《受恩蒙福的一生》

 | | | 轉寄

家庭ê隱憂

作者 林宗要 2010.09.19

箴言十五：24-33；羅馬書一：18-32

家庭是人生生存siōng有影響力ê所在，伊kap人生ê成敗有決定性ê關係，真tsē有成就ê人ê背後lóng kap家庭有關係，因為家通常hō͘人看做溫暖ê眠床，當人生面當the面對無情ê現實社會ê時，有真tsē負面ê人生狀況，但是tī厝內會有無仝ê感受，因為tī tsia，咱會體會tio̍h關愛、勉勵kap安慰ê人生正面作用ê經驗。歷史上真tsē偉大ê人，in ê家庭lóng bat hō͘ in真大ê啟發作用，比如孟母教kiáⁿ，奧古斯丁ê母親摩尼卡，愛迪生ê母親對kiáⁿ ê耐心kap了解，林肯ê母親（後母）對伊ê疼kap鼓勵，lóng是造就這幾位偉人成功ê因素，tsiah-ê lóng kap家庭有密切ê關係。

家庭ê定義是什麼？就是一家人共同生活ê所在，tī hia有老父老母、翁仔bó͘、兄弟姊妹tsiah-ê親人形成ê共同體，m̄是單獨ê個體，tī-tsiah有各人無仝ê意見、觀念、價值觀等等問題出現，這to̍h是造成家庭ê問題。中國字「家」thang分做兩個部分：1）宀 2）豕，若詳細思考，咱thang明白teh說明家庭ê狀況。

咱lóng知影，家庭對人生以及社會ê影響非常大，因為每一個人lóng是uì家庭出來--ê，家庭所雕刻ê人格若完美理想，伊所形成ê社會iah一定khah理想。用tsit-ê 做前提，咱來看台灣社會ê狀況，有真tsē 無理想ê人格teh製造真驚人、混亂ê社會現況，當然tsiah-ê毒害社會、惡質ê人格ê成因非常複雜，但是受tio̍h家庭影響suah是buē爭ê事實。咱已經體會tio̍h，現代家庭已經完全失去過去美好ê家庭倫理關係，tī社會新聞中，咱tiāⁿ-tiāⁿ會看tio̍h真tsē家庭逆倫ê事件、強姦、兇狠、詐欺ê案件，當然咱buē-sái講in tuì現代化ê變遷無影響，但是主因iá是tī人ê心態。光啟社七十年代ê電視劇「梨仔kap蘋果」：一對庄腳翁仔bó͘辛辛苦苦tshiâⁿ養兩個後生，大漢了後tī台北成家立業，有一pái老翁仔bó͘思念gín-á，to̍h來到台北，老先生tuà tī大漢後生in-tau，老太太tuà tī第二ê後生tau，因為觀念、背景無仝，生活習慣難免有無仝，有一工少年人無tī厝，留老父家己一個人tī厝，嘴乾無水thang好lim，伊看見桌頂有一粒蘋果to̍h提來食，媳婦tńg來tshuē bē-tio̍h蘋果to̍h kā伊ê先生tâu，大漢後生竟然對老父講：「實在有夠thó-tsè，一粒蘋果ài幾十箍！」老父想著以前後生koh細漢ê時，吵beh食蘋果，厝內雖然無錢，mā是買hō͘ kiáⁿ食，心中有淡薄á真有感覺。老太太tuà tī第二後生tau，ta̍k工洗衫、煮三頓，媳婦suah kan-ta注重家己ê保養kap化妝，有一工老母看tio̍h一粒梨仔the-beh害去to̍h kā伊tàn-sak，媳婦想beh食suah tshuē無，to̍h認為是老母食掉，tio̍h足受氣，後生mā責備老母ê m̄-tio̍h，因為伊ê bó͘已經有身啊。兩個kiáⁿ lóng講beh tshuā 兩個老ê去遊樂園耍、tuà觀光飯店，但是lóng kan-ta出一支嘴，兩個老ê無法度koh忍受 tsit款委屈ê生活，to̍h恬恬á轉去庄腳無kā in-ê 後生講，厝邊若來拜訪，兩個老ê iáu假做真o-ló 二ê後生tī台北是如何ê款待in，ta̍k工食梨仔kap蘋果。兩個kiáⁿ tshuē無父母，tsiah來感覺見笑、疏忽父母，to̍h回鄉，tsah tio̍h kui大籠ê梨仔kap蘋果做禮物，向雙親認罪。戲劇用「凡事以忍為先，百行以有孝為首」來結束。

Tī現代生活中，tsit款tāi-tsì必定buē少，伊mā指出現代ê家庭問題。有一個真實際ê問題是一般tsa-bó͘-kiáⁿ kap老母ê關係，lóng非常親密，但是媳婦kap ta-ke ê關係，有ê時情況to̍h無hiah-ni̍h理想，仝款是女性，只是角色無仝，為什麼差別會hiah-ni̍h大？佳哉現代人大部份採用小家庭ê生活，三代同堂ê情形khah無tsē，所以tsit方面ê問題已經減少一kuá，但是咱若詳細思考現代家庭，確實iáu有真tsē問題是咱必須ài去面對--ê：

（一） 無平衡ê心態
現代家庭大多數是小家庭，照理應該是單純ê父母kap kiáⁿ兒序細ê關係，但是若詳細kā伊觀察，咱確實會發現其中有真tsē問題，tsiah-ê問題通常是成做家庭問題ê原因。用頂一代kap下一代ê思想（觀點）做例，teh時代變遷中所帶來ê問題，tiāⁿ-tiāⁿ會造成二代人心態上非常大ê差異，這是實實在在ê事實。用父母kap kiáⁿ兒之間ê思考方式來講，當kiáⁿ兒進入青少年時期了後，咱有時仔會tuì伊ê嘴內聽tio̍h以前咱從來m̄-bat聽過、kap家己ê想法完全無仝ê論調kap看法，tsiah-ê問題若buē-sái處理hō͘伊妥當，往往會成做雙方衝突ê起點，人kap人之間思想若有差異，就真pháiⁿ得tio̍h共同生活ê事實。

相信現代家庭中，tsit種無平衡ê心態非常tsē，有一個實例「悔教囝兒來美國」，tsit篇文章是一位蘇姓寡婦tī報紙頂kuân所發表--ê，伊講天下父母心lóng期待kiáⁿ兒ē-sái成龍成鳳，tsit-má伊ê kiáⁿ兒真正成龍成鳳，但是he狼毒ê腳爪suah伸向家己ê老母，掠得伊kui身軀lóng是傷，心teh滴血……，伊有一個後生三個tsa-bó͘-kiáⁿ，翁婿tī十四年前tio̍h過身啊，伊家己taⁿ起一間破碎ê厝，費盡心血，tī 六年中送四ê kiáⁿ兒到美國留學，甚至成家立業，伊一個人tī台灣、孤獨寂寞，無guā久伊抱tio̍h滿滿ê希望kap快樂ê心情赴美探望kiáⁿ兒，伊用「冷淡、諷刺、虛假kap殘酷」來形容kiáⁿ兒對伊ê態度，長女tāi先反對伊赴美，伊講「老人無適合來美國，阮無時間照顧妳，美國人是m̄ kap父母tuà作伙--ê」，老婦人ê目屎往腹肚內底吞，tsit種打擊hō͘伊ê體重tuì 125磅瘦到90磅，自án-ne致tio̍h嚴重ê 高血壓，第二tsa-bó͘-kiáⁿ講，妳kap大姐之間ê恩恩怨怨，伊無ài tshap你，妳若看阮bē順眼，就m̄免tshap阮啊。孤kiáⁿ亦bat因為一kuá小事，tī半暝手the̍h伊ê行李，手指向大門，大叫，「kā我出去，你若死tī半路，我mā buē流一滴目屎」，佳哉媳婦出來解圍，老婦人講，tī án-ne境況中伊iáu ē-tàng活落去是因為屘tsa-bó͘-kiáⁿ ê真心kap體貼，替伊說明美國ê生活方式kap台灣無仝，難免會受tio̍h影響，若有m̄-tio̍h，請原諒in，in lóng是你ê親生kiáⁿ等……。當然這是極端ê事例，但是tī現實家庭中確實有tsit種心態ê差異所引起ê問題。Tī-tsiah，可能ē-tàng看出舊道德kap新社會ê問題，或者講是傳統kap現代化ê問題，確實tuà-tī台灣ê父母無法度了解tī美國有一kuá家庭，食飯ê時各人付各人ê，父仔kiáⁿ mā仝款，tī台灣mā bat有人去探訪親友，心肝內必定相當buē平衡，相信tī歐美社會所有ê現象，早晚mā會發生tī台灣，因為這是現實ê社會風氣。

會形成ê原因是tī社會變遷、kiáⁿ兒ê品格、無健康ê倫理教育，tī現代家庭中，定定會出現kiáⁿ兒忤逆父母ê情形，厝內只有一、二ê寶貝，因此過份疼愛，hō͘ kiáⁿ兒成做太上皇，對父母大聲喊koh是普通代，幾年前我去西安，一個導遊kap我講--著伊ê孤kiáⁿ是偌呢啊pháiⁿ！Tsiah小學四年仔。有一篇文章講：1992年夏，七十七名十一～十六歲ê日本青少年kap中國大陸三十名青少年聯合舉辦內蒙古草原探險夏令營，有真tsē行軍性質ê體會訓練，tī中間看出日本人kap中國人ê無仝心態，日本人所表現ê是刻苦耐勞、m̄驚艱難、忍耐、完美ê合作，中國人所表現suah是自私、m̄合作、口出怨言、tsiah好做輕khó、自以為是、相爭beh上車！作者評論，tuì tsiah thang看出日本第一ê原因！關鍵tī心態所形成，因此咱知影，心態對人生生活有非常重大ê影響，現代家庭ê隱憂ê一件原因，就是形成tsiah-ê人tī心態上ê差異所引起ê問題，相信咱thang tuì tsiah-ê人生實況去了解。

（二） Tuì人格kap價值觀所產生ê問題
現代家庭ê第二個隱憂，就是現代人ê人格形成ê問題（人格塑造ê 無完美），因為人格是人生tī社會生活中是毋是有正常ê基因，一個khah完好ê人格，伊ê社會性必定是khah正常化，若是一個人格形成tuè-tio̍h一個真tsē缺陷ê人，伊ê社會性必定會有真tsē反社會ê行為產生，tī現代社會中，有真tsē驚人ê社會問題比如兇殺、搶劫、綁票、吸毒等等ê社會烏暗面，hiah-ê主角ê人格狀況lóng有真嚴重ê缺失，這是犯罪學家ê結論。

同時tī現代人生活中，因為現代化ê影響，致使人kap人之間ê人際關係建立ê無guā通順，這mā是現代家庭ê隱憂，咱知影，健康互動ê人際關係，ē-tàng幫助咱完成人生重大ê責任，但是tī無閒ê家庭中，父母kap kiáⁿ兒ê關係罕得有時間去用心經營，建立好ê互動關係，譬如老父無閒事業，晚起晚歸，kiáⁿ兒suah透早tio̍h-ài起床去上課，無法度見tio̍h老父，一直到beh睏tsìn前iáu無看tio̍h老父，只有禮拜日tsiah有可能見面、相鬥陣，tsit種情形對kiáⁿ兒ê人格形成必定是負面--ê，甚至造成現代家庭欠缺雙方溝通ê管道，無退一步ê空間，相安無事ê時，家庭iáu ē-tàng維持，但是人無法度永遠tī平安ê境況，因為人ê現實就是tī不斷有問題發生ê所在，所以人生若無退一步ê空間，一旦問題出現，lóng已經真oh處理啊。

另外一個事實，就是tī tsit種人格形成ê結果，造成真tsē人tī人生ê價值觀ê極端偏差，人生ê價值觀是決定tī人生成敗ê主要因素，通常人生ê作為（生活、事業、khang-khè、社會性）lóng是根據伊ê人生價值觀所表現出來--ê。當父母塑造一個完善、理想ê kiáⁿ兒ê人格ê時，tsit位kiáⁿ兒將來tī伊ê人生過程中，必定有正面、正確ê人生方向kap態度，tī任何人生境況中lóng有剛強ê意志kap奮鬥ê精神，凡事照步來，一步一步進行，無論任何境況，lóng有獨當一面ê氣魄，tsit種人格必定會行向成功之途。

若是一個有偏差人生價值觀ê人，活teh嬌生慣養ê世界，欠缺鬥志，tú-tio̍h問題就軟弱失志，腦中所想--ê只是「Tāi-tsì少錢ài tsē tī 厝附近」ê khang-khè，輕鬆無壓力，食好做輕khó，tsit種自私、無敬業精神、貪圖利益kap功勞ê性格kám m̄是tī現代家庭四界thang看--ê？到底是siáng造成了tsiah-ê看近無看遠ê人格？Tsit種人格若tī厝內，kám m̄是家庭ê隱憂？這是值得咱思考ê切實問題。

（三） 失去了真實ê榜樣
Tī家庭生活中，siōng有教育責任ê是父母或者兄長，in必須成做真實ê教材，tsiah ē-tàng造就理想人格ê kiáⁿ兒（小弟小妹），厝內若失去tsit種活教材，伊ê家庭教育絕對無法度完美。通常tsiah-ê有教育身分ê長者，lóng較用言教，用言語訓誡kiáⁿ兒，suah疏忽了生活中ê身教－行為ê榜樣。Khah細漢ê kiáⁿ兒ê人格形成中，父母ê 所有行為lóng會深深ê印tī伊人格中siōng深ê所在，成做in未來價值觀ê題材，有一個故事講有一對翁仔bó͘，真會教示in tsiah 5、6歲大ê kiáⁿ兒ài相親相愛、ài有同情心、體貼人，但是翁仔bó͘ 二人因為個性差異，差不多ta̍k工lóng teh冤家、起衝突，有一日二兄妹tī房間學習父母冤家互相攻擊對方ê方式，hō͘ tsit對父母看tio̍h，二人感覺真對不起，下定決心改掉pháiⁿ習慣！台灣俗話講「好竹出歹筍」（好人出歹kiáⁿ），若是tuì教育ê立場來思考，是無可能ê事實，但是tī人生社會中，tsit款tāi-tsì 滿滿是，有一位教會ê長老，若用人ê標準去看，是人格非常完美ê人，教會生活mā無thang指責，是模範ê好人，但是伊suah有一個為非sám做、pháiⁿ事作盡ê了尾á-kiáⁿ，問題tī-to̍h？父母之間有問題、觀點無仝、生活buē-tàng配合、教育kiáⁿ兒態度無仝、有bē-tàng hō͘人知影ê缺陷等原因造成kiáⁿ兒ê異常，真久以一位司法人員，將伊審理ê一件青少年事件寫做一篇文章「活ê榜樣」發表tī報紙頂kuân，伊講，當伊對tsit位未成年ê少年人講了一篇做人處世ê大道理，勉勵伊ài珍惜家己ê前途，改過自新重新做人ê時，少年人suah kā伊回--講：Lín tsiah-ê大人lóng佮意提大道理來教示阮，聽起來真有道理，引用孔孟ê教示，in lóng是已經死幾千年ê古早人，是m̄是有伊tsit-ê人iáu tio̍h懷疑，橫直阮所看tio̍h ê大人世界lóng m̄是hiah-ni̍h好，大人教示gín-á ê tāi-tsì，家己lóng做未到，叫阮怎樣去相信？並舉出真tsē例證，說明大人口是心非。雖然少年人ê話並無一定對，但是tsit-ê事實是值得成人去反省--ê。

Tī大人ê世界中，咱欠缺親身去做ê決心，咱欠缺講ê kap 行為ài相仝ê行動，kan-ta講古聖先賢自重，行雙重標準ê生活方式，tsit種生活內容自然無法度得tio̍h少年人ê尊敬，雖然頂面所講tsit位叛逆ê問題少年ê心態無一定正確，但是伊所提出來ê問題，確實值得成人世界好好á檢討，咱mā會發現，這是成人世界ê責任，因為成人所有行動，對下一代lóng有絕對ê影響，心理學家用錄影機做例，說明父母ê舉動ná親像錄影ê過程一一錄tī kiáⁿ兒人格ê潛意識內底，長大後，in會tauh-tauh放出來，而且來評估是m̄是合tī in ê人生價值觀！

相信咱每一位lóng相信咱對kiáⁿ兒ê教育是合理、正確ê，但是iáu定定會發生狀況！Tsiah-ê狀況ài成做咱家庭ê隱憂，隱憂若buē-tàng克服，家庭生活就無完美，無完美ê家庭是問題ê溫床，伊會傷害tio̍h人生生活大部分ê內容，是人生負面--ê、真驚人ê現象。

結論：1）認清家己現實ê人生狀況。2）用koh-khah tsē ê心思去看家己ê家庭。3）用上帝所賜予你ê智慧kap信仰去經營家己ê厝，hō͘你ê厝成做榮神益人ê所在！