《Kahui ê Tâi-bûn Phû-tô-hn̂g》 |
 |
 |
|
 轉寄 |
頭pái的台文筆會大會
作者 Ko Ka-hui 2021.08.01
Ē-kì-tit kū-nî ê 8 gue̍h khì tsham-ka A-jîn lāu-su ê káng-tsō. Góa sī huaⁿ-hí kah tòng-bōe-tiâu, hā-khò tō hām lāu-su la-thian, kóng kúi kù-á ōe, kóng góa siuⁿ beh ka-ji̍p Tâi-bûn pit-hōe.
Tī 10--gue̍h ê sî, góa tō piàn-tsiâⁿ tsèng-sik ê hōe-oân ah! Si̍t-tsāi ū-kàu thiòng-ê, ē-tàng ka-ji̍p tùi ū teh siá Tâi-bûn ê góa sī tsi̍t tsióng khún-tēng neh!
Kàu kin-nî ê 1 gue̍h-hūn, góa tsham-ka Tâi-bûn pit-hōe ê hōe-oân tāi-hōe, sim-lāi ū kàu kín-tiuⁿ mā ū kî-thāi, tsêng-mê khùn lóng bōe--khì, it-ti̍t teh siuⁿ tsit kiāⁿ huaⁿ-hí-tāi.
Khì tsham-ka ê tông-ji̍t, góa tsái-khì 8 tiám gōa tō tsē hóe-tshia khì Tâi-lâm ê Sêng-kong Tâi-ha̍k ê Tâi-bûn-hē kàu-sik. Góa kàu ê sî, iáu tsin tsá, Tsiúⁿ kàu-siū tō kiò góa tàu-sang-kang, góa tō ìn hó, tō tī kūi-tâi tàu pun mi̍h-kiāⁿ.
Beh khai-sí tsìn-tsêng, A-jîn lāu-su tshōa góa se̍k-sāi ta̍k-ê sian-pái, góa ta̍k-ê lóng kā tshing-ho͘ lāu-su. Án-ne tō bô m̄-tio̍h. Góa teh siuⁿ, ta̍k-ê tsiân-pòe lóng-sī góa ài ha̍k-si̍p ê tùi-siōng.
Khui-hōe ê sî, thiaⁿ-tio̍h tsiok tsē tsiân-pòe ê pò-kò kap siau-sit. Ah góa mā ū khì tâi-téng hun-hióng góa siá ê Tâi-gí si. Si-miâ sī”Sú-bêng tsiân-pòe tshiáⁿ lí ûn-ûn-á kiâⁿ”, ū lāu-su kóng i thiaⁿ liáu tsiok kám-tōng--ê. Án-ne góa siá liáu tō ū kè-ta̍t ah! Kàu beh tàu ê sî, Pit-hōe tshoân sú-sih hō͘ lán tsia̍h, si̍t-tsāi tsiok tsán--ê! Góa kám-kak Tâi-bûn pit-hōe sī tsi̍t ê un-loán ê tōa ka-têng!
