《白話字文獻e5文明觀》

 | | | 轉寄

第五章《台灣府城教會報》中ê語文教育書寫(三)

作者 陳慕真 2008.09.14

小結 《台灣府城教會報》ê語文教育書寫ē-sái uì十九世紀白話字ê傳入背景講起，西方傳教士引進白話字，主要目的是beh透過白話字簡單好學ê文字特質來普及教育，hō͘信徒ē-hiáu家己讀聖經，接觸道理。根據蔣為文ê分析，白話字因為是屬於音素（phoneme)文字，具備語言學頂面「語音hām符號一對一對應」kap「線性排列」ê設計方式，所以真簡單學、記音koh準確。信徒只要ē-hiáu 23個字母kap 8個聲調，tō ē-tàng認字、看冊，學習效率確實比漢字加真kuân，所以不論男女老幼，或者是「晴暝人」，lóng thang透過學習白話字來認bat知識，達成「有教無類」ê目的。因為án-ne，教會全面來推行白話字，《台灣府城教會報》是真重要ê語文教育管道，另外，教會tī台灣南北所創設ê西式ê教育機構，m̄-nā phah開台灣現代化教育ê門窗，tī台灣行入現代文明ê過程中，扮演關鍵性ê先驅者角色。其中，白話字教育ê課程設計，以及以白話母語作為主要思考體系kap教學語言ê做法，更加是推sak本土化語言教育ê具體實踐。

因為教會對白話字ê全方位推行，tāu-tāu-á形成以白話字做為主要文字媒介ê文字社群。Tsiah ê以白話字成做文化kap知識養成ê白話字社群，透過ē-tàng完整表達台灣母語ê白話字，成做in書寫、閱讀kap思考ê文字系統，tng當台灣人hông剝削使用母語權利ê時，in進行ê是一項tshàng-bih tī歷史底層，透過使用白話字tī民間保存台灣民族母語ê本土語文活動，意義真大。另外一方面，tuè著白話字教育ê推行kap白話字社群ê形成，mā成做白話字文學發展ê基礎，tī台灣文學史上，扮演先創性ê意義。整體來講，白話字是普羅百姓接觸知識ê só-sî，mā是文字權kap書寫權ê落實，tī文字ê改革kap語文書寫ê層面來講，lóng有普及人權ê進步意涵。