《趁iau2日時》

 | | | 轉寄

真誠ê懺悔

作者 林俊育 2008.07.06

哲人講：「蠟燭無心不燃，燃燒雖然落目屎，卻照亮烏暗ê世界。」

西羅亞盲人合唱團是一陣有「心」ê視障朋友，tī有「心」社會人士ê關懷kap鼓勵下，體會tio̍h神ê愛tī燃燒in ê生命，不辭夜間按摩工作ê辛苦，花費比明眼人koh-khah tsē ê時間勤練歌唱，到教會、監獄、戒毒所kap學校，以美妙動人ê歌聲kap見證，來撫慰受創傷而殘障ê心靈，並照亮烏暗ê世界。

輔導tsit-ê合唱團七年guā來，tsiah-ê點to̍h ê蠟燭mā常照亮我個人陰時偶陣雨ê心靈，tuì in對社會大眾愛ê關懷，我koh-khah體會tio̍h神ê真理kap愛ê力量，hō͘不可能ê lóng變成可能。Tsit群視障朋友ê歌聲kap見證，hō͘一個死刑犯懺悔而得tio̍h重生，終其尾假釋出獄，重新作人。Tse是何等ê力量？！我願kap讀者分享tsit-ê感動人ê故事。

一九九一年一個秋高氣爽ê午後，西羅亞合唱團tī台南監獄，以優美ê歌聲kap動人ê個人見證，來撫慰受刑人創傷ê心靈。大約過了一個guā月，我tī一個報紙ê副刊上，看tio̍h一篇屬名台南監獄受刑人李士依先生ê「重生、燒熱目屎、恩典」文章，其中一段寫講：「會記得有次是西羅亞盲人合唱團ê演唱，見in手牽著手，和悅地行向舞台。Hit種殘而不廢ê堅定意念，到taⁿ感佩猶深；尤其是in透過歌聲，m̄-nā細訴坎坷歲月，kah-ná mā唱出我內心苦楚ê滄桑，當場禁bē-tiâu燒熱ê目屎涔涔流落。真正ê歌聲一如真理ê福音，到taⁿ iáu tī我心深處繚繞。」

我真自然tik湧起kap李先生認bat ê念頭，隨時寫一封信，並將手中所有西羅亞ê簡介、通訊、我寫ê有關西羅亞文章和合唱團ê錄音帶，用掛號包裹寄到台南監獄hō͘李先生，希望以西羅亞合唱團愛ê關懷，ē-tàng hō͘一個受刑人tī神ê面前真正懺悔，koh再活出有意義ê人生。

包裹寄出後，就tńg來到波士頓。但無久了後，我ê台北公司傳真李先生ê回phue hō͘我。清秀ê毛筆字kap詞意通順ê信，hō͘我印象深刻，那完全懺悔而決定向善ê堅定意志，koh-khah hō͘我感覺西羅亞合唱團歌聲中愛ê關懷，力量之總是ē-tàng以用排山倒海來形容。政府花tsiah-ni̍h-tsē錢蓋hiah-ni̍h tsē監獄，講是beh管訓犯罪ê人，其效果卻無如殘而不廢ê西羅亞盲人合唱團，愛ê力量之大，真是不可思議ê事。

李先生信中講伊十五年前嗜賭如命，賭輸了就借酒麻醉家己，過tio̍h行屍行肉般ê生活。就是tī醉茫茫ê時tsūn，伊殺死來ài賭債ê人而被判死刑，有次全國大赦改為無期徒刑，koh一pái大赦改為三十年有期徒刑。茫茫無期ê牢獄生活，伊mā認命he是罪有應得，唯一buē-sái釋懷ê是愧對太太kap二個無辜ê gín-á，一男一女mā lóng讀國中了，lóng由太太含辛茹苦地撫育，每想tio̍h家己悔無當初，就心痛如絞，mā只有多寫phe hō͘兒女，來補償對兒女ê愧疚。

李先生iáu kā我講伊太太kap兒女tī台北ê電話，ài我有空去關懷in。我人常tī美國，只好將tsit件事交hō͘教會ê陳牧師，tī陳牧師ê探訪kap關懷了後，李太太mā有tang時á來教會。我mā利用回台ê機會kap伊tī教會見面交談，遺憾ê是伊受害太深而一直請求李先生同意離婚，thang hō͘伊ē-tàng tuì新tī社會上khiā起來，但李先生卻絕無回答應。我kap李先生通過二十幾封信，知影伊tī西羅亞合唱團ê感動了後已深深懺悔而決志重生，但我怎樣解釋，李太太lóng講伊絕對m̄相信。李先生mā tī深覺家己虧欠太太而曉明大義了後，終其尾簽下離婚同意冊hō͘伊太太。

獲知李先生假釋出獄，我為伊歡喜之外，koh-khah期待西羅亞合唱團ē-tàng繼續以點to̍h ê蠟燭，照亮hiah-ê苦楚而烏暗ê心靈，phah開心內ê門窗，接納神ê愛kap真理，活出有意義而喜樂ê人生。Koh-khah希望有「心」ê社會人士，kap有「心」而點to̍h蠟燭ê西羅亞合唱團同齊燃燒，那燃燒ê落目屎必mā有喜樂，koh-khah會帶來光明而和諧ê世界。
1995.8.13