《胡文池牧師kap布農族》

 | | | 轉寄

大奇蹟!長子出生時-tī頭城教會

作者 胡文池 2009.03.08

伊一生只有這一pái來訪問我，tú踏入門tio̍h知影阮某難產，gín-á生buē出來，伊馬上轉身回宜蘭叫來伊助產士ê姐姐，我ê長子tuì án-ne得救。

上帝是咱患難中及時ê幫助(詩篇四六：1)

頭城(當時叫頭圍)是一個小鄉鎮，教會mā小，禮拜日只有二十名左右ê信徒聚會。

一九三七年三月三十日清早，阮某腹肚忽然痛起來，這痛並m̄是因討厭ê胃病所引起，卻是hō͘人驚喜koh緊張ê陣痛 ，十月懷胎，阮期待已久ê小寶寶teh-beh來臨了。

當時ê頭城小鎮無病院、診所、甚至連助產士lóng無。只有古老、非專業性、無牌照ê老阿婆為人接生。阮某陣痛，這是頭一胎，無生過子女ê經驗，所以我隨時請來一位接生婆。伊真緊to̍h來，無帶出診醫藥包、診察器或聽診筒。雙手空空ê來，用這雙手摸摸阮某ê大腹肚，問東問西，然後講：「是beh生了，但是只是tú tú開始有徵狀，距出生iáu有一段時間。」講完伊就tńg去了。

到了下晡，阮某腹肚一陣一陣痛kah厲害koh緊促，接生婆koh來看，tsit-pái伊講；「teh要生了!快準備嬰兒用品。」伊叫阮某用力，伊mā助陣出大力幫忙，ē-sái講是久久嬰兒就是生不落來。接生婆焦急如燒熱鍋上ê螞蟻，mā lóng無辦法。

大約下晡四點，有一位神學生來訪問我，伊名字叫李雅各，是宜蘭教會鄭蒼國牧師娘ê小弟(李雅各了後來留學美國，成做台灣神學院ê教授。)真奇怪，我kap伊並無熟，伊突然來訪，這是伊第一pái訪問頭城教會，了後mā無koh來過，的確是上帝所差派來ê。

李雅各一踏入門就聽tio̍h阮某痛苦ê Aih hngh聲，得悉是gín-á生buē出來ê難產，無kap我交談幾句話就講beh tńg去厝叫姐姐來幫助。伊姐姐就是宜蘭教會鄭蒼國牧師娘，mā就是大名鼎鼎ê正牌助產士鄭李秋蘭女士。由頭城到宜蘭當時tio̍h坐一點鐘頭ê火車。助產士匆匆趕來頭城，已經是日落西山了。

伊馬上為婦人人phah催生針，嬰兒無久就降生了，但因時間拖延siuⁿ久，嬰兒出生時不哭mā不呼吸，看起來kah-ná絕望了。助產士馬上為嬰兒注射強心劑，並用各種急救方法操作，嬰á終其尾「uah uah!」哭出聲來。助產士講：「假使koh再延遲五分鐘，嬰兒就無救了。」

「上帝是咱患難中及時ê幫助」，伊ê話一點mā無錯。如果m̄是上帝差遣李雅各來看看我，鄭秋蘭女士mā buē知影阮正需要幫助， án-ne後果真不堪設想。

Tsit件事對我厝來講是比主耶穌救活眶魯ê tsa-bó͘-kiáⁿ koh-khah直接、koh-khah切實，mā hō͘我親身體驗到上帝tī我身上所行ê神蹟。

鄭牧師娘救活了我ê gín-á了後，看時間已經暗時八點了。為tio̍h beh jiok-tio̍h最後一班車，伊快步走往火車站。一上車，火車就開了。但是鄭牧師娘當時家己mā有身孕。為tio̍h救活我ê gín-á，生死關頭時ê緊張，加上走往火車站ê激烈運動，傷害了腹中ê小生命，suah致使保不住家己ê胎兒，竟然làu胎了。這實在是真大ê犧牲。

數日了後，我往宜蘭教會。向牧師娘感謝了後問伊接生費ài juā-tsē時，伊講：「同工麼，講什麼接生費!幫忙是應該ê」。伊以愛心堅持m̄收禮，阮感覺過意m̄去。為tio̍h表示一點小意思，過了二、三工koh再往宜蘭送伊一隻大閹雞。了後tsiah知影，tsit隻雞被關tī雞舍了後，隔工就phah無見去。是被偷neh?iáu是逃命neh?bē-tàng á知，總講一句是一去無koh tńg來了。

鄭牧師kap牧師娘lóng是真慈祥ê人，愛護同工，提拔了後輩。阮tī頭城時，時常往訪in，領教良多。In ê宿舍是蘭陽一帶傳教師ê免費旅館，飯廳是同工ê免費食堂。

鄭牧師kap牧師娘bat體驗過傳道師生活ê清苦，所以鼓勵阮某ài讀產婆學，做助產士來幫助家計。因為伊ê指導內人才買來二本助產學，tī厝苦讀：因看上主幫助，竟然考tiâu助產士。

自此以後m̄-nā阮ê生活改善，mā hō͘八個子女lóng受tio̍h良好教育。