《草地囝仔做牧師》

 | | | 轉寄

生活ê原則

作者 林宗要 2010.11.07

路加福音六章36～43節

原則kap秩序是人生生活ê要素。咱若看人類史就會發現到近代ê人類社會kap以前往完全無仝：複雜kap 多樣性是伊ê特色。咱用台灣ê狀況來觀察ê時就koh-khah了解，這三、四十年來台灣ê社會thang用急變ê社會來形容伊，會成做án-ne或者是台灣社會ê必然性。因為每一個國家、社會lóng會有tsit種經歷，自某種型態beh踏入另guā一種社會型態ê時確實會有tsit種現象。過去咱ê社會是以農業為主，伊比較khah單純，但是自三、四十年前，咱ê社會就進入工商社會，因為工商ê發展，自然造成農業ê衰退。今á日若到農村去看，咱就會了解tsit種事實，台灣農村kan-ta剩一kuá五十歲以上ê老翁仔某，青年人lóng離開阿，因為都市社會khah有吸引力。

我teh讀冊ê時tsūn，台北ê人口只有二十六萬人，tsit-má已經超過了十倍以上！Tī人口不斷增加，生活空間顛倒減少ê狀況中，人ê生活問題就會有複雜ê變化，tsit種複雜ê情形是ē-tàng tuì人生社會ê實況來體驗tio̍h。Tuà-tī台北市ê人siōng深刻ê體驗，to̍h是交通ê混亂，確實，台北市ê交通buē-sái koh再惡化啊，因為主要道路若發生事故，án-ne就會真慘。

無秩序mā是現今台灣社會ê特色，咱每一個人對tsit種現象lóng真清楚，tsit種情況mā可能kap咱ê民族性有關；因為咱是自私無公德心ê民族，一個自私ê人當然bē有守法ê精神kap行為，tiāⁿ-tiāⁿ表現出siáu貪ê心態。阮tau附近巷仔內tuà一樓ê人 lóng kā路邊ê停車位佔leh，有一位見義勇為ê人士就tī in ê壁頂或者鐵板頂kuân用油漆寫二個大字「自私」，有人即時處理，有人iáu是m̄ tshap。這是小tāi-tsì，mā ē-tàng看出人心ê 無守法，無守法ê人自然是無膽識ê心胸，tuì tse會演變出真tsē人性ê問題出來，咱社會狀況ê驚人，亦是kap人心有關。哲人巴斯卡講：「上帝創造人，m̄是天使mā m̄是禽獸，但是當人想beh做天使ê時，就會發生悲慘ê現象」人m̄-nā做無成天使顛倒變成禽獸。Tī咱ê社會中有真tsē比禽獸koh-khah不如ê行為，tsiah-ê人ê心態to̍h是án-ne，因為in想超出人ê界限，人想beh取代上帝ê位置。

巴斯卡koh講：「Jú ē-tàng守法jú有幸福thang講」，為什麼tī歐美一kuá國家in ê社會狀況會hit種完美理想？一位出國九年ê台灣人描寫瑞士ê社會，講鎖匙lóng khǹg tī固定ê所在，主人無tī朋友mā thang自由出入，原因何在？人人守法ah！守法表現出國民ê氣質，有氣質ê國民當然伊ê社會國家就會有進步kap幸福，這是事實。確實咱tī he kuá進步ê國家內，會發現tio̍h in ê生活是有秩序、有原則ê。咱看社會生活中hiah-ê破壞秩序kap原則ê人，生活必定是驚人--ê。Hiah-ê驚人ê行為當事人，lóng是生活tī無秩序、無原則ê結果。真tsē腳步踏差ê有為青年lóng kap tse有關。譬如：有一個中年人有溫暖ê厝，bó͘賢慧、kiáⁿ兒可愛kó͘-tsui，伊本身有理想ê khang-khè，生活tī富裕中，但是因為一次ê舞會，kap舞女結識同居，因為舞女ê要求ê jú來jú tsē，伊侵佔公款，事發hông判刑，伊ê bó͘ mā因為絕望請求離婚離開，致使失去一切。Koh有一位三十九歲ê博士因為pua̍h-kiáu去刣一位好額ê婦人，事發hông判刑終身監禁！相信tī咱ê社會中tsit款事例真tsē，主要原因tī buē-sái安份守己，堅持人生ê原則所造成！ To̍h是頭前引用巴斯卡ê名言：人想beh做天使，結果顛倒是悲慘ê結局。基督徒mā是án-ne，真tsē hō͘人無認為是基督徒，因為伊ê信仰生活無秩序kap無原則，tsiah發生驚人ê悲劇者數目bē少，這是基督徒值得警惕ê tāi-tsì。人tī複雜多變ê社會中ài用人生必守ê原則作伊生存ê根據，tsit種人生ē-tàng通順完美。用信仰生活ê準則作信仰生活ê根據ê時，信仰tsiah ē-tàng tī án-ne複雜多變ê狀況中有突破kap成長ê表現。

今á日咱tuì tsit段聖經來學習主耶穌教咱基督徒應該有ê生活原則是什麼？咱tio̍h用什麼原則來作生活取捨ê根據neh？當然基督徒生活ê原則必須確立tī上帝ê話，伊是記tī聖經中，但是若用tse來做原則ê時，咱會知影伊ê範圍siuⁿ闊。Tī-tsia主耶穌bat教示咱幾件生活中重要ê原則：

一、 仁慈心懷
仁慈ê心懷像天父ê仁慈，tī馬太福音五章48節主耶穌講：「所以lín ài完全，像lín天父ê完全仝款。」相信咱ē-tàng了解主耶穌tī-tsia所講ê意思，人當然無可能有像上帝ê純全，但是suah ē-tàng生活teh符合上帝ê要求中，相信主耶穌tī-tsia向咱要求ê，to̍h是基督徒ē-tàng完成受創造ê目的。

上帝創造人是在teh榮耀祂家己，只要人ē-tàng完成伊，to̍h是達成天父上帝ê純全。耶穌ài基督徒ê生活原則達到像天父上帝ê仁慈，當然人無可能像上帝ê仁慈，像上帝ê愛，主耶穌tī-tsia所說明ê是khah屬於功用性。人teh生存中若不斷phah拼完成上帝所交託ê任務，就ē-tàng達成上帝要求人hông造ê目的，也thang理解像上帝ê仁慈kap像上帝ê完全。所以基督徒生活ê原則ê主要條件必須ài確立teh服從上帝ê旨意為主。保羅tī羅馬人書十二章1～2節所講--ê：「所以兄弟啊、我以上帝ê慈悲勸lín將身軀獻上，當作活祭，是聖潔ê，是上帝所喜樂ê，lín án-ne事奉，是理所當然--ê。Mài效法tsit-ê世界只要心意更新tsah有變化，叫lín察驗啥物是上帝ê善良純全thang喜樂ê旨意。」用tse來解釋基督徒ê生活原則siōng適當。

二、 用祝福代替咒詛
近代教育強調多鼓勵、o-ló tsiah m̄免處罰kap責難。九月中tī高雄有一位國校老師因為體罰一位蠻皮ê查某囝仔成為社會爭論ê議題，到底老師kám ē-tàng體罰學生？這是一個自古到taⁿ ê老問題，mā是見仁見智ê問題，當然學生ê問題kap父母教養kiáⁿ兒有關。咱ē-tàng tuì社會生活中看tio̍h父母對kiáⁿ兒教養ê問題，實在是每一人無仝，有人嚴格、有人m̄管、有人用心全力teh教，自然會有無仝ê人格出現。主耶穌tī tsia ài咱基督徒對生活ê原則是確立teh對人ê關係，儘量用祝福o-ló取代咒懺kap責備，因為基督徒必須ài有良好ê社會生活來見證信仰。Tī基督徒ê社會生活中，有真tsē無仝ê接觸，尤其是人kap人之間ê關係，tī基督徒信仰中，tiāⁿ-tiāⁿ會要求基督徒bē-tàng企圖去評斷別人ê責任，應該向所有ê人顯出基督徒應該有ê疼心。咱ē-tàng tuì社會生活中體會tio̍h，有一kuá人一開嘴to̍h是用khau洗kap批評ê言詞，試想tī-tsia人kám ē-tàng和平相處？主耶穌tī馬太福音七章12節「所以無論何事，lín願意人án怎對待lín，lín mā ài怎樣對待--人」，相信tsit種生活方式是咱各人lóng了解--ê，因為人ê本性to̍h是企盼人ē-tàng對家己好，無想beh別人對待家己bái，ē-sái講是自私ê人性往往無法度達到tsit種生活方式，suah致使造成人生ê真tsē不幸kap問題。有一篇故事：gín-á tī山內，伊為tio̍h一件無順tsiông ê事來懊惱受氣、大聲講pháiⁿ聽ê話，tuì山內傳轉來ê聲音mā是kap伊所喝ê內容仝款，伊jú大聲罵pháiⁿ聽ê話，回音mā是大聲pháiⁿ聽，gín-á向伊ê老母tâu，母親教伊mài用惡言相向，應該試看覓講一kuá好聽o-ló ê言語，gín-á聽從去做，回音就變好聽啊！雖然這是自然現象中ê事實，suah ē-tàng做咱生活上ê原則。

主耶穌tī tsia要求基督徒ê是建立和平ê社會，是達到人ē-tàng用祝福o-ló代替咒懺kap批評。Tī án-ne境況中必然有完美理想ê表現，mā是造就幫助人ê利器，基督徒ài m̄-thang 對tsit種生活方式放棄。巴斯卡克里亞（南加大教育系教授）有一本《疼、生活kap學習》ê冊，真受歡迎，受學生ê肯定，siōng主要ê原因to̍h是伊用上帝kā咱講ê精神，用鼓勵、祝福、o-ló ê教育方法，因此效果真好，咱知影現代美國ê大學生真無簡單，但是對伊suah是非常肯定。

三、 危險ê領導（路加福音六章39～40節）
耶穌koh再用比喻來提醒咱一件生活上ê問題，tī人ê社會生活中，必須有領袖，這是真自然ê tāi-tsì，所以生存tī社會中ê人加加減減lóng有tsit種「領袖慾」，beh做領袖ài做大。若機構中有一個khah出色ê位置，人人就會不擇手段去爭取，這情景咱ē-tàng tuì實際社會看出，tsiah ē-tàng完全了解。有時tī教會中ê選舉mā會有tsit種情形發生，長老會ê總會議長kap中會ê議長kap khah重要ê職位，加減lóng會有tsit種表現，這mā是自然ê現象，基督徒kap牧師mā是有慾望ê凡人，差別ê點是tī個人ê節制而已。因此領袖慾是難免--ê，但是問題是tī一個人若無實力只空有hit-ê屈勢，suah想beh做領導者，he會有危險ê下場，上帝用tsheⁿ-mê領導tsheⁿ-mê，來說明tsit種危險ê領導，因為tsheⁿ-mê是有先天ê缺陷。這並m̄是輕視，實在是因為in ê目tsiu無法度看tio̍h光明ê世界，欠缺光明ê條件是in ê siōng大問題，咱用靈魂之窗來形容目tsiu看bē-tio̍h ê人to̍h是失去了靈魂之窗ê人，是真痛苦ê人生。像海倫．凱勒，世上mā只有伊一位，其他tsheⁿ-mê ê人大概lóng khah困難kap目tsiu明ê人競爭。Tsheⁿ-mê ê人khah需要依賴別人或者物件tsiah ē-tàng行動，khah pháiⁿ去擔任導遊ê責任，因為這是超出伊ê能力範圍，「無力硬beh搶大擔」，結果一定會發生問題，人生生活bē-tàng疏忽tsit種事實，人生有一件重要ê事實to̍h是衡量咱本身ê能力，照各人所領受ê才能去完成人生ê一切狀況，這是人生ê大原則。

台語俗語：「無毛雞假大格」，m̄知家己ê能力，iáu-beh假氣派，咱一定ài了解，bē-tàng做出能力所無法度負擔ê部分。同時tsit種危險ê領導mā會出現tī教會ê體制問題上，牧師kap教會ê關係，因為伊是領導者，一ê無注意就會陷入tsit種危險ê領導中！

四、 認bat家己（路加福音六章41～42節）——等於表現疼ê人生
主耶穌用樑木kap刺來說明基督徒ê生活原則，是必須ài建立teh認bat家己ê世界，tsit-ê比喻是針對人性通病，to̍h是tiāⁿ-tiāⁿ看tio̍h別人ê問題、缺失，但是suah m̄知家己ê tîng-tâⁿ，別人身上ê一kuá問題咱真簡單發覺tio̍h，但是家己本身ê一kuá問題家己suah無知影。耶穌用樑木kap刺來比喻實在是siōng適合啊。主耶穌深知人性ê狀況，tiāⁿ-tiāⁿ是看會tio̍h別人看家己suah真困難。Tsit種情形to̍h是tī咱生活中真tsē對人嚴格，對家己真tshìn-tshái ê表現，尤其是漢人，對家己ê問題lóng kā伊掩崁、否定！你看hiah-ê犯大案ê兇犯，teh法官審問ê時（尤其是初審ê時），tiāⁿ-tiāⁿ是極力否認，甚至咒tsuā！但是對人suah真刻薄，真gâu批評、指責別人ê過失kap tîng-tâⁿ，這to̍h是m̄-bat家己！雖然tī咱ê教示中，tiāⁿ-tiāⁿ會聽tio̍h一句真有意思--ê「律己嚴，待人寬」ê話，ē-sái講是tī事實生活上，真少做tio̍h tsit點。咱khah tsē ê心態，to̍h是ná親像耶穌ê比喻。有一篇故事：兩兄弟睏中晝ê時，hông畫烏面，醒來ê時各人心內有數，lóng teh笑對方ê烏面但是家己m̄知影，in ê老母叫in去照鏡，koh教示in，人生ài tiāⁿ-tiāⁿ看家己，反省檢討家己ê生活，bē-tàng只看別人！咱人生經驗中，時常聽tio̍h ê to̍h是人teh批評、議論別人，真少聽tio̍h人teh反省、思考家己、檢討家己。

信仰需要建立tī不斷反省中，咱ài ê不時反省懺悔認罪。為什麼人會有án-ne ê通性？主要原因the欠缺疼心，一個充滿愛心ê人，buē tshìn-tshái去批評、議論人ê缺失、是非，因為愛會遮蓋一切m̄-tio̍h，有愛心ê人，伊所看tio̍h ê只有完全ê美好，無愛心ê人所看tio̍h、所注意--ê to̍h是別人身上所有ê缺失。咱知影人ê無完全kap缺失，日本俗語講：「無論何人，你kā伊拍，lóng會有土粉」，每一個人lóng有缺點，但是惡人身上mā有可能有優點！譬如：有一ê gín-á尾指殘缺，人一直看伊，伊不歡喜講，為什麼大人一直看這ki殘缺ê尾指，suah m̄看其他好ê九ki指頭仔neh？上帝教示咱ài不斷認bat家己，時常儆醒省思，用完全ê愛心表現出咱ê關愛tī別人ê身上！

基督徒tī社會上beh建立良好ê生活原則，發揮做光做鹽ê特質，來榮耀主。