《《原鄉．夜合》 客語詩集》

 | | | 轉寄

阿儀同福佬妹 Â ngì thùng ho ló moi

作者 曾貴海 白話字：邱淑華 2008.04.06

24歲過身的日仔
Ngi sṳ̍p si se ko sṳ̂n ke ngit lé
咚咚鈸接著笛聲一路行到牛埔
Tung tung khiang tsiap tén tha̍k é sâng yit lu hàng to ngiù phû
出喪ke人群當中
Tshut song ke ngìn khiùng tông tsûng
哀愁的家人同朋友頭盡盡
Ôi sèu ke kâ ngìn tùng phèn yû thèu tshín tshín

這邊那邊一聲半聲道嘆
Yá phién ke phién yit sâng pan sâng tho than
人群中一個披著麻布＜後ke生＞細妹仔
Ngìn khiùn tsûng yit ke kà tén mà pu ＜ke heu sâng> se moi é
噭泣到要人扶著正行得動
Kieu tsṳ̂ to oi ngìn fù tén tsang hàng tet thûng
那就係阿儀ke福佬妹仔
Ke tshiu he â ngì ke ho ló moi é

還小就有心臟病
Vàn se tshiu yû sîm tshong phiang
醫生講伊食毋久
Yî sên kóng kì sṳ̍t m̀ kiú

常常指著心臟同ngài講kì會短命
Sòng sòng tsṳ́ tén sîm tshong thùng ngài kóng kì voi tón miang
小學共下佇田坵圳溝搞到大
Séu ho̍k khiung ha thê thièn khiû tsun kiêu káu to thai
書包帶便當同鐵棍
Sû pâu tai phien tông thùng thiet kung
初中也共下做不良少年
Tshû tsûng yâ khiung ha tso put liòng seu ngiàn
有一擺過莊打人
Yû yit pái ko tsông tá ngìn
分人打到爬歸來
Pûn ngìn tá to phà kuî lòi

初中畢業後走去一間工廠做事
tshû tsûng pit ngia̍p heu tséu hi yit kiân kûng tshóng tso sṳ
沒幾年老闆ke老妹
Mò kí ngiàn ló pán ke ló moi
半夜就會來整理伊ke眠床
Pan ya tshiu voi lòi tsṳ́n lî kì ke mìng tshòng

有一擺過年，伊贏淨大家ke錢
Yû yit pái ko ngiàn,kì yàng tshiang thai kâ ke tshièn
忽然間剝忒手錶仔
Fut yàn kiân pok het sú pêu é

放佇桌上
Piong thê tsok hong
同ngài講，你拿去
Thùng ngài kóng ,ǹg nâ hi
你比ngài還更需要用得到
Ǹg pí ngài vàn ko sṳ̂ yeu yung é tó

過身後有人常常看到
Ko sṳ̂n heu yû ngìn sòng sòng khon tó
臨暗ke墓地頭
Lìm am ke mu thi thèu
該隻福佬妹
Ke tsak ho ló moi
坐佇墓地唇
Tshô thê mu thi sùn
目汁流入夜色中
Mu̍k tsṳp liù ngi̍p ya set tsûng
跈著星仔恬恬離開
Thèn tén sên né tiâm tiâm lì khôi