《老人kah海》

 | | | 轉寄

《老人kah海》_16, Hî úntēng thua tsûn tshut hái / 魚穩定拖船出海

作者 Ernest Hemingway, 台譯：宋麗瓊、林俊育 2019.06.16

I kóng,"Koh tsia̍h tsi̍t kóa, hóhó á tsia̍h." I siūⁿ, kín tsia̍h lo̍hkhì, hō͘ tiòkau tsiam tsha̍k ji̍pkhì lí ê simtsōng, hō͘ lí bô miā. Kín bānbān’á phû khí lâi, hō͘ góa ēng hîtshe tshiám ji̍pkhì lí ê singkhu. Hó ah lah, lí tsúnpī hó bōe? lí tsia̍h ū kàu pá bōe?
"Lâi!"i tōasiaⁿ kiò, koh ēng siang tshiú tshut tōala̍t giú hîsòaⁿ, giú ji̍plâi tsi̍t kongtshioh liáuāu, koh kèsio̍k itti̍t giú, siang tshiú lûnliû, ēng tsīn tshiúkó͘ la̍t kah singkhu ê tāngliōng piàⁿmiā teh giú.
Bô hāu. Hî bānbān’á siû khui, lāu lâng tsi̍tsut’á to giú i bē tín tāng. I ê hîsòaⁿ tsin ióng, m̄ kiaⁿ tōahî, i kā hîsòaⁿ kiong tī i ê kha脊phiaⁿ, kiong kah hiahni̍h ân, liân tsúitsu to̍h tùi hîsòaⁿ thiàutshut lâi. Liáuāu, hîsòaⁿ tī tsúinih huattshut bānbān’á ê susu siaⁿ, i iáu sī kā hîsòaⁿ kiong ânân, koh tú tī tsēpang, singkhu tò hiàⁿ, lâi tùikhòng hî ê giú la̍t. Tsûn khaisí bānbān’á hiòng sai pakhong îtāng.
Hî itti̍t teh îtāng, tsûn kah hî tsòhóe tī pêngtsēng ê tsúibīn bānbān’á teh tsiântsìn. Kîtha ê hîjī iáu tī tsúinih, m̄ koh, lóng bôtāng tsēng, iáu m̄ bián khì kóan in.
Lāu lâng tshut siaⁿ kóng,"Gín’á nā tī tsia to̍h hó à. Taⁿ góa teh hō͘ hî’á thua, góa tsiâⁿtsò sī pa̍k hîsòaⁿ ê thiāu á. Góa ētàng kā hîsòaⁿ kò͘tēng pa̍k tī tsûnténg, m̄ koh, i ē kā i tshuahtn̄g; góa tio̍h ài kā i giú tiâu Leh, i tshutla̍t ê sî, góa ài pàng tsi̍t kóa hîsòaⁿ hō͘ i. Katsài i sī teh îtāng, m̄ sī tîm lo̍h khì."
I nā kuatsim beh tshàng lo̍hkhì tshimhái, góa sī beh ántsóaⁿ? góa m̄ tsai. I nā thu̍tjiân tîm té, síkhì, góa sī beh ántsóaⁿ? góa mā m̄ tsai. M̄ koh, góa ài tsúnpī, ū tsin tsē tāitsì thang tsò.
I ēng khatsiahāu kiong hîsòaⁿ, khòaⁿ tio̍h i tī tsúinih thántsho̍ah, mā khòaⁿ tio̍h sió tsûn tsin úntēng teh kiâⁿ hiòng sai pakhong khì.
Lāu lâng siūⁿ, Ánne i ē sí, i bô khólêng ánne itti̍t thua. M̄ koh, kòe sì tiámtsing liáuāu, hî iáu sī puttōan teh thua tsûn tshut hái, lāu lâng mā sī ēng i ê kha脊phiaⁿ kā hîsòaⁿ ânân kiong leh.
I kóng,"tiò tio̍h hî ê sî sī tiongtàu, m̄ koh, kàu taⁿ góa lóng iáubōe khòaⁿkòe i." Tiò tio̍h hî tsìntsêng, i ū kā i ê tsháu bō á ânân tì tī thâukhak téng, taⁿ i ê gia̍h thâu kámkak tshintshiūⁿ to teh kuah. I mā tshùi ta, só͘í i kūi lo̍h lâi, tsin sèjī, tsīnliōng mài khì tshé tio̍h hîsòaⁿ, singkhu tsīnliōng sóakhì tsûnthâu, tshun tsi̍t tshiú khì tsûnthâu the̍h tsúikòan. I phahkhui kòan’á, sió khóa lim tsi̍tē. Liáuāu, i khò tī tsûnthâu hiohkhùn; i tsē tī bô tshāi tī ûitsō ê ûikan kah tsûn phâng téng hiohkhùn, tsīnliōng siáⁿmi̍h lóng m̄ khì siūⁿ, kantaⁿ kiantshî lo̍hkhì to̍h hó.
Liáuāu, i hôethâu khòaⁿ, íking khòaⁿ bē tio̍h lio̍ktē ā. I siūⁿ, He bô iàukín, góa ittēng ētàng tī Havana ê tingkng tiong tshōe tio̍h tńgkhì ê lō͘. Κoh nn̄g tiámtsing ji̍tthâu tsiah ē lo̍h hái, i kiámtshái ē tī ji̍t lo̍h tsìntsêng sing phû khí lâi. Nā bô, kiámtshái go̍eh tshut ê sî i to̍h ē phû khí lâi; nā bô, bîn’átsài ji̍t tshut ê sî i tēng tio̍h ē phû tshutlâi. Góa bô kiù kin, koh kámkak tsin ū la̍t thâu. Tshùi Ni̍h ū tiòkau ê sī i; m̄ koh, i sī siáⁿ khóan ê hî leh, kèngjiân ū huattō͘ ánne teh giú; i ittēng sī kā tiòkau ê thih sòaⁿ tī tshùi Ni̍h kā ânân. Góa nā khòaⁿ ē tio̍h i to̍h hó à; hō͘ góa khòaⁿ tsi̍t pái to̍h hó, thang hō͘ góa tsaiiáⁿ góa ê tùitshiú tàuté sī seⁿtsò siáⁿ khóan.



伊講：「Koh食一kóa，好好á食。」
伊想：緊食落去，hō͘ 釣鉤尖鑿入去你ê心臟，hō͘ 你無命。緊慢慢á浮起來，hō͘ 我用魚叉tshiám入去你ê身軀。好ah lah，你準備好未？你食有夠飽未？

「來!」伊大聲叫，koh用雙手出大力giú魚線，giú入來一公尺了後，koh繼續一直giú，雙手輪流，用盡手股力kah身軀ê重量拚命teh giú。

無效。魚慢慢á泅開，老人一屑á to giú牠bē tín動。伊ê魚線真勇，m̄驚大魚，伊kā魚線弓tī伊ê kha脊phiaⁿ，弓kah hiahni̍h ân，連水珠to̍h tùi魚線跳出來。了後，魚線tī水裡發出慢慢á ê susu聲，伊iáu是kā魚線弓ânân，koh tú tī坐枋，身軀倒hiàⁿ，來對抗魚ê giú力。船開始慢慢á向西北方移動。

魚一直teh移動，船kah魚做伙tī平靜ê水面慢慢á teh前進。其它ê魚餌iáu tī水裡，m̄ koh，lóng無動靜，iáu m̄免去管in。

老人出聲講：「Gín’á若tī tsia to̍h好à。Taⁿ我teh hō͘ 魚á拖，我成做是縛魚線ê柱á。我ētàng kā魚線固定縛tī船頂，m̄ koh，牠ē kā它tshuah斷；我tio̍h ài kā牠giú tiâu leh，牠出力ê時，我ài放一kóa魚線hō͘ 牠。佳哉牠是teh移動，m̄是沉落去。」

伊若決心beh tshàng落去深海，我是beh án怎？我m̄知。牠若突然沉底，死去，我是beh án怎？我mā m̄知。M̄ koh，我ài準備，有真tsē tāitsì thang做。

伊用kha脊後弓魚線，看tio̍h它tī水裡坦斜，mā看tio̍h小船真穩定teh行向西北方去。

老人想：Ánne牠ē死，牠無可能ánne一直拖。M̄ koh，過四點鐘了後，魚iáu是不斷teh拖船出海，老人mā是用伊ê kha脊phiaⁿ kā魚線ânân弓leh。

伊講：「釣tio̍h魚ê時是中晝，m̄ koh，到taⁿ我lóng iáu未看過牠。」
釣tio̍h魚tsìn前，伊有kā伊ê草帽á ânân戴tī頭殼頂，taⁿ伊ê額頭感覺親像刀teh割。伊mā嘴ta，所以伊跪落來，真細膩，盡量mài去扯（tshé）tio̍h魚線，身軀盡量徙去船頭，伸一手去船頭the̍h水罐。伊phah開罐á，小khóa lim一下。了後，伊靠tī船頭歇睏；伊坐tī無tshāi tī桅座ê桅杆kah船帆頂歇睏，盡量啥物lóng m̄去想，kantaⁿ堅持落去to̍h好。

了後，伊回頭看，已經看bē tio̍h陸地ā。伊想：He無要緊，我一定ētàng tī Havana ê燈光中tshōe tio̍h tńg去ê路。Κoh兩點鐘日頭tsiah ē落海，牠kiámtshái ē tī日落tsìn前先浮起來。若無，kiámtshái月出ê時牠to̍h ē浮起來；若無，明á載日出ê時牠定tio̍h ē浮出來。我無kiù筋，koh感覺真有力頭。嘴裡有釣鉤ê是牠；m̄ koh，牠是啥款ê魚leh，竟然有法度ánne teh giú；牠一定是kā釣鉤ê鐵線tī嘴裡咬ânân。我若看ē tio̍h牠to̍h好à；hō͘ 我看一pái to̍h好，thang hō͘ 我知影我ê對手到底是生做啥款。