《台灣人e5先覺─黃彰輝傳》

 | | | 轉寄

黃伯和牧師 序

作者 黃伯和（台南神學院院長） 2009.01.25

台南神學院為tio̍h表揚黃彰輝牧師對南神、對台灣教會ê宣教、對普世教會ê神學教育、對台灣前途kap台灣人民ê自由、人權ê貢獻，tī 1987年ê熱天，當黃彰輝牧師hō͘人放逐22年了後，頭tsit-pái tńg來台灣ê時，專工頒送「榮譽神學博士」學位hō͘伊。Tī頒送hit-ê學位ê學院準備ê褒獎文中，稱呼黃彰輝牧師講伊是：牧師、神學家、神學教育者、人權運動ê先鋒。iū-koh表彰：「主張神學應該釘根tī本土，代先提倡實況化ê神學，成做後來普世神學教育ê方針。獻身領導台灣教會關懷社會，二度hō͘人選做台灣基督長老教會總會議長，強化台灣教會ê整體性。擔任普世基督教協會神學教育基金會ê總幹事，是台灣擔任普世教會機構ê tē-it人。雖然離開故鄉tsiaⁿ，猶原uī-tio̍h台灣前途sì-kè走tsông，koh根據台灣基督長老教會「國是聲明」發起「台灣基督徒自決運動」。Tsit段褒獎詞ê描述ē-sái講提綱契領teh說明黃彰輝牧師一生豐富ê經歷kap tī教會、社會所做出ê多方面ê貢獻。

Tuì黃彰輝牧師晚年傳出身軀khah phái 開始，真tsē黃牧師ê學生、朋友kap親人就一直籌畫ài怎樣趁彰輝牧師iáu tī- ê時tsūn趕緊為其立傳。其間北美地區ê南神校友iáu bat託人專工到英倫從事專訪ê工作，聽講留落來近百卷ê錄音帶。現今黃牧師已經過身二十guā年，tuì南神決定將校園中siōng古意ê一個「互談會館」kā伊整修號名為「彰輝館」，來紀念彰輝牧師ê典範後，咱總算看到頭一本中文ê黃彰輝牧師ê傳記出版。黃彰輝牧師一生歷盡滄桑，為tio̍h南神、為tioh台灣教會ê宣教，為tioh普世教會ê合一運動kap神學教育，mā為tio̍h台灣ê前途無怨無悔ê奔走，著算伊bat稱其神學為「m̄甘願」ê神學，來表達家己一生無法度看tio̍h台灣人民通過自決來決定家己ê身分認同kap前途ê遺憾，其一世人所做出ê貢獻實在有真tsē值得咱效法kap學習ê所在。因此，為其立傳kā伊ê信仰事蹟流傳落來，是我等後輩珍貴ê資產。

張瑞雄牧師是本院校友，mā是彰輝牧師ê學生，本院畢業後，長期tuà tī美國，tī美國衛理公會服務，mā積極追隨彰輝牧師投身台灣出頭天運動ê奮鬥。為tio̍h蒐集資料，伊獨力風塵僕僕teh奔走tī美國、日本、英國kap台灣之間，為咱tshuē出真tsē珍貴koh難得ê資料。現今總算ài出版lah，本人感覺真榮幸ē-tàng 被邀請為tsit本冊寫序。衷心希望本冊ê出版，ē-tàng帶hō͘台灣ê神學人，尤其是台南神學院ê師生，作神學ê典範，也ē-tàng koh再激勵台灣教會ê宣教kap到taⁿ iáu未完成ê台灣出頭天運動phah一劑強心針。彰輝牧師ê一生ē-sái講是一幅所有台灣人ê心路歷程ê縮影，是台灣教會宣教歷史ê張本，mā是台南神學院神學教育ê藍圖。願伊ê出版彰顯上帝ê榮耀，引tshuā後輩ê腳蹤。

2004年3月31日tī台南