《台語kah魔術》

 | | | 轉寄

情--字這條路~小說

作者 蘇晏德 2022.02.06

情--字這條路 作者：蘇晏德

情--字這條路，跤步若錯誤，人生誠歹渡，需要靠天助。愛情欲堅固，互
相愛讓步，心內若有苦，毋通行迷途。

這是沉年ê往事，不堪回想ê過去；1977年中秋西門吹雪和18个朋友來到雲
海月湖，Kah西門同行ê朋友號稱大鵬十三鷹，閣有南海五仙姑；其中一个
是南海有名人物~雪花孤獨，伊雖罔將近四十，m̄-koh猶原猶未訂終身。斯
當時西門kah伊ê同伴才二十頂下，雪花是為著beh保護其他姑娘，才來參加
這擺ê聚會。有關雪花孤獨ê故事省略，故事中ê主角是西門吹雪。

西門佇江湖原本是無名小卒，因為外緣好對異性有吸引，致使tī這擺ê聚會
一孔掠雙，大鵬十三鷹只好爭奪其他三个姑娘。西門雖罔外緣好，m̄-koh佇
感情這方面並無經驗，心中真gông-ngia̍h，所以主動放棄千里紅線這位姑
娘，kah另外一个姑娘滄海鈴聲交往，hō͘十三鷹ê獨孤飛鷹有機會kah千里紅
線結緣。Tī雲海月湖結束聚會ê行程，歸途當中各路朋友互相saⁿ辭，這時
西門和滄海雙雙對對，談天說地，天文地理交換兩人ê心思意念。

西門kah滄海離開雲海月湖，來到翠屏山莊，兩人真ha̍h-kâⁿ沿路有講有
笑。雖罔誠投緣，m̄-koh彼此攏是頭一回，心內躊躇有講bē出喙ê話語，西
門思考一tiap仔久，終於提出勇氣講：「滄海姑娘，你ê手kám會當借--
我？」輕輕ê話語一出，滄海心內gông-ngia̍h，面容透紅勻勻仔伸出幼軟ê
手，kah西門手牽手行tī挨挨陣陣ê翠屏山莊，然kî後in兩人閣去杏花樓情
話綿綿。

西門和滄海一見鍾情，雙人墜入愛ê水漩(tsn̄g)，m̄-koh世事無常，人講：
近水得魚，西門kah滄海無法時刻見面，斯當時tī無手機仔ê年代，雙方
kan-na會當寫批連繫，in ê感情終於出現變數。有一回西門一人tī後街行
踏，湊拄坎拄著滄海kah別人手牽手，西門先避開in ê視線，思考一tiap
仔久，翻頭kā in兩人請安，西門對這件tshiāng-tú-tshiāng發生ê代
誌，外表雖罔鎮靜，內心卻是心碎腸(tshiâng)斷，規工tī野店借酒解憂
愁，常言道：英雄有淚無輕流，只是未到傷心時。這是西門ê初戀，tī伊ê
人生中重重致命ê一拳。經過這擺ê變故了後，西門更加成熟學會曉包容kah
體諒別人，有一工tī一个恬靜ê暗暝，西門tī微弱ê燭光邊沉思久久，對心
內微微仔笑，對家己講：一个失戀ê人贏過無談戀愛ê人。當然有量ê人是有
福--ê，滄海姑娘和陸小丹結婚了後，滄海閣有去揣西門，滄海對西門講：
若會使閣重來一擺...，西門kan-na會當安慰伊，人生無可能重來，咱攏無
重新選擇ê機會。

經過kúi-nā年西門厭煩浪跡天涯ê生活，伊轉去細漢徛起ê故鄉~蘇家村。因
為時代ê變遷，湮滅真濟童年ê記持，草間仔拆掉ah(這是細漢覕相揣ê所
在)，宗祠前ê大埕消失ah，(這是細漢ê遊樂場)，一切攏變ah，這時西門心
內哀怨感嘆，到底是世間改變人，抑是人改變世間。沉思中西門擔頭對天
講：月是故鄉圓，水是故鄉甜；西門決定留tī伊細漢出世ê土地安居。

經過數年，西門閣熟似一隊姊妹花，大姊雪映紅、小妹雪映藍；雖罔in是
親姊妹，m̄-koh個性完全無仝，大姊映紅個性冷淡保守，小妹映藍個性豪爽
溫柔，充滿活力，西門竟然選擇大姊映紅，小妹映藍嘛願意幫贊in兩人。
M̄-koh有一擺西門和映藍tī風沙坪開講ê時，終於講出伊藏tī心中久久ê話
語，有一件代誌我攏想bē通，映藍講：大姊冷冷淡淡、個性古怪，你為啥
物一開始著佮意伊？西門經過沉思對映藍講：有一寡人佮意一个人需要年久
月深ê鬥陣，m̄-koh有時會tī一目nih著會佮意一个人，這種感覺是足奇妙-
-ê，有時無理由嘛無發渡解說，有時感性贏過理性，人雖罔有遠大ê志向，
有堅強ê毅力，終期尾情--字這條路猶是真歹過關，感情有時需要取捨需要
犧牲。雖然西門對映藍講真濟有關人生哲學ê道理，m̄-koh對映藍ê眼神看會
出--來，伊猶是無了解西門ê選擇。

映藍若像足同情西門，紲接對西門講：我攏想無、你為啥物hiah-nī佮意大
姊，西門帶著柔軟ê口氣對映藍講：你是一个感性ê好查某囡仔，你ê個性溫
柔、良善、心思自由開放，你活潑平實ê心境，會hō͘人忍bē牢著會佮意你，
你是hiah-nī自然坦白，佮意你是一件真自然ê代誌，這是一種真誠ê佮意。
映紅kah你無仝款，伊siuⁿ封閉家己，若有人想beh探討伊ê世界，伊會發
揮防衛ê本領來阻擋，伊ê外表若像足堅強，m̄-koh內在卻有一粒脆弱ê心，
伊無相信感情，有時閣會hō͘感情纏拌。總講一句：伊真敏感、真脆弱，需
要一个人用心去愛--伊，毫無保留全心全意去了解--伊，人永遠袂bē用--ê
單獨一人，閣較堅強ê人也無法抵擋孤獨ê折磨，若無心靈會枯焦。這時映
藍想著西門講tsia-ê話，心內teh想：看--來西門真正足想beh保護大姊映
紅。

西門看映藍恬恬無閣講話，輕輕拍伊ê肩胛講：我今仔日講ê話你這馬可能
無了解，有一工檢采你會明白。sòa接西門對天感慨講：「人有縱天之志，
無運不能自通，馬有千里之行，無蹄不能自往，時也、命也、運也、非我之
所能也」。
無邊ê情海，人生ê無奈，感情若無解，傷心流目屎；互相若意愛，幸福閣
和諧，情關無阻礙，人生有光彩。