《草地囝仔做牧師》

 | | | 轉寄

去蕪存菁

作者 林宗要 2011.01.02

以弗所書四章25～32節

偉大ê歷史學家湯恩比ê著作《文明ê試煉》中bat提出一句真有警示性ê話，對現代人ê警告：「歷史證明，過去人類所phah拚ê，只是hō͘人類進入一個koh-khah tsē戰爭、koh-khah tsē糾紛，koh-khah tsē災禍ê時期」，咱看近代世界史就ē-tàng體會出tsit位偉大ê歷史學家所講ê話是非常切實提出人類ê問題。

若用khah淺白ê講法：是人類用心phah拚追求ê事物tī人類中間帶來koh-khah tsē ê問題。因為咱四界ē-tàng看tio̍h人類iáu是活tī戰爭不斷ê糾紛，以及真tsē災禍中。貧苦ê非洲人因為飢荒tsiah生活kah非常痛苦，餓死ê人tsē kah-ná親像山、傳染病ê發生、tiāⁿ-tiāⁿ因為真少部分自私ê人所引起ê戰爭suah thâi死無數ê人。進步中ê國家ê天災地變（1995年1月ê日本阪神大地動，死亡五千guā個人，無厝thang tuà ê人二、三十萬人，損失近千億萬美金。）或者是飛機失事，或者是科技所發生ê失敗，化工廠ê問題，工業生產ê災禍等等，lóng說明人類所面對ê災難ê普遍性，無分貧富、民族、階級。雖然人類有心想beh改變，文明ē-tàng幫助人類ê生活uì khah理想、完美ê方向去，人類付出一切ê期待hō͘生活環境koh-khah完美充實，人所得tio̍h ê suah是片面ê充實，（比如物質生活面ê豐富而已，用台灣做例，空前ê物質富裕，但是mā是m̄-bat有ê政治、烏道、宗教等社會現象ê惡質化），tuì人類整體ê實況來看ê時，確實tú親像湯恩比所講，人類一切ê phah拚只製造出koh-khah tsē ê混亂kap問題，咱用咱切實ê生活環境（污染kap癌症）來看人類ê生存ê時就ē-tàng koh-khah了解。1995年2月德國ê鏡報批評，台灣人ê生活環境ná親像豬tiâu，雖然有一kuá人會提出反駁，但是tuì整體ê狀況去了解咱ê生存環境ê時，台灣ê環境確實無juā適合人khiā起，這是不爭ê事實。為何會造成如此現象？照理社會ê進步，經濟ê大改善，對人民生活品質應該是有正面ê作用，為何台灣近年來人民ê經濟生活方面比過去khah富裕，但是為何整體生活hō͘人批評？Tsit種原因可能關係tio̍h咱ê民族性以及心態，咱雖然聰明，但是suah是用真自私ê態度待人接物，tī社會性ê表現上，咱所表現ê tiāⁿ-tiāⁿ是負面khah tsē過正面，因為自私ê人tiāⁿ-tiāⁿ buē顧慮tio̍h整體ê存在。一位學者bat講「中國人是世上siōng巧ê人，仝款ê tāi-tsì，ài一個中國人或者外國人去做ê時，中國人做了khah緊koh好，若是beh二個人以上ê中國人去做仝款ê tāi-tsì ê時，水準tio̍h buē到外國人」，tsit句話充分說明了中國人自私心態，咱知影一個自私ê人，就無可能有公德心，因為自私ê人kan-ta顧家己無顧別人。Tuì咱ê日常生活中ê細節thang知影，是啥物原因hō͘時常誇口有五千年文化歷史ê中國人輸hō͘外國人？問題就是tī自私貪心ê價值觀。

飼狗ê人，ta̍k早lóng會帶狗去公園運動kap放屎尿：一位婦人ta̍k早摒掃家己厝前ê環境，suah將垃圾塞入去水溝內底，類似tsit種情形，咱四界thang看tio̍h，這是造成咱社會ê混亂kap問題，咱知影人是群居ê社會生活者，tsit種自私利己ê心態，確實造成社會上真tsē負面ê結果！

而且近幾年來社會上大多數ê人重名重利，koh-khah hō͘咱ê社會增加負擔，這to̍h是國際間對台灣ê現況siōng確切ê批評。通常kan-ta知影報喜m̄報憂ê官府，lóng buē去檢討反省，顛倒是用別人太主觀、偏見來做反駁ê講辭，因此koh-khah形成了咱惡質ê社會。

生存tī án-ne社會生態中ê咱，如何做一個世上ê光、地上ê鹽ê基督徒角色，是咱現實ê信仰使命，tsit種心態是每一個基督徒必須樹立真正信仰生活ê路徑！

一、 人性ê弱點
咱tuì以弗所書四章25～32節保羅勸免以弗所教會ê基督徒ài除去（漢文譯做「棄絕」）真tsē不良操行或者行徑，來建立符合上帝所要求ê信仰生活ê真實內容。Tī保羅ê書信中，伊時常要求基督徒ê生活ài kap受召ê身分相稱，mā to̍h是信心kap生活有一致ê內容。基督徒必須用真實ê生活證明咱是基督耶穌ê子民，所以必須棄絕真tsē危害基督徒信仰生活ê不良行徑。基督徒必須kap hiah-ê無受召ê外邦人有所區別，因為咱既然是上帝用重價值贖回ê，就必須ài活出上帝ê款，ài有上帝ê樣式ê先決條件，to̍h是有上帝ê屬性，咱深深了解上帝ê疼kap公義，tī聖經中時常提起「當用聖潔ê裝飾（作為），敬拜耶和華」（詩篇九十六篇9節，二十九篇2節；歷代志上十六章29節），因為上帝是聖潔公義ê主。彼得tī批中mā要求基督徒ê生活ài有上帝ê聖潔，「Ná親像呼召lín ê是聖潔ê，lín tī一切所行ê tāi-tsì也tio̍h聖潔」（彼得前書一章15節）「耶和華講：lín ài聖潔，因為我是聖潔ê」（彼得前書一章16節）（哥林多後書十一章44～45節）。

Tsit種上帝神聖ê性格所要求ê，to̍h是要求屬祂ê人tī/teh祂面前有聖潔ê作為。

這to̍h是tī咱ê教會生活中。一直強調基督徒必須有聖潔ê行為ê主因。咱ài成做新ê人，ài有新人ê生活內容，（羅馬人書十二章1~2節）；哥林多後書五章17節）保羅tī以弗所書四～五章to̍h是強調tsit方面ê信仰生活，「Lín應該效法上帝kah-ná蒙慈疼ê囝兒仝款」（以弗所書五章1節），續落來無論是teh消極或者積極方面lóng詳細說明了一個上帝ê子民應該有ê生活方式，人性ê弱點to̍h是生活方式ê阻礙，咱ē-tàng tuì咱ê信仰生活中體驗tsiah-ê狀況。

1） 自私ê個性是咱所ē-tàng體會人性中siōng普遍ê缺陷！Tsit種弱點自亞當開始就tī人間，咱看亞當如何形容上帝hō͘伊匹配ê夏娃，伊ê形容詞是「骨中骨，肉中肉」，但是當犯罪了後彼此hō͘推責任，亞當向上帝辯講：「是你所hō͘我作伴ê婦人害我犯罪ê」（創世記三章12節）。一直到今á日，咱siōng tsiap看tio̍h ê人性缺陷，to̍h是tsit種利己自私ê個性表現。（譬如翁仔bó͘當利害tī目tsiu前ê時，先顧家己）。咱知影人ê存在是建立tī社會性ê互動關係上，m̄-nā tī siōng親密ê家庭環境中，甚至tī一般ê社會生活中，lóng需要tsit種群性ê關係。Ài hō͘人生ê內容koh-khah充實kap完美，關鍵是tī人彼此之間發揮相當程度ê社會性，mā to̍h是克服自私利己ê個性，用互相ê關心去分擔人生ê責任，án-ne一定有美好ê結果，家庭ê美滿或者社會ê秩序，通常lóng是因為人有tsit種共識來形成ê。

咱thang tuì幾句台灣諺語看出人性ê自私，○1別人ê kiáⁿ兒死buē了。○2日頭赤映映，隨人顧性命。○3自掃門前雪，mài管別人瓦上霜。這lóng反映出人ê自私心態。

2）無互相敬重ê人性。自私ê必然結果，to̍h是無尊重別人，因為伊ê人生kan-nā顧家己，無顧別人，tsit種心態造成社會生活中所看tio̍h ê人kap人之間ê狀況——冷淡、無情。主因是自私所形成ê結果，tī人之間無互相敬重ê誠意，tio̍h會輕視別人，buē將別人看在眼裡，結果tio̍h造成咱社會混亂ê現象，欠缺尊重ê所在，永無法度建立秩序。孟子「君子用仁存心，用禮存心，仁者疼人，有禮者敬人，疼人者人lóng疼伊，敬人者人lóng歌之」，tsit種偉大ê教示tī極端自私ê中國人身上kah-ná無發揮啥物作用。

Tsit種人性ê自然結果to̍h是造成人kap人之間ê隔閡（無信任ê存在）、疏遠、輕視、對立，產生問題（衝突）。

咱若詳細思考、觀察咱ê生存環境，就會了解tsit種人性ê弱點所造成ê傷害，失去互相信任ê社會中ê現實狀況！實例○1親人拜訪，大人無tī，只tshun gín-á，雖然表明身分，但是m̄ hō͘伊ê入去，因為父母交代過，生分人bē-tàng開門。○2船客互相m̄信任，二等艙二人仝房間，互相ioh對方心術不正，拜託船長保管珠寶kap值錢ê物件，看對方可能是無正經ê人，腳手無清氣，另一人mā仝款，船長講：如何辨別lín二人？自認好人，別人suah是歹人。

Tsit種m̄信任別人，koh ioh別人ê情形一直lóng有，無法度發揮正面ê社會性，這to̍h是今á日ê社會混亂ê原因！

二、 人為ê克服法
對人性ê弱點，人一直有心想beh用人ê方法來解決，自古以來人就一直teh運用人ê智慧想beh改進人性ê弱點，ná親像：

1）教育to̍h是siōng基本ê方法，因為人一直想用教育來感化人性，tī-tsia所講ê教育是指廣義ê教育來講，有家庭教育、學校教育、社會教育等等，尤其處tī升學主義ê時代，父母雖然關心kiáⁿ兒ê學校教育，但是對做人應盡ê本分，suah無kā伊關心，因此造成受過大專教育ê kiáⁿ兒，suah表現出真無人性ê行為，雖然teh教育ê內容裡mā強調真tsē冠冕堂皇ê人生道理，但是suah lóng像馬耳東風，騷bē-tio̍h真正癢ê所在，所以tī咱ê社會，tiāⁿ-tiāⁿ有高度智慧ê犯罪案發生，中國人ê倫理道德、四維八德ê道理實在是非常偉大，只可惜欠缺行動化，tsiah變kah空疏遠闊、無實際。

2）法律mā是人所採用ê另一種方法，咱知影新加坡ê民主制度to̍h是採用重罰政策，譬如有一kuá小tîng-tâⁿ mā用重刑，因此為tio̍h in美化環境ê實施，人民tshìn-tshái擲sak垃圾，to̍h ài穿特製服裝tī路上撿垃圾，而且另guā有重罰。Bat有一位十八歲ê美籍少年，Mitsae Fay（費麥thang），因為傷tio̍h別人ê車，損毀公物，hông判2300美金罰款，強制出境，koh鞭phahkha-tshng六下，引起美國大震撼，但是新國並無kā伊tshap，mā是照常執行。重罰到某種程度可能有作用，但是mā m̄是絕對。

3）道德，人ê修為是另一種hiah-ê人時常用ê方法，這是禮治ê問題，to̍h是用固有ê道德當做禮治之本，來克服人性ê弱點，tsit種重視道德禮治方法ê成果，tiāⁿ-tiāⁿ關於個人ê修為，因此持有tsit種主張ê人，特別強調個人ê修為，並用建立人格生活做基礎，tsit種重看自身ê人格，用人ê修為當做克服人性弱點ê人，tiāⁿ-tiāⁿ有自恃為義ê心態，tī信仰ê世界並m̄是真實ê，因為一個罪人ê道德，是thang用道德ê破產者來形容伊，這to̍h是為何tī人間有真完美高尚ê倫理道德ê論講，suah看無到/未到/bē-tio̍h有實行ê結果。

這to̍h是造成人生社會ê真tsē問題ê主因，tī-tsia咱ē-tàng看tio̍h問題ê重點，是tī siōng基本ê人心ê問題，mā to̍h是咱ê信仰所強調ê罪性ê問題，咱若看保羅ê告白就會了解，伊tī羅馬書第七章ê告白，當teh說明人性中ê驚人ê罪，照世人ê觀點，保羅有完美ê人格，伊ê修為mā是無人ē-tàng比--ê，伊家己承認照律法是無thang指摘--ê，但是伊mā講，tī罪人中伊是罪魁。

三、 去蕪存菁
（蕪：雜草昌盛、雜亂。菁：茂盛，物件ê菁粹。）基督徒ê人生內容，必須ài去蕪存菁，因為tī基督耶穌ê救贖之下，hō͘咱ê人生koh-khah充實、完美，這是基督徒ê人生內容，所以基督徒必須ài tuì真tsē人生ê雜亂中，求取菁華，這to̍h是保羅講--ê去蕪存菁ê意義，mā to̍h是講，基督徒ê人生是去蕪存菁ê人生，bē-tàng hō͘人發現咱ê人生中有真tsē雜亂ê狀況，基督徒ê生活不時ài注意ê一件tāi-tsì，to̍h是tuì咱ê人生中去除真tsē惡劣、負面ê人生狀況kap品性，用積極ê心態去追求有正面價值ê人生內容，所以時常ài有「離棄惡、追求善」ê人生表現，因為只有確立去蕪存菁ê人生內容ê時，tsiah ē-tàng見證基督ê福音，tsiah ē-tàng hō͘社會認定，這是咱ê信仰生活ê根本目標，因為每一個基督徒ê存在，lóng tio̍h成做基督耶穌ê香味，tī-tsia所需要ê，是基督徒完美純潔ê品德，tī以弗所書四章25節以下，保羅講tio̍h真tsē pháiⁿ ê品性to̍h是：白賊、受氣、竊盜、污穢ê言語，「一切苦毒、腦恨、忿氣、嚷鬧、毀謗並一切ê惡毒，lóng ài tuì lín中間除掉」（以弗所書四章31節）。

因為tsiah-ê惡劣ê行為是未蒙基督救贖ê舊人所有ê，tī基督徒ê新人生中無應該出現tsiah-ê狀況。

因為tī一個蒙召ê基督徒身上，若hō͘人發現tio̍h有tsiah-ê惡劣（雜亂）ê品德ê時，自然無法度tī人間社會發出耶穌ê香味，án-ne to̍h失去基督徒存在ê價值。

因為tsiah-ê人性ê弱點，是罪ê因由，基督徒是已經hō͘基督救贖ê人，照理無應該有tsiah-ê弱點ê存在（哥林多後書五章17節）tī基督徒ê生存環境中，必須ài有tsit種去蕪存菁ê決心，保羅tī-tsia特別提醒咱二件重大ê tāi-tsì：○1bē-tàng hō͘魔鬼留地步。○2Mài叫聖靈擔憂。假使每一個基督徒ê生活內容，ē-tàng一直注意這兩件事實，必定有完美理想ê基督徒ê人生。

因為tī咱ê信仰生活中，不斷有魔鬼ê挑戰，mā to̍h是講tī咱ê人生中，一直有誘惑存在tī基督徒ê生活境況中，基督徒必須覺悟，基督徒ê人生是不斷面對引誘ê生活，tsit種面對引誘ê狀況是基督徒信仰生活中siōng需要ê儆醒，伊to̍h是信仰所表現出來ê性格，所以一個基督徒若tī生活中失去儆醒ê心態ê時，那基督徒to̍h是已經活tī墮落ê邊緣，咱看teh教會生活中，有一kuá可敬ê基督徒ê失敗kap墮落，主因tī信仰生活中失去警醒ê心靈所造成！

「一定ài謹守、警醒，因為lín ê仇敵魔鬼ná親像teh叫ê獅，四界teh行，tshuē thang吞食ê人。」（彼得前書五章8節）面對án-ne強大ê魔鬼，基督徒ê信仰生活的確buē-sái馬虎放輕鬆。另外保羅mā強調mài叫聖靈擔憂，因為tī被救贖ê基督徒身上，lóng有聖靈ê印證（tǹg印），因此基督徒ê一舉一動lóng kap聖靈有深刻ê關係。

Tī-tsia叫醒基督徒，咱有可能生活tī hō͘聖靈擔憂ê境況中，有時雖然伊是無tú好或者真細ê tāi-tsì，基督徒mā的確ài有tsit種心態，因為去蕪存菁ê信仰生活，一方面是bē-tàng hō͘魔鬼有機會khiā空ê，另外一項to̍h是mài hō͘聖靈擔憂ê生活，tī今á日ê聖經節中，所列舉ê tsiah-ê惡劣ê品性，確實是聖靈擔憂ê主因，聖靈是基督徒ê導師。

最後保羅用積極ê心態，「Ài用恩慈相待，存憐憫ê心，互相饒恕，tú親像上帝tī基督裡饒恕了lín仝款」，（以弗所書四章32節），是建立tī仁慈ê基礎上，是用家己ê感覺去考慮別人ê感情，用對待家己ê心思去對待別人，這to̍h是聖經講ê仁慈，是主基督所講--ê，「無論何事，你願意人án怎待lín，lín mā ài怎樣待人」（馬太福音七章12節）ê真理。

結論：中國古早楚國有一個人和氏，發現一塊石頭，伊認定是一塊玉石，提去獻hō͘王，但是王看輕這塊石，而且叫人懲罰和氏，kā伊ê倒腳斬斷，幾年了後，和氏koh獻玉石，另一ê王kā伊ê正腳斬斷，和氏iáu堅信這是寶貝，最後這塊石hō͘刻成玉璽，做成玉璽了後，秦王願意用十五個城市來換取伊。米開朗基羅tuì糞埽堆內ê一塊大理石刻出有名ê大衛像。基督徒是hō͘基督tuì死來救活ê存在！