《白話字文獻e5文明觀》

 | | | 轉寄

第三章 《台灣府城教會報中ê現代醫療衛生書寫》(十三)

作者 陳慕真 2008.07.27

小結 Uì十九世紀台灣人kap西方傳教士tsih接，行入醫館the̍h藥、就醫ê時tsūn，台灣tō進入西方文明ê近代醫學時期。頭先雖然是由基督教ê醫療傳教士所帶入來ê現代西式醫療，總是，tī歷史ê過程中，本地信徒ê參與kap加入亦扮演了真重要ê角色。 透過南部ê新樓醫院、北部ê馬偕醫院，kap中部ê彰化基督教醫院tsiah-ê近代醫院ê設置，h³醫療衛生ê硬體建設、物質文明釘根tī本土。另外，早期「見習生」制度ê建立，m̄-nā是台灣醫學教育ê先驅，亦是台灣初代西醫形成ê過程。Koh包括「看護婦」ê訓練kap「助產婦」ê培養等等醫學／護理教育ê傳授，以及透過教會報大量傳播ê衛生知識教育，lóng hō͘西方ê現代醫療衛生觀念，tāu-tāu-á成做台灣本土ê一部份。另外，tī台灣人接觸西方現代醫療以後，藉著《台灣府城教會報》ê台語白話字書寫，一方面將台灣人初初接觸現代醫療ê歷史過程記錄--落-來，一方面亦透過白話字將醫療智識在地化，hō͘ tsiah-ê近代醫療、衛生觀念轉換做台灣人ê思想，tī歷史ê過程中，成做台灣文化ê一部份。

透過《台灣府城教會報》lāi-tá現代醫療衛生書寫ê內容，咱m̄-nā ē-tàng知iáⁿ「白話字」呈現出來ê台灣早期醫療史，另外，tī書寫文字頂面mā thang看出針對無kâng主題所形成ê文字風格。教會報對「現代西式醫院ê設置」kap「醫學／護理教育」這兩個主題，khah屬tī歷史事實ê文字呈現。因為主要beh將醫館設置、醫療建設、醫學教育等消息報導出來，紹介hō͘讀者知iáⁿ，對文字ê考慮，是注重實用性ê紹介部分。所以khah無進一步ê描寫，亦khah無考慮文學手路ê表現。m̄-koh，tī「衛生知識ê傳播」tsit ê主題，考慮ê是讀者對衛生知識ê吸收，為著hō͘人khah好了解、khah緊接受觀念性ê知識，所以運用文學ê mê-kak，koh透過生活經驗、以及趣味性ê文字描寫來表達醫學觀念，這是吸引讀者tsiâⁿ好ê方法，mā是真重要ê步術。所以，咱tī「衛生知識ê傳播」tsit部分，ē-tàng看著khah tsë文學技巧ê展現，以及用活跳跳ê台語語詞來tsng-thāⁿ ta-sò ê醫學智識ê情形。因為beh傳播ê消息無kâng，致使文字ê考慮kap運用mā無kâng，所以教會報lāi-té，台語白話字書寫中ê現代醫療衛生形成兩種無kâng ê寫作風格。Ùi tsia mā顯示出，白話字具備吸收現代醫學、衛生智識ê文字功能，以及ē-tàng siōng tah近民間語言來書寫ê文字特色。

Tī二十一世紀初，台灣文學ê發展形成phong-phài、多元ê文學面貌，文學界kap出版界開始對文學作品進行類別分科，發展出真tsē tuè著新時代tsiah來產生ê文學類別，親像「醫療文學」、「疾病文學」、「科幻文學」lóng成做新興ê文類。 其中，「醫療文學」所重視ê是作家針對醫療行為所書寫，包括醫生kap病患ê討論，或者是文章內容kap醫學有關係ê文學作品。 總是，《台灣醫療文選》tī編輯取材上kan-nā選取漢字ê作品，suah完全忽略台語白話字ê作品，tī編法上無夠客觀、完整，mä無法度顯示出台灣醫療文學ê豐富kap多元。事實上，透過本章對教會報ê「衛生知識ê傳播」，koh有白話字廣告頁ê分析，ē-tàng知iáⁿ早tī十九世紀ê台語白話字書寫lāi-té，tō有真tsē兼備醫學性kap文學性ê作品，tsit寡作品透過文學ê手路來表現現代醫學ê知識kap衛生ê觀念，hō͘普羅民眾lóng thang吸收著現代醫學ê新知識，ē-tàng講是台灣人sio̍ng早期ê「醫療文學」。另外，tsiah-ê作品用台語白話字來書寫，m̄-nā tah近當初時台灣ê民間語言，亦是現在「母語文學」ê重要資產。