《受恩蒙福的一生》

 | | | 轉寄

信仰者ê決定

作者 林宗要 2010.11.28

約翰九：1-8，20-25，35-41

人是啥物？自古以來有真tsē無仝ê定義，柏拉圖講：人是無毛ê二腳動物，一個學者德里歐金尼斯提一隻無毛ê雞囥tī伊ê學校，講「這to̍h是柏拉圖講ê人」，然後，柏拉圖koh加一句「Koh有腳盤扁平ê人tsiah是」。

可見替「人」下定義並m̄是簡單ê tāi-tsì，孟子講「仁者，人mā。」這是中國儒家對人ê一種定義，但是mā無法度將人實在而且完全定義出來。當然iáu有真tsē人對人提出看法，比如忠心、愛情、道德感、宗教心、會穿衫或者會用火ê動物等等，若用基督教ê人生觀，咱會koh-khah清楚，人是被創造是ài有上帝形像ê存在者，伊存在ê目的是teh榮耀上帝，若用tse來看，咱koh-khah ē-tàng了解人存在ê價值kap意義。

但是事實上，人suah違反上帝hō͘人類ê基本原則，因此人hō͘上帝所棄絕，致使tī人生現象中，有真tsē tuì罪性所引起ê不幸kap悲哀。咱thang tuì人生實況kap社會情形來了解人類違背上帝旨意所引起ê悲哀kap罪惡，tī tsit種罪性限制之下，人類ê政治、經濟、教育、制度所表現出來ê垃圾kap烏暗面實在驚人，1994年4月美國第37任總統尼克森往生，引起世人關切，報紙mā有真tsē報導，伊是美國第一個tī任內必須向人民會失禮下台ê總統，主因tī水門事件，tī-tsia thang看出執政者ê惡質、自私、利用特權kap資源來製造tuì家己有利ê環境，tsit種狀況是大多數政客ê手法，iáu有一些tī高位者，利用特權累積財富，mā是咱時常見--ê。

Tsit種利己kap無愛心ê行徑所經營ê政治現象，to̍h是貪圖利益或者利益輸送，tī台灣，有人用kuí-nā億萬kho͘參加民代ê選舉，伊ê目的tī tó？Kám真正beh為民服務？通常是利用所有ê特權來滿足伊ê貪慾，這是台灣社會亂象之一，其他比如工程烏錢、捷運系統真tsē無合理ê設備、世界第一貴ê工程費、工期一延再延、試車二次lóng有問題等等，原因何在？自私kapsiau2貪mā。

處tī án-ne人生社會中，人有時會懷疑：人間到底有正義公理存在boh？舊約中詩人祈求上主「主ah！Ài到啥物時neh？」相信有正義感ê人lóng會kap詩人仝款，有tsit種感慨，基督徒處tī án-ne社會內，必定ài有相當ê信仰良知去面對現實ê挑戰，當然，tī-tsia mā因為背景無仝有無仝程度ê信仰表現。

重要ê是，基督徒ài不斷用信仰ê反省去面對上主所託付ê責任，只要盡siōng大ê phah拚去完成伊，其他ê問題hō͘上主去定奪，tī tsit種信仰生活中，所要求ê是基督徒ê自我認知，認bat你家己，知影人ê理性ê界線，kap屬於家己ê清楚界線，若無人生tiāⁿ-tiāⁿ會落入自tshuē煩惱ê景況。

因為tī芸芸眾生，實在有真tsē狀況m̄是咱ē-tàng完全了解，譬如約翰九章，tsit段聖經teh描述學生無了解tsit位生來to̍h是tshêⁿ-mê ê人，學生無法度體會，伊tsiah向主耶穌提出問題，若用「苦難是罪ê結果」來講，到底是伊本人或者是伊ê父母犯罪？無論tuì tó一方面思考lóng無合理，苦難是因為罪tsiah來mah？有人講是，有人講m̄是。確實tī現實人生狀況中，有真tsē主所喜樂ê kiáⁿ兒，tī伊ê人生過程中tú-tio̍h相當ê苦難，但是有人suah有完全無仝ê境遇，台語有一句話「歹心戴紗帽，好心倒iau餓」，tī現實生活中，咱的確有tsit-ê體驗，tsit種人間ê矛盾kap無合理ê情形，有時是咱ê理智無法度理解--ê，因為一方面是人ê理性有限，另外一方面是tsiah-ê問題，m̄是屬於人ê部份，是在tī上主ê掌權中，好親像約翰九章tsit段記事，若用人ê立場看，實在無法度解釋，但是主耶穌suah講，「Mā m̄是tsit種人犯罪，mā m̄是伊ê老父老母犯罪，是beh tī伊身上顯出神ê作為來（九：3）」

（一） 生來就瞎眼ê乞食者（悲慘不幸ê人生）
Tī-tse記事中，咱來思考三種人：
1） 生來就tshêⁿ-mê，不幸悲慘ê乞食，伊ê人生實在是非常不幸。
2） 當事人ê父母，驚惶特權kap惡勢力tsiah失去公義kap勇氣，m̄敢講出真實ê話，照理in kiáⁿ tshêⁿ-mê得tio̍h主醫治，in當心存感激而且對人宣揚伊ê kiáⁿ koh得醫治，但是suah hō͘當時特權kap惡劣世俗所控制，m̄敢宣揚。
3） 法利賽人——惡質ê領導者，這to̍h是腐敗kap墮落ê主因，tsit種偽善無忠誠ê領導者，是國家敗亡ê主因，in用權力壓制正義kap真理，表現tī人間社會ê是虛偽、惡劣ê習俗。公義kap真理若為特權所壓抑，社會必定敗亡！國民政府tī短短數年內失去中國大陸，主因在tī放縱特權，民國37年蔣經國整頓上海經濟犯，但是tú-tio̍h揚子公司就束手無策，因為蔣介石下令禁止調查該公司（孔令侃為總經理）！

Tsit-ê天生瞎眼，不幸ê乞食者，伊可能生長tī一貧苦ê家庭，koh失明，造成伊不幸ê運命，失去kap人競爭ê本錢。馬太六：22～23，主耶穌講「目tsiu to̍h是身上ê燈」因此人生光明á無關鍵在tī目tsiu，人若失去引tshuā人生之燈，to̍h是生存在烏暗ê中間，伊ê行動無法度盡力發揮，處處受限制，tsit種ê人生buē可能有極大ê成就。既然無身上ê燈，in ê人生只有tī烏暗中摸索，這tī生存競爭ê社會中，是khah食虧ê事實，因為競爭ê條件比bē起明眼ê人，因此約翰福音九章描述ê tsit-ê天生瞎眼ê乞食者ê人生是悲慘不幸ê！

（二） 絕望中tú-tio̍h主
比如頭前所講，學生因為tsit位天生tshêⁿ-mê ê乞食向耶穌提出問題－是siáng犯罪？這mā teh說明傳統社會對tsit種不幸tiāⁿ-tiāⁿ會想tio̍h罪或者上帝ê責罰，這確實是真pháiⁿ處理ê問題，但是耶穌講，「Ài tī伊身上顯出神ê作為」，這是一件人生現象中ê偉大真理，若人ē-tàng tī伊ê無完全ê現實中彰顯上帝ê榮耀，he是一項非常有價值ê存在，因為tī人ê見笑或者無能為力ê時，ē-tàng轉變逆境，hông成做榮耀上主或者充滿能力，這kám-m̄是人生siōng大ê榮耀kap體面？Tsit種絕境變做榮顯神恩，侮辱變做上主ê權能，這to̍h是福音！因此tsit位不幸ê人，ē-tàng tī不幸中tú-tio̍h救主，這是伊siōng大ê福音。

耶穌基督ê福音，tāi-tsì經由人tsit種現實中ē-tàng顯現，對基督福音ê觀點，有時buē-sái用人ê常理去體會，因為tī人ê世界，人ê觀點kap判斷有時mā會有失覺察，tsit-ê事實，咱必須ài了解，人m̄是絕對，所以tī人生社會中，有真tsē失敗ê事例：發射太空船失敗、飛龍機失事，tsiah-ê lóng是會發生ê tāi-tsì，因為tī無完全ê人生中，無可能有絕對完全ê tāi-tsì。孔明ê智慧kap計畫非常厲害，伊ê空城計、借東風lóng thang看出伊ê智慧，伊用計火攻司馬父á-kiáⁿ mā是萬無一失，但是謀事tī人成事在天，這是bē-tàng否認ê真理。

人生時常有如意算盤，萬無一失ê人生規劃，但是ē-tàng成功ê人無tsē，理想kap現實ê距離teh說明人生ê有限性，tú親像使徒行傳十七章28節，「咱生活、動作、存留lóng tī祂…」，人無法度用家己ê能力去超越tsit-ê界線，tī tsit種無可能中，人若tú-tio̍h救主，to̍h是人生ê福音，福音ê能力有時kap人ê常理無仝。

若tuì人ê觀點來看tsit位天生瞎眼不幸ê乞食，實在是非常可憐，伊ê人生值得同情，但是若tuì另外一個角度去觀察，咱會發現，因為tshêⁿ-mê ê不幸kap悲哀造成伊kap救主ê事實，假使伊是正常、健康ê人，mā可能就buē tú-tio̍h救主，mā就bē有接觸tio̍h福音ê事實，當咱看見，伊tī tsit種悲慘不幸ê人生中ē-tàng榮顯上主ê榮耀，這kám-m̄是人生siōng大ê價值？基督ê拯救tī伊不幸中實現，這是人生siōng大ê光榮，基督徒ê人生，tiāⁿ-tiāⁿ ài有tsit種心態，「咱ê人生，就是beh彰顯上主ê榮耀ê人生」，無論你tī任何景況，lóng tio̍h ài有tsit種人生生活ê決定，tī你人生有成就輝煌ê時，你tio̍h彰顯上主ê榮耀，tī你人生失敗不幸ê時，你也tio̍h設法hō͘上主ê榮耀藉tio̍h你現實ê彎曲、患難ê性命kā伊發揮出--來，這是基督徒ê生活原則，mā是咱實在ê信仰生活。信仰生活絕m̄是kan-nā存在tī人生ê正面世界，有時tī人生ê負面狀況中koh-khah ē-tàng發揮伊ê功能。

（三）信仰者ê決定（去西羅亞池洗）
耶穌hō͘人信仰ê層次lóng無仝，有人是即刻完成，比如血漏十二年ê婦人或者提因城ê少女，但是有一kuá是ài經過信仰ê行動配合。

一個目tsiu失明ê人beh經過一段時間kap空間tsiah ē-tàng完成願望，必須有相當ê覺悟，tsit種覺悟是信仰生活ê內容，當一個基督徒聽tio̍h福音了後，伊必須uì主所指示ê所在去完成得救ê生活。Tú親像tsit位tshêⁿ-mê者，伊聽tio̍h耶穌向伊宣示得救ê完成是teh往西羅亞池去洗，tsit段路程對伊來講是一段信仰ê路程，有時間kap空間橫隔tī伊ê面前，tsiah-ê狀況tiāⁿ-tiāⁿ 成做信仰生活上真tsē阻礙，這to̍h是現實。基督徒tī伊信仰ê路徑上，有一kuá人會因為時間ê延遲或者場所ê變遷產生真大ê變化，本來有希望ê事實變kah塗塗塗，tsit款tāi-tsì，tī信仰ê世界tiāⁿ-tiāⁿ會發生。有真tsē教會青年，tī本地教會ê時非常熱心可取，一旦外出或者khang-khè環境變化，就完全迷失阿，真tsē可敬ê教會青年teh婚後，信仰生活完全改變！Tsiah-ê lóng teh說明現實ê基督徒信仰ê路徑。

咱thang tuì tsit-ê tshêⁿ-mê ê人ê現實來了解伊所必須面對ê信仰ê決定。Tī信仰ê世界，基督徒必須了解，信仰必須建立tī人格ê存在之上，人格ê動作，是經過思考→選擇→決定→行動→結果ê步數，信仰ê重要性的確m̄是只有teh聽tio̍h福音ê時機而已，必須用堅強ê決定力去親身實行，tsiah ē-tàng有得救ê把握，ná親像tsit位tshêⁿ-mê ê人，假使伊只聽tio̍h耶穌ê聲音suah無決定ê行動，伊ê目tsiu buē koh見光明，tuì tsit件tāi-tsì，咱了解一項信仰ê絕對真理。

對一位天生tshêⁿ-mê ê乞食，伊就信仰ê決定，的確非常艱苦：
（A）雙眼失明，空間ê阻隔：西羅亞池tī耶路撒冷ê東南方，對一位雙眼失明ê人，tsit段路程相當pháiⁿ行，必須ài有決定kap勇氣，若無會失敗，因為tī-tsia有真tsē阻礙會影響伊得救ê把握，這to̍h是基督徒ê信仰路徑。
（B）傳統惡勢力ê攻擊（法利賽人，用惡霸ê極權，否定真理），法利賽人為tio̍h穩固家己ê地位kap權力來否定tsit位雙眼失明，hō͘基督所醫治ê不幸者，雖然有絕對明顯ê事實証明耶穌基督ê作為，但是in只因為耶穌teh安息治病ê動作tsiah否定伊ê絕對性，tsit種法利賽人ê心態，無論tī信仰ê世界或者一般生活中，尤其是政治運作中，四界thang看tio̍h tsit種「傳統勢力腐化ê爪牙」，為tio̍h確保家己ê權益kap現實ê厲害關係，真tsē政客ê作為實在卑鄙可惡，kan-nā顧家己私利，m̄管國家民族ê死活！
（C）現實無情ê父母kap親人（無人敢出面証實！），當tsit位可憐不幸ê乞食hō͘主耶穌醫治了後，照理，伊厝內ê人應該是刣豬斬羊大慶祝，因為伊ê kiáⁿ兒天生失明，tsit-má已經thang看tio̍h天日，但是約翰九章20～22節記載，tsit對可憐ê父母，因為真理hō͘傳統ê權威所壓制suah m̄敢面對事實，m̄敢講出真實ê內心話，tuì人性ê立場看，這是何等ê悲哀！
（D）信心的確認kap決定：咱看tsit位不幸可憐ê人ê信仰體驗，活tī án-ne惡質ê傳統社會中，伊完全表現出伊信仰ê特性，伊敢用伊卑微ê身份拒絕hiah-ê領導者，koh向反對勢力見証真理！（九：30～33）伊所講ê實在是由信仰ê動力發出ê，面對傳統惡勢力ê壓抑，伊無屈服，法利賽人講：「耶穌是罪人，是惡者。」伊suah講：「有一件tāi-tsì我知影，以前我是看無--ê，如今ē-tàng看tio̍h」（九：25），這是伊信仰ê確認，伊所知ê tsit件tāi-tsì，是伊人生ê新性命，是伊人生ê全部。了後，伊hō͘法利賽人趕出會堂，koh tú-tio̍h主耶穌ê時，伊所講ê信仰告白，kap對主所表現ê感恩kap尊崇，lóng是伊信仰ê決定！伊用堅定ê信心kap行動去完成主所交託有關伊siōng切身ê問題。

結論：Tsit段聖經確實值得咱深思，「你往西羅亞池內底去洗」，是主耶穌向信伊ê人所講ê話，今á日mā是仝款！咱ài用行動來成全主ê旨意。