《胡文池牧師kap布農族》

 | | | 轉寄

傳道生活回憶

作者 胡文池 2009.12.20

原載台灣教會公報一四五0期

我是退休ê牧師，自二十六歲起tī教會工作了二十七年，初期ê十二年tī平地，以後ê二十五年tī山地，這無算短ê時光，經歷了傳教者特有ê甜鹹酸苦各種遭遇，tī-tsia只舉數項往事作為回憶。

一、講章生產之苦
有人講傳教是siōng輕鬆ê職業，每禮拜只講幾pái道理而已，以外ê時間每日閒暇。這話對我是相反ê感受，試想放飼ê雞母，伊一工到晚tio̍h到各所在tshuē覓食物，tsiah有夠額ê滋養製出卵來。傳教者ê生產講章甘不是án-ne?

我是一個平凡ê傳教者，不善講道，自開始牧會起。為每週二篇講章，絞盡腦汁，每日勞苦。自禮拜一開始，就每日閱讀各方面ê冊，或名人ê講道集，tshuē求合適ê經題kap材料，有時tsūn到禮拜六iáu未tshuē出合宜ê講章，內心ê焦慮緊張，真是bē-tàng用言語來表達。

一九二六年四月十六日，台灣教會由大陸聘請名佈道家禾尚節博士，來台北舉行為期一週ê奮興大會。當時筆者由遙遠ê中部庄腳專程前往參加，親眼看tio̍h伊偉大ê工作，有力ê證通，會眾聽了流目屎悔改，跪地認罪m̄知凡幾。宋博士ê講道內容，好似「滿漢全席」大餐，á我ê講題猶如粗米飯配鹹菜。

二、日本人ê壓迫
筆者初次受派到教會工作時，當teh日本帝國發動大東亞侵略戰初開。In siōng早強迫教會學校學生前往國家神社參拜，而且刑事時常到教會tshuē麻煩，調查信徒姓名。牧師kap信徒ài tī厝裡設置大麻(to̍h是天照大神神牌)。主日禮拜前強迫信徒向東方遙拜日本皇宮。高等警察常常向阮牧師試問:「天皇kap耶穌nah一位大?」或「教育日語kap聖經nah種重要?」用類似ê難題來為難阮。日軍tī kap美軍交戰、節節失利時，寫落來眾牧師ê烏名單，準備tī美軍登陸臺灣時全部殺死。感謝主!美軍無來臺灣，只以兩顆原子彈，就hō͘日皇投降，á hō͘主ê僕人免去一場大浩劫。

一九四五年八月十五日，日本戰敗，傳教mā自由了。

三、信徒愛心
第二次大戰期間，各項民生物資奇缺，差不多樣樣lóng採限量配hō͘。Tī大甲教會時，有一位信徒借hō͘阮一塊山坡地，所以阮夫婦帶tio̍h二個gín-á上山種土豆，收成二包土豆仁，供兩年食用。當時ê信徒生活mā真困苦，傳教者薪水koh-khah是菲薄，但是愛主ê信徒，卻時常致送額外ê金錢或食品，來補足阮ê欠缺。我向布農族開拓傳道之初，關山黃應添醫師mā幫助我tī伊ê病院內開設禮拜堂，hō͘山胞有場所做禮拜，並有免費午餐kap餅乾、糖果。

Tī平地、山地傳福音期間，信徒ê愛心是源源不斷，訴講bē盡，hō͘阮由衷感激，到taⁿ iáu念念無bē記得。

四、山地傳教得意時期
臺灣光復時政府對山胞傳教協助真tsē，thang申請一年期ê入山證，派出所並為阮召集山胞來派出所聽道。常時我iáu年經，體瘦腿長，thang連行八小時ê路到深山傳道，in以前siōng為驚鬼，我向in宣講起帝創造人類ê祖先－亞常夏娃，koh創造各種食物、牛、羊、雞、犬等，tuì án-ne in漸漸歸屬了上帝而且禁酒、禁煙。

依我四十多年傳道ê感覺。漢人有故舊文化。心田是充滿保守舊傳統ê石地，福音種子無容易進入。山地人內心空虛，容易接受福音ê恩典。天國實在是in ê(馬太福音五：3)。所以我tī山地工作ê初期十年間，經我ê手受洗禮ê山地人就超過五百名了。假使「一份工作一份收成」ê話tī于平地是真正， án-ne tī山地傅教thang講一份工作百倍收成，真是好土地!

雖然山地傳教tī肉體上有真tsē痛苦，但眼見信徙日增而且虔誠，禮拜堂一座一座落成，tuì án-ne精神上受大安慰kap喜樂。 傳教期間我bat為布農族編造十七個字母，印成字母小冊、聖歌集、要理問答、奮興短歌，最後開了十年功夫譯成布農新約聖經。一位小姐自費專程自瑞士來tsia，開了六個月為我phah出聖經原稿影印。

上帝賜hō͘每人ê恩賜本無仝款，我ê性格率直、內向，不善交際，比較無適合tī平地傳教，mā可能tī母胎內，上帝早to̍h選定我為山地文字工作者，所以我被號名為「文池」，tio̍h用這池內之水來灌溉靈性貧瘠之山地。

過去ê數十年時間，已如夢中真緊to̍h消失了。苦戰為老兵榮譽勳章，勝利是退伍者甜蜜ê回憶，為主效勞bē落空。