《《原鄉．夜合》 客語詩集》

 | | | 轉寄

假使美濃會起水庫 Ká sṳ̀ Mì Nùng voi hí suí khu

作者 曾貴海 白話字：邱淑華 2007.11.11

一條幾億噸ke水龍
Yit thiàu kí yi tún ke suí liùng
日日夜夜
Ngit ngit ya ya
想要衝下來吞殺歸庄人
Sióng oi tshûng hâ lòi thûn sat kuî tsông ngìn
半夜醒來
Pan ya siáng lòi
會聽到河壩噭泣ke悲聲
Voi thâng tó hò pa keu tsṳ̂ ke pî sâng

電鋸會鋸淨山頂ke樹林
Thien ki voi ki tshiang sân táng ke su lìm
變做一棟一棟高級洋樓
Pien tso yit tung yit tung kô khip yòng lèu
山靈會走避深山
Sân lìn voi tséu piang tshṳ̂m sân
綠色ke靚山會失去青春ke光彩
Liu̍k set ke tsiâng sân voi sṳt hi tshiâng tshûn ke kông tshái
田坵會變做大路屋仔
Thièn khiû voi pien tso thai lu vuk é


農民會穿上西裝
Nùng mìn voi tsok sông sî tsông
毋識麼介煙草禾仔
M̀ sṳt mak ke yân tshó vò é

街上沒人想講客話
Kiâi hong mò ngìn sióng kóng Hak fa
親切ke鄉音
Tshîn tshiet ke hiông yîm
只有對老夥房傳出來
Tsṳ́ yû tui ló fó fòng tshòn tshut lòi

鄉親會賣田賣地
Hiông tshîn voi mai thièn mai thi
客家人會變成人客
Hak Kâ ngìn voi pien sṳ̀n ngìn hak
食飽後就要恬恬離開
Sṳ̍t páu heu tshiu oi tiâm tiâm lì khôi

祖先ke靈魂
Tsú siên ke lìn fùn
會託夢安慰子孫
Voi thok mung ôn vi tsṳ́ sûn
講這就係客家人命運ke原罪
Kóng yá tshiu he Hak Kâ ngìn miang yun ke ngiàn tshui


鍾理和會還魂
Tsûng Lî-fò voi vàn fùn
倚佇笠山頂
Khî thê lip sân táng
寫下生前沒完成ke
Siá hâ sâng tshièn mò vàn sṳ̀n ke
笠山悲歌
Lip sân pî kô

假使美濃會起水庫
Ká sṳ́ Mì Nùng voi hí suí khu
留下來ke客家人
Liù hâ lòi ke Hak Kâ ngìn
只好準備放火燒天
Tsṳ́ yû tsún phi piong fó sêu thiên