 語言。

族群平等 ê 基礎是 ài 建築 tī 語言 ê 平等頂 kuân，族群 ê 和諧 ài 釘根 tī 文化互相 ê 尊重。當政府召開「族群與文化發展會議」ê 這個時機，阮呼籲政府正視 Holo 話是弱勢語言 ê 這個事實，正視 Holo 語言文化 tit-beh uì 台灣消失 ê 這個事實，緊成立「Holo 語文事務委員會」，位階 ài kap「客委會」、「原民會」平等，直接隸屬行政院。咱期盼這個委員會設立以後，會得 kap「客委會」、「原民會」發揮仝款 ê 功能，台灣 Holo 話會 tàng tī 短時間內恢復生機，台灣人 ê 文化資產會得 thang 保存、流傳。

─ 2004.8.4