《老人kah海》

 | | | 轉寄

《老人kah海》_20 Tsi̍t tsiah tsiáu'á pue lâi sió tsûn /一隻鳥á飛來小船

作者 Ernest Hemingway, 台譯：宋麗瓊, 林俊育 2019.08.25

I siūⁿ, Ǹg bāng sī ánne.

Tsit sî, tsi̍t tsiah tsiáu’á tùi pak pêng pue hiòng sió tsûn. He sī tsi̍t tsiah thî tsiáu （warbler), kēkē pue tī tsúibīn. Lāu lâng khòaⁿ ē tshut, i tsin thiám à. Tsiáu’á thêng tī tsûnbóe hiohkhùn. Liáuāu i tī lāu lâng ê thâukhak téng teh se̍h, koh thêng tī hî sòaⁿténg bīn, kahná khah sùsī ê khóan.

Lāu lâng mn̄g tsiáu’á,"lí kúi hòe à? tse kám sī lí thâu tsi̍t pái tshutmn̂g?"

I kóngōe ê sî, tsiáu’á tsùsîn khòaⁿ i. I siuⁿ thiám, thiám kah sīmtsì bô sing kuantshat hîsòaⁿ, to̍h ēng i ê sèki khajiáu kā hîsòaⁿ khi̍p tiâutiâu, singkhu lō͘lō͘hián.

Lāu lâng kā i kóng,"hîsòaⁿ tsin ún, ún taktak lah. Tsaàm bô hong bô iô, lí bô ingkai hiah thiám ā. Tsiáu ásī lóng ántsóaⁿ à leh?"

Lāu lâng sim siūⁿ, ū la̍hhio̍h ē tshut hái lâi lia̍h in, m̄ koh i bô kā tsit tsiah tsiáu’á kóng, hôaiⁿti̍t i mā thiaⁿ bô, m̄ koh i tsin kín to̍h ē tsaiiáⁿ la̍hhio̍h ê līhāi à.

I kóng,"tsiáu ah, hóhó á hiohkhùn leh, liáuāu tsiah koh tshuthuat khì tsiángak kihōe, tshintshiūⁿ lâng, tsiáu, ásī hî’á nne."

Tsiáu’á teh kó͘lē i kóngōe, inūi i ê khatsiah tsaàm lóng ngē khì à, tsitmá tsin thiàⁿ.

I kóng,"tsiáu ah, lí nā gōanì, lâi góan tau tòa. Pháiⁿsè lah, góa bētàng thàn bîhong tng teh khí ê sî, singkhí tsûn phâng, tshōa lí tńgkhì góan tau, m̄ koh, góa tsitmá ū lí tsitê pêngiú kah góa tsòphōaⁿ." Tú hit sî, hî’á hiônghiông khi sin, kā lāu lâng khiú tò tī tsûnthâu; nā m̄ sī i ū kiong tsin ân, koh sûi kā hîsòaⁿ pàng lēng, i hiám’á to̍h ē pue tshutkhì tsûn gōa.

Hîsòaⁿ tshuah tāng ê sî, tsiáu’á puetsáu, m̄ koh lāu lâng sīmtsì bô khòaⁿ tio̍h i līkhui. I ēng tsiàⁿ tshiú sèjī kiámtsa hîsòaⁿ, jîtshiáⁿ tsùì tio̍h i ê tshiú teh lâu hueh.

"Tútsiah i tēng tio̍h sī ū tó ūi teh thiàⁿ,"i kóngtshut siaⁿ, koh giú soh’á, khòaⁿ sī m̄ sī ētàng hō͘ hî tńg sin. M̄ koh, tng i giú kàu soh’á kiōngbeh tn̄g khì ê thêngtō͘, i tsiū úntēng tī hia, koh singkhu tò hiàⁿ, lâi tùikhòng hîsòaⁿ ê giú la̍t.

I kóng,"hî ah, taⁿ lí ē tsai thiàⁿ à hoⁿh. Thiⁿ ah, góa mā sī."

I sìkè teh tshōe hit tsiah tsiáu’á, inūi i ìài i lâi tsòphōaⁿ. Tsiáu’á pue khì à.

Lāu lâng siūⁿ, lí pēng bô tī tsia thêng gōa kú; m̄ koh, tī pêngan pe kàu háihōaⁿ tsìntsêng, lí beh khì ê lō͘ sī tsin kanlân. Tútsiah hit bóe hî tshuah tsi̍tē ê sî, góa ná ē khì siong tio̍h tshiú leh? góa ittēng sī jú lâi jú gōng, nā bô, to̍h sī góa tng tehkhòaⁿ hit tsiah sè tsiah tsiáu’á, teh siūⁿ i ê tāitsì. Taⁿ góa ài tsuansim tsò khangkhòe, jîtshiáⁿ góa ài lâi tsia̍h hit bóe tshńg’á, tsiah bē bô khùila̍t.

I tōasiaⁿ kóng,"Gín’á nā tī tsia, jîtshiáⁿ góa nā ū tsi̍t kóa iâm to̍h hó à."

伊想：Ǹg望是ánne。

Tsit時，一隻鳥á tùi北pêng飛向小船。He是一隻啼鳥（warbler)，kēkē飛tī水面。老人看ē出，牠真thiám à。 鳥á停tī船尾歇睏。了後牠tī老人ê頭殼頂teh se̍h，koh停tī魚線頂面，kahná khah sùsī ê款。

老人問鳥á：「你幾歲à？這kám是你頭一pái出門？」 伊講話ê時，鳥á注神看伊。牠siuⁿ thiám，thiám kah甚至無先觀察魚線，to̍h用牠ê細支腳爪kā魚線khi̍p tiâutiâu，身軀lō͘lō͘hián。

老人kā牠講：「魚線真穩，穩taktak lah。昨暗無風無搖，你無應該hiah thiám ā。鳥á是lóng án怎à leh？」 老人心想，有la̍hhio̍h ē出海來掠in，m̄ koh伊無kā tsit隻鳥á講，橫直牠mā聽無，m̄ koh牠真緊to̍h ē知影la̍hhio̍h ê厲害à。 伊講：「鳥ah，好好á歇睏leh，了後tsiah koh出發去掌握機會，親像人、鳥，á是魚ánne。」

鳥á teh鼓勵伊講話，因為伊ê kha脊昨暗lóng硬去à，tsitmá真疼。

伊講：「鳥ah，你若願意，來阮tau tòa。Pháiⁿ勢lah，我bētàng趁微風當teh起ê時，升起船帆，tshōa你tńg去阮tau，m̄ koh，我tsitmá有你tsitê朋友kah我做伴。」 Tú hit時，魚á雄雄khi身，kā老人khiú倒tī船頭；若m̄是伊有弓真ân，koh隨kā魚線放lēng，伊險á to̍h ē飛出去船外。 魚線tshuah動ê時，鳥á飛走，m̄ koh老人甚至無看tio̍h牠離開。伊用正手細膩檢查魚線，而且注意tio̍h伊ê手teh流血。

「Tútsiah牠定tio̍h是有tó位teh痛，」伊講出聲，koh giú索á，看是m̄是ētàng hō͘ 魚tńg身。M̄ koh，當伊giú到索á kiōngbeh斷去ê程度，伊就穩定tī hia，koh身軀倒hiàⁿ，來對抗魚線ê giú力。

伊講：「魚ah，taⁿ你ē知痛à hoⁿh。天ah，我mā是。」 伊四界teh tshōe hit隻鳥á，因為伊意愛牠來做伴。鳥á飛去à。 老人想：你並無tī tsia停gōa久；m̄ koh，tī平安飛到海岸tsìn前，你beh去ê路是真艱難。Tútsiah hit尾魚tshuah一下ê時，我ná ē去傷tio̍h手leh？我一定是jú來jú戇，nā無，to̍h是我當teh看hit隻細隻鳥á，teh想牠ê tāitsì。Taⁿ我ài專心做khangkhòe，而且我ài來食hit尾串á，tsiah bē無氣力。

伊大聲講：「Gín’á若tī tsia，而且我若有一kóa鹽to̍h好à。」