《林茂生博士論文》

 | | | 轉寄

第二章 背景概況

作者 林茂生著（英文） 林詠梅華譯 林俊育台譯 2017.08.27

一）地理背景
1）島嶼名稱ê由來
福爾摩沙tsit-ê名稱，tsit-má卻被日本人kah中國人普遍地稱做「台灣」，是葡萄牙文「美麗」ê意思。Tī十六世紀，tsit-ê島嶼iáu未被歐洲ê航海者所知影ê時tsūn，葡萄牙人偶然地航行經過tsit-ê島嶼ê西海岸，hō͘ 她ê美麗驚一tiô，suah kā她稱做“Ilha Formosa"「美麗島」。一位hō͘ 葡萄牙人雇用ê荷蘭航海官，名叫作霖卓敦（Lintsotten），就tī伊ê航行圖上án-ne標記tsit-ê島嶼ê名稱，福爾摩沙tsit-ê名稱就án-ne tī歐洲ê書籍上，hiah-ni̍h好聽，koh hiah-ni̍h適合來取代其它ê名（註：1）。
2）位置
台灣大約是東北向西南ê行向，位置tī北緯20度15分到20度55分之間（註：2），東西跨越東經120度到122度之間。往南行有菲律賓群島，她ê北端ê恩干約角（Cape Ingano）距離台灣ê siōng南端有225英里，她ê首都馬尼拉距離台灣有390英里。東北方向有琉球群島，這是去日本ê踏腳石，日本本土siōng南端ê島嶼叫作鹿兒島，kah台灣北部港口ê基隆，相距660英里。向西約100英里是中國大陸，兩者之間有澎湖群島（註：3），距台灣海岸tsiah 20英里。向東則是一望無際ê太平洋，直到夏威夷群島相距四千英里，一屑á都無阻隔（註：4）。
3）土地
台灣kah日本類似，有山脈縱貫南北，kā tsit-ê島分做兩半，東部kah西部（註：5）。Tsiah-ê山脈形成濃密ê樹林kho͘-á，山峰lóng tī 7,000呎到將近15,000呎之間。Siōng kôan ê兩個山峰，一個是Mo͘nt Morrison，日本人kā它改稱做「新高山」，有14,270呎（註：6），另外一個是Mo͘nt Selvia，日本人kā它稱做「雪山」，有12,480呎。山脈區差不多集中tī東部直到東海岸，hia-ê坑khàm根據估計總共有6,000呎，面對海洋形成垂直ê絕壁。這是世界上siōng kôan ê海岸絕壁。Tī崎嶇ê山區，是台灣已經知影ê siōng古老ê住民ê kiáⁿ孫—mā to̍h是原始山地住民ê家園。Tī西半部，真tsē hō͘ 山谷所貫穿ê斜坡伸長到海，形成起伏無停ê大平原，tī tsiah-ê平原頂面，荷蘭、中國kah現今日本ê旗á續接飄揚（註：7）。Tsit-ê西海岸有港口kah沙灘，文明就án-ne進入島嶼，並向東部擴散，行入ê里程碑to̍h是開墾ê田園kah人丁旺盛ê庄頭（註：8）。萬巒山區以西有一個黏土山丘地帶，koh再往西行，to̍h是tùi北到南一片真闊ê沖積平原，有真tsē水道穿流tī它ê間，直到沙灘kah長長ê泥沼（nî-tsiáu），kui個沿海ê景象kah東海岸ê岩壁形成顯明ê對照。西部ê土地繼續向海伸長，當然是山頂ê土因為水流沖積落來所形成ê，尤其是tī雨季ê時，山區真tsē所在差不多無法度行（註：9）。
4）氣候
台灣是一燒熱帶地區。北迴歸線約tùi其中間穿過去，因為án-ne，南部完全tī熱帶kho͘-á裡。若是因為án-ne來認為tsit-ê島嶼kui年享受熱天，án-ne to̍h m̄-tio̍h去à。事實並m̄是án-ne，春天tùi三月開始到五月底，氣溫非常溫和；熱天tùi六月初到九月中；十月kah十一月to̍h kah-ná中國kah日本ê「小春」，是kui年中siōng爽快ê月份。Tī北部，雨季lóng tùi九月開始，連續20天á是30天落sap-sap-á雨；tī南部，雨季通常tùi熱天開始，所以，會帶來涼風，hō͘ 炎熱降溫。雖然雨季是bē hō͘人爽快，m̄-koh，tsit-ê島嶼ê生產力大部分是依賴它。Án-ne hō͘ 菜蔬茂盛 ，樹木kui年生長，花一年四季lóng開（註：10）。 總是，kui個看起來，tsia ê氣候，特別是對hiah-ê非土生土長ê人，是非常oh得忍受ê，因為不時tâm濕，炎熱有瘴氣。溫度真少升kôan到華氏一百度，準講是tī溫和ê氣溫裡，普遍ê tâm濕mā hō͘人失去活力（註：11）。 離台灣南端無遠ê海面是真tsē風颱ê發祥地，m̄-koh，島嶼頂面ê高山成做抵擋強烈風颱ê屏障（註：12）。
5）自然資源kah它ê經濟價值
台灣ê物產豐富是tùi大陸招引移民ê吸（khip）石，tsit-ê島嶼對真tsē農作物lóng thang適應，有時hông稱做中國ê穀倉。因為日本gâu ê企業管理，各方面lóng大有進步，m̄-nā主要作物收成量增加，每一種作物ê品質標準mā提高。1923年農作物ê總生產量，值日幣192,939,416圓，雖然，1928年ê數字iáu bē-tàng得tio̍h，若是用2億5千萬元當做新數字並無誇大（註：13）。 米、糖、茶、蕃薯、青豆、四季豆、大麥kah小麥、黃麻、重青(染料）、煙草、果子kah菜蔬lóng是主要產物。米ê生產，經歷真大ê改變，tī真tsē地區，一年三作代替兩作。1923年，米ê總生產額，值日幣8,500萬圓（註：14）。 糖ê生產受tio̍h政府ê鼓勵kah補助；因為繼續無放輕鬆ê努力，1922到1923年tsit季ê收成約40萬噸；根據最近ê估計，1928年會有50萬噸。有以上數字ê成果，是因為tùi夏威夷kah爪哇引進真tsē品種，koh kā它密集ê開發kah實驗，並kā khah優良ê甘蔗種，免費分配hō͘ 蔗農（註：15）。 第三種重要ê農作物是茶。台灣ê烏龍茶，根據最近ê統計，總生產額為2,000萬斤，它ê輸出額值日幣900萬圓。Tsit-má對茶園ê發展特別重視，tī茶ê生產方面，美國收購（kò͘）台灣茶總生產量ê一半。 台灣有真tsē有價值ê礦產，1923年合計日幣1,291萬圓。M̄-koh，這並無包括金、銅kah煤ê開採，因為島上tsiah-ê礦物ê開採iáu tī未開發ê階段。 Hia有廣大koh壯觀ê樹林地帶，擁有ê樹木，種類ê tsē會hō͘人tio̍h驚。漁業已經仝款推sak入去à，1923年漁產ê總值為日幣14,273,730圓。 台灣是樟腦有名ê出產地，佔世界總產量ê主要部分。樟腦ê需求量真koân，tī 1924年，樟腦輸出島外包括日本，總額值日幣1,117,000圓（註：16）。 以上所舉每一個例lóng有明顯ê開發，當然是會繼續進展，因為tsit塊土地ê資源真少開發過。以上數字ē-tàng顯示，日本佔領後，台灣地位ê重要。1899年，台灣出口kah進口ê總值日幣3,100萬元，m̄-koh到1923年，tsit-ê數字膨脹到日幣3億8,000萬圓。Tī日本統治之下，收入kah支出真明顯增加。日本統治後ê前十年，每一年日本補助台灣政府將近日幣100萬圓，m̄-koh，過去二十四年，殖民地對帝國國庫年年有貢獻（註：17）。Tsit-má（1929年）ê收入kah支出ê數目大約是日幣一億圓（註：18）。
6）面積kah人口
根據siōng新ê地圖研究，台灣ê面積有13,889平方英里（註：19），等於麻省（Massatsusetts）kah康州（Connecticut）合起來ê面積（註：20），á是kah九州仝款大細；九州是日本帝國本土ê四大島中siōng南ê島。台灣ê形狀是長雞卵形，而且南端成做尖形ê to̍h是鵝鑾鼻。Tsit-ê島嶼，tùi一頭到另外一頭ê直線距離有264英里，m̄-koh，任何實際ê路tùi南到北約350英里；它siōng闊ê所在是80英里（註：21）。 人口包括10萬名原住民，雖然無gōa確定伊ê種族構成，mā可能是馬來人，189,630名日本人，383萬8,636名漢人，kah 3萬3千名外國人（註：22）。下底ê數字會明確顯示，tsit-ê島嶼kah兩個歐洲獨立ê國家，tī面積kah人口上ê比較。In顯示tsit-ê島嶼比tsit兩個國家細一點á，人口卻超越in。
面積 （平方英里） 丹麥 16,604 瑞士 15,940 台灣 13,841
人口 台灣 4,161,206 瑞士 3,880,320（1924年估算） 丹麥 3,419,656（1925年估算）
7）住民
Kah頂面仝款所述，根據最近人口普查，台灣住民已經超過400萬人，其中包括四種成員，就是日本人、當地漢人、原住民kah外國人。 日本人kan-taⁿ佔全人口ê百分之五，in大部分khiā tī khah高階層，像講政府官員、銀行家、企業家、律師、教員、sing-lí人kah警察，這以外mā有少數ê作穡人、勞工kah討海人。所以差不多tī社會每一個階層，in lóng是領導者。In ê傳統、習慣、禮儀等等，換句話講，in ê文化kah日本本土ê同胞完全仝款。 當地ê漢人是島上siōng大ê族群，差不多佔人口ê百分之九十五。其中五分之四ê人叫做「福佬」，是來自廈門kah她附近地區ê移民kiáⁿ孫，講hit所在ê方言。其他五分之一ê人是「客家」，tùi汕頭kah廣東地區來ê；in中間個百分之六十是作穡人（註：23），其他是地主、sing-lí人kah勞工，屬tī中下階級。Tī台灣當地ê漢人，lóng保留in tī中國本土ê親族記號，保持仝款ê傳統、習慣、家庭制度、文獻kah宗教；換句話來講，保留中國本土ê文化。 根據in ê方言（註：24）以及來自福建地區，福佬人thang分做四群人，是廈門、泉州、漳州kah漳浦。有kóa作者稱in為「閩南人」。大部分ê客家人á是粵人lóng來自廣東省移民ê kiáⁿ孫（註：25）。客家人tī動亂時期，tī中國南方四界遷徙，終其尾離開大陸慘淡koh受壓迫ê生活，tī台灣安居落來。In真勤奮koh ē-tàng食苦耐勞。這說明án怎講會in大多數是勤勞ê作穡人，福佬人卻大部分tī城內經商。客家婦女遵守先人ê習慣，kah丈夫tī田裡工作，因為án-ne，in無縛腳。反tńg來看，福佬婦女卻固守中國南方時行（kiâⁿ）ê古老ê習慣。當in ê丈夫出外tī田裡工作，in因為縛腳（註：26）留tī厝裡做家事。客家人因為有硬頷頸ê精神，成功ê機會tsē，福佬人卻無lóng án-ne。 客家人ê堅持kah 福佬人ê冒險精神合成一股有價值ê進取力量，因為前者勤奮，後者有創業能力。今á日to̍h是tsiah-ê性格kā tsiah-ê人帶領離開中國。Tsit種人會出現tī法屬印度支那kah暹羅；in tī馬來聯邦mā是主要ê力量，特別是tī新加坡，in是名商；in出現tī爪哇mā仝款，tī hia in屬tī富商階級；其實ē-tàng án-ne講，in散佈tī kui個南洋群島上。Tī台灣土生土長ê漢人to̍h是tsit階級ê人，用仝款無畏ê勇氣橫渡危險ê台灣海峽，suah成做台灣ê開拓者。 頭前已經敘述過，tī台灣ê漢人kah中國本土ê漢人仝款，沿襲仝款ê文化，m̄-koh tī tsia一定tio̍h對語言附帶講幾句話。咱一定tio̍h記tiâu，書寫語言，tī台灣kah kui個中國本土ê每一個所在是一致ê，m̄-koh，口語to̍h有差別。文字是固定ê，而且所標識ê意義對所有ê漢人來講是仝款ê，m̄-koh，文字ê發音就tòe中國省分ê無仝有差別。這以外，tī台灣kah tī華南ê真tsē地方仝款，實際上需要學習兩種語言；一個是口語ê á是會話用ê，一個是讀音ê。譬喻講，台灣kah廈門ê口語仝款，「人」字，讀音發音為“jîn” á是“lîn”，口語發音做“lâng”。漢文無名詞、代名詞、形容詞ê語尾變化、á是動詞變化；這是典型ê「孤立語言」。名詞、代名詞、形容詞ê語尾變化，á是動詞變化，tī漢語（文）裡tshōe bē-tio̍h相當ê對應，m̄-koh，音調ê變化往往以「聲」來表示，台灣á是廈門ê語言有八聲（註：27）。一個台灣字，外國人聽起來，kan-taⁿ是一個音，m̄-koh，因為聲調ê差別，可能表示八個以上ê事物ê其中之一，tsiah-ê聲調是真有音樂感ê。仝款ê子音kah母音ê組合，thang用高促、高緩、低緩、低升、高降ê「聲」á是八聲中任何一聲來發音。每一聲代表一個字，而且tsit-ê字真清楚指示一個特別ê意思（註：28）。 組成台灣人口ê第三種成員是原住民，有關原住民ê一切真少人知，而且in之間互相ê關係koh khah是無清楚（註：29）。有一kóa人認為是馬來人kah南洋ê小烏人á是琉球人混血ê kiáⁿ孫；另外有人相信，仝款是純馬來人ê kiáⁿ孫，東到台灣，西到馬達加斯加島，親像扇狀分佈各地。根據第三個理論，台灣原住民kah中國ê土著苗族，是仝一個淵源（註：30）。無論án怎，這是無thang懷疑ê，早tī史前時期，真tsē族群ê祖先，大部分來自附近南部ê馬來亞島嶼，有一kóa來自亞洲大陸，有kóa來自琉球群島，因為tī海上tú-tio̍h意料bē到ê風颱，suah來到台灣島上避難。因為生活條件真好，而且中央山脈ē-tàng抵擋強風，in就tī tsit-ê島上永久安居落來。 幾世紀以來，tsiah-ê島上ê原住民雜居做伙，teh過原始ê生活，從來m̄-bat被外界侵入攪擾kah眾人知。照記載，大約tī 1430年以後，早期漢人渡過海峽，tī台灣島ê西海岸登陸，to̍h發見有真tsē原住民ê部族。Tāi先接觸ê部族hông稱做「平埔蕃」（平原ê野人）。In ê土地漸漸被強奪，並hông驅逐往東到山脈ê山腳，山脈是tsit-ê島嶼ê主幹。Tsiah-ê平埔番tī歷史ê演變中，tsē少受tio̍h文明ê洗禮，siōng早來自荷蘭人，然後來自漢人，最近來自日本人。In講漢語，大部分穿tshah mā親像漢人。Koh講，in ê宗教儀式效法漢人，m̄-koh，in猶原保留真tsē原來ê觀念kah習慣。真tsē部族ê家庭制度是母系社會，這kah中國ê家庭制度tú-tú倒péng。漢人bat做進一步ê分類，kā以上所有部族稱做「熟蕃」（「煮熟ê」á是馴服ê野蠻人），來區別〔生蕃」（「生ê」á是未馴服ê野蠻人），生蕃khiā起tī深山kah南部（註：31）。 東部地區未開化ê原住民，m̄承認統治當局，而且時常借機突襲。In分做真tsē族、群，in有無仝ê語言kah方言，koh保持in獨立kah古老ê生活習慣、制度，像講身軀ê裝飾á是毀傷、紋面、獵取人頭、神靈kah自然崇拜等等。Tsiah-ê原住民被描述做非常勇敢koh結實，in利用有閒ê時tsūn練習奔走。真tsē人ē-tàng一工走100英里，kah-ná馬hiah緊。In腳底ê皮膚無比ê tēng koh厚，準講踏tio̍h刺phè mā bē傷痛。Tsa-po͘人差不多全身赤theh，tsa-bó͘人to̍h用草編成ê裙遮身（註：32）。In所tòa ê村落，厝是用石頭疊（thia̍p）起來ê，厝頂用石板蓋leh，是非常清氣koh整齊。小型ê戰爭是真平常ê tāi-tsì，m̄-nā tī漢人tòa ê邊界，準講kah近鄰ê無仝階級之間，mā常常發生；被phut ê人頭當做戰利品保存起來。Tī有kóa地區ê少年tsa-po͘人kah tsa-po͘ gín-á就睏tī khǹg頭骨ê房間，來激發in ê勇氣。死人用坐ê姿勢被埋葬tī伊臨終ê眠床腳。Tī路上，tsa-bó͘人tú-tio̍h年長ê人，á是階級khah koân ê人， tio̍h行去路邊，並要求tńg身，kha脊phiaⁿ ǹg in，一直到in完全行開。In無曆（la̍h）日，當in看tio̍h幼草生出來，就斷定春天已經到à，in就開始掖種。當種籽puh芽，in相信天公teh祝福in，in就停止互相爭鬥，而且從事比較khah平和ê工作來報答天公。In phah獵鹿á kah射鳥á，用獸皮kah羽毛做衫褲。In真正是siōng原始ê人群。15世紀末葉，漢人來à，in不得不放棄肥ê低地，逃入去山區，遠離侵入者（註：33）。真tsē kah漢人接觸ê部族就顯示真tsē文明ê技能（註：34）。 Beh結束以前，一定tio̍h提起ê是人口中間ê第四個成員—外國人。根據1926年ê人口普查（註：35），外國人ê人數是3萬3千2百58人，tsit陣人佔總人口百分之一bē到。其中大部分是中華民國ê公民，其中無到200人是西洋人。Tī台灣ê中國公民，差不多全屬tī勞動階級，只有少數經商á是做小買賣。講tio̍h tsit小數目ê西洋人，大部分是傳教士kah in ê家眷，加上幾位貿易商kah sing-lí人。傳教士除外，整體講起來，tī台灣ê外國人影響力是非常微小，為tio̍h beh顯得完整，tsiah kā in包括在內。
台灣ê住民（註：36） 有日本人、漢人（福佬kah客家）、 原住民（蕃人，有生蕃（泰雅族、布農族、鄒族、賽夏族、排灣族、卑南族、阿美族）kah平埔蕃（熟蕃）。
8）政治kah經濟現況
日本人佔領台灣後ê前24年內，司法制度kah經濟結構，以及教育制度ê建立方式，kah日本本土ê對等機構真無相仝。這是當初制立政策ê時，對台灣本土固有ê習慣kā它做某種程度ê承認。 總是，1919年以後，因為日本人ê人數增加，日本人社會kah經濟ê影響相對增加，koh因為日本人ê台灣資本化ê發展，tsit-ê島嶼已經kah日本本土處tī仝款經濟kah文化制度ê範圍裡。親像司法制度包括民法kah刑法，已經是日本現有ê制度ê延長。 講tio̍h政治制度，台灣iáu-koh處tī一個特殊ê地位，受統治ê方式kah日本本土真無相仝。 雖然tī 1921年，tī台灣公佈ê法律kah法令，基本上kah日本ê仝款，m̄-koh，總督tī立法kah行政上iáu-koh保留非常獨裁ê權力。Tī 1921年新近成立總督府評議會，是siōng kôan ê顧問機構。Tsit-ê機構是為tio̍h島上要求諮商ê種種問題，提出民意。M̄-koh，這根本m̄是民意代表ê立法機構，而且kan-taⁿ是一顧問機構，評議會ê評議員koh是由政府提名ê（註：37）。Koh khah嚴重ê，評議會ê開會lóng是由總督召開，而且由伊決定議題。 雖然地方行政已經重新組織—有關tsit點以下會詳細討論—地方ê政治制度已經修改kah親像日本ê本土，m̄-koh iáu-koh存在大koh重要ê tsing差。比論講，各市kah州ê首長以及各庄社ê主管lóng由政府指派。Tī日本本土就由人民選舉來產生。地方ê協議會成員仝款由政府任命，因為án-ne，像日本本土ê民意代表機構真明顯並無存在tī台灣。 一想tio̍h維持和平kah秩序ê機關ê時，值得特別提ê是「保甲」制度，這tī日本本土mā無存在。「保甲」制度原本來是一個自治ê組織，由中國宋朝ê時一位名政治家設計ê，真正tī台灣實行是清朝ê時tsūn。日本政府因為欣賞它ê功效，採用tsit-ê制度，並無做必要ê修改。 「保甲」制度是由「保」、「甲」兩部分合成得來ê名稱。十戶組成一「甲」，而十「甲」組成一「保」。tsit兩部分ê首腦是由各市、街kah座ê長老選舉出來ê。 平常時in ê功能是維持和平kah秩序，並tī in各自區域內從事戶口kah人口ê記錄。Tsia有一原則是每一成員對各「保」kah「甲」內發生ê tāi-tsì，有共同連帶責任。 雖然tsit-ê制度ê理想是用民主ê方式去維持秩序，而且造福「保」kah「甲」ê成員，m̄-koh，因為tī政府警察當局ê控制之下，實際上它變成一般警察制度ê輔助機構。 自從日本統治初期，台灣ê工業政策to̍h被特別看重。尤其是tī 1919年以後，日本人對台灣經濟發展ê影響koh khah明顯。Tùi tsit時開始，工業、企業ê數目kah投資ê總值緊捷（tsia̍p）增加；投資tī tsit-ê島上ê大資本是日本人所有，kan-taⁿ少數ê台灣人參與投資tī幾個公司。 親像以前所述，農民佔當地全人口ê百分之六十。大多數ê農民是佃農，tùi大地主á是製糖公司租地。因為in處tī不利ê經濟地位，甚至自耕農mā漸漸失去in ê土地，hông迫成做佃農。 農民以外iáu有勞工階級，in m̄是tī日本人ê工廠做工，to̍h是當技工á是臨時工。 Tsiah-ê農民kah工人ê經濟狀況並無真好，in ê人數加起來佔全人口ê百分之八十。的確tī日本統治下，in每一個人所付出ê勞動kah in tùi田地kah勞動ê金錢收入增加，m̄-koh是因為跟tòe生活費提高，tsiah-ê階級ê經濟福利並無相對ê提高。 一般來講，咱發見tī台灣，農業kah勞工ê人口差不多形成台灣當地人ê全人口，而且日本人是掌握大部分ê商業kah工業事業。後者，經由in ê所有權以及控制主要ê工業kah金融機構，實際上掌握tsit-ê島嶼ê經濟性命。
二）歷史背景
1）1600年以前ê台灣—原住民kah海賊時期
Tī紀元前幾世紀以前，tāi先移民到台灣是來自東北方。Tsiah-ê人hông稱做「瑯喬」（Lonkius），in控制tsit-ê島嶼直到第六世紀ê後半葉，以後由來自南方ê幾群馬來人，kā tsit-ê島嶼ê kui個西海岸控制à。 幾世紀以來，tsiah-ê馬來人構成tsit-ê島嶼ê永久人口，而且直到第十五、十六世紀kah外界無建立固定ê接觸。 Tī第十六世紀，活跳tī中國沿海ê海賊kā台灣當做行動中心。Tsiah-ê放浪ê海賊看情況來決定，mā經商mā搶奪。In中間有日本人kah漢人；前者ê大本營tī北部ê雞籠（基隆），後者tī南部ê台員（台南）附近。Tsiah-ê海賊sing-lí人ê出現，hō͘台灣tī hiah-ni̍h早期to̍h成做中國、日本kah南海附近島嶼之間ê商業交易所。 Tī仝一個時期，其他漢人因為中國大陸惡質狀況所趕逐，koh被台灣土地之肥沃所吸引，成群結隊湧進tsit-ê島嶼；in是勤勉koh有活力ê移民；in處tī非常重要性ê地位，台灣ê海賊時期開始變成做農業時期。 一般來講，1600年以前，台灣處tī khah混亂ê狀況下，居民大部分lóng是原住民，in有tang時á kah已開化ê民族—主要是漢人kah日本人—有所接觸。當時是一個無主人ê島嶼，而且tsit-ê時期有關咱ê題目ê資料mā真少。除了hiah-ê原始社會所通行ê原始做法，欠缺有意識ê教育活動是明顯ê。Tī tsia值得提ê是，遠tī三百年前，mā to̍h是tī十五世紀kah十六世紀，漢人kah日本人tī tsit-ê島上開始往來，尤其是tī台員地區ê sing-lí人，漢人kah日本人做厝邊tòa做伙，而且無任何互相敵對ê形跡。*
2）荷蘭時期（1600年到1661年）
幾世紀ê混亂狀態已經過去，tī hit期間，台灣是一個無統治者，若無to̍h是siuⁿ tsē統治者ê島嶼，tī十七世紀前半葉由荷蘭人佔領。荷蘭人一開始就強調商業殖民政策，來增進母國ê財富，荷蘭人m̄-nā tī島上kah日本人以及漢人交易，koh差派船隻到中國以及日本直接kah兩國通商。 關係內部ê行政，in用非常有遠見ê態度，隨時向原住民表示友好，荷蘭人tī tsit-ê島上建立第一間學校。In發見hō͘原住民改信基督教，ē-tàng擴大in對原住民ê影響力kah商業往來。所以tī 1627年，台灣第一位傳教師名叫甘狄士（Georgius Candidius），tī荷蘭政府ê指派下，加入台灣南部ê荷蘭公司，tī原住民部族中間從事宗教kah教育ê工作。到1645年，tī七個á是八個村落中設有學校，將近六百個男、女gín-á來讀冊，教授內容以記誦宗教冊為主。這lóng是用原住民ê語言來教學，同時訓練原住民教師來教導in家己ê族人。政府以供給學生米kah衫褲來支持幫助tsit項教育工作。 雖然課程ê內容kah影響範圍真有限，荷蘭人tī教育上ê努力，的確hō͘原住民有書寫in語言ê工具—羅馬字，而且tī in ê社會習慣上造成一kóa進步。有證據顯示以上ê智識（譯按：指羅馬字ê使用〉一代一代傳授落去，直到十九世紀ê初期。
3）中國時期（1661年到1895年）
（1）國姓爺ê統治時期（1661年到1683年） 以上已經敘述過，台灣ê發展kah殖民化，是tùi荷蘭人開始，in做tsit-ê島嶼ê統治者約62年。M̄-koh，荷蘭人多次kah漢族移民衝突，koh最後kah出名ê海賊國姓爺衝突ê結果，tī 1662年受逼撤退，國姓爺tī仝hit年，tī tsit-ê島上成做統治者。跟tòe荷蘭人ê撤離，漢人隨時緊捷（tsia̍p）湧進tsit-ê島嶼，這致使荷蘭人帶來ê西方宗教kah文明ê消滅。東方ê影響代替西方世界ê影響，而且漢民族文明注定beh改寫台灣ê前途。 當明朝被滿洲人推翻ê時，國姓爺希望tī tsia建立一個獨立ê國家，而且tī tsia從事恢復明朝ê活動。伊原本來是一位活跳ê海賊，伊卻證實家己是一位真gâu ê行政者；tī伊ê統治下，農業昌盛，而且社會秩序mā井然有序。 總是，tī tsit項研究ê範圍內，真顯然，tī tsit階段是一屑á都無建樹，咱一定tio̍h tńg到清朝統治ê時期，tsiah ē-tàng tī台灣看tio̍h ē-sái講是教育措施ê事務。 （2）清朝統治時期（1683年到1895年） Tī 1683年，清朝統治下ê中國tùi國姓爺ê孫á得tio̍h台灣ê時，m̄-nā無設立殖民政府，反tńg kā她變成中國本土ê一部分，而且kā它稱做「台灣」，tsit-ê名bat被荷蘭人取用tī一個小島，to̍h是現今ê安平；它而且成做福建省ê一部分。 Tsit-ê島上ê居民，tī tsit時期包括三種無仝ê種類，to̍h是開化ê原住民、未開化ê原住民kah漢人。第一種類ê原住民，m̄-nā服從漢人，而且接受真tsē in ê風俗，koh向漢人所認定ê文明邁進。第二種包括無受馴服kah獨立ê部落以及村民，in kah平原ê原住民仝款，本來kah kui陣來到ê漢人爭鬥，漢人tùi西海岸kā in趕走，in就向內陸四散，用武力奪取in ê土地，koh逼in逃入山區。直到tsit-má，tsiah-ê「高山族」對漢人極端ê反感kah憎惡，而且只要tsit兩個民族一旦有接觸，tsit種情況mā會繼續落去。 來自大陸ê漢人農業移民，進入台灣速度之緊，致使漢人人口tùi十八世紀中葉ê 150萬，到1895年漢人政權結束時ê 300萬。 漢人分做兩種，廣東來ê客家人kah主要來自福建ê「本地人」（Puntes）。Tsit兩種人之間ê爭鬥，tī大陸to̍h不時發生，來到台灣mā常常重現。 講tio̍h tī台灣ê漢人教育行政，並無明顯ê特點顯出kah中國本土漢人教育ê差別，例外ê是：無和諧ê因素、地方ê騷動，kah遠離中國本土ê政治隔離等等因素加起來，致使tī教育上beh khah強koh有力ê施政是困難ê。 中國政權kah荷蘭人ê教育活動區別如下：（a）前者ê教育對象是漢人，其次tsiah是原住民；荷蘭人ê課程完全kan-taⁿ為tio̍h原住民。這是料想會到ê，tsit時tsūn漢人人口大大超過原住民。（b）漢人ê課程無論tī形式上á是在內容上lóng是東方式ê，對宗教事務lóng無考慮；荷蘭人ê課程是西方式ê，並致力tī宗教教育。 總是，tùi以上兩個情形看起來，兩個政權lóng企圖kā in各自ê民族特性，透過教育來好好á教訓原住民。 台灣tī中國ê政權下，教育ê目的就kah中國本土仝款，主要是為學子準備科舉考試，其次tsiah教授日常生活所需要ê讀、寫。因為參加tsiah-ê考試必須有漢文經冊kah中國歷史ê知識，所以無論是官辦ê á是私辦ê學校，學習ê課程kah教育活動就根據tsit-ê方向來形成。 雖然tī中國ê教育制度，官辦ê學校包括州、縣kah初級ê學校，一看所謂官辦學校ê名單以及入學ê學生，就ē-tàng肯定tsiah-ê學校m̄是針對大眾，而且事實上in對教育mā少有貢獻。Kah中國本土仝款，教育tio̍h依賴私人辦ê學校。 私人辦ê學校，它ê目標在tī提供一般讀kah寫ê知識，á是為學子準備科舉考試。後者往往留在學校（私塾）十年以上，in學習ê課程包括讀中國經冊，to̍h是四書、書法、作文kah作詩。 所有私塾ê教學方法lóng是個別教學，án-ne比較受tio̍h父母ê歡迎，因為in時常一定tio̍h kā gín-á帶離學校。 Tsia值得提ê是，無論是官辦ê á是私辦ê學校，lóng無提供婦女ê教育。 直到1875年，原住民ê教育工作kan-taⁿ限tī受荷蘭人影響ê先人ê kiáⁿ孫。Tī hit年了後，中國開始對台灣有koh khah tsē ê關注。Tī 1886年，台灣已經成做中國帝國ê一個省分了後，巡撫劉銘傳試一個有趣味ê實驗，就是為真tsē部落族長ê kiáⁿ兒設立一間學校，這是向全體原住民傳授中國文化kah習慣ê計劃ê一部分。規定學生穿中國服，食中國飯；tsit-ê教育措施ê一般目的是beh漢化原住民。食物kah書籍免費供給學生，來鼓勵in繼續求學。學習ê課程kah一般漢人私辦ê學校類似，mā to̍h是讀、寫漢字為主要ê考慮。 （3）中國統治下由傳教士輸入ê西方教育 Tùi教育ê觀點，tī台灣ê傳教團體有權聲言in是傳授現代教育hō͘當地住民ê榮耀先行者。 當西班牙kah荷蘭人tī台灣拚手尾ê hit段目nih-á久ê時期，西班牙傳教士開始tī台灣北部工作。當西班牙tī 1642年被逐出ê時，in ê工作mā停止。 Tī 1850年，有兩位西班牙道明會修士tī台灣南部tòa落來，而且tī高雄設立教會kah學校。Tī 1894年，建立一間女子學校kah孤兒院，訓練漢人tsa-bó͘-gín-á成做家庭主婦kah教員，另外一間學校是為tio̍h訓練少年人tī教會當神職。後來tsit兩間學校到taⁿ iáu由西班牙傳教團體teh主持，m̄-koh，對tsit-ê島上一般教育ê影響是真微小ê。 Tī中國統治ê期間，siōng現代化kah系統化ê教育工作，是由英國kah加拿大ê長老教會傳教團體，各自tī tsit-ê島嶼ê南半部kah北半部從事經營。 起先，前者kan-taⁿ訓練少年人做牧師，m̄-koh tī 1885年，tī台南設立一間中學，科目內容有漢文、歷史、地理、算術、天文學kah聖經。有教會ê庄頭mā設有小學，由當地教會支持幫助ê漢人教員來教。一間女子學校mā設立，課程內容kah tsa-po͘人中學仝款，有一間附屬tsa-bó͘-gín-á學院，是為tio̍h訓練少年tsa-bó͘-gín-á從事教會工作。 加拿大傳教團體mā建立第一間神學院，接著有一間中學kah 女子學校，性質kah英國傳教團體所辦ê類似。 教會團體為台灣帶來現代化教育，mā同時傳播羅馬字ê知識，這對bē曉讀á是寫漢字ê成年人，是方便ê學習工具。 Tsit-má，日本人tī全島建立現代化ê學校，這致使傳教士tī教育方面ê工作無koh hō͘人所注目，m̄-koh過去五十年內，in對台灣人教育ê貢獻是值得慶賀ê。
註釋
（1）Tsit-ê名m̄是第一個被南歐人使用ê例。Tī葡萄牙有一個庄頭有仝款ê名，仝款，有一個tī阿根廷，另外一個tī巴西ê東海岸。Tī Benin（中譯：貝陵，是tī非洲西海岸）有福爾摩沙海角，而且tī馬來西亞有福爾摩沙山。葡萄牙人會取tsit-ê名，無啥疑問是因為tsit-ê島嶼hō͘ in想起in本國有仝款名ê庄頭á是殖民地。M̄-koh，siōng早ê航海人，當in第一pái看tio̍h tsit-ê美麗ê島嶼khiā-tshāi tī一片倦（siān）倦ê水色裡，猶原禁bē-tiâu huah：「美麗島！美麗島！」（"Ilha Formosa! Ilha Formosa!"）（見竹越與三郎，頁103 kah Davidson, pp.9,10）。幾世紀以來，中國人lóng認為台灣島嶼是琉球群島ê一部分，tī歷史文獻kah地圖上有無仝ê號名如「大琉球」·「小琉球」等等，見Davidson, p.2. （2）台灣siōng東pêng位置是tī東經122度6分15秒。首都台北，位置是北緯25度4分kah東經121度28分。彭佳嶼（Agincoort）位置是tī北緯25度37分35秒，位置tī東京向西18度ê所在，tsit-ê島ê時間就比東京慢五十四分鐘。 （3）澎湖群島是「台灣」ê一部分，位置是tī西pêng，tī台灣kah大陸之間，kah台灣之間由一個海峽分開，水深只不過100尋（sîm）（fathoms）。一隻船趁晚潮離開台灣，第二工早起就thang達到中國大陸ê港口。（見竹越與三郎，頁103） （4）見Davidson, p.2. （5）見竹越與三郎，頁106。 （6）「新高山」日文ê意思是「新ê siōng kôan ê山」，取代富士山成做日本帝國ê siōng kôan ê山峰。（譯者按：新高山to̍h是玉山。） （7）見Davidson, p.2。 （8）見竹越與三郎，頁106。 （9）見International Ene'clopedia, "Formosa." （10）見竹越與三郎，頁111。 （11）見International Encyclopedia, "Formosa." （12）見International Encyclopedia,"Formosa." （13）見《進步中の台灣》，台灣總督府，台北，1926年，頁48、49。 （14）同上，頁49~50。 （15）同上，頁50~51。 （16）關於茶、礦產資源、木村kah樟腦ê數字，見《進步中の台灣》，頁52一71。 （17）見Hayden, p.475. （18）見《時事年鑑》，1929。 （19）見Encyclopedia International, Year Bo͘k, 1928. （20）見Hayden, p.474。 （21）見Davidson, p.1。 （22）見《時事年鑑》，1929，頁629。 （23）見山川均，頁5。 （24）方言ê差別真少，kan-taⁿ tī發音上有kóa無仝。 （25）根據一位法國人，名叫潘德（M. Pant）所寫ê “Accoonts of a Trip to the Hak-ka District in Kwangtung"，客家人原來khiā起tī廣東嘉應州一帶，m̄-koh，tī第八世紀ê時，in遷徙到同省ê其它地區kah福建、廣西等地。（見竹越與三郎，頁114·115） （26）自從第一次世界大戰以後，受tio̍h中國本土ê改變kah日本教育ê影響，縛腳ê現象漸漸消失。 （27）實際上kan-taⁿ有七聲。 （28）見Mackay, pp.102,103. （29）見International Encyclopedia,"Formosa.” （30）見竹越與三郎，頁44。 （31）見International Encyclopedia,"Formosa” （32）見竹越與三郎，頁48~49。 （33）見竹越與三郎，頁48~49。 （34）見International Encyclopedia, “Formosa”。有關台灣ê原住民，馬偕（Mackay）有一章寫kah真詳細，見 “From Far Formosa”, pp.205,267：Tùi我個人ê觀察，我注意tio̍h台灣ê原住民kah北美洲ê印地安人，有驚人ê類似所在。M̄-nā男女ê體形kah相貌，連in ê生活習慣，kah北美洲ê印地安人真相近。M̄-koh，這是真oh tùi tsiah-ê類似點下結論，tsiah-ê類似點大大超過表面。咱對tsiah-ê部落ê起源瞭解siuⁿ少，我想kā tsit-ê問題留hō͘將來ê學者，去決定人類發展ê鎖環中，屬tī tsiah-ê原住民ê正確環結。 （35）見《時事年鑑》，1929。 （36）見竹越與三郎，頁119; Mackay, p.94。 （37）評議會有二十五位評議員，其中被指派ê高層官員有三位，tùi日本住民kah土生ê台灣人各任命十一人。