《老人kah海》

 | | | 轉寄

《老人kah海》_36, Bô huattō͘ siongsìn i ū tsiah tōa bóe /無法度相信牠有tsiah大尾

作者 Ernest Hemingway, 台譯：宋麗瓊 林俊育 2019.12.22

I khaisí kā hî giú óa lâi tsûnpiⁿ, thang hó kā soh'á tshngkòe i ê sai, tùi tshùi tshutlâi, liáuāu kā thâu ânân pa̍k tī tsûnthâu piⁿ. I siūⁿ, góa siūⁿ beh khòaⁿ i, mā siūⁿ beh kā i bong bong leh, so so leh. I sī góa ê tsâihù, m̄ koh m̄ sī inūi ánne, góa tsiah siūⁿ beh bong i; góa siūⁿ, tng góa tē jī pái kā hîtshe pèⁿ sak ji̍p khì ê sî, góa ū kámkak tio̍h i ê simtsōng. Tsitmá góa ài kā i thua oá lâi, kā i pa̍kân; ēng tsi̍t tiâu thò soh thò tī hîbóe, lēnggōa tsi̍t tiâu thò tī hî sin ê tiongng, kā i pa̍k tī tsûnpiⁿ.

I lim tsi̍t sut'á tsúi liáuāu, kóng,"lāulâng ah, tāngkang lah. Tsingtàu kìjiân kiatsok à, tsitmá ū tsin tsē khó͘kang ài tsò."

I gia̍h thâu khòaⁿ thiⁿ, liáuāu khòaⁿ tsûn gōa ê hî. I tsimtsiok kuankhòaⁿ ji̍tthâu, kámkak sîkan tú tsiah kòe tiongtàu nātiāⁿ. Bō͘e̍k hong khí à. Tsiahê hîsòaⁿ tsitmá lóng bô tiōngiàu à, tńgkhì tshù ·ni̍h liáuāu, gín'á kah góa tsiah lâi kā in tsiap khílâi.

I kóng,"hî, lâi lah!". M̄ koh, hî bô óa lâi, i kantaⁿ tó tī hia, tòe háiéng teh iôtāng, só͘í lāulâng kā tsûn sái khì i hia.

Tng i kah hî pênghêng, koh kā hî ê thâu khò óa tsûnthâu ê sî, i bô huattō͘ siongsìn i ū tsiah tōa bóe. Tsóng sī, i tùi tsûnthâu ê thiāuá tháu khui hîtshe ê soh'á, kā i tshngkòe hî sai, tùi i ê ēhoâi tshutlâi, koh tī i ná kiàm ê tn̂g tshùi se̍h tsi̍t liàn, liáuāu kā soh'á tshngkòe lēnggōa tsi̍t pêng ê hî sai, koh se̍h tsi̍t liàn tn̂g tshùi, koh kā tsit nn̄g kó͘ soh'á phah tsi̍tê kiat, ânân pa̍k tī tsûnthâu thiāu. I kuahtn̄g tsi̍t tsat soh'á, khì tsûnbóe pa̍k hîbóe. Hî íking tùi goânlâi ê gîn sik kah kiôsik piànsêng sûngîn sik, singkhu ê tiâubûn kah bóeliu kângkhoán lóng sī tshián kiôsik. I ê tiâubûn pí lâng peh khui gō͘ tsí ê tshiú koh khah khuah, hî ê ba̍ktsiu léngbo̍k bôsîn, ná tshintshiūⁿ tsiâmbōngkiàⁿ （periscope）ê kiàⁿ phìⁿ, á sī teh iûhêng tiong ê sînbêng.

Lāulâng kóng,"tse sī thâi sí i ê îit honghuat."Lim tsúi liáuāu, i kámkak ke tsin sóngkhoài, i tsaiiáⁿ i bē hun·khì, jîtshiáⁿ i ê thâukhak mā tshingtshéⁿ à. I siūⁿ, i khòaⁿ khí·lâi ū tshiaukòe tsi̍t tshing gō͘pah pōng, hoānsè puttsí; nā thâi hó ê tāngliōng tshun saⁿ hun tsi jī, tsi̍t pōng bē Bíkim 3 kak, ánne ē ū gōa tsē leh?

I kóng,"góa ài ū iânpit tsiah ēhiáu sǹg, góa ê thâukhak bô hiahni̍h tshingtshó, m̄ koh, góa siūⁿ DiMaggio láutōa kin'áji̍t ē thè góa kámkak kiaungō͘. Suijiân góa bô kuttshì, m̄ koh, góa ê tshiú kah khatsiahphiaⁿ tsin thiàⁿ."i siūⁿ, góa m̄ tsai kuttshì sī siáⁿ; hoānsè lán ū, tsísī lán m̄ tsai. I kā hî pa̍kân tī tsûnthâu, tsûnbóe kah tsûn tiongng ê hoâiⁿpang. Hî hiah tōa bóe, khòaⁿ khí·lâi ná tshintshiūⁿ tsûnpiⁿ koh pa̍k tsi̍t tsiah khah tōa tâi ê sió tsûn. I kuah tsi̍t tsat soh'á, kā hî ê ēhoâi kah tsiamtshùi pa̍k oá lâi, ánne, hî tshùi to̍h bē khuikhui, tsûn kiâⁿ to̍h ē sūnlī. Liáuāu, i tshāi khí ûikan, ēng hîkau ê pèⁿ tsò tsûn phâng ê hoâiⁿkuaiⁿ, koh singkhí hit tè siupó͘ kòe ê tsûn phâng. Tsûn khaisí khíkiâⁿ, i pòaⁿ theⁿ tī tsûnbóe, kā tsûn sái hiòng sailâm.

伊開始kā魚giú óa來船邊，thang好kā索á穿過牠ê鰓，tùi嘴出來，了後kā頭ânân縛tī船頭邊。伊想：我想beh看牠，mā想beh kā牠摸摸leh，so so leh。牠是我ê財富，m̄ koh m̄是因為ánne，我tsiah想beh摸牠；我想，當我第二pái kā魚叉柄sak入去ê時，我有感覺tio̍h牠ê心臟。Tsitmá我ài kā牠拖oá來，kā牠縛ân；用一條套索套tī魚尾，另外一條套tī魚身ê中央，kā牠縛tī船邊。

伊lim一屑á水了後，講：「老人ah，動工lah。爭鬥既然結束à，tsitmá有真tsē苦工ài做。」

伊gia̍h頭看天，了後看船外ê魚。伊斟酌觀看日頭，感覺時間tú tsiah過中晝nātiāⁿ。貿易風起à。Tsiahê魚線tsitmá lóng無重要à，tńg去厝裡了後，gín’á kah我tsiah來kā in接起來。

伊講：「魚，來lah！」。M̄ koh，魚無óa來，牠kantaⁿ倒tī hia，tòe海湧teh搖動，所以老人kā船駛去牠hia。

當伊kah魚平行，koh kā魚ê頭靠óa船頭ê時，伊無法度相信牠有tsiah大尾。總是，伊tùi船頭ê柱á tháu開魚叉ê索á，kā它穿過魚鰓，tùi牠ê下頦出來，koh tī牠ná劍ê長嘴se̍h一liàn，了後kā索á穿過另外一pêng ê魚鰓，koh se̍h一liàn長嘴，koh kā tsit兩股索á phah一个結，ânân縛tī船頭柱。伊割斷一節索á，去船尾縛魚尾。魚已經tùi原來ê銀色kah茄色變成純銀色，身軀ê條紋kah尾溜仝款lóng是淺茄色。牠ê條紋比人peh開五指ê手koh khah闊，魚ê目tsiu冷漠無神，ná親像潛望鏡（periscope）ê鏡片，á是teh遊行中ê神明。

老人講：「這是thâi死牠ê唯一方法。」Lim水了後，伊感覺加真爽快，伊知影伊bē昏去，而且伊ê頭殼mā清醒à。伊想：牠看起來有超過一千五百磅，hoānsè不止；若thâi好ê重量tshun三分之二，一磅賣美金3角，ánne ē有gōa tsē leh？

伊講：「我ài有鉛筆tsiah ē曉算，我ê頭殼無hiahni̍h清楚，m̄ koh，我想DiMaggio老大今á日ē替我感覺驕傲。雖然我無骨刺，m̄ koh，我ê手kah kha脊phiaⁿ真痛。」伊想：我m̄知骨刺是啥；hoānsè咱有，只是咱m̄知。 伊kā魚縛ân tī船頭、船尾kah船中央ê橫枋。魚hiah大尾，看起來ná親像船邊koh縛一隻khah大台ê小船。伊割一節索á，kā魚ê下頦kah尖嘴縛oá來，ánne，魚嘴to̍h bē開開，船行to̍h ē順利。了後，伊tshāi起桅杆，用魚鉤ê柄做船帆ê橫杆，koh升起hit塊修補過ê船帆。船開始起行，伊半theⁿ tī船尾，kā船駛向西南。