《受恩蒙福的一生》

 | | | 轉寄

解開Hō͘伊行

作者 林宗要 2010.12.05

約翰十一：1-3；17-44

Tī耶穌ê傳道生涯中，tsit-ê伯大尼ê厝佔有真重要ê位，路加九：58「狐狸有孔，天空ê飛鳥有巢，唯獨人子無枕頭所在。」Tsit句話充分表現出耶穌當時ê生活狀況，確實耶穌ê生活是án-ne，tī tsit種現實中，伯大尼tsit-ê家tī耶穌ê宣教事工上有關鍵性ê幫助，因為tī-tsia，有安息有溫暖情誼有平安kap疼ê關懷，tsiah-ê人間ê情誼tī人生生活中是有真有正面價值。耶穌雖然是神，但是祂是道成肉身ê事實，所以祂mā有人ê屬性（無罪而已）。所以tī hit種辛苦艱難ê人生日子中，有一個所在ē-tàng體會tio̍h人間ê溫暖，實在是一件值得歡喜ê人生tāi-tsì，因此耶穌kap伯大尼家有特別ê感情是咱所ē-tàng了解ê。

Tsit-ê家ê三名人物kap耶穌ê關係lóng真特別，拉撒路tuì死koh活起來ê記事，tī福音書中是非常ê特別，tī耶穌ê神蹟中，祂beh叫死人活起來，lóng是無像拉撒路事件特別，是tī墓內已經四工（約翰十一：17），若通常ê生理狀況，肉體已經開始爛，tī tsit種狀況中，祂叫拉撒路tuì死內底復活。

咱tuì tsit段聖經來學習耶穌beh向咱講ê問題，咱知聖經ê事實，的確m̄是只teh說明過去所發生ê事件而已，tī福音書耶穌ê真tsē行為中，lóng有祂beh向學生提起ê真理，祂tī-tsia特別強調拉撒路ê事件是為tio̍h上帝ê榮耀，hō͘上帝ê kiáⁿ兒tuì tsit-ê tāi-tsì得tio̍h榮耀。雖然祂接tio̍h拉撒路病危ê消息了後無隨去伯大尼探視，iáu tī所tuà ê所在tuà二日，（Hit時耶穌kap學生多數ê學者認為是tuà-tī約旦河東邊ê比利亞）因此頭尾就有四工，所以耶穌到伯大尼ê時，拉撒路已經死四工，為tio̍h beh hō͘上帝ê榮耀koh-khah發揚，祂用tsit種方式，確實tsit種神蹟是耶穌神蹟中ê神蹟，當然對神蹟ê了解，你若認為是神蹟ê時，就無論任何狀況lóng是有可能ê，tī約翰福音書耶穌所行ê神蹟tī共觀福音書lóng看bē-tio̍h ê。

1） 迦提婚禮ê變酒（二章）。
2） 王ê人臣ê kiáⁿ重病（迦百農）去ah你ê kiáⁿ兒活啊，彼人信耶穌ê話就去，伊ê kiáⁿ兒就活起來（四：44－）
3） 畢士大池邊破病卅八年ê人（五：1-9）
4） 變餅hō͘五千人食（六：1－）此神蹟三福音書lóng有
5） 醫好出世就tshêⁿ-mê ê人（九：1－）
6） 拉撒路復活（十一：）

Tī三福音書中mā有hō͘人復活如睚魯ê女（馬太九：馬可五），提因城寡婦ê孤kiáⁿ（路加：七），但是tsiah-ê 是tī時間上kap拉撒路無仝，若tuì生理觀點思考ê時，咱就會了解拉撒路tuì死復活ê困難是比其他ê神蹟khah難，tú親像拉撒路ê姊妹所講：主ah，伊現在一定是臭啊，因為已經死四工啊（十一：39），teh信仰ê觀點上，你若認為伊是神蹟，tsiah-ê時間上ê差異應該m̄是根本ê問題，teh聖經研究上，khah大ê問題tī學者間是認為為何án-ne重大ê神蹟tī三福音書中suah看bē-tio̍h？這是聖經學家teh研究福音中ê一個siōng困難ê問題，當然有正反兩面ê論述，siōng重要是teh宣示死kap復活ê關係，m̄是只有顯示主耶穌本身ê死kap復活ê問題，同時mā hō͘信祂ê人也ē-tàng分享復活ê性命，tú親像耶穌向馬太講：復活tī我，性命mā tī我，信我ê人雖然死去，mā一定復活。只要活teh信我ê人，一定永遠buē死（約翰十一：25-26），tsit種復活ê性命ê論調，除了這以外tī別位無koh看tio̍h像耶穌tsit種講法，因為祂是性命ê主，所以祂有tsit種權柄講tsit種話，拉撒路復活tsit件事實，beh hō͘信祂ê人也ē-tàng分享tsit種復活ê性命ê真理，是tsit件神蹟ê重點。

（一）主ah！你所疼ê人破病啊（十一：3），拉撒路死去（十一：14）
咱先來思考一個問題，to̍h是十一章三節kap十四節所講--ê，主所疼ê人ê破病kap死！咱若看伯大尼tsit-ê厝內ê三ê人，in有無仝ê性格，大姐馬大因會事奉來出名，tī現今教會中，只要真gâu事奉ê人lóng hông稱做「這是阮教會ê馬大姐」，馬利亞表現tī耶穌身上siōng出名ê是用hit罐真貴重ê香油膏耶穌ê行為，tsit件tāi-tsì teh強調伊無計較ê疼，因此tī現代教會中，只要紀念信徒teh奉獻上比如馬利亞tsit種精神ê人，就會用馬利亞ê名稱來紀念伊，真tsē教會lóng有馬利亞館，to̍h是teh紀念某某人對教會無計較ê付出，ná親像馬利亞疼主ê情形。最後一位男性拉撒路，伊siōng優秀ê to̍h是約翰十一、十二章所記，伊tuì死內底復活，成做復活ê見証人，因為伊ê復活，伊成做hō͘人寫phue去耶穌ê原因（約翰十二：10-11），伊mā tiāⁿ-tiāⁿ kap主耶穌坐仝位，所以tsit三ê人用三方面無仝ê性質表現出信仰ê無仝內容，tsiah-ê狀況teh說明in tuì無仝ê方向表現出疼主ê心情，所以成做tī基督ê傳道生活中，祂siōng捷去ê所在，所以聖經用：主ah，你所疼ê人來形容拉撒路實在是真適當！

照常理，主所特別喜愛ê人，主應該會特別賜福（這mā是聖經ê真理，因為上主一直強調人kap上帝ê關係應是處tī應允ê關係，人若完成kap上帝之間ê關係，上帝一定降福氣hō͘祂所疼ê人，這是上帝ê應允），所以若照常情，像伯大尼tsit-ê家庭，主耶穌應該tio̍h用疼kap平安ê籬笆hông圍起來，hō͘ in生活tī平安喜樂kap健康中tsiah是合理，因為in是主所疼ê人，tī in生活中，會為in除去所有負面ê人狀況，這是正常ê傳統見解，因為人kap上帝之間ê關係是忠誠ê信仰者，（上帝所歡喜，所疼ê人）必定ē-tàng就會領受上主ê恩典kap賜福是理所當然ê。但是咱若看教會生活或者是信仰史上ê事實，咱就會了解tī教會中確實有真tsē熱心疼主ê信仰，in ê人生境況無一定是蒙福--ê，顛倒是充滿tio̍h真tsē不安、痛苦kap一連串ê逆境，我認bat一位長老，非常疼主疼教會、肯事奉甘奉獻，mā真有能力，參加女宣、詩班、任主日學長，熱心探訪，尤其是愛牧者，但是四十出頭就致tio̍h癌症往生，這to̍h是主所疼ê人，但是可惜伊ê人生狀況無算順利，tī現實ê教會中，tsit款tāi-tsì四界lóng ē-tàng看tio̍h，所以咱看聖經講：主ah！你所疼ê人破病啊（死去），咱就koh-khah ē-tàng了解人生ê狀況，tī人生生活中，tsit種病kap死是人生ê不幸kap悲哀，基督徒有覺悟。

反面來思考，忠誠tī主ê一定亨通或者疼祂ê必蒙賜福，tsit種信仰ê信息若kap現實主所疼ê人mā會破病甚至死亡（大概認為m̄是適當ê死ê時期）ê情形來思考ê時，咱就會了解tī人生ê現象中，的確有tsit種時hō͘咱想buē通ê人生狀況會發生tī主所疼ê人身上，tsit種現象tī聖經ê信息中mā ē-tàng看tio̍h，舊約ê約伯，伊ê人格信仰lóng是一流--ê，但是伊ê人生狀況suah是非常ê不幸kap悲哀，或者是hiah-ê為上帝盡忠ê先知ê生活mā是真無好，新約ê保羅，哥林多後書十一章描寫伊ê人生境遇，thang用不幸kap悲哀來形容，siáng ē-tàng比伊koh-khah疼主，替主ê教會ê宣教盡siōng大ê貢獻，但是伊ê下場kap經歷是非常不幸--ê。有一位長老，人格suí信仰好，負責礦業會計，別人做會計ê時出入無guā大差別，伊做會計ê時，ta̍k年tshun ê炭有kuí十噸，原因何在？老實無貪心。但是suah kap病做朋友，一生食藥m̄-bat怨嘆，了後因為癌症過身，teh說明啥物？主所疼ê人仝款會破病、mā會死。

（二）Kā hit塊石頭徙開
人死ài埋，台灣ê風俗是盡量將死人ê遺體khǹg tī厝內愈久愈好，台語叫做phah桶，通常lóng tuì看日á師父看日子tsiah決定，過去時常看tio̍h略略仔好額ê人若看日仔tiāⁿ-tiāⁿ會tshuē bē-tio̍h好日子thang埋屍體，有時ài幾十工了後、幾個月了後，但是有一個現象，to̍h是sàn-tshiah ê人去看日子，通常lóng是三、四工了後就有日子ē-tàng處理。

以教會ê立場來講，只要符合喪家各方面需要ê時，通常lóng是好日子，因為上帝所創造ê日子lóng是好日子，所以信徒處理喪事ê時應該是比一般人順利，而且hō͘人肯定做嚴謹tsiah合情合理。現在tsit位主所疼ê人破病啊，耶穌所疼ê人mā會hō͘死神吞滅，耶穌到伯大尼ê時，in已經將拉撒路ê屍體安葬tī固定ê所在（一般猶太人ê墓是安置tī孔內，外口用大石塞tiâu來堤防野獸ê侵犯，）咱若看主耶穌ê墓mā是án-ne，墓口有大石塞tiâu，七工ê頭一工，hiah-ê探墓ê婦人iáu為tioh8hit大石徙buē開tsiah煩惱，「Siáng hō͘咱kā石頭tuì墓門徙開neh？」（可十六：3-4）。因為hit塊大石kā主所疼ê拉撒路塞tiâu啊，hō͘伊永遠tī墓內，因此有聖經學者講tsit塊石是生ê希望ê終止符，tsit塊大石kā路塞tiâu，hō͘人永遠無可能tuì墓內出來，但是性命ê主耶穌基督，tī-tsia命令人kā hit塊石徙開，beh hō͘主所疼ê人tuì死內底復活，必須徙開hit塊阻擋去路ê大石。「輥開hit塊石」tsit件tāi-tsì，tī基督徒信仰生活ê過程中有非常重大ê意義，因為有時基督徒屬靈ê性命會像拉撒路hit種hō͘ hit塊大石塞死，致使基督徒無法度kap榮耀ê主有面對面ê機會，當咱詳細kā伊思考咱ê信仰過程ê時，tiāⁿ-tiāⁿ為tio̍h私己ê問題失去了基督徒應該有ê性命ê發揮，ná親像拉撒路仝款，hō͘ hit塊大石塊封死，因此有人講，hit塊石是死權ê封印，信徒beh發揮屬靈性命ê先決條件to̍h是必須先輥開hit塊塞死信徒ê靈命，面對榮耀ê主ê大石！因為hit塊大石是塞死一個beh tuì死入生ê人ê通路，各位啊！Tī咱ê信仰世界，你必須認清啥物狀況阻礙你ê去路－tuì死ê世界beh進入榮光ê所在！Hit塊阻礙ê大石若無輥開，你永遠無法度面對榮耀ê主。為tio̍h beh出死入生，beh面對榮耀ê主，你必須輥開hit塊大石！各位啊！你知影阻礙你ê hit塊石是啥物mah？錢財mah？Kā伊輥開，若無你永遠見bē-tio̍h榮耀ê主，是你ê事業hō͘你無法度出死入生？你ê人生價值觀kap你ê人生思想會封死teh信仰過程中面對性命ê主ê機會ê時，你必須設法徙開hit塊阻礙uì上帝ê道路ê hit塊石，若無你ê人生是永遠活tī死ê世界，基督徒必須了解，咱ê主一直teh向咱呼喚「輥開hit塊石」，因為tsit塊封死通往榮耀ê主ê路ê tsit塊大石若無徙開，一個死ê人生是永遠buē-sái行出來面見性命ê主！

這是基督徒信仰ê使命kap課題，咱必須認真去思考，phah拚來完成tsit-ê事工，消除你uì上帝ê道路上ê大石，hō͘伊成做thang直達通順ê屬靈道路，án-ne，你ê靈命會thang純全無缺！

（三）解開伊，hō͘伊行。（十一：44）
主所疼ê人破病致死，因此葬tī墓內底，tī墓口hō͘一塊大石塞tiâu，但是經由耶穌命令，人已經將hit塊封死ê大石輥開，現在主耶穌koh再進一步命令拉撒路tuì墓內出來（43），聖經寫講「死人就出來了」，tsit-ê死人是「手脚纏布、面頂包手巾」（44）無像台灣風俗ài穿七領或者九領衫褲來方便hō͘陰間ê鬼魂取用，猶太人是將細麻布包tī清氣ê屍體頂kuân，所以拉撒路雖然tuì墓內出來，但是tī伊kui-ê身軀lóng包tsiah-ê細麻布，聖經特別用「手脚纏布、面頂包手巾」來形容一個死人已經完全失去了行動ê能力，因為án-ne境況實在無法度行動，無行動ê性命是無價值ê性命，所以性命必須ài有自主ê行動ê能力，所以主命令其他ê人解開hō͘伊行，因為手脚纏布、面包巾是無法度hō͘人伸脚出手，人無法度行動，因為伊性命ê動力hō͘ tsiah-ê布kap巾縛死死ê，拉撒路雖然tuì死復活，但是suah hō͘ hiah-ê布kap巾縛tiâu伊性命應該有ê行動力，tī屬靈ê過程中，tsit件tāi-tsì是值得咱用心去思考ê，tī現實ê教會生活中，真tsē人lóng已經hō͘主基督所呼召hō͘伊新ê性命，可惜ê是tsiah-ê性命並無解放出來，tī tsiah-ê性命中，猶原有真tsē人ná親像拉撒路仝款，「手脚纏布、面頂包手巾」。Tī屬靈ê過程中，真tsē hō͘基督耶穌呼召ê人無法度發揮出屬靈應該有ê活動能力，tsiah-ê有名無實ê信者，to̍h是kap當時ê拉撒路仝款，in「手脚纏布、面頂包手巾」，tsiah-ê阻礙tio̍h in ê性命力ê發揮。

咱若用信仰生活ê過程來思考ê時，咱確實會了解真tsē信徒ê信仰狀態實在hō͘ tsiah-ê會阻礙性命力發揮ê布kap巾縛死，所以in無法度發揮出新性命ê動力，因為in整體ê性命實在hō͘ tsiah-ê世俗ê惡勢力所縛死無法度活動！但是感謝主！祂命令tshun ê人解開tsiah-ê縛手縛脚ê阻礙物，hō͘伊有正常ê行動空間，tī-tsia咱必須注意一件tāi-tsì，to̍h是祂叫tshun ê人來做tsit-ê khang-khè，為何？主愛人人參與祂拯救ê事工，這是今á日咱ê教會ê大使命，因為tī咱教會ê四周圍iáu有真tsē ê性命，in是「手脚纏布、面頂包手巾」ê狀況，咱教會存在使命是tī做「解開伊，hō͘伊行」ê信仰過程，m̄是只求上帝完全賜與，是kap上帝同工，盡你應該盡ê本分，來完成上帝tī你身上ê信仰ê工程。

今á日咱必須了解，tī靈ê事工上，真tsē人ná親像拉撒路仝款，手脚纏布、面包巾，嚴重ê失去性命動力，實在tsit種人生是無意義ê，因為tsit種性命無法度發揮性命可貴ê力量， tuì人類社會無貢獻，所以是無價值ê性命，各位啊！當你思考你ê性命ê實質價值ê時，你ê性命如何？是m̄是ná親像拉撒路當時「手脚纏布、面頂包手巾」ê性命？Tsit種性命必須ài解開hiah-ê阻礙tio̍h性命力發揮ê布kap巾，將tsiah-ê物件完全去除了後，你ê性命tsiah ē-tàng成做純潔、有力量ê性命，來發揮上帝交代你應該有ê力量，你ê性命是m̄是hō͘世俗ê真tsē會縛死你豐盛ê性命力ê tāi-tsì所控制tiâu？Tī你ê性命中有juā-tsē布kap巾teh束縛你ê手脚kap面？咱必須了解塞tiâu拉撒路ê hit塊大石已經hông徙開，這是大原則，但是基督徒ê失敗，tiāⁿ-tiāⁿ m̄是tī hit塊大石，是縛tī你ê脚手ê布kap巾，tsiah-ê你看做微細ê人生狀況。

結論：基督徒必須了解咱ê性命是出死入生ê性命，大石已經徙開，人已經出墓，但是你ê性命是m̄是iáu hông縛死？若手脚iáu纏布面iáu包巾，是無法度發揮性命ê價值！