《胡文池牧師kap布農族》

 | | | 轉寄

懷念愛兒－賢民

作者 胡文池 2010.01.24

賢民是我八個兒女中ê老么，tī一九九二年，因意外傷害，輸血中不幸血液病毒感染，引起其他併發症á蒙主恩召。伊ê離世帶hō͘阮無限傷痛。不過阮真正tio̍h感謝上帝，bat賜hō͘阮tsit-ê gín-á，伊伴阮四十年，如今上帝先召伊tńg去了。雖然阮萬分不捨，但是「賞賜ê是耶和華，收取ê mā是耶和華，耶和華ê名是應當稱頌ê」。阮bē明白上帝ê旨意，但阮順服伊siōng好ê安排。 現在我用感恩ê心寫落來對伊ê懷念：

一、伊ê出生
賢民一呱呱落地，阮就gōng-gia̍h地發現伊唇顎裂。婦人人抱tio̍h這弱小無助ê嬰兒直落目屎，心疼伊ê缺陷。但是阮真緊就感謝上帝hō͘賢民出生tī我ê家庭，阮m̄-nā bē厭棄伊，反tńg會hō͘伊siōng適宜ê關愛、醫療kap教育。

婦人人是助產士，伊會曉真tsē育嬰常識，用siōng好ê方法來照顧tsit-ê gín-á。賢民bē曉吸吮母奶，沖泡ê牛奶koh hō͘伊不消化。阮只好家己養羊，hō͘伊每工有新鮮營養ê羊奶thang進食。

Tī伊出生第八天，黃應添醫生就為伊做唇部外觀縫合手術。口腔內顎裂部分卻無法度縫合，這造成伊講話語音kap咀嚼lóng有障礙。阮四界為伊tshuē名醫，孫理蓮牧師娘mā託董大成醫師四界探聽。但足四十年前，台灣ê醫學技術尚無法度進行這高難度ê手術。一直到賢民十二歲hit年，有一工，阮突然接tio̍h馬偕病院羅慧夫醫師ê通知函，ài賢民去接受手術。

原來hit時正有一位專研究唇顎裂ê名醫將路過臺灣一工，tsit位名醫是傳教兼醫治ê印度宣教師。伊真樂意為唇顎裂患者手術，賢民就好字運ê被選上了，只因為伊ê父親是牧師，tī東部為原住民傳福音。感謝主。Hit-pái ê縫合手術m̄-nā全部免費，mā是臺灣第一個唇顎裂患者口腔內成功地被全部縫合ê案例。遠位印度宣教師就án-ne一pái來臺灣，是上帝親自派伊專程來為賢民動手術ê天使。阮m̄知影伊ê大名，只有滿心感謝上帝。

唇顎裂患者lóng須經過kuí-nā-pái ê修補手術。以了後羅慧夫醫師kuí-nā pái到美國siōng好ê醫學中心進修研究。每pái tńg來，就必通知賢民去複檢。Koh再為伊動修補手術。並紹介siōng好ê老師教導伊重新練習發聲，hō͘伊咬字清晰，ē-tàng愉快有自信ê kap別人交談。

二、伊ê奮鬥成就
賢民上大學了後就漸漸脫穎á出，伊ê力量源自tī上帝。伊tī自傳上寫tio̍h:「深深體會tio̍h內心ê軟弱á願koh-khah倚靠主，仰望上帝無限ê希望，支取上帝無限ê堅強kap力量」。一個唇顎裂者所會遇tio̍h ê挫折、困擾或傷害，是一般正常人無法度體會ê。但tsit-ê gín-á，靠tio̍h對上帝ê信仰，tī上帝帶領下，伊突破了任何ê困境。

Tī伊hō͘羅慧夫醫師ê一封感恩信件中，阮thang看出伊ê信仰、對工作ê熱誠kap成就，我將原文抄錄如下:

所敬愛ê羅院長:
我是胡賢民是臺東縣關山鎮，胡文池牧師ê kiáⁿ兒，未知您會記得否?今á日接tio̍h長庚病院ê複診通知，本月10日，我將真樂意前往。

我現就讀tī臺中醫藥學院藥學系夜間部五年級。

一個月以來一直想寫phe hō͘您，吐露我ê心聲kap感謝：一個月前我卸下了中區長老會大專基督徒學生團契會長ê職務，tī卸任ê hit工我禁bē-tiâu有真tsē感觸，mā想起了真tsē事，其中我特別想起kap感謝ê是您－羅院長。因為我原是一個顎裂ê人；一個口齒不清ê人；一個原應bih-tī別人背後ê人，但因為院長您tī上帝面前ê獻身，將家己奉獻hō͘臺灣人，遠渡重洋來到臺灣，我tsiah ē-tàng得tio̍h siōng好ê醫治，tī大學tsit幾年間，除了今年bat擔任中區長老會大專基督徒學生團契會長外，我iáu bat擔任臺中市大專夜間部聯合團契會長、好撒瑪利亞人學生慈善基金會會長，kap中國醫藥學院藥學導報社總編輯。擔任了tsiah-ê職務thang想像地我必須主持真tsē會議，必須接洽真tsē事務，雖然我ê口音並m̄是百分之百地清晰，但至少我已ē-tàng輕易地hō͘別人曉得我ê意思。我禁bē-tiâu地回想，假使m̄是接受了您三pái ê手術，到taⁿ我將iáu是一個口音完全不清ê人，根本不可能做一個「會長」mā根本不可能做這真tsē事。所以卸任ê hit工我深深地想起您mā感謝您!假使tsiah-ê年來擔任了這真tsē ê職務，有一kuá榮譽我願tī心中深處完全獻hō͘您!

寫tsit封信tuì án-ne tī表達我對您深深地感謝，中國人尤其是臺灣人一向不善坦白正直表露家己ê感情。我相信一定會有koh-khah tsē受您恩惠ê臺灣人tī背地裡對您有無限ê感激!

最後附上一本我編輯設計ê「臺北市乘車指引」雖然伊對您mā可能無路用(因您家己駕車不乘公車)但對一kuá人是有需要ê。假如上帝賜hō͘我能力，我ǹg望有一工ē-tàng幫助kap我有仝款苦難ê人。

願上帝祝福您
Mā koh再表達我深摯ê感謝
胡 賢 民 敬上
民國六十七年七月五日

在學期間，伊就常擔任各種會長等重要職務。畢業了後，上帝mā特別賜福伊，hō͘伊前後擔任長老會文字中心經理、門徒服務團經理、伊甸基金會kap惠明盲校聖誕卡義賣原策劃者、GDC土地投資人自救會總幹事、中坡教會長老‥‥。任何一份工作或服事，伊lóng全力以赴，不辭辛勞。伊所設計出版ê「胡氏臺北乘車指引」tī二年中出版了十三版共五萬本，當時坊間koh-khah競相仿倣、翻印，hō͘伊停止了tsit項出版á專心tī其他事業上。

伊ê朋友hō͘伊一句讚語講:「賢民無一個腦細胞是生銹ê」，足thang看出伊無一絲á浪費上帝所hō͘ ê恩賜。時刻積極運用家己ê每一個思想，勤奮認真正做每一件事。

三、伊ê孝心
Tī伊大學時代ê日記，第一頁就寫tio̍h：
Hō͘您ê kiáⁿ兒獨擔奮鬥ê痛苦，á請您kap您ê kiáⁿ兒共享成功ê果實。
－hō͘我親愛ê父母親

伊開始工作，就每一個月hō͘阮夠額ê生活費，家己卻省食儉用。
伊結婚ê前夕，寫了一篇「反哺」，懇切地邀請阮kap in tuà作伙，伊講：

「爸媽，您們bat為兒女建立一個充滿了深深ê愛kap溫暖ê家庭，足令in一生懷念kap滿足。如今，tī您們年老ê時tsūn，mā hō͘您們bat滿溢tī阮身上ê愛回流到您們身上。爸媽!阮歡迎mā teh等待您們來!」

伊確實用實際行動來表達伊ê孝心。

伊蒙主恩召時，阮哀痛地寫落來以下肺腑之言：

賢民吾兒：
你是阮心中ê孝子，所以你m̄是故意án-ne少年就離開阮到天堂去。當時tī你身邊ê人kā阮講，你tī病重、已經衰弱、講話mā困難之時卻iáu強裝有氣力，快樂á大聲地kap媽媽講國際電話。講完時你全身冷汗，隨時就躺落去了。你最後tio̍h離開世間ê時tsūn，iáu-beh安慰媽媽，hō͘媽媽放心，你講：「我真好，媽媽!您mài煩惱」。

阮深知天父召你tńg去是愛惜你，buài你在地上過tī勞苦。 你做事全力以赴，爭取時間，辦事迅速，連食飯mā匆匆，這是tsit-pái疾病ê起因。

天父ê旨意是buē-sái違背ê，m̄-koh父母ê心是án-ne軟弱m̄甘你離去，ta̍k工想beh看你，呼叫你ê名字，尤其重感情ê你母親流目屎啼哭，你tī天頂ê靈一定看tio̍h聽tio̍h了pah!

你小時候常講，將來長大了bueh蓋一座樓房hō͘阮tuà，最近你ê願望果然實現，可惜你kap阮只tuà了兩工就回臺北，tsit-ê離別，就永遠看未到你了。

雖然阮心裡真甘苦，兄弟姐妹mā仝款流目屎，但是咱有信仰，相信將來tī天堂會koh再相見。阮感謝上帝hō͘你一生有堅定ê信仰和美好ê行為，以及現在tī天國ê福氣，阮以此得安慰。阮二人年紀大了，無久會tī天家kap你相會。 ─爸爸ê心聲

我ê kiáⁿ兒賢民ah─媽思念你、想tio̍h你hiah-ni̍h乖，hiah-ni̍h孝順，就流目屎，媽愛你，ài-beh看你，bueh kap你講話，媽媽bueh叫你，阿賢，阿賢，但已經buē-sái了，無機會了!25日hit工，媽媽ê心突然劇痛一陣，了後來tsiah知影那to̍h是你行ê時刻，媽媽叫了「阿賢，阿賢」一百guā次!

願你tī天堂無掛慮、無煩惱、kap天父tuà作伙永遠快樂。
－媽媽ê心聲
一九九二年三月二六日寄自美國

四、伊ê追思禮拜
Tuì伊ê追思禮拜中。阮看tio̍h伊佳美ê腳蹤遍行各地方，伊真誠懇ê愛心hō͘人感念無停。

賢民是tī三月二十五日暗時榮歸主懷，四月五日下晡tī東門教會舉行追思禮拜。參加者坐滿教會樓頂樓腳每一角落。有tuì美國tńg來ê親友，tuì關山來ê牧師kap親友，臺中惠明盲校mā有師生二十guā人特別乘專車前來。

Tsit幾年，伊花真tsē心血。投入koh再幫助殘障ê事工上，除了幫助伊甸殘障基金會，惠明盲校外，伊mā tī馬偕病院設立唇顎裂基金，hō͘無錢動手術者thang免費接受治療(當初無全民健保)。伊往生前一年，tú好羅慧夫顱顏基金會成全，伊將剪報khǹg tī皮夾內，註明基金會ê地址、電話，正計劃如何獻上心力。無想tio̍h第二年卻蒙主恩召了，伊這心願，其妻麗宇已代為完成。

賢民m̄-nā愛殘障朋友，對教會牧者尤其關懷。追思禮拜這天，多位牧師上台見證賢民愛傳道人ê種種實際行動:「胡長老常常到牧師館來看看有什麼缺乏無‥為牧師裝冷氣、裝電話、tī牧師辦公室添購siōng好ê冊櫥‥」「伊m̄-nā一pái tī司會時呼籲信徒tio̍h愛傳道人、同心關懷聖工‥．」「伊是難得tshuē見ê好人‥」「伊是一位天使，上帝差來協助咱ê天使‥」in流目屎懷念，台頂台下，無論老少lóng流目屎受tio̍h激勵，敬佩伊那美好ê生命。

最後鄭興讓牧師講:胡長老雖然kan-ta有四十歲，生命雖短，內容卻豐富，結果纍纍，遠超過一般八十歲老人所做ê。所以主講：「有夠，你為我所做ê已經太夠額了，快來享受你主人ê福分pah!」雖然阮真m̄-kam，但是阮只ē-tàng講:「無m̄-tio̍h，上帝ê美意本是án-ne!」

賢民tī自傳第一行寫tio̍h：
「有kuá人，in ê生命如落葉，tuè風漂盪不定，無一定ê方向，但是有kuá人，in ê生命卻如晨星，有伊固定ê軌跡」~赫塞「流浪者之歌」。 ~座右銘、自勉之~

的確，賢民ê生命是有一定ê方向，如晨星，有伊固定ê軌跡。四十歲，是伊回天家ê年歲，奇妙ê是伊早就知影，早就teh做準備。阮mā求主保守阮，忠心走盡當走ê路，完成主所託付ê聖工，阿們。