《《原鄉．夜合》 客語詩集》

 | | | 轉寄

將「原鄉．夜合」以「羅馬拼音」呈現之感言

作者 邱淑華 2007.06.03

我siōng先認識ê曾醫師是一位生態環境保護以及關懷土地人文ê學者，續落來tsiah知影伊iáu是一位胸腔科ê名醫、客家詩人；我講「客家詩人」，m̄是單指寫詩ê人是客家ê人，卻是指用客家話寫詩ê人；其差別在tī選擇、承擔以及對族人ê一份使命感。

Ē-tàng真翔實kā心中ê感受寫出來，達到真正「我手寫我口」ê境界，是每一位作家所追求ê siōng高理想；但是tī國民黨五十guā年ê語言政策摧殘下，客家ê人漸漸kap客家話疏遠，想beh寫客家詩siōng便捷ê方法只有藉助北京話loh;方便koh有市場。但曾醫師卻選擇用「祖宗言」來寫族人ê事，這意思是講伊必須承擔真tsē ê困頓kap無奈。做為醫師，救人無數，但如何kā殘缺不全、奄奄一息ê客家話tuì加護病房裡拯救出來，有可能tsiah是曾醫師目前所急beh從事ê工作；咱tuì「原鄉、夜合」tsit本詩集裡，就ē-tàng充分體會tsit點。

用客家話來寫詩，必然會tú-tio̍h無字thang用或如何使用ê情形，曾醫師卻ē-tàng克服文字ê障礙，寫出tsiah-ni̍h優美ê詩作，真是hō͘人由衷佩服。

「原鄉、夜合」一書，共收錄三十三首詩，不管抒情、記述、感懷、寫史，篇篇lóng包含了作者對tsit塊土地kap其族人ê禮讚、期待kap呼喚。「夜合」一首，文辭高雅、意境深遠，真貼切來勾畫出客家婦女ê特質，並hō͘ tsit-ê特質提高到精神層次，大大來豐富了客家文化；thang預見伊必永久流傳。「下六根步月樓保衛戰」是一首戰爭史詩，文筆流利、張力十足，淒壯ê情景歷歷在目hō͘人動容；ē-thang直接kap「荷馬」ê史詩比美。

「原鄉」一詞，一直困擾tio̍h客家ê人而且糊糊纏bē清；個人感覺曾醫師siōng大貢獻之一就是對「原鄉」提出新koh有力來詮釋祖先流浪ê終點，就是子孫流浪ê起點。伊ài咱mài心思不定，tio̍h愛你土生土長ê所在，「講一聲請愛台灣，請愛我等ke台灣，永遠ke台灣」。親像先知對伊ê族人án-ne teh-huah:「M̄好bē記得客家話，M̄好離開六堆家園，像樹根咬狠腳底土地吸飽地泥水，生滿樹葉開滿花，代代傳落去」。Mā kah-ná有一個聲音án-ne啟應tio̍h先知殷切ê叮嚀：「台灣土地已經聽得識客家話，認得出六堆客厝裡ke人，瞭解伊等對家園ke愛」 。

Tī-tsia,我beh koh再三懇求我ê眾客家前輩，除非lín mā認為「阿公喊做爺爺，阿婆喊做奶奶」無什麼無好，聽了mā不感覺心酸，若無我希望咱lóng ē-tàng為咱ê族人盡一份力量；mài hō͘曾醫師ê擔憂成真，「真驚這兜台灣客家ke記憶，mā會像平埔變做歷史ke負擔，分人擲去時間ke大海」。Hō͘咱ê下一代mài koh再為客家ê人是m̄是該講客家話，客家詩是m̄是該用客語文tsiah-ê原本就天經地義ê事來傷神。

曾醫師為tio̍h beh hō͘ koh-khah tsē人了解客家文化之美，試探以「羅馬拼音」對照ê方式來koh再版tsit本詩集。Tī曾醫師ê精神感召下，我接落了tsit份意義深遠ê工作，ē-tàng為客家略盡綿薄之力，感覺真榮幸。