《耶穌言行錄》

| | | 轉寄

Tē-1-tsiuⁿ, Iâ-so͘ Ki-tok lîm-kàu sè-kan

作者 Ko Kim-sing. 2008.04.13

Tuì A-tong Hā-ua kuáⁿ-tshut Lo̍k-hng kàu Iâ-so͘ lîm-kàu sè-kan ê sî，kuí-nā tshing nî.

Tsú Iâ-so͘ Ki-tok sī Siōng-tè íng-ua̍h ê Kiáⁿ，tshut-sì tsuè lâng.Í-sài-a lūn I ê tāi-tsì tsiū kóng，"Ū tsi̍t ê Eⁿ-á uī lán lâi tshut sî，ū tsi̍t ê Kiáⁿ siúⁿ-sù lán.I beh hū-tam kok-tsìng，I ê miâ tshing tsuè Kî-biāu，Bô͘-sū，Tsuân-lîng ê Siōng-tè，Íng-uán tī-the ê Pē，Hô-pîng ê Jîn-kun. "（Í-sài-a 9：6）

Iâ-so͘ sui-jiân tshut-sì tsuè Eⁿ-á，tī sè-kan tsuè sòng-hiong lâng，kî-si̍t sī Siōng-tè.

Iâ-so͘ lī-khui thian-tông îng-hián hok-khì，lîm-kàu sè-kan sī beh kiù lâng.Lâng í-king ū tik-tsuē Siōng-tè，tio̍h siū hîng-hua̍t，Iâ-so͘ lai5thue3 lán tam-tng.Siōng-tè ê bīng-līng lán tik-khak tio̍h siú，iáu-kú lán bô khuì-la̍t，Iâ-so͘ thuè lán siú.Lâng beh hiàn-tsè hō͘ Siōng-tè，ta̍k-hang tio̍h īng tsiâu-tsn̂g-ê；Iâ-so͘ tsiū-sī tsiâu-tsn̂g ê tsè，bô tsi̍t-tiám-á phuà-phah，só͘-í Siōng-tè huaⁿ-hí I.Siōng-tè ín put-kuán sím-mi̍h lâng nā sìn，tsiū beh īng I ê Kiáⁿ ê huih sué-tshing i ê tsuē，ia̍h beh īng I ê Kiáⁿ ê gī lâi tsuè i ê gī，án-ni tì-kàu íng-uán ua̍h.Sìng-king kóng，"Siōng-tè tsiong to̍k-siⁿ ê Kiáⁿ siúⁿ-sù sè-kan，hō͘ kìⁿ-nā sìn I ê lâng buē tîm-lûn，uē tit-tio̍h íng-ua̍h；I thiàⁿ sè-kan kàu án-ni. "（Iok-han 3：16）

思羅安台語點字網站