《寧毀不銹─馬偕e5故事》

 | | | 轉寄

tsi̍t塊安息ê所在

作者 曹永洋 2009.05.24

1895年馬偕博士全家kap柯維思tńg來到台灣，知影清、法戰爭ê時tsūn，教會受tio̍h真大ê損害，tio̍h拜見當時日本駐台ê乃木總督。馬偕it向身體真勇，無想tio̍h到台灣傳教目tsi̍t ê nih 20-guā年。看..起..來原本應該iáu tī壯年ê 52歲，suah已經是馬偕ê晚年，伊只tshun 6年無到ê俗世旅程。

馬偕自細漢養成勤讀ê習慣，日後tī長年堅定ê宣教工作內底，伊mā無一工改變伊ê生活。

逐工透早伊就起床靈修、讀經、祈禱。閒ê時間，伊lóng是坐tī冊桌前研讀書冊。暗時伊mā tiāⁿ-tiāⁿ看冊到深夜。牽涉ê冊包括神學、哲學、歷史、醫學、理工方面。

伊宣教以外為人挽嘴齒、醫病ê事蹟hō͘真tsē人lia̍h做是伊受過專業ê醫學訓練，甚至斷定伊kap早伊7年tī台南傳教、獻身教育、醫療工作ê馬雅各醫生仝款，應 各lóng是醫學院畢業生，其實，馬偕讀ê是神學院，並無tī醫學院受過專業訓練。

1900年5月初1，馬偕去嘎瑪蘭巡視各教會，tsit時伊感覺嚨喉kap早前無仝。伊tī禮拜日或者是逐工暗時，通常beh向漢人、外國人、平埔人、熟番、南勢番、生番等原住民講道。Tuì禮拜同齊到禮拜六，馬偕看..起..來一直無hō͘伊ê咽喉有歇睏ê機會，伊真明顯是使用嚨喉過度。

6月初，beh離開最後1站 ê 打馬教會，tsit時伊kap會友、老人kap青年人大約3百人，ná行ná唱詩歌。做伙行ê有5名愛徒：in是柯維思、王春生、張金波、林佛梨、林達久，逐家來到渡船碼頭。船tī水面siong hián，搖無停，有人落水kā船khiú-ân，hō͘船身平穩..落..來，hō͘馬偕牧師順利落船。

馬偕心肝內kah-ná有預感，這是伊上尾訪問嘎瑪蘭平原，tsi̍t大tīn人目送tsit位偉人離去。馬偕kap送行ê人e̍t手告辭，信徒ê眼睭內lóng含tio̍h燒熱ê目屎，逐家同齊合唱聖 詩，馬偕tsit款情景，伊心肝內真清楚，tsiah-ê屬靈ê kiáⁿ-jî koh-khah àn怎to buē-sái kap伊tī人間相會。

6月24日伊kap門徒往北投教會ê時tsūn，就由門徒講道。伊家己ê聲音沙沙，甚至完全無聲。Tsit時伊原本應該完全tiām-tiām歇睏，m̄-koh因為1種責任感kap使命ê原因，伊繼續以無自然ê聲音，逐工iáu teh理學堂大書院勉強講課。

馬偕tī 8月15日ê日記內底寫tio̍h：「我講話失去聲量，我tī烏板頂頭寫字，hō͘學生抄，逐工iáu為學生siong課，我真明顯失去早前ê聲音a。」
伊ná看醫生ná巡視附近ê教會。

Tī khah早前1段時間，加拿大國外宣道會聽tio̍h馬偕破病，馬上派河南省英國女宣教師醫生麥克．克魯爾到淡水醫治，診斷結果判定是喉癌，禁止伊發聲講話。

9月15日理學堂大書院開學時，根本m̄免別人禁止伊講話，馬偕家己已經 完全buē-sái發出聲音。一切全lóng tio̍h uá靠筆來進行溝通，神學院委託郭水龍牧師代課，依馬偕所寫ê內容讀hō͘學生抄寫，馬偕家己坐tī講台頂tiām-tiām聽講。

9月28日馬偕iáu去uá淡水ê灰瑤á教會做禮拜，請kiáⁿ婿柯維思代替伊講道。因為病情lú來lú嚴重，呼吸困難，10月中旬tī台北病院由日本籍醫師烏岩，kap tī偕醫館協助ê英國醫生威廉金遜，為伊tī嚨喉開1孔，插1支銀管幫助呼吸。為tio̍h hō͘醫師逐日方便到厝來看病，全家由淡水搬到台北大稻埕河溝頭，租1幢厝tuà落..下。

11月初1馬偕由威勒金遜醫師陪伴，iáu有愛徒柯維思、陳清義、郭希信、陳錫等坐船往香港就醫。Tsit段時間神學院ê課全部交hō͘郭水龍牧師代理。

Tī香港治療2-koh-guā月，病況時好時壞。上尾判斷大概復原ê希望，koh坐船tńg來到淡水。

尾期馬偕ê病況變koh-khah嚴重，嚨喉開始爛..去，食kap吞已經有困難，tsit位昔日差不多行遍全台灣ê宣教先鋒，已經變kah瘦pi-pa，病魔漸漸吞噬原本勇壯ê身軀‥‥。

beh死前幾工，厝內ê人拍電報到香港，叫當時iáu teh讀高中ê孤kiáⁿ偕叡廉tńg來淡水。家己感覺活無juā久ê馬偕，聽tio̍h愛子ê船beh來，iáu tuì病床起..來，穿插整齊，等待愛子tńg來。

馬偕回想當年iáu是26歲ê青年，隻身渡海到台灣來宣教，如今愛子iáu未成年，tsi̍t塊甘願毀壞buē生sian ê生鐵，suah為美麗島燒盡siong尾ê餘光‥‥。

1901年5月31日半暝，家己知影連mī beh安息主懷ê馬偕，心肝內koh-leh想牛津學堂ê學生，感覺iáu有tsi̍t-kuá話ài kā學生交代，伊竟然以be7tsai7 ê腳步，拖tio̍h病體，偷偷á行到砲台埔ê牛津學堂，敲響轟立tī淡水鎮郊山崗牛津學堂ê鐘聲。

當厝內底ê人kap輪流照顧ê學生tshuē-tio̍h伊，beh tshuā伊tńg去厝裡底，伊iáu以無穩ê手tī烏板寫..落..來幾-ê彎彎khiau-khiau無法度辨認ê字，勉強ē-tàng推斷意思大概是「考試」（Examination）。

馬偕病倒ê siong尾tsi̍t段時間，輪流tī身軀邊守護ê學生有4、5位，確定知影姓名ê有：柯維思、張金波、卓開日、bat清江等，tshun-e姓名無法度調查確認。



1901年6月初2（禮拜日）下晡4點左右，堅強kap喉癌抗爭ê馬偕，tī淡水ê厝吞..落..去siong尾tsi̍t口氣。Tsit位影響台灣北部siōng大ê宣教師，安息主懷，得年57歲。

Tuì伊踏siong福爾摩莎tsit塊土地開始，m̄驚艱苦奮鬥30年，設立教會60-guā所，施洗信徒有3千人‥‥。遠tī嘻瑪蘭平原ê平埔族信徒數10人，聽tio̍h消息，經過2暝日ê長途跋涉，tuì in ê部落趕到淡水，in beh向心肝內siōng尊敬、愛戴ê偉人馬偕博士相辭。

馬偕博士ê追思禮拜，tī淡水理學堂大書院ê大禮堂舉行。葬禮由吳威廉牧師kap當時日本人教會（今á日濟南教會）第it任牧師河合龜輔牧師主持，送葬ê人大約有4、5百人。

馬偕博士ê靈樞採用西洋式，4周包tio̍h烏布，內裡用白綢tsū。棺柴蓋用玻璃製作，方便參加追思禮拜ê人看伊ê遺容。家屬照馬偕ê遺言，伊ê遺體安息tī搖曳ê樹影腳，tuì今á日淡江中學it直行到盡頭，1座舊體育館ê正pîng，就ē-tàng看tio̍h 1片由學校磚牆圍繞ê馬偕墓園，tī茂密ê老tsîng-á影下腳有1排墓碑，馬偕博士kap夫人張聰明、孤kiáⁿ偕叡廉翁á-bó、kiáⁿ婿柯維思、陳清義、tsa-bó͘-kiáⁿ偕媽連、次女偕以利，馬偕ê親族kap追隨伊ê幾位門徒‥‥lóng安息tī tsia。