《草地囝仔做牧師》

 | | | 轉寄

安心ê人生

作者 林宗要 2010.10.17

約翰福音十六章33節；使徒行傳二十七章18～25節

Tī咱生活環境中，當人tú-tio̍h問題ê時，第三者tiāⁿ-tiāⁿ會用「安lah！安lah」來安慰tsit-ê人。相信各位lóng bat有tsit-ê經驗，因為平安ê生活是人人所ǹg望--ê。有時，人若tú-tio̍h重大ê危機，雖然損失真大，只要無危害tio̍h性命，定定感覺he已經是不幸中ê大幸。無m̄-tio̍h，人若tú-tio̍h危機，to̍h會對人生有重大ê影響，若一個家庭發生狀況，比如厝內ê一份子，特別是khah重要ê人出問題ê時，kui家伙á lóng tī不安ê狀況內，由此可見平安對人ê重要性。因此，現實人生中，大部份ê人lóng以平安為siōng重要，但是人生真正ē-tàng平安mah？是m̄是真正ē-tàng安心過生活？保羅tī羅馬人書三章17節講「平安ê路，in m̄-bat知影」，tsia所提tio̍h ê人，是罪犯，m̄-bat上帝ê世人，mā to̍h是保羅所講虧欠上帝榮耀ê世人，mā to̍h是咱教會所講ê「罪人」，罪人ê生活，實在無平安thang講，因為無論tuì肉體或者是心靈方面去看，「罪」lóng是hō͘人不安ê主因。咱看社會上hiah-ê犯法ê人，雖然ē-tàng暫時逃避法律ê制裁，但是in ê良心必定不安。

有一ê小故事「錢kap良心」：十guā年前有一位有理想ê青年beh創業，可惜伊只是公司ê小職員，身邊koh無有juā-tsē錢，有一日kap一位年老ê同事，老人領有退休金三十萬kho͘（是當時青年員工一百個月ê薪水），teh落車ê時bē記tsah走，等伊發現ê時車已經m̄知駛去tó位啊（hit時hit-ê青年ē-tàng tuì車窗擲那包錢），退休老人因為行動不便suah來跋倒，無guā久就過身啊，這錢是準備beh hō͘伊細漢tsa-bó͘-kiáⁿ去西班牙學藝術ê部分費用。那青年得tio̍h hit筆錢，雖然生活得tio̍h改善，mā有創業，但是suah一直良心不安。後來青年用盡辦法tshuē-tio̍h hit-ê老人ê tsa-bó͘-kiáⁿ，共伊講詳情，而且付出相當ê數目補償伊，hō͘家己有機會thang贖罪。M̄-nā hō͘ tsâ-bó͘ gín-á teh生活上無所欠缺，並且iáu去自首，關了三、五冬tsiah出獄，因為án-ne，伊ê良心tsiah得tio̍h真正ê平靜。

Tī咱ê社會中，tsit種情況bē少，這是teh說明tī人心內，猶原有上帝所hō͘咱ê屬性，一般人叫做「良心」或者「天良」，過去台灣社會講「有良心ê人，一人已經過身，一ê人iáu未出世」或者講「鼻孔向下者無一ê有良心」，這tio̍h是基督教信仰中所強調ê「犯罪ê人，無一個好人」。Tú親像保羅tī羅馬書三章所強調ê，有罪ê人生是充滿不義、乖謬、偏離正道，無行善--ê，連一個好人mā無。羅馬人書三章13～16節，形容tsiah-ê犯罪ê人，惡質ê罪行，to̍h是人間所講充滿了各種歹代，17節強調平安ê路in m̄-bat知影。用屬靈ê觀點來看，犯罪ê人m̄-bat平安是啥；但是咱知影平安是uì上帝hia來ê，祂tsiah是賜平安ê主。咱看保羅書信，差不多每一張書信ê開始lóng有一句「賞賜平安ê上帝」（羅馬人書十六章20節；腓立比書四章7～9節），另外一句「願您tuì阮ê父神kap主耶穌基督得tio̍h恩典平安」Tsit句請安語tī保羅ê批中時常thang看tio̍h，咱ê上帝是賞賜平安ê上帝！因此主耶穌時常向學生講一句：Lín放心，是我，mài驚。（馬太福音十四章27節）Teh行神蹟ê時祂mā定定向hiah-ê人講：放心，起來，你ê罪已經赦免阿，你ê信共你救ê等等ê話語。咱siōng熟ê一句話to̍h是約翰福音十六章33節「我將tsiah-ê tāi-tsì kā lín講，是beh叫lín tī我內面有平安。Tī世上lín有苦難，但是lín ē-tàng放心，我已經贏了世界。」此句話是主耶穌叫信祂ê人安心生活，只有tī主耶穌內底ê人生tsiah會體會tio̍h真實ê平安，因為人ê不安是因為罪，主耶穌已經替祂所有ê人擔當所有ê罪，所以一個願將罪hō͘主耶穌承當ê人，一定ē-tàng體會tio̍h罪ê釋放，tsit種釋放是生活安心ê基石。因為基督徒已經體會tio̍h賞賜平安ê上帝是in ê主，所以基督徒ê人生實在是thang好囥下重擔而且有平安ê人生。咱tuì下腳幾方面來思考：

一、 體會赦罪ê安心
（馬可福音五章34節；路加福音七章50節，八章48節）

主耶穌行神蹟ê時定定會用「Gín-á，你ê罪赦免啊」，然後行神蹟，siōng ē-tàng引咱注意--ê，to̍h是hit位血漏十guā年ê婦人，伊用盡辦法，開乾伊所有ê家產iáu無法度治好伊ê病，有一次看tio̍h主耶穌tī人群中，伊認為只要摸tio̍h主耶穌ê衫褲，就ē-tàng治好伊ê病症，果然伊信心ê行動，hō͘伊ê人生問題得tio̍h解決，雖然伊信心ê行動是暗中teh進行（只有伊家己知影），但是主耶穌suah ài伊行出來告白伊ê信仰，當伊完成信仰告白了後，主耶穌向伊講：「妳ê信kā妳救啊，平平安安ê tńg去pah，妳ê病好啊。」相信tsit位得tio̍h主耶穌接納ê婦jîn人，一定因為主ê應允tsiah tī伊ê人生中有充分ê平安。因為伊過去hō͘病疼纏身，無法度有平安ê日子，m̄-koh因為伊信心ê行動解決了伊人生ê絕大痛苦，hō͘伊體會tio̍h平安ê人生。

Tī基督徒ê人生中，siōng ē-tàng感受ê生活to̍h是經過主耶穌所賜ê信仰，體驗赦罪ê平安，這是人生siōng值得放心ê所在。只要基督徒願將家己ê罪lóng囥tī十字架ê寶座頭前，一定ē-tàng感受tio̍h人生真正ê平安。寫《天路歷程》ê本仁約翰tī/冊--內提起hit位基督徒雖然決心beh離開the-beh滅亡ê城，m̄-koh iáu有真tsē俗務the觸纏，hō͘伊tī天路歷程中ài揹tio̍h各種重擔，tī tsit種揹重擔ê日子中，實在無法度體會tio̍h平安ê實質！當伊來到基督ê十字架面前ê時（當伊giâ頭看主基督ê時）伊所揹ê重擔tsiahthang完全囥下，了後伊ê天路歷程體驗就完全無仝啊。這是基督徒信仰生活上ê重要課題。每一個基督徒必須體驗tio̍h平安ê生活，絕m̄是kan-ta嘴講講或者是守戒規而已，是tī基督徒家己ê信仰生活豐富ê體驗，mā to̍h是基督徒ài願意將家己所有ê一切交hō͘主基督，家己無koh揹重擔ê時，咱ê人生tsiah有hông赦罪ê體驗，án-ne，基督徒tsiah ē-tàng uì心肝內產生充分ê喜樂kap平安ê生活。咱mā thang tuì稅吏撒該人生ê改變來思考，當伊iáu無tú-tio̍h主耶穌ê時，是一個有錢但是不仁ê人，但是當伊體驗主耶穌kā伊赦罪ê喜樂了後，伊ê人生就充滿tio̍h快樂kap平安，相信伊tsit種平安ê人生m̄是金ē-tàng得tio̍h --ê。Tī詩篇三十二篇1～2節「得tio̍h赦免伊ê m̄-tio̍h，遮蓋伊ê罪--ê，tsit種人是有福ê。只要心內無詭詐，耶和華buē算是有罪--ê，tsit種人是有福--ê。」相信基督徒ē-tàng明白hō͘人喜樂ê信仰內容，基督徒siōng大ê幸福並無kan-ta限制tī現實ê物質生活，更加是tī基督徒ê罪得tio̍h赦免，tsit種赦罪ê人生體驗是促成hō͘基督徒有夠額ê能力去面對kap經營伊ê人生ê主要動力。因此一個真實ê體驗tio̍h赦罪ê基督徒，一定ē-tàng有平安ê人生。

二、 逆境中ê心安
使徒行傳二十七章保羅坐船beh去羅馬。Iau未出發tsìn前，伊bat警告船長，bē-tàng出帆以免危險，但是suah無得tio̍h接納，出帆了後，真正像伊所講--ê船tī大海中tú-tio̍h tsiok大ê風湧，保羅suah tī危險中成做安慰kap鼓勵ê動力。咱ê一生，每一個人難保buē tú-tio̍h危機、逆境，這並m̄是咱所願意，每一個人lóng期待ē-tàng生活tī美好安定ê環境中，但是tsit種美好ê現實往往是人ê理想，人khah會面對tio̍h真tsē無願意見tio̍h ê逆境，tī生活中不斷面對一kuá生份ê環境，危機四伏以及未知ê前程，tī上或者經濟上有真tsē挑戰kap問題ê時，咱會感覺孤單無助，tsit種心理上ê壓力增加咱情緒上ê困擾kap緊張。對一個確信耶和華是咱ê牧者ê基督徒，一定ē-tàng體會tio̍h祂一定會指引咱人生ê道路，賜hō͘咱面對逆境困難ê能力，對一個確信上帝ê人，確信上帝會替祂ê名引tshuā伊ê子民行義ê路。

確實人lóng會為tio̍h 未知ê前途煩惱、不安。使徒傳二十三章11節，當暝，主khiā-tī保羅身邊講：「放心pah！」意思是to̍h算tī羅馬皇帝面前mā m̄免驚，因為主一定會kap伊同在。對一個信徒來講，有主同在，無論tī任何所在、任何景況lóng ē-tàng放心！但是以理書所講ê獅穴kap火窟，是真驚人ê情形，但是因為有主ê同在，就變做榮耀燦爛了，基督徒ê人生ài有tsit種體驗，只要上帝kap咱同在，就m̄驚任何逆境，因為有主ê所在，逆境會成做聖路，苦境變成聖路ê人生體驗，就ná聖詩二八七首所描述--ê：夢中看見天開，榮光出現，上帝施落恩情天地相連，試煉kah-ná主聖使，所過淒慘煩惱成伯特利。「苦境變做聖路」確實是基督徒ê信仰生活ê寶貴內容。咱ê人生定定會處tī苦境中，但是m̄免驚，只要你ê人生中有主ê同在，就會改觀，當一個人tú-tio̍h主ê聖使將苦境變為聖路ê時，伊過去所有ê試煉、煩惱、悲慘ê狀況，kám m̄是lóng消失去啊mah？所以人必須tī人生道路中儲備ē-tàng化解逆境ê真理，to̍h是主kap你同在，會隨時聽tio̍h主ài咱放心ê聲音。

三、 Tī苦難中ê安心（約翰福音十六章33節）
主耶穌講「Tī世上lín有苦難，但是lín thang好放心」，只有主所應允ê是真實無虛假，kap人ê誓言無仝。Tī人ê社會中，mā有類似ê保證，tiāⁿ-tiāⁿ聽人講：「囥一萬ê心」，ē-sái講是事實證明he是無可靠--ê。有一位人士將台灣ê房地產賣掉，得tio̍h ê錢差不多有千guā萬kho͘，伊phah算beh到美國置產。伊ê好朋友，kā伊講目前台灣ê利息好，保證安全妥當，經過朋友再三ê保證，果然將全部一千萬kho͘借hō͘朋友，tsit開始有提了幾個月ê厚利，心中有淡薄á歡喜，但是無guā久tio̍h變成血本無歸ê下場，suah hō͘伊破產。民國七十八年台灣股市當teh熱烈ê時，有人用厝借錢伍佰萬投入股市，心中認為一定會thàn錢。頭先iáu有一kuá甜頭，但是無guā久tio̍h崩盤，自一萬二千點變成三、四千點，一千萬tshun二、三百萬，最後只有賣厝還債，bó͘ ma7ka7伊離婚來離開。

有一位姊妹ê老父鼻á buē爽快去tshuē醫生，醫生講是敏感而已，無什麼關係，安心lah！但是當事人buē放心koh再經過三位醫生ê診斷竟然是第二期鼻咽癌。Tsiah-ê事例說明了世人所講ê放心、放心，但是結果suah無法度放心，這to̍h是人啊。到底siáng ē-tàng hō͘人實實在在放心neh？相信tī世間上，若ē-tàng tshuē-tio̍h一位絕對thang hō͘咱放心ê對象ê時，咱確實會完全無保留ê將一切交託hō͘伊，但是事實上世間上真oh tshuē-tio̍h tsit種人，因為人ê一切lóng會改變。對基督徒來講，咱了解，主耶穌是咱絕對ē-tàng交託ê對象，因為祂是咱ē-tàng完全信賴ê救主，只要咱願意將一切交託hō͘祂，表現出絕對ê相信，好親像聖詩二七五首「siōng好ê朋友to̍h是耶穌」所吟唱--ê，咱ê心失落不安，或者是掛慮艱苦代，to̍h是咱iáu未深信主，無放心交託主ê緣故，因此基督徒ê信仰生活若ē-tàng實實在在信賴主，交託主，就ē-tàng實現平安ê人生。因為對一位深信體驗上帝同在ê信仰者來講，任何世間上ê掛慮，身軀上、精神上ê負擔，家庭ê問題、事業ê問題、社會ê問題、人生ê苦難，這款tāi-tsì，tsē kan-nā啥，但是lóng bē影響基督徒kap主耶穌之間ê感情。Tú親像保羅tī羅馬人書八章31節以下所提無論什麼困難、困苦、迫害、腹肚guā枵、guā sàn-tshiah、危險，甚至死亡lóng無法度阻檔一個真誠ê基督徒kap主耶穌ê感情kap信心。只要基督徒有tsit種對主耶穌的確信，ná親像保羅tī腓立比書三章ê告白用認bat主耶穌做上好ê寶，án-ne就ē-tàng放棄任何會影響tio̍h kap主耶穌ê實質關係ê事物。因為tsit-ê人世間ê苦難對信徒來講是ē-tàng放心--ê，伊ê關鍵tī對主耶穌ê確信，因為基督徒若ē-tàng確信主耶穌，真自然tio̍h就會明白上帝所講ê約翰福音十六章33節ê內涵，問題teh把握你kap上帝之間ê關係。假使無建立良好ê關係，當然基督徒ê生活就無法度tī伊ê人生中得tio̍h肯定。

人生現實ê狀況，有真tsē問題kap困難，基督徒mā仝款，m̄-koh基督徒ài因信來堅立tī任何困境中，因為基督徒已經體驗tio̍h人生ê上好ê寶。人生境遇kap困難定定kap咱生活鬥陣，只有tī你人生中建立ē-tàng放心ê實體，he就是hō͘主耶穌基督tī你ê人生排第一位。