《白話字文獻e5文明觀》

 | | | 轉寄

第三章 《台灣府城教會報中ê現代醫療衛生書寫》(十二)

作者 陳慕真 2008.07.20

另外，＜論Thái-ko>、＜論Thái-ko ê傳染性＞兩篇文章lóng是teh講「Thái-ko病」。T„頭前咱已經有討論著早期台灣thái-ko病患者ê數量真tsē，亦因為心理壓力kap社會眼光，致使in自我封閉，病情更加嚴重ê情形。＜論Thái-ko＞ tsit篇文章開頭就形容thái-ko病ê病徵：

人tú-著這號病，身軀就一直nuā--去，ûn-ûn-á lak-腳lak-手，到身軀lóng害，人就死。Tsit-ê病亦bē醫--得，khah gâu ê醫生lóng無法-tit。

用活跳跳ê台語語詞，簡單兩句話tō kā得到thái-ko病ê情形，描寫kah真深入，hō͘人看著感覺「怵目驚心」。這篇文章雖然是講thái-ko病，總是，作者uì聖經道理ê觀點切入，將thai-ko病ê病症kap人ê罪惡做對照，koh結合聖經ê基督教教義，論述世間人ê罪kap上帝ê赦免；是一篇結合醫學kap宗教論述ê文章。

＜論Thái-ko ê傳染性＞tsit篇文章，作者uì西方醫學博士ê研究成果開始論述，將醫學博士研究出來ê「thái-ko病人其實無傳染性」ê醫學新知識，介紹tī文章ni̍h，koh舉醫院內醫生、護士時常kap病人做夥亦無傳染著thái-ko病ê例，希望教育大眾對thái-ko病「無傳染性」ê認識：
醫生kap看護婦nā久久，日繼日，tiám tī thái-ko病院伺候，in tsió-tsió對án-ne來染著thái-ko。畜生亦是m̄-bat染著thái-ko。小腸熱、梅毒、淋病、肺痨kap岀-phia̍h，lóng會khah gâu傳染；m̄-kú罕得tú-著人真驚kap花柳病ê人食飯á-是擋伊m̄-thang來醫院。

作者認為只要適當治療，thái-ko病就會漸漸消失，社會無應該過頭著驚。伊亦講岀大眾對thái-ko病ê態度：「自然應該著細膩tsiah tio̍h，總是m̄-bián無知識無仁愛來驚到ngia̍uh-ngia̍uh-tshuah。」講出當時社會因為對thái-ko病情欠缺jīn-bat，民眾亦無充足ê仁慈心，致使對thái-ko患者產生嚴重ê排斥kap驚-hiâⁿ ê情形。另外，作者用「ngia̍uh-ngia̍uh-tshuah」tsit ê詞來形容整個社會對thái-kó病ê反應，亦是真活潑ê語言特色。

Uì 教會報第305期到307期（1910年8-10月）連載ê＜寒熱論＞，是馬雅各醫生所寫ê報導。這三篇文章主要以醫學研究ê觀點探討「寒熱病」。起頭作者先引用世界各國ê例、醫學專家ê研究成果kap科學數據來說明「寒熱病是透過蚊仔咬--著tsiah引起ê」，所以蚊仔是傳染寒熱病ê主要媒介。Suà--落-來，koh說明感染著寒熱病ê時，血管內部ê情形：

人ê血有「hueh-tsu(血珠）」亦有「hueh-lûn（血輪）。血輪亦有兩款，就是白血輪kap紅血輪。若看tú-著寒熱ê人ê血，著用hián-bî-kiàⁿ來看，tsiah會看著紅血輪有-ê kap平常ê紅血輪tām-po̍h tsing-差，就是tī hit中間有一lia̍p一lia̍p îⁿ îⁿ，看了真gâu振動ê款，tsiah ê就是寒熱ê毒珠。

馬醫生用真淺白、簡單ê語詞來論說醫學知識，對血液ê組成、顯微鏡ē-kha所看著ê寒熱病細菌ê形狀，lóng有真清楚、詳細ê解說。後來koh講著「毒珠」tī人體內擴大、紅血輪ê「mo̍͘h（膜）」破去，毒珠進入血液，引發寒熱病ê過程。Tsit篇文章ē-sái講是一篇內容完整、醫學知識豐富，猶koh語言淺白、通俗ê醫學報導。另外，ùi文章中咱亦ē-sái知iáⁿ，當時台語已經有「血珠」（hueh-tsu）kap「血輪」（hueh-lûn)，亦tō是tsit-má華語所講ê「血小版」kap「血球」ê講法ah。而且tsit種透過外型來形容血ê組成ê醫學名詞，m̄-nā符合in實際ê形體，ē-tàng真科學來傳達血液組成ê知識，mā因為是真常民化ê比喻，所以hō͘人ē-thang真緊來理解。「血珠」、「血輪」kap「毒珠」tsiah-ê出現tī文章中ê台語醫學用詞，現在lóng已經無真普遍teh使用。Uì醫學台語ê角度來講，教會報lāi-té有關醫療衛生ê文章實在保留真tsē珍貴ê醫學語料。

另外，＜老鼠病＞一文uì「老鼠病」ê病情特徵、傳染管道kap預防方法來鋪陳，是一篇完整ê衛生教育性質ê文章。作者tī文章一開始tō切入主題：

Tsit號病是tsi̍t種幼幼ê物，（有人講「Sè-lân-蟲」，á-是講「毒」），入人ê身軀，tuà tī血來生thuàⁿ。Tsit號物ê身軀ni̍h有毒；tsit號毒，會hō͘人ê臟腑出血，kap身軀發熱來致到死。病人ê糞、尿、痰，以及伊所用ê物，lóng有毒。

因為tsit種病老鼠第一會傳染，其他親像蚊仔、胡繩、狗蟻亦有可能會傳染，透過咬人、帶毒hē tī人ê食物、或者是hē tī人身軀有破空ê所在，親像空嘴（khang-tshuì）來傳染。所以預防ê方法著ài注意各種生活層面：

第一要緊著lia̍h老鼠，若lia̍h著老鼠，伊ê身軀所有ê ka-tsáu m̄-thang hō͘伊走--去，著用火kā伊燒-去。（自然著代先kā伊拍死，然後thang用火燒）食物著sè-jī，hē tī鍋爐ê物 m̄-thang lām-sám食。食物的確著過煮，若過煮滾是khah妥當，因為驚了胡繩，狗蟻，sì-kè sô，hioh，會帶毒來ka-la̍uh tī hit-項物。

作者真詳細紹介預防老鼠病ê方法、步驟。其中，文章括弧內底ê補充「自然著代先kā ka-tsáu拍死，然後tsiah thang用火燒」，m̄-nā表達對讀者ê提醒，mā形成閱讀ê趣味感。另外，「sô」、「hioh」等動詞ê使用亦適當表達出昆蟲ê習性，以及描繪岀in tshuē空tshuē縫tī人ê身邊，隨時傳染病毒ê可能性。

koh親像＜蚊子毒ê病＞kap<治防痨傷病ê法＞兩篇，lóng是短篇ê病症介紹報導，文章內先介紹病症ê症頭kap傳染性，後來說明tsit款病ê防治方法，親像「mái hō͘蚊仔叮著」、「mái kap痨傷病ê人做夥khùn tī同一張眠床、掛同一張báng罩」，lông屬於簡單有力ê介紹性報導。

1918年9月ê＜胡繩會hō͘人死＞是一篇翻譯自中國上海衛生機構ê文章。Kuí篇文章ê中心是「胡繩」，論述胡繩án-tsuáⁿ對人類產生危害，引起siáⁿ-mi̍h款ê傳染病，ài án-tsuáⁿ預防。文章中對胡繩有真心適ê描寫：

胡繩日時á-是暝時lóng teh爬，不時teh食，設使若有tam6-po̍h物thang食，有一塊-á tiⁿ ê物 á-是有一點-á湯伊就隨時食。Tī gin-ná ê頭殼有爛 á-是pū-膿ê khang伊不時teh注意。gin-ná beh去khùn ê時á-是早起時khùn起來，伊不時teh tshuē機會thang來食。人teh beh食ê時，胡繩kuí家lóng無洗身軀來kap人食。Hit時咱若出手beh拍伊，胡繩代先看見就飛走，suà放tām-po̍h lâ-sâm ê物hō͘咱所buē會看見。總是咱無注意ê時，伊koh爬來食。實在照án-ne來看，伊ê ba̍k-tsiu真有路用。

作者「Tân Sù-ta̍t」tī tsia用「擬人法」ê文學手路來形容胡繩若親像人kâng款，會「看」、會「注意」、會「tshuē機會」，koh會「kuí家無洗身軀來kap人食」，造成真心適ê文學效果。雖然是一篇翻譯ê文章，總是，作者對台語ê使用真liú-liah，亦gâu掌握文學ê技巧，所以完全看bē出來翻譯ê痕跡。因為加添文學性kap趣味性ê關係，致使tsit篇傳播衛生知識ê論說性文章，m̄-是充滿死硬、ta-sò ê學術用語，顛倒hō͘讀者tī輕鬆ê文筆中來吸收著醫學、衛生知識，是真成功ê一篇文章。

綜合來講，tsiah-ê有關衛生知識 ê文章，通常lóng先介紹「病情特徵」，suà--落-來說明「傳染途徑」，最後以「預防方法」作為結論，達成衛生常識ê傳播kap預防教育ê效果。教會報t„刊載、報導文章ê過程中mä扮演著向教友／一般讀者傳達衛生知識ê重要角色。另外，值得注意ê是，tsiah-ê以病症、衛生、預防為論說主體ê文章雖然lóng屬tī醫學性ê現代知識範圍，m̄-koh uì內容當中亦ē-tàng發覺著作者／主筆ê文學手路，像講：透過活跳ê台語用詞、淺白、簡單koh有力ê敘述特色，以及使用「擬人化」ê文學技巧來書寫。藉著台語白話字ë-tàng淺白、直接書寫民間語言ê特色，作者kä文學性ê特質帶入來醫學、衛生知識ê傳播、教育，tshöa讀者進入科學性ê世界，hō͘信徒kap一般讀者ē-tàng真容易來吸收tsiah-ê具備文明特質ê現代醫療、衛生觀念。