《受恩蒙福的一生》

 | | | 轉寄

聖潔ê教會

作者 林宗要 2010.12.12

使徒行傳五：1-11

耶穌ê死，帶hō͘學生有真大ê衝擊，造成in ê身心lóng真thiám、困惑kap絕望。因為in認為耶穌既然ē-tàng行異能神蹟克服人生真tsē問題，甚至ē-tàng hō͘人起死回生，祂若是來拯救以色列民族ê救主，suah無想tio̍h伊傳道生涯竟然hō͘當時反對勢力所終結tsiah hông釘死tī十字架，因此耶穌ê死對in來講是hō͘人絕望--ê，m̄-koh tsiah-ê反應是in ê信心無堅定ê原因，in buē-tàng體會耶穌來世間ê使命，耶穌bat真清楚kā學生講，人子必受釘死，三日了後復活。雖然當時ê學生對耶穌復活ê信仰iáu無徹底了解，suah已經化解in對耶穌ê死真tsē惡劣心情，teh耶穌復活了後四十工之久，耶穌告誡學生應該有ê信仰方式，祂kā學生講，祂kap學生雖然將beh暫時分離，但是suah應允in聖靈來做in ê幫助、安慰、導師kap力量，同時叫in ài建立教會，將福音傳揚到全世界，因為向人傳福音to̍h是教會存在ê使命kap價值，beh完成傳福音ê使命，教會必須ài有聖靈ê充滿，因為若m̄是uá靠聖靈ê能力，軟弱ê人是無法度完成án-ne艱鉅ê khang-khè--ê。

學生遵照主耶穌ê吩咐，tī耶路撒冷專心等候所應允ê聖靈，果然聖靈降到學生身上而且大大改變了in ê人生kap信仰，in ê心態完全kap以往無仝，咱thang用彼得做例，teh未承受聖靈ê時，伊tī信仰方面雖然有所表現，但是並無堅定，伊siōng大ê敗筆to̍h是三次m̄認耶穌，當伊受聖靈充滿了後ê信仰生活，tio̍h全然無仝了，咱看使徒行傳三章，伊表現出大有能力，使徒行傳四章伊甚至敢公然向當時ê大官見証主耶穌是救主，kap以前伊m̄敢tī人ê面前承認耶穌ê作風全然無仝。

Tsiah-ê tāi-tsì kā咱講教會生活ê重要事實teh受聖靈ê充滿，tuì使徒行傳一～四章亦thang看出。教會生活kap聖靈有密切ê關係，因為只有uá靠聖靈ê幫助kap引tshuā，教會tsiah ē-tàng正常而且理想ê運作，咱看使徒行傳二章經聖靈充滿了後ê教會生活，是非常ê完美。使徒行傳二：43-47；四：32-37，初代教會tsit種理想完美ê疼ê共同體，實在是教會ê典範。非常美好ê教會生活表現tī人間！相信了後ê基督教會，無任何教會ē-tàng kap初代教會完美ê信仰生活相比。

伊表現出基督教ê siōng kuân價值ê疼ê共同體，tsit種疼ê共同體ê發揮，必須ài藉tio̍h聖靈ê充滿tsiah ē-tàng完成。因為未受聖靈充滿ê人性，通常只表現出自然ê人性，因此充滿人自私ê慾望以及真tsē利己ê行為，tsit種自然人所表達出來ê是屬於肉體ê作為，mā是現實ê世界中咱所看tio̍h ê人性ê烏暗面。比如保羅tī加拉太書五章16節所講情慾kap聖靈為敵，tuì人ê情慾所產生ê結果是hiah-ê人類生活上真tsē惡劣ê作為，kap聖靈所結ê果子無仝。教會是耶穌基督所有ê樂園，是受聖靈充滿ê所在，因此tsiah ē-tàng有án-ne完美ê團契生活tī初代教會中出現，咱看tio̍h用疼做主體ê信仰結果，是人人克服私利為別人設想ê。Tsit種生活ê結果，to̍h是初代教會ê理想表現，tsit種完美ê疼ê共同體ê信仰生活to̍h是信仰siōng有力ê証明。

教會ê使命是傳揚耶穌基督所交託ê福音，伊本身是人類siōng需要ê實體，但是tiāⁿ-tiāⁿ因為教會無法度表達出tsit種真實ê信仰見証，致使hiah-ê人無了解教會所宣揚ê福音ê內容，自然buē-tàng接納耶穌基督做in ê救主，這是咱教會必須ài tiāⁿ-tiāⁿ省思ê一項嚴肅事實，同時mā是基督徒ài不斷來面對上帝來思考咱ê信仰kap生活。咱來思考下面幾點：

（一） 亞提尼亞ê作為
咱若看聖經ê記事咱會發現tio̍h一個真嚴肅ê真理，使徒行傳一～四章lóng teh說明教會ê光榮、勝利、完美、理想ê信仰狀況，實在是非常美好ê教會生活，m̄-koh當咱看使徒行傳五章ê時，就會發現tio̍h tī án-ne完美理想ê教會生活中，竟然會出現tsit種不幸ê悲劇。

Tsit件事實teh提醒/基督徒一項真理，to̍h是教會（基督徒）若當teh光榮、勝利、理想ê狀態中，往往mā是惡魔siōng活躍ê時刻。

惡魔往往tī hia-ê熱心、可敬、理想ê教會生活動工，所以愈是熱心事奉、表現理想信仰ê人，愈ài提kuân儆覺；因為這to̍h是惡魔爭取ê對象（比如有兩間教會，教會中惡魔全然無仝ê狀態：A）無閒應付活動 B）Ta̍k-ê tī厝尾頂睏，因為m̄免khang-khè，教會荒廢，基督徒冷淡，生活墮落，to̍h是惡魔所希求ê）。

Tī-tsia kā咱講一個事實，若自認為信仰生活堅實ê人koh-khah更加ài小心，以免跋倒，tī教會生活中，hiah-ê tī信仰生活中ê失敗者，通常m̄是hiah-ê對教會生活冷淡ê基督徒，顛倒是hō͘人肯定做可取ê信仰者。所以家己認為khiā了隱koh-khah應該謹慎（哥林多前書十章12節）。因為熱心可取ê基督徒往往是撒旦爭取ê對象。

初代教會hit種完美可取ê教會生活是撒旦所怨妒ê，所以伊用盡方法利用tsit對翁仔bó͘，hō͘當時ê教會生活產生污點，tī-tsia咱thang看出亞提尼亞翁仔bó͘，in ê信仰生活m̄是主所喜樂--ê。

A. 無老實kap虛偽
In tī當時ê教會生活中行事虛偽，咱知影，基督徒kap上帝之間ê信仰是忠誠真實--ê。約翰講上帝是神，敬拜ê人必須用心靈kap誠實ê態度敬拜祂，基督徒追求ê信仰to̍h是真實。若tī信仰生活中失去真實性，he就是失去了信仰。而且in虛偽ê行為mā是信仰ê致命傷，信仰者ài時常省思，咱ê信仰是m̄是真誠？是m̄是有虛偽ê動作？咱必須記tiâu基督tī馬太二十三章責備當時ê法利賽人，重點to̍h是tī in ê虛偽。

B. 虛榮心、愛面子
Tsit對翁仔bó͘疏忽了上帝hō͘人ê恩賜lóng無相仝，in看tio̍h當時有一kuá人ê熱心捐獻（尤其是巴提巴）tsiah受tio̍h教會全體ê肯定，因此in ê虛榮kap愛面子ê心思hō͘ in做出tsit種無老實ê作為，tī-tsia咱mā thang看出tī信仰ê世界，的確beh去除tsit種心態，若無咱ê信仰buē-sái榮耀上帝，只榮耀人，因為tī平常ê世界，虛榮心過重kap相愛面子ê人，lóng已經是不可取，tī信仰ê世界koh-khah是án-ne。

C. 欺騙
亞提尼亞翁仔bó͘ ê作為表現出一種驚人ê罪，to̍h是欺騙上帝。彼得責備亞提尼亞講：亞提尼亞！為甚麼撒旦充滿你ê心來欺騙聖靈，將賣田產ê錢暗中留幾份？（使徒五：3）In若只將部分獻hō͘教會，彼得一定buē責備伊：問題是in宣稱in賣掉「一切」獻hō͘教會，但是暗中suah留一部份。其實in有權ē-tàng留一部份，但是bē-tàng欺騙，信仰生活中ê動機真重要，因為伊是行動ê原因，teh信仰ê過程中主khah tsiap鑒察信仰者ê動機，譬如耶穌o-ló獻二個半厘ê婦人人，有時主mā會向咱要求咱ê時間、tsiah ē-tàng kap錢財、恩賜等等，但是咱必須會記一個事實，to̍h是主koh-khah歡喜咱敬拜祂是出自真誠ê信心、純潔ê動機。而且咱知影，tī人ê世界，欺騙ê tāi-tsì mā無可能久長，因為ē-sái瞞一時，瞞buē了一世。這是人間ê情況，koh-khah是tī屬靈ê世界？聖經時常提起：上帝是bē-tàng 輕慢ê，欺騙上帝ê結果是敗亡！

（二） 彼得ê行動（保持教會ê聖潔）
咱若讀tsit段聖經ê時，咱會發覺彼得ê行動kah-ná khah過份一kuá，聖經雖然無寫in二人獻出juā-tsē，但是kā伊觀察tsit-ê tāi-tsì thang知影，因為是賣田產ê錢，數目應該真大，若用今á日台灣ê錢來算，可能是十幾萬或者幾百萬kho͘，tsiah-ni̍h大ê數目捐hō͘教會，彼得應該tio̍h心懷感謝來接受tsiah是，為何kā伊罵，致使tsit對翁仔bó͘當場猝死，彼得為何用án-ne殘忍ê方法來對待tsit兩位無忠實ê信徒neh？

上帝hō͘ in ê刑罰kám bē相過重neh？這是人tiāⁿ-tiāⁿ the想ê問題。

當咱讀tio̍h tsit段聖經ê時，會想tio̍h現代教會ê基督徒奉獻ê問題，真tsē基督徒pua̍h-kiau贏錢將其中ê一部份the̍h來奉獻，tio̍h六合彩ê基督徒，獻大筆錢hō͘教會，這到底是啥物款ê信仰？

Tī-tsia彼得處置亞提尼亞翁仔bó͘ ê情形實在無符合慈疼ê上帝ê形象，因為聖經時常提起耶和華有恩典kap憐憫，確實，咱若以上帝慈疼ê性格來思考，咱有可能無法度了解彼得ê作為。為啥物彼得會用tsiah-ni̍h重ê刑罰來處置tsit對翁仔bó͘，kám-m̄是欠缺疼心？

但是咱ē-tàng瞭解彼得tsit-ê舉動是因為：
1） 保持教會ê聖潔——初代教會當teh克服萬難，tī聖靈ê引tshuā之下漸漸形成完美教會ê形象，為tio̍h beh保持教會tsit種純潔性，彼得不得已用siōng沈重ê作為來處理tsit-ê tāi-tsì。相信彼得那時tsūn，一定mā是作一個真痛心ê決定，但是為tio̍h保持教會榮耀以及完美無瑕ê事實，tú親像保羅tī以弗所五章27節：「Beh將伊獻hō͘家己，做榮耀ê教會，無lâ-sâm無皺痕，to̍h是聖潔無缺點ê」，這是教會應該ài有ê聖潔。

2） 教會ê訓練hō͘基督徒了解，只要屬於耶穌必須實實在在kap耶穌有真正ê關係－比如約翰福音十五：2「只要屬於我buài結果子ê枝，伊to̍h剪去」，咱承認咱ê無完全kap真tsē缺失，m̄-koh tī上帝所特別召選ê聖潔團體，是無允准有tsiah-ê不法ê tāi-tsì存在--ê！

3） 對基督徒啟示伊ê信仰生活kap奉獻有密切ê關係－奉獻ê主旨tuì án-ne tī對上帝恩典ê感激所產生ê自然反應，無論任何奉獻，伊ê精神lóng無應該離開基督徒對上帝ê恩典ê感激。

Tuì tsit種感恩ê心情所產生ê自然表達是奉獻ê siōng kuân價值。「各人照伊ê本心所酌定ê，無tiuⁿ-tî、無勉強，因為上帝歡喜願意奉獻ê人」（林後九：7）Tuì亞提尼亞tsit件tāi-tsì，基督徒ē-tàng學習奉獻ê真誠態度。

另一件教導to̍h是留機會hō͘人，假使當時對彼得ê責難，tsit對翁仔bó͘若ē-tàng真誠悔改，相信主一定會憐憫，人無完全，難免有過失，但是悔改ê心是上主所喜樂，比如詩篇五十一：17：「神所beh ê祭，就是ài憂傷ê靈，神ah！憂傷痛悔ê心你一定m̄好輕看」，犯罪ê心靈只要真誠tī上帝面前悔改，祂一定kā伊接納。

（三） 少年人ê責任（除去阻礙物）
亞提尼亞翁仔bó͘ ê作為tī當時ê教會中是一個污點，照上帝ê教會ê性質，教會內ê lâ-sâm必須ài除去，伊二人ê信仰心態實在tuì當時ê教會無幫助，因為教會是聖潔ê團體，tī聖潔中koh-khah 無允准tsiah-ê垃圾，ná親像純白ê衫頂ê污點或者像一鍋白米飯中有lām tio̍h一kuá雜物，tsit種情形對人生來講lóng是tsiok驚人ê現象，tī人生中buē-sái留有tsit種污點。咱看社會上，人對待bat關過tsiah出獄ê人ê態度，雖然講tsiah-ê人之中有人是已經完全改變，但是tiāⁿ-tiāⁿ因為過去ê記錄suah無法度hông接納！Tī上帝純潔ê教會中，koh-khah buē-sái留有侮辱上帝榮耀ê不法作為，因為信仰生活koh-khah希求信仰者完全ê聖潔！

當時教會ê污點（亞提尼亞翁仔bó͘ ê作為）已經hông處置。使徒行傳五：3-6：「仆倒斷了氣，…有一kuá少年人起來，kā伊包好扛出去埋啊。」，tsit節經節對現代教會ê青少年真有啟示作用，青少年有ê是熱情kap強壯ê力量，beh善用上帝所賜hō͘ ê tsiah-ê熱情kap強壯ê力量，投入教會，清除教會中真tsē垃圾，hō͘教會保持聖潔，是青少年人ê責任。

每一個時代ê教會lóng會有上帝所無喜樂ê問題，去除tsiah-ê問題，是需要有熱誠ê心思以及願意獻出in強壯ê力量ê人來負擔。今á日ê教會真需要tsit種有心，而且肯獻出in心力ê基督徒，來維護上帝ê教會ê聖潔，因為tsiah-ê屍體若無扛出去，he是教會ê障礙，會妨害教會正常ê運作，因為有污臭ê所在buē吸引人！教會ài盡量吸引人來聽上帝ê福音，但是tī教會中若有屍體或者腐敗，那無可能有人願意去，這是事實！Tsit-ê事實是咱今á日教會ê嚴肅ê問題。

結論：福音ê真理（基督、教會、信仰）無允准虛偽kap欺騙，了解基督徒奉獻ê心態kap發出疼心ê信仰生活！