《寧毀不銹─馬偕e5故事》

 | | | 轉寄

餘音仍繞樑

作者 曹永洋 2009.05.03

合唱團團員內底陳酒治、駱先春等日後lóng成做出名ê音樂家。陳泗治校長m̄-nā是優秀ê作曲家，mā是傑出ê鋼琴家，伊後來tī戰後擔任20 guā年淡江中學校長。伊回想恩師吳師母ê時tsūn講： 「吳師母教鋼琴認真嚴格， tsi̍t點á lóng無清采，伊tiāⁿ-tiāⁿ對學生講：『音樂無「差不多」這款代誌』」。There is no “just aboot”in music.


台灣教會tī亞洲bat有「唱詩ê教會」ê美譽，吳師母thang講是大功臣。1930年4月29日伊bat親身tī當時音樂水準siōng高 ê醫專講堂（今á日ê台大醫學院前身）指揮tsi̍t場創新koh盛大ê大型演奏演唱會。團員除淡水中學、淡水女中學生以guā，iáu包括 台北幾所禮拜堂ê聖歌隊參與演奏。演唱者有百guā位，伊ē-tàng得tio̍h「北部教會音樂之母」ê美名m̄是好運 --ê。


台灣基督教長老教會1964年編訂ê聖詩第317首＜你若欠缺真失望＞ê歌詞，to̍h是出自吳師母ê手筆。當年吳師母寫tsit首聖詩ê時，to̍h是吳威廉牧師陷tī宣教困境ê時tsūn。牧師娘所寫聖詩，歌詞是án-ne：


「你若欠缺其失望，我當盡力來幫助，救主看了就歡喜，顯明真實趁道理。‥‥咱決意相愛，咱決意相愛，咱決意相愛，求聖神來幫助。」


吳牧師看了真感動，伊重新找tńg來信心，重頭koh來，認真繼續tī tsit塊土地上繼續為主做工。吳牧師過身了後，牧師娘iáu sì界作育英才，伊m̄-nā致力tī音樂教育，是音樂界ê慈母，另guā伊mā是信徒偉大ê慈母。


伊關心傳道師ê家庭kap貧苦ê信徒，伊對家己苛刻，對待人真好，tiām-tiām-á行善，tī透早或者是半暝探訪病人，伊ê話中總是充滿仁慈、溫暖，推動教會事工，有頭有尾，m̄-bat改變，是真有效率ê行動家。


吳師母tī 1960年以93歲ê長歲壽安息主懷。伊無論tī教會、學校或者是病院，甚至tī ma-lá-lí-á病院，伊留tī hiah-ê人ê心肝內ê印象就是愛kap實踐。


Tsit-ê對台灣奉獻真tsē ê翁á-bó有2男4女。長男tī第it-pái大戰中不幸死--去。次男為醫生、長安為護士亦是宣教師。次女siàu年tio̍h來過身。 第saⁿ ê tsa-bó-kiáⁿ做醫生，第sì ê tsa-bó-kiáⁿ做護士。Tsiah-ê後生tsa-bó-kiáⁿ對台灣社會ê貢獻mā真tsē。


Tī tsia特別beh來提起，後來koh有tsi̍t位uì加拿大來ê德明利姑娘（Miss Esabel Taylor, 1909-92）。伊到台灣了後接--落來吳師母培育音樂人材ê工作。30到70年代bat tī淡江男、女校就讀ê學生，無人m̄-bat tsit位出名ê鋼琴大師。


台灣樂壇真出名ê駱先春、陳酒治、陳信貞、鄭錦榮、吳淑蓮、林淑卿、詹懷德、駱維道、郭淑道‥‥lóng是伊ê高足，台灣百guā年來，ē-tàng有án-ne高ê音樂水準，人才輩出，吳師母kap德姑娘灌溉ê心血功bē-tàng無。