《《原鄉．夜合》 客語詩集》

 | | | 轉寄

蕭家屋前竹頭樹 Sêu kâ vuk tshièn tsuk thèu su

作者 曾貴海 白話字：邱淑華 2007.11.18

庄肚流傳算命先生批ke流年
Tsông tú liù tshòn son miang sîn sân phî ke liù ngiàn
某一年早秋
Mêu yit ngiàn tsó tshiû
大屋前ke竹頭樹燥黃時節
Thai vuk tshièn ke tsuk thèu su tsâu vòng sṳ̀ tsiet
秋風吹散竹葉
Tshiû fûng tshôi san tsuk ya̍p
飄落屋前圳溝向西流
Phêu lo̍k vuk tshièn tsun kiêu hiong sî liù

來台三代蕭光明
Lòi thòi sâm thoi Sêu Kông-mìn
慷慨好義庄人說
Không khói hau ngi tsông ngìn sot

賣布釀酒做米商
Mai pu ngiong tsiú tso mí sông
財富像水流入來
Tshòi fu tshiong suí liù ngi̍p lòi
落腳六根起大屋
Lo̍k kiok Liuk Kîn hí thai vuk


原鄉載來建屋材
Yàn hiông tsoi lòi kian vuk tshòi
精雕細琢幾十年
Tsîn tiâu se to̍k kí sṳ̍p ngiàn
四堂大落坐六根
Si thòng thai lo̍k tsho Liuk Kîn
面對三山國王廟
Mien tui sâm sân kuet vòng meu
跈著日頭照南方
Thèn tén ngit thèu tseu nàm fông

月光華華六根庄
Ngia̍t kông fà fà Liuk Kîn tsông
手牽黑旗大將軍
Sú khiân vû khì thai tsiong kiûn
爬上右角步月樓
Pak sông yu kok phu ngia̍t lèu
眼前田野一片荒
Ngián tshièn thièn yâ yit phién fông
樓下流水連海滣
Lèu hâ liù suí lièn hói sùn
飲酒笑談江山夢
Yím tsiú seu thàm kông sân mung

馬關條約割台灣
Mâ Kuân thiàu yok kot Thòi Vân
六根大戰又變天
Liuk Kîn thai tsan yu pien thiên
含怨離家歸原鄉
Hàm yan lì kâ kuî ngiàn hiông
蕭屋面門改洗石
Sêu vuk mien mùn kói sé sa̍k
後院再起第五堂
Heu yan tsai hí thi ńg thòng
百年歲月流過去
Pak ngiàn soi ngia̍t liù ko hi
庄人記起流年命
Tsông ngìn ki hí liù ngiàn miang

燥黃ke竹頭樹葉
Tsâu vòng ke tsuk thèu su ya̍p
飄落齷齰ke西邊圳溝
Phêu lo̍k ô tsô ke sî phién tsun kiêu
落山日頭對馬背緣滣
Lo̍k sân ngit thèu tui mâ poi yàn sùn
慢慢下沉消失燦爛光彩
Man man hâ tshṳ̀m sêu sṳt tshan lan kông tshái
月光尋毋到舊陋ke步月樓
Ngia̍t kông tshìm m̀ tó khiu leu ke phu ngia̍t lèu

百年後ke寒天朝晨
Pak ngiàn heu ke hòng thiên tsêu sṳ̀n
對第一堂後ke八卦門看入去
Tui thi yit thòng heu ke pat kua mùn khon ngi̍p hi
牆壁彩紋已經變色
Siòng piak tshái vùn yí kîn pien set
堂後禾埕擺滿盆景
Thòng heu vò thàng pái mân phùn kín
盆栽榕樹陪古屋佇曬日頭
Phùn tsâi yùng su phì kú vuk thê sai ngit thèu



後記：一九九九年十一月六日，政府用一億元破土整修佳冬三級古蹟
蕭家古屋。這首詩完成佇破土前。