《白話字文獻e5文明觀》

 | | | 轉寄

第五章《台灣府城教會報》中ê語文教育書寫(二)

作者 陳慕真 2008.09.07

第二節 白話字時代－白話字社群ê形成kap白話字文學ê展開 一、白話字社群ê形成

長老教會對白話字ê推行m̄-nā呈現tī教會報，mā全面實踐tī教會ê醫療事工、教育事工頂面。清國末期開始，教會開始tī台灣南北創設西式ê教育體制，uì教會小學到中學、女學、大學體制ê神學院，koh有針對盲人教育所設立ê「訓瞽堂」， ë-sái講ùi兒童教育、中等普通教育、傳道師養成教育，到特殊教育，已經建構一個完整ê教育體制。 有關清國時期長老教會所設立ê現代化學校列tī下底：

（1） 大學（今台南神學校）－1876年巴克禮牧師創設。 （2） 理學堂大書院（牛津學堂）－1882年馬偕博士tī淡水創設。 （3） 淡水「女學堂」－1884年馬偕博士創設，是台灣第一間女子學校。 （4） 中學（今長榮中學）－1885年余饒理創設。 （5） 女學（今長榮女中）－1887年朱約安kap文安姑娘創設。 （6） 訓瞽堂－1891年甘為霖博士專為盲人開辦ê學校。

以上教會所設立ê學校一方面有培養教會傳道人才ê作用，一方面mā tī清國時期ê台灣社會，扮演hō͘教育普及化ê重要角色。尤其是tī清國時期，台灣iáu是保守、重男輕女ê封建社會，教會設立「女學」，h女性有接受現代化教育ê機會，ē-sái講是tsiâⁿ大ê突破。甚至tī當時社會要求女性綁腳ê風氣下面，「女學」訂定入學ê條件tō是「m̄-thang有綁腳，若已經綁了ê tāi先tio̍h kā伊tháu」。 若就女權ê觀點來看，「女學」ê設立有真大ê意義，一方面hō͘女性ê知識kap心理得著開展，另外一方面，「m̄-thang綁腳」ê入學條件mā成做解放女性身體束縛ê重要標記，教會女學確實tō是「不纏足運動的先鋒」。 除了女性，教會對著當時社會邊緣、弱勢ê盲人，mā設立盲人學校「訓瞽堂」，以實際ê教育來達成盲人ê福利，更加是人權教育ê具體呈現。

值得注意ê是，tsiah ê西式教育體制m̄-nā是台灣現代教育ê先驅，mā是台灣本土語文－白話字教育ê重要搖籃。Tī光緒11年6月《台灣府城教會報》ê創刊號ni̍h，tō刊出設立「中學」ê消息，內容提起beh tī府城設立一間中學，hō͘人thang受ta̍k項ê教示，親像「聖冊ê道理、讀白話字、唐人字，寫字，地理，ta̍k國ê紀錄，算帳（sǹg-siàu），天文」。 可見中學tī提供hō͘學生完整、豐富ê一般教育ê時，白話字ê語文教育亦是其中重要ê課程設計。另外tī光緒12年1月（教會報第17張）mā刊載「開設女學」ê消息，內容提起所beh學習ê課程是「白話字，寫字，算帳，tsham ta̍k項ê女工，親像做衫，tshia̍h-bue̍h」。 Tī盲人學校「訓瞽堂」方面，創辦者甘為霖研究歐洲kap美洲地區盲人使用ê無kâng套點字法，認為羅馬拼音點字是盲人初學siōng簡單ê一種，大部分ê點字為著簡化，hō͘盲人thang khah簡單透過摸字來認bat知識，lóng是運用羅馬字字母來印成。 所以甘為霖引進西方盲人使用ê凸型字母，hō͘晴暝人用手摸凸字來認識白話字字母，ē-hiáu讀冊、點字了後tsiah讀聖經。透過白話字ê點字教育，m̄-nā引tshuā晴暝人行入閱讀ê知識世界，mā改善in ê生活。另外，最高學府ê「大學」－神學校，tī課程設計中mā有白話字ê語文課程。除了課程設計，整個ê教學思考體系kap書寫系統mā lóng是用白話字。鄭兒玉針對台南神學院ê教育提出下面ê觀點：

台南神學院不但是台灣神學教育ê起步，而且具備西歐概念之現代台灣高等教育ê雛型，亦是建設現代化新台灣文化ê開路先鋒。其課程體制ê基礎教學語言kap訓練學生學術思考ê語言，是照台灣人ê白話母語，就是用羅馬字表達ê台灣白話。換話來講，巴牧師beh培養台灣人ē-hiáu用家己ê母話思考kap書寫。

由此可見，十九世紀末期教會所建立ê西式教育學校，包括中學、女學、大學、盲人教育ê「訓瞽堂」，m̄-nā phah開台灣現代化教育ê門窗，tī台灣行入現代文明ê過程中，扮演關鍵性ê先驅者角色。另外，包含白話字教育ê近代教育課程設計，以及以白話母語作為主要思考體系kap教學語言ê做法，更加是本土化語言教育ê具體實踐。

包含《台灣府城教會報》ê白話字語文教育，以及教育體制ê白話字課程設計kap台灣母語ê教學語言，加上教會本身tī主日學、教會小學等所在實行ê白話字教育，tsit寡對白話字語文教育ê推動，m̄-nā豐富tsē tsē信徒、讀者ê信仰教育，mā hō͘真tsē原本無機會接受教育ê社會普羅百姓，透過白話字得著了解外國資訊、認bat知識ê機會。Tī歷史ê過程中，「白話字」mā成做長老教會真重要ê本土特徵。Uì十九世紀ê 1885年到二十世紀ê 1960年代，雖然經過日治時代kap戰後國民黨政府強勢ê國語政策，m̄-koh tsit段將近85冬 ê時間猶原是白話字tī教會hông普遍使用ê年代 。Tī tsit段台灣ê「白話字時代」lāi-té，以閱讀白話字、書寫白話字、透過白話字吸收外界資訊kap知識、藉著白話字聯絡感情等等使用白話字ê人，tāu-tāu-á形成以白話字成做主要文字媒介ê文字社群，亦tō是台灣ê白話字社群。

Tsiah ê tī台灣ê白話字時代以白話字成做文化kap知識養成ê白話字社群，tī殘酷ê語言政策下面，透過ē-tàng完整表達台灣母語ê白話字，成做in書寫、閱讀kap思考ê文字系統，tng當台灣人hông剝削使用母語權利ê時，in進行ê是一項tshàng-bih tī歷史底層，透過使用白話字tī民間保存台灣民族母語ê本土語文活動，意義真大。總是，目前白話字ê使用一方面tòe著國民黨國語教育ê強勢來消失，甚至t„教會內部mā kan-nā tshūn少數老一輩ê信徒iáu koh有teh使用。另外一方面，tuē著老一輩信徒ê凋零，mā hō͘白話字ê使用tī歷史漸漸消失。筆者透過田野調查ê訪談，希望ē-tàng khah具體了解台灣ê白話字社群，進一步走tshuē白話字社群ê時代kap記tî。

Tsit ê田野訪談ê受訪者大多數是長老教會第三、四代ê信徒，年歲uì 71歲到90歲lóng有，平均年歲是80歲。In lóng tī日治時代出世，經歷日治時代到戰後ê時代背景。雖然tsit ê訪談ê時間點超出本論文1885年到1942年ê研究範圍。M̄-koh，咱ē-sái uì tsit寡戰後ê白話字使用者所形成ê白話字社群，來知iáⁿ戰前亦有 kâng-khuán ê情形，mā thang看出白話字社群uì戰前到戰後ê延續性。另外，因為tsiah ê受訪者所經歷ê kap回憶ê亦是日治時代，或者koh khah早以前ê時代背景。Uì in ê回憶所呈現ê記錄，亦ē-sái成做1885到1942年間研究範圍ê外圍論證。針對訪談「白話字社群」ê紀錄，ē-sái歸納做下面三點：

（一）白話字ê學習背景kap經驗 目前80歲以上ē-hiáu白話字ê人，大部分lóng是細漢7、8歲以後進入「主日學」ê時開始接觸白話字ê教育。早期主日學ê白話字教材是一張紙，頂面印有子音、母音kap聲調，後來tsiah有白話字課本，課本mā增加呼音ê練習。囝仔一開始lóng先入字母班，讀熟以後ē-tàng進入聖詩班，最後是聖經班。三ê階段完成以後，tsiah算是完成白話字教育。除了主日學ê學習管道以外，mā有uì厝內親人hia學著白話字ê。厝內人tī教學過程中會用糖á鼓勵或者唸趣味ê口訣來增加學習效果。親像張先生回憶阿嬤teh教白話字ê時tiāⁿ tiāⁿ會唸：「一kái學乖、二kái學巧，三次iā bē-hiàu，一生去了了」，hō͘伊印象真深。
Tī學習速度頂面，通常認為uì細漢入主日學開始，一禮拜學一kái，差不多2冬ê時間tō lóng完全ē-hiáu。有ê雖然細漢受過白話字訓練，總是後來因為生活ê關係離開白話字ê學習環境，m̄-koh，tng當in後來有機會koh再重學ê時，lóng真緊tō ē-hiáu白話字。比如講楊女士一直到40歲tsiah因為khang-khuè ê關係 koh再接觸白話字，kan-nā 3 kang ê時間tō學ē-hiáu ah。另外，白話字ê簡單好學hām囝仔mā ē-tàng做老師，鍾女士講起伊ê阿公學白話字ê經驗真特別，原來阿公少年ê時bat有一kái hō͘叔伯兄弟kā伊phah，後來到台南新樓病院醫治，開始接受福音，因為無讀冊，無受過教育，所以uì白話字開始讀，當時tō是一個囝仔教伊讀ê。「囝仔tō ē-hiáu教白話字」ê故事uì阿公時代流傳落來，成做in後代子孫學白話字ê家族記tî。

（二）白話字ê使用情形 不管是tī主日學或者厝內學白話字，主要目的lóng是beh ē-hiáu讀聖經，認bat道理。總是除了宗教領域之外，白話字mā hông普遍運用tī各領域。Tī教會內，白話字成做主要ê通行文字，親像教會報、牧師ê講道稿、教會憲法、法規、教會各種正式會議ê會議記錄lóng用白話字來書寫。除了公領域ê文書紀錄以外，白話字mā運用tī私領域ê phue信書寫頂面。教會報lāi-té，tō刊載真tsē用白話字書寫ê phue信，比如講1917年3月＜甘為霖ê phue＞、1916年2月＜馬醫生ê phue＞、1919年2月＜文姑娘ê phue＞等等。用白話字寫phue ē-tàng講是白話字社群共同ê經驗，受訪者中ta̍k位lon2g bat用白話字寫phue hō͘親人kap朋友，主要是因為用白話字寫phue ē-tàng siōng親切來傳達口語ê感情，m̄-bián經過翻譯kap解釋tō ē-tàng kā心所想ê、tshuì所講ê自由書寫落來。想beh用家己ê母語寫phue，mā成做真tsē人開始學白話字ê動機。親像李女士tī讀長榮女中ê時代開始用白話字寫phue，為著beh kap媽媽通phue，所以利用暑假2個月ê時間專工教媽媽白話字，後來母子開始透過白話字來通phue。日治時代ê政治、文化運動家蔡培火mā是因為13、14歲ê時beh kā阿兄通phue tsiah開始接觸白話字，kan-nā 3 kang ê時間tō學ē-hiáu，以後tī日文kap漢文ê學習頂面，lóng得著白話字真大ê幫贊 ，甚至因為本身ê學習經驗，提倡台灣白話字運動，成做蔡培火一生重要ê社會實踐。

Tī白話字社群中，用白話字寫phue mā bat發生趣味ê tāi-tsì，張先生回憶戰爭時期，老pē離開台灣，後來用白話字寫phue寄tǹg去厝，日本警察因為看無koh特別來查問，等待伊用台語唸出內容以後tsiah離開。Koh親像柯先生tī做兵ê時接著厝內親人寄來ê白話字phue，班長lia̍h-tsún是英語phue，經過解說了tsiah知iáⁿ原來是白話字。白話字tī早期因為主要流傳tī教會內部，外界ê人khah無了解，所以時常產生kā白話字當做英語ê類似情形，m̄-koh mā因為án-ne，白話字成做一種「我族」內部ê識別象徵，kan-nā tī共同「文字脈落」下面ê人tsiah會互相了解對方ê意思。致使白話字ê書寫tī語言、文字所代表ê社會意識tíng-kuân，形成區別「我族」kap「他族」ê民族意義。十七世紀荷蘭人引進羅馬字，提供當時ê平埔族書寫本身語言ê文字系統，荷蘭人離開台灣以後150外冬，Siraya平埔族猶原繼續使用羅馬字來kap漢人定訂土地契約，產生新港文書。以羅馬字來書寫土地契約m̄-nā是平埔族相對漢人ê自我認同，新港文書mā成做in對抗漢人ê區別性象徵記號。 Tī白話字社群ê訪談中，mā有將白話字當作thang「秘密通phue」或者是書寫個人私密tāi-tsì ê文字工具ê情形。

除了寫phue以外，白話字mā用來書寫日記、寫家庭紀錄、速記上課筆記、用來編寫教會特別節目ê迷猜、劇本，mā用tī書寫履歷書、祝賀新婚詞、告別式紀念冊等等，ē-tàng講被充分運用tī每一個階段，使用範圍真闊。值得提起ê是，白話字mā成做書寫、創作ê利便工具。親像劉女士因為家境ê關係，一生m̄-bat受過漢字教育。總是，接觸白話字以後，伊開始將家己人生ê經歷，包含家庭背景、親子關係，婚姻生活等等生命歷程，用唯一熟sāi ê白話字書寫落來。透過女性ê觀點kap生活化ê台語，真精采呈現出所生長ê年代kap時代氣氛，hō͘呂興昌教授kā評論做台灣ê「素人作家」。M̄-nā án-ne，伊ê作品mā ē-tàng講是用台灣母語創作ê「女性生命家族史」，不論就女性文學á是台語文學ê角度來看，lóng有真大ê意義。Uì tsia mā thang說明白話字ê利便性kap好學ê特質。對無法度接受體制內漢文教育ê女性、弱勢民眾來講，白話字成做in發揮思想、靈感ê唯一媒介，白話字書寫亦因為án-ne成做民間心聲ê重要呈現。

（三）對白話字ê看法 早期教會內bat流傳「bat字bat道理」這句話，意思是「若bat白話字tō bat聖經道理、做人道理kap bat知識」。另外，早期tī社會上mā流傳「基督徒有三樣好處：不纏足、不迷信、而且都讀過書、認識字（白話字）」ê講法，顯示出教會kap白話字ê密切關係，mā表達學白話字對各種知識ê進步真有幫助。真tsë受訪者mā確實透過白話字來得著進入知識世界ê só-sp5，親像柯先生tō認為學白話字對伊siōng大ê影響就是thang透過「甘字典」來認bat漢字，伊ê pē母原本是漢字ê文盲，總是因為ē-hiáu讀白話字，所以ē-tàng學習漢字。Koh像鍾女士認為因為ē-hiáu白話字，所以讀英語加真好讀，加khah緊。由此可見白話字mā是學習第二語言ê重要工具。綜合來講，受訪者對白話字ê看法有下面kuí點：（1）白話字ē-tàng幫助文盲，無接受漢字教育ê，mā ē-tàng bat字。（2）白話字對學英語真有幫贊。（3）白話字ē-tàng寫咱台灣話，ē-hiáu講tō ē-hiáu寫，真方便。（4）白話字會hō͘教會形成和諧ê氣氛，因為大家讀聖經、聖詩ê時lóng讀kâng音。（5）白話字ē-tàng保存台灣文化。（6）白話字不但台語ē-sái用，客語、排灣語mā ē-sái用，台灣現在無家己ê官方語言，beh成做一個新koh獨立ë國家，母語真要緊，有母語tsiah有家己ê文化。Uì頂面ê歸納ē-sái知iáⁿ，白話字ê實用性kap ē-tàng保留台灣文化ê功能是受訪者對白話字主要ê看法。

以教會ê白話字語文教育所形成ê白話字社群，是相對華語漢字、日語使用者ê語文社群。雖然經過清國、日本、國民黨政府等無kâng政權，in lóng用台灣人ê語言kap文字tiām tiām tī民間社會存活。白話字使用者用白話字讀聖經、吟聖詩，看教會報，用白話字學習漢文kap外國語文，用白話字kap世界知識tsih接，koh透過白話字來掌握文字權kap書寫權，使用tī個人ê書寫kap各項事務ê紀錄。以白話字為主所形成ê白話字社群，teh進行ê語文活動m̄-nā發生tī早期ê教會內部，現在mā猶原koh繼續tī台灣民間社會發展，成做白話字時代ê歷史見證。

二、白話字文學ê展開 世界文學ê產生大部分lóng受著聖經ê影響，台灣mā無例外。1916年巴克禮出版白話字聖經，台語白話字聖經ê出版mā直接影響著台語文ê使用，以及台語白話文學、台灣文學ê書寫。另外一方面，tuè著白話字語文教學ê推行，以及白話字社群ê形成，mä漸漸建立白話字文學發展ê基礎。1920年代，正式出版ê賴仁聲小說集《阿娘ê目屎》（1925年）kap鄭溪泮小說集《出死線》（1926年），兩本小說ê產生lóng是白話字文學行向成熟ê具體表現。

總是，tī 1920年代白話字小說出世tsìn前，教會報tō已經刊載真tsē短篇ê文學作品，tsiah ê作品ē-tàng講是台灣siōng早期ê白話文學。另外，in mā t„白話字文學發展成做成熟ê過程中，扮演重要ê基礎角色。教會報ê白話字文學作品uì 1885年到1942年中間主要ē-tàng分做六類：

（一）小說 教會報早期ê小說作品主要以短篇小說為主，篇幅khah短，情節mā khah簡單。總是，tsiah ê出現tī十九世紀ê白話字短篇小說suah tī台灣白話文學史上扮演phah頭陣ê重要角色。其中，tī 1886年1月所刊載ê＜日本ê怪事＞是教會報siōn早ê一篇小說，內容描寫tī日本ê庄腳，有一個旅館ê店主tú著一個假做老狐狸ê人客，hō͘人客利用驚妖怪kap痟貪ê心理騙錢ê故事。Tī台灣文學史上，過去通常認為「追風」tī 1922年發表ê＜她要往何處去＞是第一篇小說，m̄-koh蔣為文就台語白話字文學ê角度來看，指出＜日本ê怪事＞m̄-nā比「追風」ê＜她要往何處去＞khah早，甚至mā比「賴和」1926年ê第一篇小說＜鬥熱鬧＞早40冬」。 由此可見，若將台語白話字文學khǹg入台灣文學史再思考，會突破過去學術界忽略白話字文獻ê侷限，開展新ê文學史詮釋。除了短篇小說以外，教會報tī日治時代末期mā開始刊載長篇小說。1939年8月ê＜用ka-tsiah ǹg上帝＞是第一篇tī教會報刊載ê小說，這篇小說連載五期以後，教會報koh tī 1940年繼續刊載＜只有一條路＞、＜伊是我ê丈夫＞、＜兩款ê疼＞，以及＜兩極端ê教育(1)＞、＜兩極端ê教育(2)＞等五篇連載小說。以上tsit寡作品ê作者lóng是賴仁聲，伊是白話字文學作品量siōng豐富ê作家。教會報刊載ê小說看起來雖然lóng是獨立ê篇章，m̄-koh作者tī 1940年4月ê＜只有一條路＞中說明講，小說作品ê總題目是「疼ê勝利」，lāi-té包含：（1）＜用ka-tsiah ǹg上帝＞，（2）＜只有一條路＞，（3）＜黎明＞，（4）＜各各他ê路＞。所以，1939 ê＜用ka-tsiah ǹg上帝＞只是＜疼ê勝利＞tsit篇小說ê「頭序」niâ，uì tsia ē-sái知iáⁿ作者ti71920年代ê白話字小說集出版之後，koh teh繼續進行寫一篇長篇ê宗教小說。賴仁聲出版ê小說集包括：《阿娘ê目屎》（1925）、《刺仔內ê百合花》（1954年）《可愛ê仇人》《1960年》。

（二）散文kap報導文學 散文體ē-tàng講是教會報lāi-té數量siōng kài tsē ê文類。另外，真tsë人lóng認為台灣一直到二0世紀ê九0年代tsiah 正式有「報導文學」ê產生，其實早tī十九世紀ê八0年代，《台灣府城教會報》tō已經有真精采ê報導文學ah。Tsiah ê文章m̄-nā描寫出當時社會或者國外ê重要時事報導，mā有文學手路ê藝術性表現。親像1886年2月＜北港媽ê新聞＞，是描寫清末嘉義城北ê人迎北港媽祖，suah kā媽祖siak落來ê tāi-tsì，引起北港kap嘉義信徒衝突ê社會新聞。另外，1887年4月＜迎佛冤家＞mā是描寫發生tī府城，信徒因為迎媽祖「搶頭香」sio-phah ê社會消息。除了漢人ê社會報導以外，mā有原住民ê新聞，1911年9月ê＜生番內地觀光＞一文，描寫日本總督府招待原住民ê頭目去日本參觀軍方武器、工廠、兵隊kap珍貴文物ê新聞，作者除了具體報導原住民參觀ê情形，mā表達出對tsit ê現象感覺感慨kap同情ê心理。Tī國外新聞方面，親像1912年6月ê＜攻破大船＞描寫世界重大ê船難事件「Titanic」（鐵達尼號）ê消息。Tsiah ê散文m̄-nā是台灣文學ê重要資料，文章所報導ê早期台灣社會新聞kap民間宗教情形，mā是研究台灣社會史ê重要文獻。

（三）詩歌 教會報中有真tsē詩歌體ê文學作品，親像1915年9月ê＜浪蕩子歌＞、1917年2月ê＜食薰歌＞、1930年2月ê＜願主無放sak>、1933年6月ê＜學字歌＞、1935年5月ê＜震災悲傷歌＞等等。Tsiah ê作品大部分lóng用民間文學流傳ê七字仔歌謠ê形式來創作，主題方面真多元，除了有宗教信仰ê歌誦、基督教義ê傳達以外，mä有針對社會時事來抒發，或者是勸善ê主題呈現，親像＜食薰歌＞，kuì首詩總共分做十二段，主要teh勸人mài食薰，下面舉其中二段：
Khó͘-khǹg tông-pau tsìng tāi-ke, 苦勸同胞眾大家， Bo̍t-tit tsia̍h hun hāi sin-thé； 莫得食薰害身體； Ǹg-bāng sing-khu ióng kiāⁿ-kiāⁿ， 向望身體勇健健， Tsù-jiân tsē-tsē tsia̍h tn̂g-miā 自然tsē-tsē食長命。

Hun ū to̍k-sò͘ ku2i-nā tsíng: 薰有毒素kuí-nā種， Tē-it tsiū sī Nî-kó͘-ting. 第一就是尼古丁； Nî-kó͘-ting to̍k tsin lī-hāi, 尼古丁毒真利害， Sa°-tih lo̍h âu sí tsiū lâi. 三滴落喉死就來。

Uì「七字仔歌謠」ê書寫形式kap「勸善」ê內容主題來看，表現出白話字文學受著傳統民間文學ê影響。Mā顯示出西式ê基督宗教進入台灣，tī文學形式頂面融合台灣社會背景ê情形，以及土著化ê過程。

（四）戲齣 林茂生tī 1924年11月到1925年2月，發表＜戲齣：路德改教＞，tsit ê戲齣tī教會報連載四期，屬於短篇戲劇ê形式，後來koh tī 1925年由「新樓冊房」出版，冊名是《路德改教：歷史戲》。內容是以路德馬丁（Martin Luther,1483-1546）進行宗教改革ê故事做為題材，是文學史上真難得ê劇本文類。另外，教會報tī 1930年12月刊載ê＜對話戲＞kap1938年12月ê＜クリスマス放送（聖劇）＞、1940年12月ê＜クリスマス劇「伊是罪人ê救主」＞三篇戲本lóng是聖誕節ê時beh tī教會演出ê戲齣。＜對話戲＞是針對主日學ê學生所寫ê，所以對話加khah簡短。另外兩篇「クリスマス劇」內容主要以耶穌誕生ê故事，以及基督宣教ê傳達做主題。

（五）翻譯文學kap寓言故事 翻譯文學ē-tàng講是教會報真有特色ê文類。內容包含著世界名著、伊索寓言、童話故事，koh有歐洲國家ê文學作品等等。傳教士將tsiah ê作品uì英語翻譯做台語白話字，mā hō͘台灣人tī十九世紀tō接觸著世界文學。Tsit寡翻譯文學t„教會報刊載ê時，有時會配合解說文學作品ê圖片，所附ê插圖有時亦有歐洲童話故事ê氣味，透過台語teh閱讀ê過程，hō͘人會產生「異國情調」ê氣氛，這kiam-tshái mā是台灣人tī文學作品中體會著異國情調siōng早ê經驗。世界文學名著ê翻譯親像＜天路歷程＞的連載，koh親像1896年11月ê＜大石亦著石á kīng>是伊索寓言中「獅子kap老鼠」ê故事，1896年12月ê＜貪字貧字殼＞是「貪心的狗」ê故事，1915年9月ê＜塗炭仔＞是格林童話中「灰姑娘」ê故事，另外包括＜知防甜言蜜語＞等文章lóng是uì西方ê寓言故事翻譯過來ê作品。

（六）學術論述 除了純文學ê作品以外，教會報mā刊載用白話字書寫ê學術論述，親像日本時代台灣ê知識菁英林茂生tī 1932年6月到1933年10月連載十四期ê＜基督教文明史觀＞tō是一篇論述性tsiâⁿ強ê長篇文章。林茂生tī＜基督教文明史觀＞一文中，uì兩方面來論述基督教文明ê特質，第一是基督教ê精神方面有五大要素siōng重要，分別是：（1）上帝ê觀念，（2）罪惡ê觀念，（3）自我否定ê觀念，（4）積極ê道德觀念，（5）人類愛ê觀念。第二是基督教精神所發展出來ê文明產物，包括來世主義、向異邦傳福音、基督教文化ê普及性等等。 可惜tsit篇具備歷史專業ê學術論著，林茂生並無完成。另外，顏振聲醫生所寫ê＜南部教會醫療傳道史＞uì 1940年6月到1941年8月連載tī教會報，內容詳細紀錄uī 1865年馬雅各醫生來台醫療傳道開始，台灣南部西醫ê事跡kap醫館ê設立情形。是一篇兼備歷史kap醫學專業ê學術論著，mā是「台灣第一部有系統記述西醫ê醫學史」。 除了頂面兩ê長篇文章以外，koh有無刊載tī教會報lāi-té，m̄-koh mā是白話字ê重要學術論著作品，親像蔡培火ti71925年出版ê《十項管見》，m̄-nā是台灣文學史上第一本散文集，mā是白話字ê社會文化評論集。另外，戴仁壽醫生tī 1917年出版ê《內外科看護學》，kui本lóng用白話字來書寫內外科護理ê專業知識，是訓練護理人員ê教科書，mā是台灣重要ê醫療文獻。

以上六種文類是教會報（1885-1942）ê白話字文學作品內容，tsiah ê作品m̄-nā是白話字語文教育ê文學教材，mā證明白話字m̄-nā ē-sái書寫純文學作品，亦ē-sái書寫學術專業論著。另外，白話字文學 ê出現tī台灣文學史上mā充滿意義。呂興昌教授tī 1995年bat對台灣新文學ê起源提出重新解說ê觀點：「Tī新文學運動tsìn前ê 30 kuí冬，教會內流傳ê刊物tō已經登載真tsē優秀ê作品，台灣新文學ê萌芽期ài提早30 kuí冬，伊可能m̄是出現tī二十世紀ê二0年代，應該是發生tī十九世紀ê八0年代」。 Uì tsia mā thang看出白話字文學tī台灣文學史上ê先創性。

Tsiah ê以民族ê母語來創作ê白話字文學，m̄-nā有填補1920年代台灣新文學運動tsìn前空白期ê意義，hō͘台灣文學史向前延伸，而且更加多元、豐富。另外一方面，教會報中ê語文書寫mā提早實踐著1930年代台灣話文運動時期所提出ê「tshuì舌kap筆尖合一」ê觀點。Tī書寫內容方面，白話字文學雖然起源uì教會系統，本質上有宣傳基督教信仰ê目的。M̄-koh tī「宗教」小說／作品以外猶原相當有台灣在地特色，tsit寡文本精采描寫出當時台灣ê人物、思想、光景，以及社會背景，tō若親像時代的見證。