《白話字文獻e5文明觀》

 | | | 轉寄

第三章《台灣府城教會報》中ê現代醫療衛生書寫(一)

作者 陳慕真 2007.08.12

第三章《台灣府城教會報》中ê現代醫療衛生書寫
Tī日本殖民統治，引進公共衛生觀念、正式醫學教育tsìn前，現代ê西式醫療tō已經透過醫療宣教士傳入台灣ah。台灣基督長老教會ê宣教活動kap醫療事工有真密切ê關係。十九世紀開始，tuè著醫療宣教士所傳入ê醫療、衛生知識，tō是台灣現代醫學ê開始。長老教會ê醫療活動包括著對現代醫療技術ê引進，對西式醫院ê建設，對衛生知識ê傳播，koh有對醫學、護理教育e重視；tī台灣醫療史上lóng有真重要ê貢獻kap意義。值得注意ê是，tsiah-ê對現代醫療建設、醫學教育kap衛生知識ê觀念mā透過台語白話字來傳播，記錄tī《台灣府城教會報》lāi-té。事實上，tsiah ê用白話字所書寫tī教會報ê醫療報導，tō是一phō͘台灣早期ê醫療史。總是，除了醫療歷史ê呈現以外，白話字án-tsuáⁿ來書寫醫療衛生mā是一個ē-sái hō͘咱khe-khó tsit-ê問題。換一句話講，《台灣府城教會報》對「現代醫療衛生」ê報導m̄-nā成做咱了解台灣醫療史ê第一手資料，mā ē-sái進一步探討「白話字」án-tsuáⁿ來書寫現代醫療衛生。

目前針對早期由西方宣教士所引進ê現代醫療、衛生工作，大部分ê論述是khiā tī教會史ê醫療傳道、或者是醫療史ê觀點為主要切入點。總是，khah tsió運用台語白話字所書寫ê《台灣府城教會報》來作為論述主體。本章以《台灣府城教會報》為主要分析對象，tī早期醫療史ê歷史脈絡下面，來探討白話字所書寫ê「現代醫療衛生」相關報導，以及tsiah ê白話字書寫lāi-té,所呈現、吸收ê文明觀。另外，mā探討台語白話字án-tsuáⁿ來表現現代醫療、衛生觀念，以及用台語白話字來表現ê時tsūn,所呈現ê書寫特色。透過內容ê分析，除了ē-sài知iáⁿ台語白話字所書寫ê醫療歷史以外，mā進一步論證白話字成做傳播、吸收現代醫療智識、衛生觀點 ê文字功能kap歷史意義。白話字書寫所表現出來ê文明特質，除去教會史以外，tī台灣醫療史kap思想史上，亦有伊值得重視ê歷史地位。另外，教會報所傳達ê醫療、衛生觀念ê文章，雖然lóng屬tī醫學性ê現代知識範圍，m̄-koh uì內容當中亦ē-tàng發覺著作者�主筆ê文學手路，tsiah ê具備醫學性kap文學性ê文章，ē-sái講是台灣siōng早期ê「醫療文學」。下面根據教會報lāi-té有關醫療衛生書寫ê相關內容，分作「現代西式醫院ê設置」、「醫學�護理教育」kap「衛生知識ê傳播」這三個小節來進行論述。

第一節 現代西式醫院ê設置 Tī宣教活動ê過程中，「醫療傳道」是真重要ê部分，因為透過現代醫療ē-sài排除本地人對宣教士kap基督教ê排斥、反感，koh因為現代醫療ē-sài khah有效來解決民眾身軀ê艱苦病痛，得著大眾ê感謝kap思念。所以，現代醫療ê進行對傳教ê khang-khuè時常產生間接或者是直接ê幫助。 Tī十九世紀，來自英國kap加拿大ê宣教士分別tī台灣ê南、北透過「醫療傳道」來進行傳教ê事工，雖然目的是beh宣揚基督信仰，m̄-koh，tuè著tsiah ê宣教士所帶來ê現代醫療技術、醫療建設、醫學觀念，mā對台灣ê現代化產生tsiâⁿ大ê貢獻。

台灣基督長老教會ê醫療傳道時期（1865-1895）tī台灣醫療現代化ê過程中ē-sái講扮演了啟蒙性ê角色。 頭先對台灣產生影響ê,就是現代西式病院ê設置。1865年，英國基督長老教會ê醫療宣教士馬雅各（Dr. James Laidlaw Maxwell) 來到台灣，伊是第一位來台灣ê醫療傳道者，mā是西式醫療技術ê引進者，代先hē落台灣基督長老教會tī南部醫療傳道ê基石。馬雅各醫生tī台南西門外「看西街」（khuàⁿ-sai-ke)租一間厝，頭前做傳道ê拜堂，後壁做診療所，開始醫病kap傳道。來接受醫治ê人真tsē,馬醫生ta̍k-kang lóng看五十外名患者。這是台灣人第一kái接觸著現代醫學，發覺著kap傳統中醫完全無kâng ê所在。 總是，無luā久，當地傳出毀謗kap謠言，講馬醫生取人心肝、挖人ba̍k-tsiu、因為人心驚hiâⁿ，百姓猶koh阻擋民眾接受醫治；馬雅各醫生不得已只好遷suá到鳳山縣打狗ê旗後街 。1866年，馬雅各tī hia買厝做禮拜堂，亦開設一間thang收容八位患者ê醫館，這tō是「旗後醫館」，mā是台灣第一個西式病院 。後來，旗後病院人數lú來lú增加，ta̍k日有三、四十人來討藥，另外亦有五、六十ê病人tiàm tī 醫館內，因為人數siûⁿ過tsē,所以ta̍k禮拜用三日做醫期，每禮拜一、三、五，hit三日外面ê患者thang來hō͘醫生看suà發藥 ，借án-ne來減輕醫生ê負擔。馬雅各tī旗後tuà三年外，認為有七萬ê居民ê府城tsiah是傳道真tsiàⁿ ê目標，因為「台南府城是台灣南部第一鬧熱ê所在，ài hō͘通台灣ê人lóng得著道理，的確著ài tī府城設醫館」， 所以tī 1868年將旗後醫館交hō͘李庥（Rev.Hugh Rittsie) 牧師，tō koh tńg去府城。

後來宣道會無koh派宣教士來管理旗後ê醫療事工，kan-nā由打狗商行出經費，請醫生來辦理，頭一任ê萬巴德醫生（Dr.Patrick Manson)是馬醫生推薦--ê,萬醫生tī旗後無luā久，tō換去廈門。值得注意ê是，萬巴德醫生tī台灣研究「痲瘋病」（癩病）、「象牙病」、「Malaria」等等熱帶病症，後來hō͘人叫做「熱帶醫學之父」。 萬醫生去廈門了後，換伊ê小弟萬大衛（Dr.David Manson)醫生來接任，萬醫生後來去福州，不幸意外過身。為著紀念萬大衛醫生ê德行kap對台灣醫學ê貢獻，後來ê繼任者有設立一間「萬大衛紀念醫院」（David Manson Memorial Hospital），中文名稱號做「慕德醫院」，這間台灣早期ê病院已經有開設醫學課程，ē-tàng講是台灣西式醫學ê開端。打狗（高雄）m̄-nā是台灣西洋醫學ê開基點，mā成做世界熱帶醫學ê發源地。