《白話字文獻e5文明觀》

 | | | 轉寄

第三章《台灣府城教會報》中ê現代醫療衛生書寫(四)

作者 陳慕真 2008.04.06

1931年，李約翰醫生（Dr.John.Llewellyn Little.）當任院長後，改善新樓醫院ê設備kap外觀，kā醫院南面改做一棟八床病室hō͘「肺癆」病人thang tuà，這是南部台灣設置肺痨特別治療ê鼻祖，亦有設置一棟十床小兒病室teh照顧「著猴」（lám身gín-á-kiáⁿ）ê囝仔。 另外，增設X光線、紫外線kap檢查室等近代設備。 自馬雅各醫生到台南創設台南醫館到李約翰醫生，總共七十年久ê歷史，一直到1935年，因為政治局勢ê影響，交hō͘南部大會經營為止。

值得注意ê是，長老教會ê醫療事工除了普通性質ê西式醫院之外，koh有針對特別病症「Thái-ko病」（痲瘋病�癩病）所設置ê醫院。早期台灣有真tsē 「Thái-ko病」ê患者，根據調查，tī 1929年所知影ê tō有四千ê患者， 加上「Thái-ko病」患者ê心理壓力kap整各社會眼光，致使真tsē隱藏性、m̄-káⁿ公開ê患者。1929年2月教會報nih，林燕臣所寫ê＜設Thái-ko病院＞tō描寫岀tsit khuán情形：台灣thai-ko患者真tsē，khah常tuà tī街內，若khah傷重，就tuà khah ún-ba̍t ê所在，m̄-ài見著人，雖然警官査著亦無huat-tō͘。醫生亦bē-ē kā伊táⁿ-tia̍p，kan-táⁿ bih tī內面，本身huân-ló peh-pak，iàm-tsiān失志，頭kia̍h bē起，beh死bē-tit khuì-tn̄g，ná久身軀ná hiú-nuāⁿ，街內ê人真驚，beh閃避m̄-kú無路，驚了去hō͘ in uè著；對án-ne兩pîng lóng艱苦。

1911年，戴仁壽醫生來到台灣tō注意著「Thái-ko病」患者ê需求kap治療，亦關心患者ê生活，所以積極推動「Thái-ko病救治會」kap「Thái-ko醫院」ê設置。戴醫生做北部馬偕醫院院長期間，ta̍k禮拜三kap拜六有特別針對癩病患者做治療，有百外ê患者來hō͘伊看。為著beh hō͘所有ê患者lóng得著照顧，所以積極進行募款，除了台灣南北部教會之外，亦tńg去英國募款，著手建醫院 。總是，tī設置醫院ê過程亦有tú著真大ê阻擋，1932年1月第562期ê教會報刊載＜Thái-ko病院受反對＞ê文章，詳細記錄戴醫生成立醫院ê艱難。當時有淡水人「許丙」 召集淡水街有力者十外人出頭反對，反對ê原因是相信地理師講，淡水本來會出gâu人，對面（指八里）若設thái-ko醫院，地靈會敗壞，所以出頭阻擋。許丙要求kä醫院地點變更轉移去pa̍k位，koh聯名庄民tǹg印，煽動八里庄民講：「tsit ê地方若建thái-ko院，後日所出ê產物，米，tshik，果子，西瓜，魚類，lóng無人káⁿ買。」戴醫生用合理、衛生，kap世界學者ê phue演說hō͘庄民聽，後來雖然許丙等人猶原反對，總是，亦有一部份庄民贊成醫院m̄-thang轉移去pa̍k位 。Beh設立thái-ko病院ê慈善事業tō án-ne經過種種ê困難tsiah完成。1934年，tī台北縣八里鄉ê「Ngâu-san-uân」（樂山園) 建設完成，是台灣史上頭一間由民間設立、專門收容「Thái-ko病」患者，近代化設備真完善ê癩病病院。另外，日本政府亦tī戴醫生ê建議下，設立官方ê痲瘋療養院「樂生院」 ；戴仁壽醫生因為對癩病患者ê貢獻hō͘人稱做「台灣痲瘋救濟之父」。

《台灣府城教會報》lāi-té對現代西式病院設置ê報導，包含南部打狗ê旗後病院、台南醫館kap後來ê新樓病院，中部大社醫館、蘭醫館kap後來ê彰化病院。Koh有1913年以後對北部馬偕病院ê報導，以及台灣第一間「痲瘋病院」（樂山園）。教會報一方面報導tsiah-ê醫院設立ê過程，亦將各醫院ê動態、需求，透過報紙ê傳播hō͘所有ê教會�教友來了解。當時設置醫館ê費用來源有本地患者ê收入，mā有來自英國、加拿大教會ê補助、募款。 總是，tng當醫院因為患者ê增加需要擴建，tú著困難ê時tsūn，亦會tī教會報中尋求各教會ê支援。親像tī 1912年5月，教會報刊載一篇＜siàu-liām醫館＞，tō是報導台南醫館ê馬醫生kap彰化醫館ê蘭醫生需要補助醫館費用ê消息，教會報tī報導ê中間亦鼓舞各教會補助、寄付，請會友替醫館祈禱。Koh過三個月ê教會報中，隨tō刊載台南、彰化醫館收著kuí nā間教會幫助醫館所費ê消息，報紙mā將tàu幫贊ê教會名稱kap金額刊出來。 uì tsia m̄-nā thang證明教會報ê鼓舞有一定ê效果，是扮演連絡台灣南、中、北部醫療事務ê重要媒介，mā證明透過「白話字」ē-tàng將病院設置kap醫生、患者ê情形等現代醫療訊息，用民間ê語言書寫落來，hō͘普羅大眾thang有機會接觸台灣醫療現代化ê基礎建設。

另外，uì教會報lāi-té白話字書寫ê現代醫療衛生內容，咱mā ē-sái看著早期台灣人患者面對西方醫療ê情形。《台南府城教會報》tī 1896年9月刊登ê＜台南醫館＞描寫當初時ê患者情形，「tsē tsē人ê症頭拖到真傷重，tī厝-nih請佛請本地醫生無-法-tit，tsiah姑不終來醫館táⁿ-tia̍p。」uì tsiah-ê描寫thang看出當時民間對現代西式醫療保持距離ê心態，不得已傷勢嚴重，本地漢醫無法度醫治ê時，tsiah踏入醫館。Tī接觸著西式醫療tsìn前，早期台灣人醫療ê方式是uá靠漢醫tsat脈，或者是採取民俗療法，求神明、道士ê幫贊，khah欠缺西洋式ê解剖學、生理學、外科方面ê知識kap技術。所以當時來醫館求醫ê病症khah tsē是屬於外科，尤其「ba̍k-tsiu痛」佔大多數， 「寒熱症」（瘧疾）tī當時亦真普遍。所以，tng當患者經過西式醫療ê手術、治療解決著身體上、精神上苦疼ê時tsūn，mā會對醫療傳教士所傳揚ê基督福音產生欣慕，間接促成醫療傳道ê效果。具體ê例是，患者入醫館得到治療以後tńg去宣傳道理ê情形，甚至因為án-ne來設立教會。親像1898年，溪洲ê陳陸kap蕭壟（佳里）ê黃水加先生，tī新樓醫院接受著馬雅各醫生ê診療以後，心存感激，後來tǹg去佳里創設北門郡ê第一間教會「蕭壟台灣基督長老教會」。 Koh親像「烏牛欄」siōng早ê信徒「潘開山武干」，因為phah獵受傷，送到府城接受馬雅各醫生ê治療以後，接觸著西方文化kap基督教義，促成烏牛欄教會ê成立。 Tsiah ê用白話字呈現tī教會報ê醫療史，m̄-nā見證著醫療傳教ê影響，mā見証早期台灣人uì傳統中醫走入現代西式醫療ê歷史。