《台語kah魔術》

 | | | 轉寄

愛ê教育

作者 蘇晏德 2013.05.19

愛的教育袂使罵 熏酒檳榔逐項會 罵(mē)
開喙合喙講恁爸 閣講老師水準低

愛的教育袂使罵 攏是學生的天下 罵(mā)
交群結黨有夠峇 閒甲掠虱母相咬

愛的教育袂使摃 機車騎咧烏白撞
男女關係亂亂創 以後變成浮浪逛

愛的教育要求濟 全校學生的天地
你若閣再共我罵 假痟共你蓋布袋

愛的教育人呵咾 校規學生做參考
老師予囡仔偃倒 凝心轉去賣水果

少年教冊教到老 囡仔罵我死老猴
學生囡仔若出頭 老師家長目屎流

較早老師手若指 學生驚甲若鳥鼠
這馬講伊囡仔庀 伊講老師你去死

人本要求著毋著 老師愛共囡仔惜
囡仔毋行咱扛轎 恿甲頭殼頂放尿

Ài ê kàu-io̍k bē-sái mē、Hun tsiú pun-nn̂g ta̍k-hāng ē、
Khui-tshuì ha̍p-tshuì kóng lín pē、Koh kóng lāu-su tsuí-tsún kē，

Ài ê kàu-io̍k bē-sái mā、Lóng sī ha̍k-sing ê thian-hā、
Kau-kûn kiat-tóng ū kàu bā、Êng kah lia̍h sat-bó sio-kā，

Ài ê kàu-io̍k bē-sái kòng、Ki-tshia khiâ leh o͘-pe̍h lòng、
Lâm-lú kuan-hē loān-loān-tshòng、Í-āu piàn-sêng phû-lōng-kòng，

Ài ê kàu-io̍k iau-kiû tsē、Tsoân-hāu ha̍k-sing ê thiⁿ-tē、
Lí nā koh-tsài kā goá mē、Ké-siáu kā lí khàm pò͘-tē，

Ài ê kàu-io̍k lâng o-ló、Hāu-kui ha̍k-sing tsò tsham-khó、
Lāu-su hō͘ gín-á ián-tó、Gêng-sim téng-khì bē tsuí-kó，

Siàu-liân kà-tsheh kà kàu lāu、Gín-á mē goá sí lāu-kâu、
Ha̍k-sing gín-á nā tshut-thâu、Lāu-su ka-tiúⁿ ba̍k-sái lâu，

Kah-tsá lāu-su tshiú nā kí、Ha̍k-sing kiaⁿ kah ná niáu-tshí、
Tsit-má kóng i gín-á-phí、I kóng lāu-su lí khì sí，

Jîn-pún iau-kiû tio̍h m̄-tio̍h、Lāu-su ài kah gín-á sioh、
Gín-á m̄-kiâⁿ lán kng-kiō、Sēng kah thâu-khak-téng pàng-jiō。