《趁iau2日時》

 | | | 轉寄

視障音樂基金會成立酒會致詞

作者 林俊育 2008.07.27

各位貴賓：

事(tāi)先我謹代表視障音樂基金會，多謝各位百忙中撥空來參加本基金會ê成立酒會，共同分享tsit份喜樂。

今á日應該先請台灣ê盲人ê父陳五福博士，mā是本基金會ê名譽董事長來勉勵咱，但伊去日本接受身体檢查而buē-sái來，ài我代伊向各位致意。本基金會第一pái發起人會議，承蒙陳五福博士親臨指導，hō͘咱真大ê鼓勵，本基金會tsiah ē-tàng如期順利成立，真該多謝伊ê精神領導。

視障音樂m̄是咱開創ê，tī台灣早就有啄木鳥樂團、西羅亞合唱團、喜樂四重唱kap烏門樂團等享譽國內外ê視障音樂團体。Koh-khah有二十七年前出生tī台灣，生落來就無眼球ê韓義明，被德國惠明盲人基金會派來台灣輔導台中惠明盲校ê韓牧師﹝CHRISTIAN HEINRICH﹞夫婦領養tńg去，tī德國ê大環境造就下，韓義明已成做管風琴、小提琴kap鋼琴ê音樂家，二年前頭pái回台tī國家音樂廳演出，今年五月中，本基金會將邀請伊來台kap國內視障音樂家同齊巡回演出。Tsiah-ê lóng是視障音樂基金會成立ê催生劑，本基金會只是將in ê“視障音樂”理念整合起來，koh-khah希望ē-tàng tī各位熱心人士ê支持kap贊助之下，將“視障音樂”ê理念發揚光大，造福koh-khah tsē ê視障朋友。

我個人從事盲人事工七年來，深深体會到，盲人ê障礙m̄是看bē-tio̍h，卻是社會大眾對in ê不了解而產生ê歧視心態。我接觸tio̍h ê真tsē盲朋友kā我講，伊ê失明m̄是殘障，只是比較無方便而已。所以遇tio̍h盲朋友時，用你ê手臂hō͘伊扶tio̍h而引tshuā到伊beh去ê所在，mài牽tio̍h伊行，因為伊家己有腳ē-tàng行。Kā失明人ê無方便變成方便，是咱明眼人ê責任。視障音樂基金會就是beh tī台灣為視障朋友，開創一個教育、就業kap生活機會平等ê大環境。

有一種比肉体殘障koh-khah悲慘ê心靈殘障，台灣工商發達了後，社會風氣敗壞，心靈殘障koh-khah嚴重，只有愛心ê實踐，tsiah ē-tàng化解心靈ê障礙。靜宜大學李家同校長最近拜訪印度德蕾莎修女後，寫落來一篇大作「hō͘高牆倒下pah」，iáu有台灣目前siōng暢銷ê冊，林清玄名作家ê「phah開心內ê門窗」，lóng是tī強調以愛化解礙ê實踐。視障音樂基金會mā是beh透過音樂，來實踐以愛化解礙ê社會運動，願大家共襄盛舉，hō͘咱ē-tàng做得koh-khah真、koh-khah善、khah suí。

有關視障音樂基金會ê宗旨kap bueh辦ê業務，請「視障音樂」理念ê開創者張育豪執行長來做koh-khah詳細ê報告。最後敬祝各位身心健康，萬事如意。多謝。
1995.1.5