《趁iau2日時》

 | | | 轉寄

為生命歡唱

作者 林俊育 2008.06.29

生命是何等ê偉大，值得大家來歡唱！生命是來自創造宇宙ê獨一真神，值得大家來尊重！

人道主義ê史懷哲博士提出「敬畏生命」，並以一生ê奉獻來實踐tsit種高超ê人格，mā成做後來跟隨者ê準則。台灣第一個奉行「敬畏生命」ê，應該算是有「台灣史懷哲」之美譽ê陳五福醫師，伊一生奉獻hō͘視障朋友ê「慕光精神」，mā就是「敬畏生命，服務視障」。

最近常看「尊重生命，關懷交通」kap「尊重生命，向毒品講不」等標語，但我感覺siōng具體而有意義ê是，今年十一月十一kap十二日，由高雄市中正教會聯合中華民國殘障人協會kap台灣基督長老教會殘障關懷中心舉辦ê「為生命歡唱音樂晚會」，因有「雙連教會西羅亞盲人合唱團」、「手語詩班」kap bat是心靈殘障而蒙耶穌基督救贖ê蔣忠先生等活活ê見證，加上青年歸主協會廖明發強而有力ê信息，應呼召而決志信主ê有一百guā人，盛況空前。但策畫全程ê陳儀裕牧師tī主日崇拜中講：「遺憾ê是，咱準備ê陪談員無夠，希望各位會友ē-tàng向主講：『我tī tsia，請差遣我。』」

西羅亞合唱團tī中正教會ê主日崇拜中詩歌見證，in雖然肉體目睭看bē-tio̍h，卻tuì心靈ê深處唱出生命ê謳歌，闡明「西羅亞=奉差遣」ê意義，並震撼渴求生命喜樂ê與會會友。Hō͘我siōng感動ê是，tuì週報看tio̍h頂禮拜ê教會主日崇拜奉獻金額是 6,118 元，hit工為西羅亞合唱團事工ê奉獻高達 35,000 元。

一個殘而不廢koh「奉差遣」四界用詩歌見證神ê愛kap大能力ê合唱團，團員心中充滿tio̍h神ê大愛，m̄免看譜kap詞（其實肉眼看bē-tio̍h，但腦中背有一百首以上ê歌曲），完完全全將心中ê感情唱出，mā就是真正為生命歡唱，ná親像一股tuì山谷流出ê清水，hō͘乾渴已久ê心靈重新得tio̍h滋潤，koh再真正「看得tio̍h」耶穌基督ê「生命、真理kap道路」。「為生命歡唱」是何等ê喜樂！何等ê偉大！