《草地囝仔做牧師》

 | | | 轉寄

教會Tī曠野

作者 林宗要 2011.01.30

啟示錄十二章1～17節

教會無論是tī新約或者舊約，古代或者現今ê時代，lóng是上帝所特別揀選、珍重ê一個團體，是上帝所聖別ê團體，是上帝ê選民、上帝所喜樂ê，mā是上帝特別保守照顧ê團體。

因此若照人ê觀點來看教會，伊是光榮ê團體，有上帝特別ê安排kap祝福，充滿tio̍h完美kap理想ê現象，因為伊hō͘全能ê天父上帝有特殊ê關係。但是咱看現實ê教會，自舊約時代開始到耶穌時代，中世紀教會，或者近代教會，咱所看tio̍h tsiah-ê kap上帝有特別關係ê教會，ē-tàng用tī水深火熱中來形容，咱若tuì舊約時代開始看以色列ê民族史，以及新約時代ê教會史，咱ē-tàng了解ê to̍h是一部受苦史。Tī舊約時代ê狀況，自以色列人出埃及ê時tī迦南地ê生活，kap列王時代了後hō͘人掠走tio̍h亡國，到現今以色列kap中東ê問題，lóng是非常悲慘ê生活史。一直到新約時代了後ê教會，經過二千年來，雖然teh迫害了後得tio̍h保護，成做國教，但是無論任何時代一直處tī苦難中，tī近代ê宣教史上，真tsē宣教師teh國外傳道、建立教會，lóng忍受無數ê迫害kap攻擊，甚至有教會受難ê事件發生，tī台灣或者中國大陸lóng有tsit種現象。

雖然現代人對基督教無過去hit種ê敵視，但是教會到taⁿ iáu hō͘人批評、誤會，hō͘人輕視、討厭，這是咱所ē-tàng了解ê。當咱想tio̍h教會ê現象，以及上帝對教會ê應允ê時，咱會問：為何上帝ê教會會受tio̍h án-ne ê對待？伊kám-m̄是上帝所特別珍重，所賜福ê團體mah？咱mā會問，教會ê主kám是全能ê主？確實，tī咱ê信仰生活中，咱會體驗tio̍h真tsē tāi-tsì是真pháiⁿ理解ê，ná親像世界kap惡ê問題，信仰kap苦難ê問題，tsiah-ê問題，有時用信仰去請問上帝，mā是無法度得tio̍h肯定ê答案。尤其tī教會生活中，時常體會tio̍h真tsē熱心事奉，有為可敬ê基督徒，伊ê一生，充滿tio̍h坎坷不平、無限ê苦難，為啥物上帝會將tsiah-ê苦難成做伊ê負擔？通常咱khah ē-tàng了解ê是上帝ê恩典kap祝福，會tī祂所疼ê基督徒身上，但是對上帝所疼ê教會或者基督徒，suah生活tī不幸、悲哀ê情景中，通常tsiah-ê khah tsiap hō͘人疏忽。

因此，基督徒必須ài建立正確信仰價值觀。咱ē-tàng體會tio̍h上帝豐盛ê恩典，施tī祂所疼ê人身上，以及引tshuā、保守祂ê教會。但是同時咱mā必須了解，主所疼ê人mā會破病、受苦；mā會生活tī水深火熱惡劣ê環境中。

Tsiah-ê是咱信仰ê現實，tú親像咱人生現況仝款。人生充滿tio̍h各種無仝ê情感，起起落落tiāⁿ-tiāⁿ是人生ê真實景況，比如傳道書所講ê，事事有定tio̍h、生kap死、健康kap病痛、歡樂kap憂愁、幸福kap不幸。Tsiah-ê現象一直是人生ê狀況，基督徒或者教會mā是處tī人生或者社會中，因此難免mā會有tsiah-ê感受，thang tuì下面三個問題來思考：

一、 上帝ê教會kap魔鬼
通常beh了解信仰kap苦難ê先決條件，必須ài先了解上帝kap惡ê問題；tī神學上ê教義學方面代先提出--ê，to̍h是神觀問題。一般ê情形是tuì神存在ê證明開始，通常tī哲學立場上論證神ê時，thang tuì ○1宇宙論○2目的論○3本體論或者○4道德論等多多證明，tsiah-ê是用人ê理智beh來證明上帝ê，當然kap基督徒信仰ê立場無仝。通常基督教信仰ê神觀，m̄是tuì人ê研究tsiah來--ê，是tī耶穌基督ê啟示，因此基督教信仰ê神觀，必須以耶穌基督ê 事實，主耶穌向學生講：「看tio̍h我，to̍h是看見父神，若無經由我，就無人ē-tàng到上帝hia」lóng是說明耶穌基督ê啟示，是人認bat上帝ê主因。Tuì tsia講tio̍h活ê人格神，創造者上帝，三位一體ê上帝，然後講到上帝ê創造kap世界，tī-tsia就會出現上帝ê攝理（預見或者預知）；照基督教信仰ê立場，上帝對世界ê攝理是咱所了解ê事實，上帝對世界ê統治、支配，對世界kap人類ê目的以及上帝國ê實現，上帝ê全能慈愛，保護kap關心，to̍h是上帝ê攝理。

Tuì以上所講--ê，咱就ē-tàng體會tio̍h一個真確實ê問題，to̍h是惡ê問題，mā to̍h是創世記第三章，亞當kap禁果ê問題，是人tiāⁿ-tiāⁿ討論ê主題，就是為何tī上帝所創造美好ê世界中，會有惡ê存在？Ài如何去了解上帝ê全能？這是基督教史上siōng tsiap爭論ê主題，mā to̍h是信仰kap苦難ê問題。

為啥物上帝允准撒但tī祂所創造安置亞當ê樂園中？為啥物歷代教會lóng會面對tio̍h tsit種魔鬼勢力不斷ê破壞kap攪擾？為啥物上帝ê教會tī百般苦難中經營？Tsiah-ê問題，是tī教會中時常提出來討論ê嚴肅課題。

咱thang發現，上帝ê教會出現ê時，惡ê勢力mā同時出現，進行破壞ê khang-khè，因此，自有教會史以來，教會就時常面對tio̍h惡魔ê挑戰。Tī教會內to̍h是有不斷ê困難kap迫害，但是tsiah-ê是tī上帝ê應允之中，伊是有限，m̄是無限ê。Tī啟示錄十二章已經暗示tsit-ê真理，若照正統ê解釋，婦人iáu指上帝ê教會，身揹日頭、腳踏月娘，掛上十二粒星，日、月、星tī聖經中，tiāⁿ-tiāⁿ是表示榮耀ê記號，因此上帝ê教會伊ê本質是榮耀ê存在，「十二」tī啟示錄中tiāⁿ-tiāⁿ看做是舊約ê十二支派kap新約十二使徒，包括了舊約kap新約ê教會。

教會雖然是地上人所設立，但是伊ê起源或者本質ê意義是屬於天。 Tsit種屬於上帝ê教會，tī地上歷經真tsē患難kap痛苦，而且是歷經奮鬥kap phah拚tsiah產生人類ê救主耶穌基督，祂是tuì教會出來--ê，祂是亞伯拉罕ê後代，大衛ê kiáⁿ孫，馬太福音第一章第一節耶穌ê家譜thang查出。但是咱若看啟示錄十二章2節「伊有身啊，teh生產ê艱難中痛kah大聲叫」to̍h ē-tàng了解，婦人是指教會，上帝ê教會beh產生救贖ê主，tsit-ê過程是相當艱苦，伊用疼kah真艱苦ê叫來形容伊ê過程。

Tuì tsia thang知影kui-ê教會是一個戰鬥ê教會，是負擔tio̍h真tsē苦難ê教會，但是教會iáu tī苦難中，期待tio̍h拯救ê來臨，另guā一方面惡魔用各種方法beh消滅教會，雖然惡魔是專門teh破壞上帝ê khang-khè，自創世記到啟示錄kui本聖經中，咱ē-tàng看tio̍h ê to̍h是伊無時無刻teh kap上帝作對，用各種方法抵制上帝ê意旨。咱若看歷代教會史上真tsē可悲ê事實，通常lóng kap惡魔有關，雖然有時伊非常直接--ê，但是suah時常利用教會ê人物，尤其是有影響力ê人物，當做工具來進行破壞上帝ê計畫。

主耶穌ê生涯中，mā tiāⁿ-tiāⁿ受tio̍h tsit種引誘，siōng典型就有三pái，tī-tsia咱ē-tàng了解，惡者連榮耀ê主lóng會想出所有ê辦法beh引誘伊，何況咱tsiah-ê無完全ê人？啟示錄十二章4節「龍khiā-tī beh生kiáⁿ ê婦人面前，等待伊出世，就beh kā伊拆食落腹」這是teh寫惡魔對待上帝ê教會ê情形。伊ê本質是殘忍、狼毒ê象徵，是pháiⁿ ê，雖然有文雅、美麗ê外貌，但是伊ê內心所充滿ê是狼毒ê作為。伊所siàu想e5toh8是歹代，比如保羅tī羅馬人書三章12節：「Lóng是偏離正路，做伙變做無路用，連一個mā無」所形容罪ê性質仝款。

二、 教會tī曠野
惡魔雖然用盡一切方法，beh破壞消滅上帝ê教會，但是上帝ê教會suah受tio̍h上帝ê保護，tuì十二章5節咱ē-tàng了解救主耶穌已經出世（tio̍h用鐵枴á治萬邦，然後ài hō͘人tshuā到神ê寶座），十二章6節婦人to̍h逃去曠野，tī-hia有上帝所預備ê所在，hō͘伊tī-hia得tio̍h 照顧1260工（1260相當三年半，是七ê半數代表無完全）。雖然咱lóng了解曠野kap城市ê生活是有真大ê差別--ê，tī曠野是無方便，而且有背後ê危險，khah無適合人生活，因此tī曠野ê生活to̍h是代表ài歷盡真tsē艱苦，因為無方便，就會帶hō͘人真tsē問題，ná親像四十年代，台灣ê生活方式kap現今有真大ê差別，hit時tú tuì神學院畢業，用柴做燃料，需要特別買一支斧頭，了後就用番仔油爐代替，到現今1997年使用瓦斯燃料。為啥物美國hiah-ni̍h仔關切科威特hō͘伊拉克侵佔？伊主要ê原因，tī石油。全世界有五分之一ê油量tuì hia生產，美國又koh是siōng浪費石油ê國家，tse對現代人來講，石油實在是bē-tàng欠缺ê能源。咱ē記主耶穌講tio̍h末日來臨ê時bat講，hiah-ê好額人必定khah無法度承擔，咱自困苦ê人生，進入富裕ê生活khah簡單，若是tuì富裕ê人生，beh進入困苦生活khah困難。因此人無歡喜生活tī曠野，伊ê人生必須ài增加付出，伊是無方便、辛苦kap有阻礙ê所在。M̄-koh，咱看聖經寫上帝ê教會tī曠野：

（一） 是上帝ê安排，「婦人就逃去曠野，tī hia有上帝hō͘伊ê預備地」（十二章5～6節）教會tī曠野，這是事實，但是咱必須ē記這是tī上帝ê安排之下，有時咱體會tio̍h教會ê真tsē問題kap困境，但是咱必須了解tsit-ê 事實，是有上帝ê美意，既然是上帝ê安排，祂一定buē放棄咱來離開，「Buē hō͘ lín做無老父ê kiáⁿ」是主耶穌向學生所講--ê，一定有上帝ê同在，有上帝ê同在，to̍h是榮耀ê所在。

（二） hō͘伊tī-hia，得tio̍h照顧：人會驚tī曠野，是驚會影響tio̍h生存，既然tī曠野會得tio̍h適當ê照顧，án-ne就無需要驚惶曠野，咱若看以色列人tī曠野生活了四十年之久，就koh-khah ē-tàng了解四十年ê歲月，實在是上帝teh養育in，因為in無耕作或者飼動物，完全流浪tī曠野，但是suah得tio̍h上帝完全ê養育。教會ê事實mā是tī曠野，但是上帝teh養育伊，因此生存並bē有問題，雖然歷代教會受tio̍h苦楚，但是suah有上帝完全ê養育。

（三） 受苦是有期限ê：tī曠野1260工（四十二個月、三年半、七ê半數），時間若到，問題就會解決；真tsē困難中ê教會，有一日會變做榮耀ê教會，這是教會屬天ê性格，因此現實ê教會，siōng迫切需要ê問題，to̍h是忍耐、等待、期望上帝榮耀ê來臨，tse mā是基督徒信仰生活真正ê內容。


三、 撒但ê破壞永遠buē停
雖然咱了解，教會tī曠野有時間性，但是咱必須ē記，惡者破壞ê khang-khè是永遠buē停--ê！Tuì啟示錄十二章6～8節大龍tī天頂無khiā起ê所在，就到地上來，tī十三節hit條龍就tī地上迫害教會，但是教會得tio̍h上帝ê照顧kap安排。雖然iáu tī曠野，但是一直得tio̍h照顧kap保守，惡勢力，永遠buē停止迫害上帝ê教會，koh-khah去用各種ê方法beh破壞教會，但是教會有上帝ê照顧kap保守，thang用「有驚無險」來形容伊。

雖然教會因為蛇（龍）無放棄迫害，hō͘人遷到曠野甚至是無人所到ê所在，惡靈iáu無放棄迫害，koh tuì後面（15節）吐水像水災，ài kā伊沖走，（m̄是正面，hō͘人料想buē-tio̍h--ê，hō͘伊看bē-tio̍h）beh消滅這婦人，（這是真惡毒ê手段，tī聖經中，水災有時hông形容是惡ê意思）但是tuì 16節thang知，上帝suah幫助婦人解決tsit-ê問題，m̄-koh教會是tī上帝ê國之中，永遠受tio̍h上帝ê照顧kap保護，這是教會ê事實。

雖然歷代ê教會，lóng經過了相當大ê風險kap苦難，無論是tī任何地區、任何時代lóng án-ne；因為教會生存ê本質，是tī曠野，因此，教會必須ài有tsit種認同，雖然tī苦難中，但是惡魔ê攻擊kap破壞，永遠buē停。Tuì啟示錄十二章17節「龍向婦人發性地，去kap伊其他囝兒爭戰，to̍h是he守上帝誠命，替耶穌作見證e--5」，tsit-ê節聖經真清楚看出惡魔án怎對敵上帝ê教會，tsit種實況，mā hō͘基督徒真大ê警告，只要你遵守上帝ê誠命，有基督ê見證，就會受伊ê攻擊kap迫害，這點是基督徒必須覺悟，同時認清tsit種迫害是永遠buē停ê。

咱若看聖經，tuì創世記到啟示錄，四界lóng有撒但破壞上帝ê旨意，而且永遠buē停ê，主耶穌hō͘人試探ê時，雖然三pái lóng得勝，但是路加福音四章13節suah記講：「魔鬼用盡各樣ê試探，就暫時離開耶穌」這暫時離開to̍h是表示有機會就會koh來。

所以咱ài認清惡魔ê真面目，同時ài了解咱教會或者個人信仰生活ê限時性，期待咱ê教會，雖然tī曠野，但是suah是榮耀ê教會，惡魔雖然橫逆，但是上帝ê保守kap照顧koh-khah大，這是每一個基督徒siōng大ê安慰。