《草地囝仔做牧師》

 | | | 轉寄

《草地囝仔做牧師》林宗要牧師 自序

作者 林宗要 2010.07.04



我生長tī彰化縣芳苑鄉ê草地，gín-á時，常常有夢想未來ê作為，tī六十guā年前ê庄腳看tio̍h頭戴Helmet帽，身穿西裝（寒天是烏色，熱天是白色）ê牧師，心中有淡薄á欣羨kap愛慕，但自頭到尾無想tio̍h家己ē-tàng做牧師，完全是上主ê恩疼tsiah ē-tàng hō͘ tsit位平凡ê草地囝á成做牧師。雖然我對主ê呼召並無確切ê時間體驗，但tī進入神學院ê時就存感恩ê心，抱tio̍h完全委身ê奉獻心態去面對神學教育kap將來ê牧會工作。

1952年神學院畢業ê時，就有kuí-nā位長老代表教會到神學院來，希望我ē-tàng到in ê教會去做傳教師，我kā in講，一切委任傳道局ê指派。後來傳道局長親身tshuē我並kā我講：「傳道局已經決定派你到當時由全省TKC（台灣基督長老教會青年團契）所發起ê五角銀獻金運動所開設ê新屋教會，並講：「本局認為派你去新屋教會khah適合，mā知影有真tsē教會beh來請你去。」

因此tī七月初khāiⁿ二大件行李uì台北到富岡，koh轉坐輕便人力車到新屋去擔任首任ê傳教師，uì開拓到獨立kap建堂lóng總十四年久。Tī新屋牧會中確實體驗tio̍h牧會ê滋味，tsit段過程雖然是相當辛苦ê教會生活，suah定定tī艱苦中體會tio̍h喜樂ê感受（我喜樂ê牧會生活，就是tī新屋教會十四年ê牧會生活所建立ê）。因為家己認為相當用心來牧會才hō͘總會指定做理想ê農村示範教會，定定有外國ê朋友來訪問新屋教會。

同時kap地方機關（鄉公所、農會、學校）mā建立了良好ê實質關係，教會若有特別ê聚會，地方首長lóng會來參加。以青年為中心ê牧會，kā教會增加淡薄á活潑ê氣氛，tsit時tsūn，眾長執mā感受tio̍h可能無法度koh再kā牧師留落來ah，因為有真tsē教會lóng前來拜訪過我，ti71966年，受虎尾教會禮聘擔任該教會牧師十一年久，虎尾教會是一間真健全ê教會，組織完善，事工運作堅實而且真活潑，尤其對牧師ê謝禮非常厚（當時教會hō͘我ê謝禮是按總會規定加六成ê謝禮），對傳教者ê關愛，ē-tàng做其他教會典範。我tī虎尾ê牧會期間ē-sái用「無後顧之憂ê牧會生活」來形容，三名kiáⁿ兒lóng是tī-tsia ê時tsūn完成高等教育，koh-khah體會tio̍h主豐盛ê恩典kap祝福。

長子元生大學畢業了後，mā tshuē-tio̍h有淡薄á理想ê工作，因為 án-ne伊建議阮kám ē-tàng考慮牧會khah弱小ê教會，因此就去竹中ê東勢教會，認為適合阮當時ê生活，預定tī-tsia牧會到退休，但是因為環境ê變化kap師母ê過敏體質，不得不離開牧會已經有五年ê東勢教會，tńg來到無話講牧師娘ê故鄉----路上教會，tsit間教會是阮丈母出嫁路上ê厝了後tsiah成立ê，其成長ê過程有淡薄á艱難，mā定定受tio̍h迫害。二年後因為家庭ê緣故向中會請假三年到台北kap長男元生共同生活（因為伊ê bó͘-kiáⁿ lóng tuà-tī美國）。

洪志芳長老（我ê表小弟）知影阮ê狀況，bat向阮提起kám ē-tàng來木柵門諾會幫忙？我講若負責講道應該無問題，就因此kap木柵教會結了有淡薄á深厚ê情感。阮ê工作（主要是主日ê講道）有淡薄á受兄弟姊妹ê認同kap接納，十五年來（自一九八五年起），阮體會tio̍h比親情koh-khah可貴ê主內情誼，tī阮ê人生晚境中增加了阮ê身心正面價值ê感受，tsit種上主無限ê恩疼，是阮一直tī阮ê生活中不斷感謝ê主要原因。

雖然然tī木柵教會阮無法度專任牧師職，m̄-koh tī阮ê心態中阮對木柵教會所表達出來ê 猶原是阮全部ê信仰kap無保留ê心，因此得tio̍h各位兄姊ê肯定kap接納，對阮所表現出ê敬重kap關懷是阮深深感動ê事實。回想師母tī 1990年七月ê脾臟大手術，阮ê 囝lóng 無tī台灣，m̄-koh姊妹會妥當安排人輪流看顧手術中ê牧師娘，連續三禮拜久，伊對tsit種感情一直思念，銘感tī心肝內，ta̍k-pái提起tsit件 tāi-tsì，伊lóng會感動kah流目屎。雖然阮ê年歲已經kuân，過去也bat提出二、三pái請辭，但是lóng無法得tio̍h長執會ê接納，阮只有將tsit件 tāi-tsì交hō͘上主，ńg望祂ē-tàng為阮安排阮未來ê路，hō͘阮會盡阮應盡ê本分，tī人生ê過程中，榮耀上主是阮全生涯ê努力kap應該做ê人生目標，期待阮ê心願望主悅納。