《寧毀不銹─馬偕e5故事》

 | | | 轉寄

第it-ê門徒

作者 曹永洋 2009.03.01

馬偕學習語言，研究文字lóng是為tio̍h宣教，m̄是為tio̍h學習來學習，koh-khah m̄是一種純粹ê研究。

以家己古老文化做中心ê漢人，tuì明朝後，to̍h kā外國人lóng看做蕃á，全部lóng是無開化ê「番á」，所以叫紅頭毛ê荷蘭人「紅毛蕃」，叫基督教 「番á教」，kā水泥叫「紅毛土」，「火柴」叫做「番á火」。
馬偕開始tī淡水以文字傳道，找一大張中國報紙，kā十誡印tī報紙頂，貼tī 厝門ê guā口，這張紙隨hō͘人kô͘ làm土，koh hō͘人thiah-tiāu，tah第二張mā仝款ê運命，等kàu貼第三張，tsiah好好á保留..落來。

Tsit位漢化siōng深ê西洋傳教士，對台灣農藝亦有貢獻，譬如菜頭（菜頭）、臭棉子（柑á蜜）、菜花（花á菜）、高麗菜（廿藍菜）、敏豆、胡菜頭、甜菜、外國芹菜等‥‥，有bē少是伊tuì歐美輸入種籽，tsiah 藉tio̍h教士、信徒，tī台灣各地栽種，漸漸推廣生炭..e。

Tī北部淡水tuà..落來ê馬偕kap tuì南部..起來ê男僕，逐工暗時固定lóng會tī厝內作伙唱聖詩kap讀聖經。In ê行為引來真tsē外人ê注意。

有一工透早..起來，一個少年人，名叫嚴清華。伊ê漢文造詣真深，舉止斯文， 談吐mā真清秀。馬偕對伊印象真深。

嚴清華ê khiā家是離馬偕厝主kan-tā三分鐘腳程ê三棧厝，後來翻起做有名ê「白樓」（目前已經拆歸若年..a）。

伊來ê第一暗，馬偕送伊一本聖詩。以後連續三暗伊lóng找伴作伙來。上尾á一暗作伙來..ê iáu有二十guā ê地方士紳kap教師。

In之間難免有人帶tio̍h懷疑ê態度對馬偕，所以tio̍h針對宗教比較tsit-ê主題，kap伊展開一場辯論。當in發現tsit-ê「番á鬼」竟然對儒、釋道、mā有精確ê見解kap研究，心內難免感覺敬佩。上尾家己知影無法度辯贏馬偕，一陣人tio̍h lóng來離開。

半點鐘後，tsit-ê青年koh tńg..來。伊向馬偕表明心志，願意接受基督當做伊 ê救主。

Tsit-ê大家叫伊「阿華」ê青年人，做過官吏ê私人秘書，bat去中國各地旅行，也bat tī北京tuà過半年。

第二工，嚴清華就搬進去馬偕住ê所在，成做馬偕ê僕人、學生kap朋友伴。

馬偕離開加拿大，立志beh去東方宣揚福音ê時陣，就認為tio̍h ài由本地人來管理本地ê教會。原來tuì南部同齊來ê男僕，發現主人無眠無日學習台語、漢文，心肝底感覺真iah-siān，無juā久就離開無做..a。

Tī生活中失去助手ê馬偕，祈禱上帝ē-tàng賜hō͘伊一個ē-tàng擔任聖職ê青年。Tsit-ê祈禱應驗了。

22歲ê嚴清華，是一個老實ê僕人，mā是siōng聰明kap kut-la̍t ê學生。馬偕教伊閱讀kap書寫羅馬字，伊進步真緊，hō͘人感覺真意外。

馬偕mā把握機會向阿華學習台灣話，漸漸來克服發音ê困難。2個人tī厝無出門ê時陣，kui工同齊証冊、唱聖歌、研訂聖經，反覆來練習功課，厝邊看tio̍h tsit種情形甚至認為in起siáu..a。

嚴清華成做馬偕tī台灣第一個ê門徒。伊事主忠誠，追隨馬偕四界傳道，tio̍h 像提摩太追隨保羅hit種。