《胡文池牧師kap布農族》

 | | | 轉寄

月娘hō͘ in飲酒

作者 胡文池 2009.10.18

「酒」，對漢人來講，是一種嗜好品，有人認為伊thang補體強身，有人借酒澆愁。Tī社交習慣上，宴饗人客mā lóng細jī地講「敬備薄酒」，若無對人客是無酒to̍h 無得禮。

Tī傳統上，祭鬼神、拜祖宗mā lóng必須「敬酒」三杯。Tsiah-ê lóng成做bē-tàng缺少ê至上禮儀。
對山胞來講，酒m̄-nā是一個人嗜好品，mā是團體ê娛樂。同時mā是in ê宗教，犯罪ê根源，剿家滅族ê暴君。日本政府bat用警察ê力量來強制矯正in酗酒ê惡習，卻無效果，因為in講月娘叫in飲酒。

直到福音傳入山地了後，全能ê主耶穌tsiah改變酒徒成做聖徒。
一位布農族老人對我講起為什麼in必須飲酒ê一段有趣味故事。
太古時代，有二個日頭，每日tī上空日夜無停地照耀地上。

有一工，一位婦人帶伊ê嬰兒到山頂工作，伊將嬰兒放在地上，用棕樹插在地上作陰影遮蓋嬰兒，繼續伊ê工作。不juā久，伊聽bē-tio̍h嬰兒ê聲音，回過頭來一看，發現樹葉已枯乾，嬰兒mā被日頭ê炎燒熱焦死並變成四腳蛇了。伊隨時tńg去厝裡將tsit-ê tāi-tsì kā丈夫講。

伊ê尪非常震怒，帶tio̍h長子向東方前進，beh為嬰兒報仇。父子每日無停地前進，jú山過嶺，幾十年了後父親死去，長子繼承父親遺志，無停地koh再前進。

最後到了日頭昇起ê所在。伊用弓矢向日頭射去，果然成功地射中了日頭ê目睭，tsit-ê日頭因流血siuⁿ過tsē，失去了光輝，面色變蒼白，就是現在ê月娘。

Tsit位青年同情月娘流血ê痛苦，將家己kho͘-á tī胸前ê布獻hō͘月娘拭去面上ê血跡。Hit時月娘對伊講：「lín m̄知影，lín每工ê生活，萬物ê生育lóng是uá靠我。就是因為lín忘恩負義，嬰兒tsiah會受罰á死，所以以後每月月圓ê時tsūn， mài bē記得過節來紀念我ê恩惠，án-ne lín ê子孫tsiah會興旺。」

布農族人相信了這傳說，所以in家己釀酒，並tī每月ê月圓之夜，暢飲歡樂，表示對月娘ê報恩。

Tsit項傳說，hō͘單純ê族人陷入魔鬼ê詭計，成做酒奴、酒鬼，一生醉生夢死，迷信、犯罪，suah致使自滅。