《哈佛台語筆記》

 | | | 轉寄

第十二屆南瀛文學傑出獎得獎感言

作者 李勤岸 2008.09.21

br> 感謝咱故鄉台南縣 ê 縣政府 tsiah-ni̍h 有文化素養，會曉撥經費出來設立文學獎，鼓勵文學創作。Tī 全國所有縣市當中是 giâ 頭旗 ê。Tī tsia，beh kā 台南縣縣政府恭喜！Mā beh 感謝 kā 我推薦 ê 菅芒花台語文學會，特別是理事長方耀乾先生。伊家己有資格 thang the̍h 這个獎，卻提名我出來競爭，這是心胸曠闊，真有腹腸 ê 作風，這號時代，這款人無濟。我 mā beh kā 伊恭喜！
聽講這个文學獎競爭非常激烈，逐冬攏有真濟人被推薦來參賽，今年聽講 mā 有七个人。可見咱台南縣人文興旺、作家輩出。台南縣 ê 文學風水的確是特別好，建議縣長會使 kā 這當做台南縣 ê 地方名產來推銷，kā 包裝做 ná 像「桐花祭」、「蓮花祭」ê 地方文化慶典，咱會使 kā 叫做「南瀛文學祭」lah、「南瀛詩之祭」lah，抑是「作家之鄉」lah、「詩人生產地」lah ，這就真有特色。無定著，以後真濟人相爭 beh 移民來台南縣，抑是 beh 來台南縣生囡仔，台南縣 suah 變做「文學之旅」ê 觀光聖地，凡勢，台南縣 ê 婦產科生理會變真好！
有人講我這陣 tsiah the̍h 著這个獎，有 khah 慢一屑仔。In ê 意思可能是講平平十五萬，若是 khah 早 the̍h 著新台幣 khah 有票面 ê 價值，這陣 tsiah the̍h，錢就薄去啊，算 khah bē hô。我 ê 看法 m̄ 是按呢。我認為第「十二」屆 ê 南瀛文學獎 beh the̍h 著 khah 無簡單，「十二」屆 neh，十二是一打 neh，規打 ê，m̄ 是 lan-san ê neh，無，你 kā 我講，咱 tó 一屆 ê 得主會 tàng 像我按呢，一 khùn me 規打 ê 文學獎？
以上是真「正經」ê 第十二屆南瀛文學獎得獎感言，m̄ 是 teh 講笑話。感謝大家。