《胡文池牧師kap布農族》

 | | | 轉寄

驚人ê大迫害

作者 胡文池 2009.08.09

警察ê任務是「安良除暴」，是「人民ê保母」，這m̄-nā是口號，的確，絕大多數ê警員盡忠職守，為人民所敬佩。但是，煞mā有害群之馬，m̄-nā不盡義務，反而成為魔鬼之輩。

我也bat認bat一位狠毒、憎恨人民、設計陷害人民ê警察，伊捏造事實，以可惡ê叛亂罪來迫害山地無辜良善ê基督徒。叛亂罪是會hō͘判死刑ê。若m̄是上主ê保護．我全家以及真tsē布農族信徒，必定遭受tio̍h驚人ê災禍，脫離不了嚴重刑罰，後果就不堪設想。

「凡立志tuè基督耶穌，過敬虔生活ê人、lóng會受迫害。」 (提摩太後書三：12)

一、討厭教會ê警員
M̄知何故，警員余保堂真討厭基督教。伊tī東里，平地派出所任內，有一pái主日來到教會，向當teh做禮拜ê信徒大聲講：「今á日天氣tsiah-ni̍h好，lín為什麼m̄去工作，án-ne lán-si坐tī tsia!lín大部份是農民，án-ne會妨害生產。」

教會負責人kap長執真細jī地對伊講：「今á日是禮拜日，阮是基督徒，理當放落一切ê工，來tsia敬拜上帝，而且中華民國ê憲法保障人民宗教自由，你若禁止阮敬拜上帝，就是妨害了阮信仰ê自由。」

伊聽了，無thang奈何地離開了。但是以後，伊常常利用禮拜日，召集義務勞動，來阻止真tsē信徒做禮拜。

二、好消息變大災禍
余保堂轉任到山地卓樂村時，迫害教會ê心並無改變。伊ê太太所養ê一大群鴨，常常行到山胞ê農田，踏死in所播種ê秧苗。眾信徒到教會來抱怨，教會ê長老執事就大膽地行到派出所陳情。Tsit件事激起余保堂ê憎念，等待機會bueh報復。

有一工，郵差送來一大堆信件，bueh轉送hō͘山胞。因為當時ê信件lóng tio̍h通過派出所轉送到山胞手中。

Tī這批信件中，余保堂無意中發現一張由關山瑪利亞產院寄出hō͘卓樂教會ê信函。這信件ê內容是通告一項好消息：
1.tī關山bueh開辦瑪利亞產院，為山胞婦女服務。
2.生產費kap食宿費全免。
3.另外贈送嬰兒衣物。

產院是芥菜種會孫理蓮女士開辦ê，因婦人人是助產士，tī-tsia產院負起院長職務，因此發信人是院長胡葉寶玉。

余保堂一看，機會來了，tuì án-ne留落來了tsit封信，khǹg入家己衣袋內。暗時伊tī厝裡起稿，寫了一封假信。伊知影我常去卓樂教會帶領in崇拜，因此，以我ê名義發信，tī信中亂批評蔣總統kap國家一大堆壞話，然後講：「我交hō͘ lín ê「鴨蛋」tio̍h好好á保管，等待我ê指示以後，tsiah thang行動‥;」等等話語。

伊將這假信用日文寫好，然後交hō͘伊tī高中讀冊，m̄-bat日文ê姪兒重新抄寫tī信紙上，然後kā真信件the̍h掉，換了tsit封假信入瑪利亞產院ê信封內。

次日，待山胞們上山工作了後，伊偷偷進入山胞ê房屋，秘密地將二個手榴彈kap一kuá子彈分散khǹg tī宣道師kap長老ê衣櫃內。

約下晡四點，伊the̍h了tsit封偽造ê信，khǹg tī小學生放學必經ê馬路上，故意製造「某人遺失」ê景況，伺機行事。果然無久，一位小學生撿了起來。余保堂馬上行近講：「喂!小朋友，你撿到了什麼?來!交乎派出所。」

伊一本正經ê按照規律，登記了撿到者ê姓名kap地址。然後對其他警員講：「tsit封信大概有問題，咱需要扣查。」in隨時拆閱，「不得了，這是一封反政府ê信，信上iáu提起暗語「鴨蛋」，咱到in-tau去搜查pah!」

Tuì án-ne余保堂帶了二、三人，到宣道師kap長老ê厝中，tsit時已經是beh暗á，in lóng由耕地tńg來到了厝內。經過一陣東翻西tshuē，tshuē出了余保堂所預藏ê子彈。Tuì án-ne宣道師kap長執等共五、六人隨時被捕，in實在莫名其妙，mā m̄知厝內án怎講會有子彈kap手榴彈。

Tī派出所內底，in被經過長時間ê審問，余保堂硬叫in承認伊事先準備好ê筆錄，筆錄ê內容是：「胡文池牧師tī一九五九年十二月二十三日帶長子，用皮包the̍h子彈kap手榴彈hō͘阮，ài阮thìng候時機造反‥‥等。」

In不承認，因為這根本m̄是事實，因此in開始遭遇tio̍h一連串ê毒phah，tsit時已經是寧靜ê半暝，in被毒phah所發出ê哭叫聲，驚醒了當地居民，hō͘真tsē無助ê居民感覺心痛流目屎。

一九六0年四月二十八日，玉里分局接tio̍h余保堂ê報告，認為這是關於國家大事，即時派來多名刑警到卓樂村，封鎖kui-ê村子，並將宣教師kap tsiah-ê長執帶到玉里分局審問，tī玉里koh一pái受tio̍h毒phah、灌水、倒掛、針刺指甲縫‥‥等各種刑求，有ê忍受不了痛楚，只好承認筆錄ê偽罪狀。

四月二十九日，玉里刑警the̍h了那封偽造信件－造反ê重要證據，偕同關山ê刑警，鄰里長來到了關山我家。當時婦人人kap眾細kiáⁿ lóng tī家。

刑警問明信封上ê字跡是長子宏仁寫ê。但當in抽出內文，是二、三張ê日文信，婦人人解釋講，內文m̄-tio̍h，實際ê內文只是一封「孫理蓮女士ài tī關山開設瑪利亞產院」ê通知，是中文ê油印信，因為總共發出五、六十封hō͘各山地村教會，由長子kap眾細kiáⁿ幫忙寫phe、貼郵票…。刑警真細jī地講：「信封既然是令公子ê字跡，阮必須帶伊到分局一tsuā，真緊就ē-tàng送伊tńg來。」

阮完全m̄知影發生了什麼tāi-tsì，mā m̄知日文信ê內容。Hit暗長子無tńg來，koh來了kuí-nā位刑警，tī我家大搜查，但得bē-tio̍h任何證物，只好帶走一kuá無關要緊ê信件kap長子tī大學讀冊ê幾本雜記。Tsit時阮tsiah感覺tāi-tsì ê嚴重性，而且得悉長子已被帶到玉里分局收押了。

三、及時ê幫助
余保堂為tio̍h bò ài hō͘事件擴大á揭發出伊ê陰謀，伊封鎖了卓樂村ê出入口，m̄-tsún村民落山，伊建議玉里分局快速執行tsiah-ê叛亂人犯。

但是伊萬萬無料想tio̍h「上帝ê眼目遍察全地」

有一位卓樂村民連夜爬過了後山，到鄰村，kā tsit件不幸ê消息kā高榮順牧師講，高牧師馬上趕到玉里宣教師鮑德理牧師hia，轉達了tsit件事。鮑牧師知影tāi-tsì ê嚴重性，隨時派伊太太坐hit工ê飛機到台北，報告長老會總會。

當時ê山地幹事卓信得牧師，以前是玉里ê牧師，伊知影余保堂常常tshuē教會ê麻煩，直覺感覺tsit項事是余警員所做ê陰謀，向政府寫了一封陳情冊。另外一位宣教師海佯登牧師mā將tsit項事向tī警備總部ê朋友報告。因此tāi-tsì發生ê第三工，警總就直接派人到玉里辦案。

經in詳細調查ê結果：
一九五九年十一月十三日出境到美國留學。
一九五九年十二月二十三日(筆錄上ê日期)當teh部隊受訓，無外出。
一個tī美國，一個tī軍中，知筆錄有問題。

警總派來ê刑警對長子kap卓樂教會hō͘抓ê人表明身份，請in坦白供出實情，終其尾調查出這lóng是余保堂所設計ê陰謀。

烏雲已散，真相大白，余保堂無法度thang賴，伏首認罪，被法院用利用職權，偽造文冊等罪狀，判刑十五年。

感謝神ê帶領，hō͘刑警辦案迅速，長子kap其他被冤枉ê人犯tī一禮拜內lóng被釋放tńg來。

Tsit件事解決了後，花蓮縣警察局長bat親自來到關山我家道歉，並贈送一點禮品。

「耶和華ê眼目看顧敬畏伊ê人kap仰望伊慈愛ê人，bueh救in ê命逃離死亡。」(詩篇三十三：18)

「主講：申冤tī我，我必報應。」(羅馬冊十二：19)

四、卓樂事件hō͘教會kap旺
一九六0年四月卓樂教會ê信徒張品國、張國興、沈金福、高則通‥‥等人，經過被毒phah、灌水、刑求了後，關tī玉里分局鐵窗內一禮拜。其餘ê信徒，以及附近布農族各教會ê信徒lóng聚集，每日無停ê為受難ê兄弟祈禱，請求上帝賜in力量，堅定信仰。

雖然tsit件不幸ê事發生了，但in無因外來ê迫害失去對上帝ê信心，相反地信徒日益增多，而且計劃建造新ê禮拜堂。

經過籌備設計，有錢ê出錢，有力ê出力，終其尾tī一九六二年二月間開始破土，經過八個月，信徒同心協力獻錢、獻力，艱苦工作，最後終告完工。同年十二月廿二日舉行獻堂典禮，參加人數約有七百人。

典禮中，真tsē人想起tsit-pái ê大試煉，禁bē-tiâu流目屎傷感。東部布農區會，為tio̍h安慰奮興tsit-ê受魔鬼傷害ê教會由次年三月五日起派出五名傳教師(to̍h是劉傳、馮貴興、高順榮、黃順利、張旺)，每晚輪流到該會開培靈會，醫治in ê心傷，koh-khah振奮in ê信仰。