《《原鄉．夜合》 客語詩集》

 | | | 轉寄

產婆踏話頭─序曾貴海客語詩集《原鄉．夜合》

作者 張復聚 2007.05.20

若是講美國文學內面無多數美國人會曉ê話語、日本文學內底無多數日本人會曉ê話語，大家定tio̍h會感覺tsiok奇怪、無可能！M̄-koh台灣文學ê內容真罕得有多數台灣人(客家、原住民、Hō-ló)會曉ê話語，卻真少有台灣人kap台灣作家認定無正常；koh-khah奇怪ê是，無啥台灣作家beh寫本土語文ê作品！

南方教父曾貴海醫師ê客語詩集《原鄉．夜合》beh出漢字kap白話字對照版lah!曾醫師m̄-nā是綠色運動家，mā是社會改革ê實踐者、有有思想ê台灣文學前輩；koh-khah要緊ê是，伊mā是母語運動ê支持者kap實踐者。客語詩集《原鄉．夜合》原作是完全用客語思考、mā完全用客語書寫，m̄-koh是用無讀音ê漢字寫ê,hō͘我tsit-ê血統透濫ê Hō-ló人kan-ta ē-tàng加減bóng看，大部分bē曉讀！實在tsiok可惜。相信tsit款經驗真tsē人lóng有，特別是對本土語文有趣味味ê人。Tsit-má出版客語漢字kap白話字ê對照本，hō͘咱真簡單ē-tàng正確讀出客語，這絕對是台灣人ê福氣。

Tī 21世紀ê後殖民時代，語言是資源，文化權是人權，文化ê多樣性是世界ê財富，lóng已經是基本常識lah。客話講：「寧賣祖宗田，不忘祖宗言；寧賣祖宗坑，不忘祖宗聲」曾醫師講會到做會到，這是我siōng欽佩ê所在！希望曾醫師真緊koh有新ê作品thang hō͘咱享受。

我有機會拜託曾醫師kap邱淑華、陳慕真母á-kiáⁿ合作hō͘ tsit本詩集出世，感覺真榮光。特別tī tsia án-ne踏話頭，寫幾句心內話kā in感謝。(作者是台灣羅馬字協會創會會長)

《原鄉．夜合》作者簡介
曾貴海，1946年出世tī屏東佳冬客家庄，混合客家、平埔kap Hō-ló ê血統。現居高雄。高雄醫學院醫學系畢業，胸腔內科醫師，曾住高雄市民生醫院內科主任、高雄基督教信義醫院副院長，並為開業醫。積極參與公共事務。曾任高雄市綠色協會創會會長、台灣環保聯盟高雄分會會長，並為台灣筆會會長。現任文學台灣雜誌社社長、鍾理和文教基金會董事長、台灣社副社長。著作有《鯨魚ê祭典》(1983)、《高雄詩抄》(1986)。Bat得tio̍h吳濁流新詩獎kap賴和醫療服務獎。