《台語kah魔術》

 | | | 轉寄

幸福高雄城

作者 蘇晏德 2015.04.19

幸福高雄城 (台語文)

台17線
濱海北pêng是茄萣 情人碼頭上有名
藝術表演ê大埕 黃昏日落情人行

茄萣落南是永安 永安有名是石斑
濕地生態tī鹽田 黃--家古厝是資產

永安落南是彌lô 虱目魚節有成果
魚蝦養殖品質好 草笠草蓆是古寶

彌lô落南是梓官 kôaⁿ天烏魚來做伴
漁民出海bē孤單 海產一盤sòa一盤

梓官落南是左營 左營古名叫舊城
古城古蹟上時行 高鐵起點tùi tsia行

左營落南是市區 現代行業ta̍k項有
Nā有需要來市府 工作人員會服務

駁二藝術特別區 主題藝術真豐富
愛河坐船看夜景 河--nih平靜無海湧
鼓山旗津有渡輪 tsia-ê船班真tsiâu-ûn
買衫買褲來堀江 妝kah媠媠嫁好翁
城市光廊藝術埕 朋友相招來tsia行
打狗英國領事館 古蹟保留是永遠
黃昏來到西仔灣 保証日夜lóng留戀
三鳳中街貨色tsē 生活用品ta̍k項賣

市區落南是小港 各路飛機tsia起降
大船tòa tī紅毛港 thūn海造地真kāu工

小港落南是林園 魚蝦蔬果lóng tsiâu-tsn̂g
東pêng高屏溪長長 濱海南pêng到林園

台1線
台一線北pêng是湖內 寧靖王爺tī tsia tâi
烏面曲盤店--nih排 滷味有名通人知

湖內落南是路竹 路竹古名半路竹
古早路邊lóng是竹 發展經濟有利益
台文奇才蘇晏德　在地出世tī路竹
魔術表演真心適　台語宣傳有能力

路竹落南是岡山 岡山羊肉上kài tsán
豆瓣醬料大生產 蜂蜜有名真稀罕

岡山落南橋á頭 橋頭有名是肉包
橋頭糖廠se̍h透透 來食酵母lām紅豆

橋頭落南楠á坑 高雄三山交通地
都會公園大草坪 來tsia散步兼ha茶

楠á坑落南仁武 劉--家古厝有歷史
古文物生態園區 人文藝術lóng總有

仁武落南是左營 半pêng山頂運動埕
蓮池潭邊情人行 水鴨載你四kè行

左營落南市中心 一寸土地一寸金
Nā無先人來致蔭 只好歸隱tòa山林

市區往東是鳳山 藝文表演一大kōaⁿ
相招來衛武營聽歌 大東藝術真好看

拍鐵sai-hū拚血汗 需要農具緊來換
番薯m̄驚落土爛 只求枝葉代代湠

你ê厝宅nā beh搬 請你搬來鳳山tòa
鳳山過去屏東線 台一線南pêng到鳳山

台28線
台二八線西pêng是湖內 天宏園戲團通人知
蘇.劉.祖厝請你來 玉湖窯瓷á店--nih排

湖內往東是阿蓮 超峰佛寺有寶殿
生態園區有表演 羊肉有名真新鮮

阿蓮往東是田寮 月宮地形真奇妙
土雞真材koh實料 呂--家祖厝愛介紹

田寮往東是旗山 tsiah-ê弓蕉大出產
旗山車頭是資產 旗山老街人講tsán

旗山往東是美濃 高雄客家上大宗
客家八音是傑作 觀光小城真幸福

美濃往東是茂林 多納溫泉來tsia浸
原住民米酒請你lim 台二八線東pêng到茂林

高雄是幸福ê城市 美景古蹟滿滿是
玉山雲霄接天邊 港口有蝦mā有魚

捷運載你四kè去 公車山區到海邊
有船mā有飛行機 tsiūⁿ北左營有高鐵

高雄真有人情味 多數的人講台語
古錐熱情閣客氣 歡迎來做阮厝邊

台語教師：蘇晏德2013.0225