《受恩蒙福的一生》

 | | | 轉寄

微細ê聲音

作者 林宗要 2010.09.12

列王記上十9：1-16

列王記上十八章是先知以利亞面對極權ê王權亞哈王ê反背上主，藉著上帝ê幫助，先知tī眾人面前，顯示出上帝ê大能，利用當時ê氣勢來消滅亞哈王ê假先知四百五十人。

Hit時tsūn，先知以利亞有責備當時ê群眾躊躇ê信仰是非常驚人ê信仰危機，tī/tsit件tāi-tsì，咱ē-tàng明白一件真理，就是先知ê責任就是tī人民ê tsit種心存兩意，teh躊躇對上帝、對信仰無明確ê立場ê時tsūn，才向in宣示上帝ê意志，引tshuā人民，明白必須ài建立kap上帝之間有理想、完美ê人格關係，tsiah ē-tàng真真實ê成做上帝ê選民來完成上帝交託ê責任，用今á日教會ê存在，to̍h是承擔先知tsit種角色，教會tī猶未有信基督ê人當中，ài有引tshuā人去體驗上帝、信靠上帝ê使命。

當然tsit種khang-khè是有淡薄á艱難ê khang-khè，好親像當時ê先知以利亞仝款，面對真tsē 不義kap 無相信ê境況中，人若beh傳達上帝ê啟示tī人間，往往會引起tsiok大ê反感、反擊。

但是先知suah tī tsit種極端困苦中去完成上帝所交託ê責任。A)消除當時危害人民kap上帝之間ê信仰ê巴力ê先知四百五十人。B)解決了三年半久ê火燒埔，hō͘人民活teh正常ê過程中。當時以利亞ê作為實在表現出伊ê信仰kap人格，伊ê偉大相信tī he時tsūn無人thang比（包括國王在內！），伊ê人望贏過任何人，伊thang利用tsit種氣勢來替家己計畫，一定會有美好ê結局，但是伊深深了解tsit種世界kap其中所有ê m̄是伊ê主要事工，伊ê khang-khè是宣示上帝tī人中間ê疼kap恩典，因此真正做上帝ê差用者往往會有超然ê心態去面對環境kap事工，tī咱ê社會現象中，咱定定ē-tàng tuì新聞看tio̍h有權力ê人the教示勉勵基層人員ài有傳教師ê精神，去面對hông交託ê責任，tsit種精神to̍h是先知ê khang-khè內容，tī任何境況中，永遠死忠tī受託ê使命，咱tī十八章看tio̍h先知以利亞ê絕對勝利，非常有體面榮耀ê人生狀況，是有淡薄á得人望ê存在者，但是tī/teh十九章，咱會看見tsit位上帝ê僕人ê淒慘可憐，為tio̍h保命，必須拼命逃走，tī-tse咱thang/ē-tàng看出完全無仝ê狀態，伊所以必須ài逃走是因為伊ê作為所引起耶洗別ê 不滿，tsit位推羅王ê tsa-bó͘-kiáⁿ耶洗別án-ne看是相當有能力ê而且ē-tàng影響伊ê翁婿哈亞王ê作為，是一個有非常堅強ê性格ê人，因為伊ê祖國是祭拜巴力tsit-ê偶像，伊mā將tsit種tuì偶像追求引進以色列，hō͘選民去拜偶像。（列王記十六：31-33），伊beh刣（追擊）先知，（十八：4），同時mā想beh kā先知以利亞殺害（十九：2）為tio̍h beh奪取uá王宮ê 一塊地（提伯所有）伊獻毒計來殺害園主，來達tio̍h目的，實在是非常狼毒ê tsa-bó͘。

「耶洗別叫人去見以利亞，說明日約tī-tse ê時我若無使你ê性命，像hiah-ê人ê性命仝款，願神明加倍處罰我，以利亞看見án-ne就驚惶，爬起來逃命」（十九：2-3）。

Taⁿ咱tuì這二章聖經來看tsit位上帝所重用ê先知，前後ê差別竟然tsiah-ni̍h 無仝：Tī-tse咱會看tio̍h實實在在ê人性ê流露，tī-tse為著性命逃走ê以利亞kap十八章khiā-tī王kap 四百五十名巴力ê先知面前ê hit種勇敢、壯觀ê氣慨完全無仝！

Tī-tse伊體會tio̍h人ê軟tsiáⁿ kap無完全ê實在，伊為tio̍h上帝，做tsiah-ê美好ê見証，結果suah是tsit位非常狼毒ê耶洗別beh刣伊、消滅伊，伊m̄-nā放出風聲，是實在ê動作。

Tsit種情境，定定是hō͘上帝ê差用產生真tsē疑問，但是信徒一定會相信，萬事lóng有上帝美好ê旨意，降落tī祂所選ê人身上，這是事實。而且有ê時，親像tsit種狀況，mā會幫助信仰者去體會上帝ê恩kap疼tī祂所疼ê人身上，親像以利亞，處tī極端困境中，伊順服上帝ê引tshuā，重新體會聖靈ê恩賜，tsiah hō͘ in新ê使命，需要伊去執行。Tī-tse咱看著以利亞tī極端ê困境中重新得tio̍h新ê能力，這就是beh完成受託ê責任所bē-tàng欠ê條件。當咱想tio̍h tsiah-ê狀況ê時，咱就會明白，tī人所有ê遭遇中，有上帝永遠無變ê旨意ài人去完成伊，尤其是tī信仰ê路上，有ê時teh極端ê困境中，基督徒mā會體會tio̍h上帝美好ê事實排teh伊ê面前！

（一） 成功了後ê危險
每一個人tī伊所面臨ê事物中，伊buē-sái用平凡ê心情來khiā tī中ng ê所在，tī-tsia，人必須ài有所選擇或者有所取捨，tsit種對事物ê選擇或者取捨ê結果，就是形成人ê成功或者是失敗，所以人ê成敗，tuì án-ne確立tī人對伊所tú-tio̍h ê事物ê取捨了後ê結局。

無論每一個人ê個人或者家庭狀況以及信仰ê歷程，lóng是án-ne。若m̄是成功to̍h是失敗，所以咱ê人生實在是真嚴肅ê事實。

Tī人生中，khah無中間地帶，尤其是咱ê信仰，koh-khah是án-ne，若m̄是成功就是失敗。主基督tī啟示錄三章十五～十六節﹝我知影你ê行為，你buē冷mā buē燒，我真希望你會一下á冷或者一下á燒。既然你kah-ná溫水，mā buē冷mā buē燒，所以我ài tuì我嘴中kā你吐出去。﹞咱ē-tàng tuì主基督所講ê事實來看咱ê信仰ê性格，伊kap人間社會有一kuá無仝，tī人間，人定定要求人ài有khah中庸ê性格，可能tuì人生ê生活有幫助，khah buē造成失敗，這是事實，但是信仰生活無中間線（無中立），是基督kap魔鬼，光kap暗ê選擇，to̍h親像先知以利亞向當時ê以色列人ê要求，tī上帝kap巴力之間ài選其中一個，buē-sái 兩個lóng選，這m̄是信仰ê道路。

以利亞真成功引tshuā以色列人進入上帝所歡喜ê路徑頂kuân，tsiah解決了當時民眾生活ê危機，人若是ē-tàng替社會化解危機，he自然是成功ê英雄人物，但是必需ài認清一件真理，就是人生ê生活是起起落落，有成功，但是m̄是絕對，失敗mā是仝款！咱thang tuì歷史或者教會生活中體會tio̍h tsit種狀況，真tsē成功ê偉人或者信仰者，有ê時in會表現出失敗kap悲慘ê下場，因為tī人間無絕對ê事實（只有上帝tsiah是絕對），咱若看聖經，馬太十六章彼得ê信仰告白，hō͘主耶穌所肯定o-ló，但是無guā久suah hō͘主耶穌責備做﹝撒但退去！﹞，彼得tī客西馬尼勇敢ê護衛耶穌，但是無guā久就tī查bó͘嫺面前三pái否認耶穌！咱看先知以利亞tī十八章所表現ê kap十九章ê事實，咱就會知，tī人生中定定有tsit種成功了後ê危機（無論亞伯拉罕、摩西、參孫、大衛、所羅門等等），tsit種情形，一方面是人ê性格ê軟弱，另guā一方面是人ê現實環境，定定是造成咱人有tsit種危機ê產生，因此若beh克服tsit種對人生有危害ê發生，人生必須ài對人性ê軟弱以及現實ê環境做有利ê調整，加強人性ê堅實以及對境況有相當程度ê辨別kap適應，若無tī日常生活中ê錯誤判斷往往是造成人生有驚人ê失敗，這是咱ê生活ê真理。另外一種情形咱必須注意--ê就是成功了後ê自高 mā是造成人生失敗ê原因。

（二） 危難中tshuē上帝！（以利亞上何烈山）
十九章ê聖經teh說明，以利亞ê境況無論心理抑是生理，lóng是tī極端ê危機kap不利中。當伊聽tio̍h王后耶洗別beh刣伊ê消息ê時，﹝以利亞見這光景就開始逃命，到了猶大ê別是巴，將下跤手人留tī hia，家己tī曠野行一工ê路程，來到一欉羅騰樹跤，就坐tī hia求死，講，耶和華阿，罷了，求你取我ê性命，因為我對不起我ê列祖。﹞伊認為當時ê狀況á是死khah好，咱thang看出當時伊ê困境，實在是處tī非常ê危機中，tī心身lóng非常厭倦中入眠（可見當時伊真正tsio̍k悽慘），然後伊體驗tio̍h上帝ê預備以及完全ê看顧，因此tsiah得tio̍h心身恢復ê能力tsiah koh行四十工ê路程到上帝ê聖山－何烈山。當時伊ê境遇實在是非常惡劣，一個真有能力，khang-khè亦相當做功ê先知，mā會tú-tio̍h tsit種危難ê場面，這就是聖經teh kā 咱講人ê現實，無論任何人物，tī伊ê人生中lóng有可能像án-ne ê人生狀況發生。

當軟弱ê人性面對tio̍h tsit種hiah-ni̍h大ê危難ê時，聖經kā 咱講唯一 ê辦法就是－tī危難中tshuē上帝！所以以利亞來到聖山－何烈山。

Tī-tsia，伊ê危難得tio̍h化解，同時得tio̍h新ê使命，tsiah重新伊ê事工，聖經用漸漸ê方式來表達出上帝ê臨在，A)烈風大作，崩山碎石－tsiah-ê山破裂， tsiah-ê石頭破碎，非常強大ê作用，但是耶和華無tī風中。B)透風了後有地動－mā是自然現象中ê狀態，hit時ê人，kā tsē看做真驚人ê tāi-tsì，耶和華mā 無tī地震中。C)地震了後有火－lóng是teh說明自然現象kap漸漸加強ê狀況，耶和華mā無tī火中。D)火了後有微小ê聲音，tī-tsia先知tsiah聽tio̍h上帝ê聲音，tī-tsia咱會發現一個事實，就是上帝ê臨在是tī有「人格ê」關係上，m̄是存在tī hia-ê無人格中，雖然，咱ê上帝是無所不在ê，但是人kap上帝之間ê關係，必須ài建立tī人格ê關係上，人ê危機tsiah ē-tàng真正提出tī上帝面前，咱看見，tsit位偉大、有成就ê先知，伊所做--ê成功ê khang-khè，ē-sái講是危難mā同時kap伊作伙，tsit種人生現象，teh說明人生ê實況，不管你ê人生有何等、guā大ê能力，當你tú-tio̍h人生非常大ê危難ê時，的確m̄是人ê力量thang化解--ê，tī tsit種人生中，基督徒必須ài建立tī危難中走tshuē上帝ê管道，tsiah ē-tàng解決你人生ê危機。
這就是咱tī教會生活中，時常強調--ê，基督徒kap上帝之間屬靈ê狀況通順ê原因，因為tī平時（你ê人生順暢ê時），你若無phah通你kap上帝之間ê tsit條來往ê路徑，當危難來臨ê時，有ê時buē赴通順，自然就無法度完成。會記ê he m̄是單行道（有來有去！）。基督徒必須ài明白，咱ê人生ê狀況是有起落ê人生，任何狀況lóng有可能發生tī咱ê身上，咱若無建立tsit種心態，只有生活teh期待上帝ê祝福kap保護ê時，有一工若處tī危難中，咱ê生活就會失去重心。

（三） 微細ê聲音（火了後有微小ê聲音）
Tī-tsia以利亞聽見上帝ê聲音，mā就是前三pái自然界ê現象中，以利亞無聽見上帝mā無體會tio̍h上帝tī其中，只有tī微細ê聲音中，伊體會tio̍h上帝ê存在，因為上帝ê臨在是tī人格中顯現，tī無人格存在ê自然現象中是tshuē bē-tio̍h上帝！Tī-tsia上帝用微細ê聲音向以利亞說明，hō͘伊使命，咱tī-tsia會想tio̍h約翰一章「道」ê真理，﹝太初有道，道kap上帝同在，道就是上帝，萬物是藉tio̍h伊製造ê，只要hō͘伊造ê，無一項m̄是藉tio̍h伊製造ê。性命tī伊內底，這性命就是人ê光。﹞日語翻譯做「言」，伊ê起頭雖然kap希臘哲學有關係，但是約翰所用ê 是teh紹介人格神基督，祂是性命kap光輝，若用約翰一章道ê思想來思考以利亞tī-tsia所聽見ê微細ê聲音，咱就會明白，伊是人kap人格神來往ê器具。

因為咱知影，聲音kap人生有密切ê關係，tī人生生存中聲音四界long2thang好看見。A）無好聽ê聲音－噪音是現代生活ê 1件siōng大ê缺失，工廠﹝場﹞ê機械聲、車ê噪音、飛機聲，tsit種聲音是無人歡迎ê。B）美好ê聲音－音樂、樂器之聲，1 9 9三年2月間，電視上bat紹介用瓶子演奏，雖然仝款是聲音，但是經音樂家處理了後變成了美好ê聲音。C）表達人格ê聲音－tī/teh對話、交談中，有人格在內。

創世記第一章，上帝創造天地是tuì上帝嘴中ê話。約翰第一章ê道是tī/teh紹介人格ê上帝顯現在人間。所以聲音猶原是人格ê表現，比如政見ê發表、律師ê辯護、外交家ê演講、教會the 做禮拜ê時ê証道ê聲音等等，lóng thang看出聲音tī人世間ê重要性。先知ê灰心kap危難，he是iá未體會tio̍h（kap上帝有人格ê接觸）上帝ê實在，因此危機加重a，但是當伊聽tio̍h上帝ê聲音（雖然是非常微細ê聲音）了後，kap上帝有人格ê接觸，伊ê狀況就完全無仝，tsit種改變，是tī tsit種微細之聲ê功效。

1） 安慰之聲－－Tī以利亞tsit種處境中，上帝ê聲音表示安慰，因為事實上，耶和華是安慰ê主，當時ê以利亞siōng需要ê就是安慰，咱人ê人生狀況，有ê時mā會灰心失志，會記ê，ài去聽tio̍h tsit種安慰ê聲音。

2） 幫助之聲－－另外，先知tī微細ê聲音中，伊體會tio̍h ê是上帝幫助ê聲，因為咱ê主上帝是幫助ê上帝，只要屬於祂ê人，tī人生危難中，ē-tàng聽tio̍h伊ê聲音，就有可能化解人生ê危難。所以以利亞所聽見ê這微細ê聲音是幫助ê聲音。

3） 改變，重新接受使命ê聲音－－十九章十、十四節，咱會知影先知tī-tse境況中，sió-khuá帶有傲性，tī上帝面前是無適合--ê，因此tsit-ê聲音，對伊ê品性一定有改變ê作用，然後上帝tsiah任命伊koh-khah重大ê使命。上帝hō͘ 人ê新使命往往要求人必須ài修改人ê傲氣、自高，是用謙虛恭敬ê心tsiah ē-tàng承接上帝新ê委任，這就是主基督強調ê重生之道，tsiah有上帝ê恩典ê施與。

結論：活tī雜音真tsē ê現代社會，基督徒ài注意聽，謹慎去聽上帝微細ê聲音，好應付人生ê急需。撒母耳聽了上帝kā伊huah三pái了後，回答上帝講：「請講，僕人敬聽。」