《老人kah海》

 | | | 轉寄

《老人kah海》_22 Tī hái ni̍h, bô lâng ē ko͘tuaⁿ / Tī海裡，無人ē孤單

作者 Ernest Hemingway, 台譯：宋麗瓊, 林俊育 2019.09.08

I siūⁿ, "Tse sī tsi̍t bóe ióngtsòng, koh hia̍tkhì tsin ōng ê hî. Katsài góa sī lia̍h tio̍h i, m̄ sī háiti’á. Háiti’á siuⁿ unjiû, tsit bóe hî khiok tsi̍ttiám’á to bô unjiû, i só͘ū ê khùila̍t lóng iáu tī.Leh."

I siūⁿ, M̄ koh mā sī hiānsi̍t siōng tiōngiàu, góa nā ū iâm to̍h hó à. Góa m̄ tsai tshun lo̍hlâi ê hî bah, sī ē hō͘ ji̍tthâu pha̍k ta ásī pha̍k tshàu, só͘í sûijiân góa bē iau, siōng hó iáu sī lóng kā i tsia̍hliáu. Hit bé hî taⁿ tsēngtsēng, únún, góa nā kā hî bah tsia̍hliáu, góa to̍h tsúnpī thòtòng à.

I kóng,"tshiú ah, ài ū nāisim, góa tsia̍h hî bah sī ūi tio̍h lí."

I siūⁿ, góa nā ētàng tshī hit bóe hî to̍h hó à, i sī góa ê hiaⁿtī. M̄ koh, góa ài kā i thâi, jîtshiáⁿ góa ài pótshî khùila̍t tsiah tsò ē kàu. I bānbān’á, iōngsim kā hiahê tsiⁿ’á hêng ê hî bah liâu lóng tsia̍hliáu. I kā singkhu 挺（théng） ti̍t, tshiú tī tn̂gkhò͘ tshit tshit leh.

I kóng,"Taⁿ, tshiú ah, lí ēsái pàng khui hîsòaⁿ, hō͘ góa kantaⁿ ēng tsiàⁿ tshiú lâi kah i piàⁿ, itti̍t kàu lí bô tāitsì."i ēng tòkha ta̍h tò tshiú teh giú ê tsho͘ hîsòaⁿ, singkhu hiàⁿ āu, lâi thèⁿ khatsiahphiaⁿ siū tio̍h ê la̍t.

I kóng,"thiⁿ ah, mài koh hō͘ góa kiù kin lah, inūi góa m̄ tsai hit bóe hî koh lâi beh tshòng siáⁿ."

I siūⁿ, M̄ koh, i ná siōng tsin léngtsēng, jîtshiáⁿ tsiàu i kakī ê kèōe teh tsìnhêng. M̄ koh, i ê kèōe sī siáⁿ? góa ê kèōe koh sī siáⁿ? i hiahtōa phiang, góa ê kèōe tio̍h ài kinkì i ê kèōe lâi ìn piàn. I nā thiàutshut tsúibīn, góa to̍h kā i thâi. Khósioh i m̄ tshutlâi, ánne, góa to̍h kah i bôa kàuté.

I kā kiù kin ê tshiú tī tn̂gkhò͘ téngbīn mô͘tshat, tshì beh hō͘ tsí thâu á pàng lēng. M̄ koh, tsí thâu á iáu tshun bē khui. I siūⁿ, Kiámtshái hō͘ ji̍tthâu pha̍k liáu, i to̍h ē khui, ásī, kiámtshái hiahê ū kàu la̍t ê tshńg’á sasímih siauhòa liáu, i to̍h ē khui. Tshiú nā ittēng ài ēng tio̍h ê sî, góa ē bô sioh jīmhô tāikè kā i phahkhui, m̄ koh, tsitmá góa iáu m̄ bián ēng kiông ê; hō͘ i kakī khui, kakī hôeho̍k. Tsaàm tháu hîsòaⁿ, tsiap hîsòaⁿ ê sî, góa kā i tshau siuⁿ kòehūn à.

I khòaⁿ hiòng hn̄ghn̄g ê háibīn, tsaiiáⁿ kakī ū gōa ko͘tuaⁿ, m̄ koh i ētàng khòaⁿ tio̍h tshim hái.Ni̍h, o͘sik hái tsúi tiong ê kng thiāu, kah bīn tsêng sûilo̍h háitsúi ê hîsòaⁿ, íki̍p pêngtsēng háibīn kîbiāu ê波 tāng. Inūi khí bō͘e̍k hong （ e̍k tsù, trade wind, sìn hong, sī tī kēkhong tùi Ajia̍ttài kuaptài tshue hiòng tshiahtō kēaptài ê hong, inūi ta̍k nî hóanhok úntēng tshuthiān, tshintshiūⁿ tiâuse̍k ū sìn, só͘í kiòtsò"sìn hong". Kó͘tsá ê seⁿ lí lâng iā līiōng sìn hong ê kuilu̍t sèng tsò 航 hái bō͘e̍k, intshú sìn hong tsiah hông tshingtsò"bō͘e̍k hong". ）ê kuanhē, hûn tng teh tsiktsū tah koân; i khòaⁿ hiòng thâutsêng, khòaⁿ tio̍h tsi̍t tsūn iá ah puikòe tsúibīn, in ê hêngiáⁿ ū sî bôngbông biáubiáu, ū sî khiok tshintshiūⁿ khik tī thiⁿténg ê tô͘ hiahni̍h tshingtshó. I tsai, tī háibīn, bô lâng ē ko͘tuaⁿ.

I siūⁿ tio̍h ū ê lâng tsē sió tsûn tshut hái, nāsī khòaⁿ bē tio̍h háihōaⁿ ê sî, in ē kiaⁿhiâⁿ; i tsai nāsī tī tsin kín piànthiⁿ ê go̍ehhūn, in ē kiaⁿ sī tsèngsiông ê. Taⁿ tsiàⁿ sī hongthai ê go̍ehhūn, nā bô hongthai, tsittsūn ê thiⁿkhì sī tsi̍t nî tiong king siōng hó ê.

Hongthai nāsī beh lâi, tī kúinā kang tsìntsêng ê hái.Ni̍h, lí to̍h ētàng tī thiⁿténg khòaⁿ tio̍h tiāuthâu. I siūⁿ, In tī lio̍ktē khòaⁿ bô, inūi in m̄ tsai beh khòaⁿ siáⁿ. Tī lio̍ktē ittēng mā ētàng tùi hûn ê hêngtsōng lâi khòaⁿtshut tiāuthâu. M̄ koh, tsitmá lán bô hongthai beh lâi.

I gia̍h ba̍k khòaⁿ thiⁿ, khòaⁿ tio̍h pe̍hsik ê tsikhûn （cumulus）ná tshintshiūⁿ tsi̍t tui siâⁿ lâng ê pingkilîn （ice cream）, téng koân koh ū po̍hpo̍h ná újiông ê kńghûn （cirrus） phû tī koânkoân ê káugo̍eh thiⁿ.



伊想：「這是一尾勇壯，koh血氣真旺ê魚。佳哉我是掠tio̍h牠，m̄是海豬á。海豬á siuⁿ溫柔，tsit尾魚卻一點á to無溫柔，牠所有ê氣力lóng iáu tī.leh。」

伊想：M̄ koh mā是現實siōng重要，我若有鹽to̍h 好à。我m̄知tshun落來ê魚肉，是ē hō͘ 日頭pha̍k焦á是pha̍k臭，所以雖然我bē iau，siōng好iáu是lóng kā它食了。Hit尾魚taⁿ靜靜，穩穩，我若kā魚肉食了，我to̍h準備妥當à。

伊講：「手ah，ài有耐心，我食魚肉是為tio̍h你。」 伊想：我若ētàng飼hit尾魚to̍h好à，牠是我ê兄弟。M̄ koh，我ài kā牠thâi，而且我ài保持氣力tsiah做ē到。伊慢慢á，用心kā hiahê櫼á形ê魚肉liâu lóng食了。

伊kā身軀挺直，手tī長褲拭拭leh。

伊講：「Taⁿ，手ah，你ēsái放開魚線，hō͘ 我kantaⁿ用正手來kah牠拚，一直到你無tāitsì。」伊用倒腳踏倒手teh giú ê粗魚線，身軀hiàⁿ後，來thèⁿ kha脊phiaⁿ受tio̍h ê力。 伊講：「天ah，mài koh hō͘ 我kiù筋lah，因為我m̄知hit尾魚koh來beh tshòng啥。」

伊想：M̄ koh，牠ná像真冷靜，而且照牠kakī ê計畫teh進行。M̄ koh，牠ê計畫是啥？我ê計畫koh是啥？伊hiah大phiang，我ê計畫tio̍h ài根據牠ê計畫來應變。牠若跳出水面，我to̍h kā牠thâi。可惜牠m̄出來，ánne，我to̍h kah牠磨到底。

伊kā kiù筋ê手tī長褲頂面摩擦，試beh hō͘ 指頭á放lēng。M̄ koh，指頭á iáu伸bē開。伊想：Kiámtshái hō͘ 日頭pha̍k了，它to̍h ē開，á是，kiámtshái hiahê有夠力ê串á sasímih消化了，它to̍h ē開。手若一定ài用tio̍h ê時，我ē無惜任何代價kā它phah開，m̄ koh，tsitmá我iáu m̄免用強ê；hō͘ 它kakī開，kakī回復。昨暗tháu魚線，接魚線ê時，我kā它操siuⁿ過分à。 伊看向遠遠ê海面，知影kakī有gōa孤單，m̄ koh伊ētàng看tio̍h深海裡，烏色海水中ê光柱，kah面前垂落海水ê魚線，以及平靜海面奇妙ê波動。因為起貿易風（譯註：trade wind，信風，是tī低空tù亞熱帶高壓帶吹向赤道低壓帶ê風，因為ta̍k年反覆穩定出現，親像潮汐有信，所以叫做「信風」。古早ê生理人也利用信風ê規律性做航海貿易，因此信風tsiah hông稱做「貿易風」。）ê關係，雲當teh積聚搭koân；伊看向頭前，看tio̍h一陣野鴨飛過水面，in ê形影有時茫茫渺渺，有時卻親像刻tī天頂ê圖hiahni̍h清楚。伊知，tī海面，無人ē孤單。

伊想tio̍h有ê人坐小船出海，若是看bē tio̍h海岸ê時，in ē驚惶；伊知若是tī真緊變天ê月份，in ē驚是正常ê。Taⁿ正是風颱ê月份，若無風颱，tsittsūn ê天氣是一年中間siōng好ê。 風颱若是beh來，tī幾nā工tsìn前ê海裡，你to̍h ētàng tī天頂看tio̍h兆頭。伊想：In tī陸地看無，因為in m̄知beh看啥。Tī陸地一定mā ētàng tùi雲ê形狀來看出兆頭。M̄ koh，tsitmá咱無風颱beh來。

伊gia̍h目看天，看tio̍h白色ê積雲（cumulus）ná親像一堆siâⁿ人ê冰淇淋（ice cream），頂koân koh有薄薄ná羽絨ê捲雲（cirrus）浮tī koânkoân ê九月天。