《寧毀不銹─馬偕e5故事》

 | | | 轉寄

回首來時路

作者 曹永洋 2009.06.07

美國詩人桑德堡講過：「tsi̍t-tsâng樹á tī伊倒..落來ê時siōng好來量。」

馬偕博士到台灣宣教已經百guā年，伊過身到2001年mā tú好tsi̍t世紀。時間ê裁判原本tio̍h無情m̄-koh公平。馬偕ê志業m̄是世俗ê榮名、權利、高位，試看歷史頂頭ê暴君kap獨裁者，在生ê時為非sám做，真tshiaⁿ-iāⁿ，m̄-koh nā全力拔除，所有ê一切lóng來化做烏有，只留..落..來tsi̍t-kuah世人心寒ê惡行kap紀錄，提醒後人會記tit歷史ê教示。

128年來，台灣經過清法戰爭，了後tī清廷kap日本，進入日本50年（1895-1915）ê統治。

2次大戰結束，日本宣布無條件投降，台灣進入蔣家父á-kiáⁿ半世紀ê統治，內底iáu包括重大ê 228事件悲劇，38年久ê戒嚴時代，以及解嚴了後步入「民主」曲折ê歷史路‥‥。

無論將來歷史如何解讀，馬偕博士tī台灣ê近代化軌跡內底，伊留..落..來..ê事蹟是無法度抹消..ê。

it手創辦ê牛津學堂，如今已經成做淡江中學、真理大學（淡江工商、淡水學院前身）kap陽明山頭ê台灣神學院saⁿ-ê學府ê源頭。

基督教長老會創立ê淡江中學，tī教育史頂頭比日本1895年佔領台灣了後tsiah開始$5國民教育koh-khah早10幾年，tsit種西方ê近代教育對台灣ê現代化，產生了決定性ê推sak作用kap真深ê影響。

頭前提起ê南部馬雅各醫生、中部蘭大衛父子2代kap北部馬偕家族ê奉獻mā hō͘基督教ê福音tī台灣傳播、定根，mā為台灣人ê心靈，注入屬靈ê種籽。

另外台南ê新樓病院、中部ê彰化基督教病院、北部ê馬偕病院，koh-khah成做台灣醫療事業ê重要據點，kan-ta用saⁿ-ê領域對台灣社會結構、生活品質、教育水準、文化內涵所造成質kap量ê變化，就m̄是短短篇幅ē-tàng描寫..ê。

1997年淡水工商學院成立台灣第it-ê「台灣文學系」，台灣文學家巫永福、葉石濤、鍾肇政榮得tio̍h學校頒發ê第it、jī、saⁿ屆「台灣文學家牛津獎」。

2000年11月4日，tsit-ê獎koh頒hō͘千禧年正月初1透早1點55分過身ê王相雄。台灣文學系ê成立，經過真艱苦ê phah-piàⁿ，無juā久，國立成功大學mā成立台灣文學研究所。

淡水工商學院原本bueh改名淡水牛津學院（以紀念創校人偕歡理來自加拿大牛津郡），教育部以it般人會lia̍h做是牛津大學分校無接受。聽講mā-bat提出以「馬偕大學」當做校名，得tio̍h ê回應是馬偕博士是外國人，buē使用tsit款名。

做1-ê寫傳記ê文字工作者，我認為馬偕比任何tī台灣生活過ê「台灣人」Koh-khah台灣，伊tuì踏上tsit-ê塊土地hit工開始，當時27歲ê加拿大青年，用tio̍h「甘願毀壞，無願意生sian、àu..去」ê奉獻精神，tsi̍t世人做光榮ê獻祭。

馬偕tī淡水kap台灣女子張聰明小姐結婚，生tsi̍t-ê後生nn̄g-e5tsa-bó-kiáⁿ。Nn̄g-e5tsa-bó͘-kiáⁿ lóng嫁hō͘愛徒台灣tsa-po人柯維思、陳清義牧師，馬偕ê了後代繼續遺志，留tī教育界、宗教界、醫療界貢獻in ê才華kap心力，uì tsi̍t-ê「台灣人」ê定義來講，誰ē-tàng比in koh-khah愛台灣?

Tī天堂安息tsi̍t世紀ê馬偕博士，khah-su伊老大人家聽tio̍h伊ê大名無適合成做大學ê校名，可能伊會用正港ê福佬話，謙虛面告tsit位經辦人： 「先生，用我ê名字命名ê馬偕病院已經有台北、淡水、台東saⁿ-ê所在，我bē為學校校名ê核准或者是無kap你計較，m̄-koh你講我是guā國人m̄是台灣人，這tsi̍t點我thang tio̍h受氣ah‥‥。」

好佳哉咱只要想tio̍h馬偕博士it生ê事蹟，就會對tsiah-ê無愛台灣ê無知後輩所做ê詮釋tī心肝內做出判斷。聖經kā咱講：塵歸塵，土歸土，koh-khah àn怎to m̄免費心tī歷史ê大水中為大粒石頭或者是細粒沙去定位。

其實這mā無奇怪，1961年筆者初出校門，bat tī淡江中學教3年冊。Siong尾tsi̍t年iáu tuà過舊體育館劃出ê單身宿舍，細細ê窗á口sak開就ē-tàng看tio̍h馬偕ê墓園，日夜相對，3百6十guā-ê透早黃昏過去，每tsi̍t-pái tī校園敬仰馬偕銅像ê時，我mā m̄知影tsi̍t位偉人bat kā 30年siōng精壯ê歲月，無私奉獻hō͘台灣後代ê kiáⁿ-sun。



筆者tī淡江教冊ê時tsūn，名作曲家兼鋼琴家陳酒治牧師擔任校長，杜姑娘、德姑娘iáu在學校教冊，馬偕guā孫柯設偕老師mā tī淡江中學教歷史，謙虛、趣味、博學ê柯設偕長老，是日本時代台北帝大文學部第it屆畢業生，20世紀ê 60年代，柯長老ê母親偕來便利，當時已經是80歲ê年歲，無論好天，落雨，伊lóng是it身烏色簡單ê打扮，the̍h-tio̍h tsi̍t支雨傘，tī淡水ê老街頂uì真理街行..落..來，遠遠看tio̍h淡水小鎮ê人lóng是講：「平安。」所以，淡水人lóng叫伊「平安婆」，帶tio̍h溫暖、親切ê情意kap伊phah招呼，這是我記憶內底60年代淡水舞台ê情景之it…。