《台語kah魔術》

| | | 轉寄

彰化台一線遊記

彰化台一線遊記

2017年2月初2拜四(咱人正月初六)烏陰天,早時9點出發,今仔日ê目的地是彰化
縣ê溪州、田尾、永靖(Ián-tsiān)三ê鄉,tsit三ê行政區是tī彰化縣ê南
pêng(俗稱彰南),tsit三ê鄉是第一擺來,以前bat坐車經過,對tsit-ê所在無
特別ê印象,tsit擺是因為beh去溪州公園,順路去永靖(Ián-tsiān)聽永靖人講
台語,順紲來一回深度ê旅遊。

第一站:『溪州公園』,kah牽手--ê二人,車tsiūⁿ路竹交流道上北,沿國道1號
lo̍h西螺交流道,轉台一線經過濁水溪ê橋頂,看對倒手pêng、紅色ê鐵轎~西螺大
橋,國中畢業旅行有對tsia經過,he是43冬前ê代誌ah,西螺大橋是我欣慕想beh
去ê所在,真可惜tsit擺我無牽tio̍h你ê手。駛過濁水溪著是彰化縣,車到溪州加
油站加油,我用台語kah加油員對話門路,查某ê工讀生用真liú-lia̍h閣親切ê台
語kā我回答,我tng面kā伊呵咾鼓勵,因為beh講台語ê少年人愈來愈少ah,尤其
是查某囡仔;鼓勵人講台語是台語人ê責任,tsit-ê查某囡仔hō͘我留落真深ê印
象。對加油站正uat、駛幾百公尺tio̍h8到溪州公園,彰化縣溪州鄉ê溪州公園,是
全國面積上大ê平地公園,面積有123公頃;溪州公園tī 2004年舉辦花展博覽會,
名聲隨傳遍全國,當時ê名「溪州花博公園」,彰化縣政府按照澳洲墨爾本的費茲洛
公園重新規劃,2014年改名「費茲洛公園」,tī-tsia舉辦2014花tī彰化活動。
M̄-koh改名出現反對聲音,自按呢「還我溪州,無愛仿冒的費茲洛」連署,得
tio̍h相當熱烈ê響應,ia̍h有真濟民眾笑講「肥豬肉公園」,這馬閣改轉來溪州
公園。2017年溪州公園ê金雞花展仝款真tshia-iāⁿ,吸引將近百萬人來參觀,阮
大約tī-tsia停跤三點鐘,tī公園大門口、kā一ê阿婆買一粒肉粽kah一塊tshì-
kak粿,我ê目的是beh hām老人講台語,然kî後徙跤離開溪州公園。

第二站:『田尾公路花園』,離開溪州公園、上北沿台一線,經過寶斗、這是
hōo人放拺ê舊地名,這馬街路ê地摽攏寫北斗,外地人已經袂記得寶斗tsit-ê在地
真實ê地名,一府、二鹿、三艋舺、四寶斗,已經鑽入時間ê磅空,寶斗已經離咱足
遠足長。車liâu-liâu-á駛過tsit-ê曾經繁華ê小鎮,來到田尾公路花園,車
tshah tī公園邊ê停車場,tī公園聽tio̍h pa-pu pa-pu ê喝賣聲,kā賣冰ê大
哥買一粒芋冰,順紲探訪地方特色,伊講tsia有足濟店、會使去lau-lau leh,
足濟店?喔!原來是花店;四界行、hām tse庄跤所在嘛真鬧熱,聽講tsia是台灣
上大ê花園,規叢好好,四界攏是園藝店,ta̍k所在攏是花花世界,賞花免出國、
來田尾包君滿意。Tī散步中途湊抵坎(tshàu-tú-khám)、路nih有一位大姊講:
今仔日khí-mo͘ su̍t put lí giang,tsiâⁿ久無聽tio̍h這款親切ê話語,
我kā伊比讚,台語人愛揣回kiông beh失落ê台語。

第三站:『永靖(Ián-tsiān)』,車沿台一線繼續上北來到永靖;無講你m̄
知,我來永靖ê目的是beh tshōe永靖人講話,聽永靖人講台語;聽講Ián-tsiān
ê ki-á-pian lián-lián tiān-tiān,pòaⁿ-mê ke-lōo lián-lián
tshian-tshian (永靖的枝仔冰冷冷碇碇,半暝街路冷冷清清),『ing』ê音、
講『ian』,是永靖ê特色。車停tī永靖國小門口,守衛室內面有二ê中年婦女,佮
in破豆大約講十thóng分;紲接去成美文化園,佮園區的工作人員開講,雖罔講甲
真投機,m̄-koh真可惜,濟濟永靖人已經失去in ê原味,永靖腔khah輸我tsit-
ê外地人;我問一个二十幾歲ê查某囡仔,『行政院』台語按怎講,伊講hêng-
tsèng院、無講hiân-tsiàn院。台灣各地ê腔口若beh保留,需要提倡羅馬字,若
無各地ê腔口會hōo強勢腔食掉,終其尾台語會hōo華語消滅,天佑台灣、天佑台灣
各族群語言,台灣人m̄-thang閣睏ah。
永靖國小的對面,tio̍h是頂新集團ê成美文化園,來tsia參觀ê人真濟,號做『成
美』是為著beh成人之美,因為毒油事件,頂新魏--家、sòa hōo tsit-ê世外桃
源『成美文化園』留lo̍h污點,來tsia參觀免門票、茶點攏免錢,m̄知是beh回報
鄉親抑是beh贖罪。Tsit-ê園區有一條巷管(kóng),巷管(kóng)是我來tsia對
一位大約六十thóng歲ê婦女學--tio̍h ê台語,雙面種落羽松(落羽松是樹仔
名),所以形成一條巷管(kóng),景色kán-na用一字來形容~媠。紲尾車駛到永安
街ê永靖故事牆,這片牆畫tio̍h先人ê點點滴滴,kah hōo人懷念ê過去,有二ê
20幾歲、對田中來ê查某囡仔嘛來翕相,我kā in講:懷念過去愛講台語,kā in
洗腦!講台語ê好處,我感覺in有聽--入去,我閣講一擺,鼓勵人講台語,是台語
人ê責任。阮tī-tsia hip一張相片,然kî後車離開永靖駛到寶斗交流道tsiūⁿ高
速公路,踏入回鄉ê路途,又閣是美好ê一日,彰化感謝--你。